1. Twak moro ma nogol e chokruok maduong’ ma notim e higa mar 1935 nomulo nade geno ma rawera moro ne nigo?

NITIE dichwo moro gi chiege ma ne gin Jopuonjre Muma (kaka niluongo Joneno mag Jehova e kinde machon). Ne gin gi yawuoyi adek kod nyiri ariyo ma ne gikonyo mondo oti ne Jehova kendo luwo ranyisi mar Kristo. Achiel kuom yawuotgigo nobatis e higa mar 1926. Rawerano ne madhoga divai kendo chamo makate e Rapar higa ka higa mana kaka Jopuonjre Muma duto ne timoga e kindeno. Kata kamano, geno ma ne en-go e wi kinde ma biro nolokore bang’ winjo twak ma wiye ne wacho ni, “Oganda Mang’ongo.” Owadwa J. F. Rutherford e ma nogolo twagno e higa mar 1935 e chokruok maduong’ ma notim Washington, D.C., e piny Amerka. En ang’o ma Jopuonjre Muma nofwenyo e chokruogno?

2. En adiera makende ma ne Owadwa Rutherford olero e twak ma nogolo?

² E twagno, Owadwa Rutherford nolero tiend ‘oganda mang’ongo’ miwuoye e bug Fweny 7:9. Nyaka chop kindeno, ne iparo ni oganda mang’ongo ne en grup ma bende dhi e polo, en mana ni ne gionge gi yie motegno kaka Jokristo mowal. Owadwa Rutherford nolero ni oganda mang’ongo ok bi dhi e polo; kar mano, gin rombe mamoko * mag Kristo ma biro tony e “masira maduong’,” kae  to gibiro dak e piny kae nyaka chieng’. (Fwe. 7:14) Yesu nosingo ni: “An gi rombe mamoko ma ok gin mag kundni; gin bende nyaka akelgi iye, kendo giniwinj dwonda, mi ginibed kueth achiel e bwo jakwath achiel.” (Joh. 10:16) Rombe mamokogo gin Joneno mag Jehova ma nigi geno mar dak e Paradiso e piny kae nyaka chieng’. (Mat. 25:31-33, 46) Wane ane kaka yo manyien ma nolergo adierano noloko geno ma Joneno mag Jehova moko ne nigo, moriwo nyaka rawera ma ne jahigni apar gaborocha.​—Zab. 97:11; Nge. 4:18.

3-4. E chokruok maduong’ ma notim e higa mar 1935, en ang’o ma ji mang’eny nofwenyo e wi geno ma ne gin-go, to nikech ang’o?

³ Ka ne J. F. Rutherford golo twak, nonyiso jowinjo kama: “Ng’ato ang’ata mong’eyo ni en gi geno mar dak nyaka chieng’ e piny kae ochung’ malo.” Owadwa moro ma ne ni kanyo nowacho ni chiegni nus mar ji nochung’ malo. Kae to Owadwa Rutherford nowacho kama: “Neeuru! Mae e oganda mang’ongo!” Bang’ mano, joma ne ni kanyo nokok gi mor ka gipamo. Ji duto ma nochung’ nofwenyo ni Jehova ne pok oyierogi mondo gidhi e polo. Ne gifwenyo ni ne pok owalgi gi roho maler. E odiechieng’ ma luwo mar chokruogno, ji 840 nobatisi, to thothgi ne ni e kueth mar rombe mamoko.

⁴ Bang’ twagno, rawera ma nosewuoyecha kaachiel gi jomamoko mathoth noweyo chamo makate kendo madho divai e Rapar. Joneno mang’eny nobedo gi paro ma chal gi mar owadwa moro ma nowacho kama: “Rapar ma higa mar 1935 e ma namadhoe divai mogik kendo chamo makate. Koro nafwenyo ni Jehova pok nowala gi rohone maler kendo miya geno mar dhi e polo; kar mano, ne an gi geno mar dak e piny ka, kendo lose mondo obed paradiso.” (Rumi 8:16, 17; 2 Kor. 1:21, 22) Chakre kindeno, kwan mar joma ni e oganda mang’ongo osemedore ahinya, kendo gisebedo ka gitiyo kanyachiel gi Jokristo mowal ma pod ni e piny ka.

5. Jehova nenoga nade joma oweyo chamo makate kendo madho divai e Rapar?

⁵ Jehova noneno nade joma noweyo chamo makate kendo madho divai bang’ higa mar 1935? To nade ka ng’ato ne chamoga makate kendo madho divai e Rapar, kae to bang’e ofwenyo ni kare pok nowale gi roho? (1 Kor. 11:28) Nitie joma ne chamoga makate kendo madhoga divai nikech ne ok ging’eyo maler geno ma ne gin-go. Kata kamano, ka giyie gi kethogi kendo weyo chamo makate gi madho divai ma gidhi nyime tiyo ne Jehova, Jehova pod biro kwanogi e kueth mar rombege mamoko. Kata obedo ni koro ok gimadh divai kendo ok gicham makate, pod gidhi nyime biro e Rapar nikech gimor gi gima Jehova gi Yesu notimonegi.

6. En ang’o ma Yesu osechiko malaike mondo otim?

⁶ Kaka masira maduong’ medo sudo machiegni, dwarore ni wanon kendo gima Fweny sula mar 7 wacho e wi Jokristo mowal kod oganda mang’ongo mar rombe mamoko. Yesu pod chiko malaike mondo odhi nyime mako yembe  ang’wen ma kelo kethruok. Ok onego giwe mako yembego nyaka tiek keto alama ne Jokristo mowal, tiende ni, bang’ ka Jehova osepwodhogi ni gichung’ motegno. (Fwe. 7:1-4) Nikech chung’gi motegno, owete Kristogo biro yudo pok; gibiro bedo ruodhi kendo jodolo e polo. (Fwe. 20:6) Jehova, Yesu, kaachiel kod malaike rito gi siso neno ka Jokristo mowal 144,000 yudo pokgi e polo.

7. Ka luwore gi Fweny 7:9, 10, Johana noneno jomage e fweny, to en ang’o ma jogo ne timo? (Ne picha manie nyim gaset.)

⁷ Bang’ ka Johana nosewuoyo kuom ji 144,000 ma biro bedo ruodhi kod jodolo, noneno “oganda moro mang’ongo” ma notony koa e Har–Magedon. Grup mar ariyoni nigi ji mathoth ma onge gi kwan moro sie. (Som Fweny 7:9, 10.) “Girwakore gi kandho ma rochere,” ma nyiso ni gisesiko ma onge “mbala” moro amora ma wuok kuom piny marach mar Satanni, kendo gisesiko ka gimakore gi Nyasaye kod Kristo. (Jak. 1:27) Gikok gi dwol maduong’ ka giwacho ni Jehova kod Yesu ma en Nyarombo mar Nyasaye osewarogi. Giting’o othidhe e lwetegi, ma nyiso ni gimor ni Jehova oseketo Yesu mondo obed Ruoth.​—Pim gi Johana 12:12, 13.

8. En ang’o ma Fweny 7:11, 12 wacho ni ji duto ma ni e polo notimo bang’ neno oganda mang’ongo?

⁸ Som Fweny 7:11, 12. En ang’o ma joma ne ni e polo notimo ka ne gineno oganda mang’ongono? Johana noneno ka ji duto ma ne ni e polo pako Jehova kendo ne gimor sama ne gineno oganda mang’ongo. Gibiro mor neno ka fweny ma ne Johana onenono chopo sama oganda mang’ongo biro tony e masira maduong’.

9. Ka luwore gi Fweny 7:13-15, en ang’o ma oganda mang’ongo timo gie sani?

⁹ Som Fweny 7:13-15. Johana nowacho ni oganda mang’ongo ‘oselwoko kandhogi gi remb nyarombo mi gibedo ma rochere.’ Mano nyiso ni gin gi chuny maler e nyim Jehova, kendo osekwan-gi kaka joma kare ma Jehova morgo. (Isa. 1:18) Gisechiwore mobatisgi, kendo gisenyiso yie motegno e misango mar Yesu, kendo gin gi winjruok maber gi Jehova. (Joh. 3:36; 1 Pet. 3:21) Omiyo, giwinjore chung’ e nyim kom-loch mar Nyasaye kendo ‘tiyone odiechieng’ gotieno’ e laru mar hekalu ma ni e piny ka. Kata gie kindegi, gilando wach Pinyruoth gi kinda kendo loko ji obed jopuonjre ka giketo Pinyruoth obed mokwongo e ngimagi.​—Mat. 6:33; 24:14; 28:19, 20.

10. En ang’o ma oganda mang’ongo nigo gadier, kendo en singo mane ma gibiro neno ka chopo kare?

¹⁰ Oganda mang’ongo ma biro tony e masira maduong’ ni gadier ni Nyasaye biro ritogi nikech ‘Jal mobet e kom-loch biro yaro hemane kuomgi.’ Singo ma rombe mamoko osebedo ka rito gi siso biro chopo kare. Singono wacho ni, ‘Nyasaye noywe pi wengegi duto, mi tho ok nobedie kendo, kata kuyo, kata ywak, kata rem ok nobedie kendo.’​—Fwe. 21:3, 4.

11-12. (a) Ka luwore gi Fweny 7:16, 17, gin gueth mage mabeyo morito oganda mang’ongo? (b) En ang’o ma rombe mamoko nyalo timo sama gin e Rapar, to onego gitim kamano nikech ang’o?

¹¹ Som Fweny 7:16, 17. E kindegi, moko kuom jotich Jehova nigi kech nikech pek mag yuto, kaachiel gi lwenje ma koni gi koni. Moko bende osetue nikech yie margi. Kata kamano, oganda mang’ongo mor ng’eyo ni gibiro tony  kiketho piny marachni, kendo bang’ mano gibiro yudo chiemo mogundho​—mag ringruok kod mag chuny. “Liet mager” ok nohinygi, tiende ni, Jehova ok bi olo mirimbe kuomgi. Bang’ ka masira maduong’ oserumo, Yesu biro tayo oganda ma biro tonyno e “sokni mag pi ngima.” To mano kaka oganda mang’ongo nigi geno ma jaber! Kuom ji tara gi tara mosedak e pinyni, gin kendgi e ma gibiro donjo e piny manyien ma ok gibilo tho!​—Joh. 11:26.

¹² Rombe mamoko nigi geno ma jaber, kendo gigoyo erokamano ne Jehova gi Yesu nikech genono. Kata obedo ni ok gibi dhi e polo, pod gin gi nengo maduong’ ahinya e wang’ Jehova. Jokristo mowal kod rombe mamoko nigi thuolo mar pako Jehova kod Yesu. Achiel kuom yore ma gitimogo kamano en dhi e nyasi mar Chiemo Modhiambo mar Ruoth.

13-14. Ang’o momiyo Jokristo mowal kaachiel gi rombe mamoko onego odhi e Rapar?

¹³ E higni machiegnigi, kuom ji 1,000 ma biroga e Rapar, ng’ato achiel e ma chamoga makate kendo madho divai. Mano nyiso ni nitie kanyakla mang’eny ma onge gi joma chamo makate kendo madho divai, kendo ni ji mang’eny ma dhiga e Rapar nigi geno mar dak e piny. Kare, ang’o momiyo gibiroga e Rapar? Inyalo pimgi gi joma dhiga e arus. Joma dhiga e arus timoga kamano nikech gihero joma kendorego kendo de gigomb riwogi lwedo. Kamano bende, rombe mamoko dhiga e Rapar nikech gihero Kristo kod Jokristo mowal kendo giriwogi lwedo. Bende, rombe mamoko dhiga e Rapar mondo ginyisgo ni gigoyo erokamano ne misango mar rawar ma miyogi thuolo mar dak nyaka chieng’ e piny ka.

¹⁴ Gima chielo momiyo rombe mamoko dhiga e Rapar en nikech giluwo chik ma Yesu nomiyogi. Ka Yesu nochako nyasi makendeno gi jootene ma nomakore kode, nowachonegi kama: “Sikuru ka utimo ma mondo uparago.” (1 Kor. 11:23-26) Omiyo, gibiro dhi nyime timo Rapar, tek mana ni pod nitie Jokristo mowal e piny ka. To mano e momiyo rombe mamoko timoga kinda mondo gigwel ji e Rapar.

15. Ere kaka ng’ato ka ng’ato kuomwa nyalo pako Jehova gi Kristo e Rapar?

 ¹⁵ Sama wan e Rapar, wayudoga thuolo mar pako Jehova kaachiel gi Kristo kokalo kuom wendewa kod lamo. Wi twak mar Rapar ma higani wacho ni, “Nyis ni Igoyo Erokamano Kuom Gima Nyasaye gi Kristo Osetimoni!” Twagno biro konyowa ng’eyo kaka wanyalo medo goyo ne Jehova gi Kristo erokamano kuom gik ma gisetimonwa. Sama ibiro kadh makate gi divai, mano biro paro ne joma obiro e Rapar gima gigo ochung’ne, tiende ni, ringre Yesu kod rembe. Kendo mano biro paronwa kaka Jehova noyie mondo Wuode othonwa mondo wayud ngima. (Mat. 20:28) Ng’ato ang’ata mohero Jehova kod Wuode biro bedo gi siso mar biro e Rapar.

16. Gin yore mage ma Jokristo mowal kod rombe mamoko chalree?

¹⁶ Nitie yore moko ma Jokristo mowal kod rombe mamoko chalree. Kuom ranyisi, Jehova oherogi giduto. Bende, giduto gin gi nengo machal e nyim Jehova, to mano en nikech notiyo gi nengo achiel, tiende ni, ngima mar Wuode mondo ong’iewgo Jokristo mowal kaachiel gi rombe mamoko. Pogruok mantie e kind grube ariyogo en mana geno ma gin-go. Joma ni e grube ariyogo duto nyaka sik komakore gi Kristo kod Nyasaye. (Zab. 31:23) Par bende ni roho maler mar Nyasaye tiyo kuomwa waduto e yo ma chalre. Mano tiende ni Jehova nyalo miyo ng’ato ang’ata rohone maler, bed ni owale kata ok owale.

17. Gin gueth mage ma Jokristo mowal ogeno yudo kinde ma biro?

¹⁷ Jokristo mowal ok nyuolga ka gin gi geno mar dhi e polo. Nyasaye e ma pidhoga genono e chunygi. Kae to gichako paro matut e wi genono ka gilemo, kendo gibedo gi siso mar yudo pokgino e polo. Ok ging’eyo kaka dendgi mar roho mibiro migi biro chalo ka gin e polo. (Fil. 3:20, 21; 1 Joh. 3:2) Kata kamano, girito gi siso neno Jehova, Yesu, malaike, kod Jokristo mamoko mowal ma nosedhi e polo. Bende, girito ahinya kinde ma gibiro yudo pokgi e Pinyruodh polo.

18. Gin gueth mage ma rombe mamoko rito gi siso?

¹⁸ Rombe mamoko rito gi siso dak e piny ka nyaka chieng’, ma en gombo ma  nochuewago. (Ekl. 3:11) Girito kinde ma ginilokie piny duto obed paradiso. Girito kinde ma ng’ato ka ng’ato nogerie ode, puro puothe, kendo pidho nyithindo ma ngimagi ber. (Isa. 65:21-23) Gigombo wuotho kuonde mopogore opogore e gode, bunge, kod nembe ka gipuonjore e wi chuech mag Jehova. To moloyo duto, gimor ahinya sama giparo kaka winjruokgi gi Jehova biro siko ka medo bedo motegno pile ka pile.

19. En thuolo mane ma jaber ma wabedogago e Rapar, to en karang’o ma wabiro timoe Rapar higani?

¹⁹ Jehova osemiyo moro ka moro kuom jotichne geno ma jaber mar kinde ma biro. (Jer. 29:11) Rapar mar tho Yesu miyo ng’ato ka ng’ato kuomwa thuolo mar pako Jehova kod Kristo nikech gima gisetimonwa mondo wayud ngima ma onge giko​—ngima ma nyaka chieng’! Onge kiawa ni Rapar en nyasi makende ma miyoga Jokristo duto thuolo makende mar romo kanyachiel higa ka higa. Higani, ibiro tim Rapar chieng’ Ngeso, Mach 27, 2021. Thothwa biro timo nyasino kuonde ma ginie thuolo lamo Jehova ma onge gimoro amora ma chochogi. Nitie jomoko ma biro timo nyasino e bwo akwede. Moko to biro time ka gin e jela. Wang’eyo ni Jehova, Yesu, malaike, kaachiel gi Jokristo mowal mosedhi e polo, biro mor neno ka watimo nyasini. We wang’aduru e chunywa​—bed ni wan e kanyakla, grup, kata ng’ato achiel-achiel​—ni wabiro timo nyasini ma ok wabare!