1-2. (a) Gin kinde mage ma waparoega ahinya wedewa kata osiepewa mosetho? (b) En nyasi mane ma Yesu nochako e otieno mogik ka pok notho?

WAPAROGA wedewa mosetho kata bed ni ne githo higni adi mokalo. Thothne wajaparogiga sama tarik ma ne githoe ochopo.

² Higa ka higa, wajariwore gi ji tara gi tara e piny ngima e paro tho mar ng’at moro ma wahero ahinya, ma en Yesu Kristo. (1 Pet. 1:8) Wachokorega mondo wapare nikech nothonwa mondo owarwa e richo kod tho. (Mat. 20:28) Kuom adier, Yesu ne dwaro ni jolupne oparga thone. E otieno mogik kae to otho, nochako nyasi moro makende mar chiemo modhiambo, kae to nochiko jopuonjrene kama: “Sikuru ka utimo ma mondo uparago.”​—Luka 22:19.

3. Ang’o ma wadwaro nono e sulani?

³ Kuom ji duto ma biroga e Rapar mar tho Kristo, ji ma nok ahinya e ma nigi geno mar dhi e polo. Ji tara gi tara modong’ nigi geno mar dak e piny ka. E sulani, wadwaro nono gimomiyo grube ariyogo duto niga gi siso mar dhi e Rapar higa ka higa. Wabiro nono bende kaka dhi e Rapar konyowaga. We wachak gi nono gimomiyo Jokristo mowal dhiga e Rapar.

4. Ang’o momiyo Jokristo mowal chamoga makate kendo madho divai e Rapar?

⁴ Higa ka higa, Jokristo mowal ma dhiga e Rapar chamoga makate kendo madho divai e nyasino. Ang’o momiyo gitimoga kamano? Mondo wayud dwoko, wane ane gima notimore e otieno mogik ka ne Yesu ni e piny ka. Bang’ chamo Pasaka gi jootene, nochako nyasi mong’ere kaka Chiemo Modhiambo mar Ruoth. Nomiyo jootene 11 ma nomakore kode makate mondo gicham kod divai mondo gimadhi. E nyasino, Yesu nowuoyo kuom singruoge moko ariyo, ma gin singruok manyien kod singruok mar Pinyruoth. * (Luka 22:19, 20, 28-30) Singruogego noyawo ne jootego kod Jokristo mamoko manok thuolo mar bedo ruodhi kendo jodolo e polo. (Fwe. 5:10; 14:1) Jokristo mowal ma pod ni e piny kende e ma chamo makate kendo madho divai e Rapar.

5. Ang’o ma Jokristo mowal ong’eyo e wi geno ma gin-go?

⁵ Wach machielo momiyo Jokristo mowal mor ahinya dhiga e Rapar en ma: Nyasino miyogi thuolo mar paro matut kuom geno ma gin-go. Jehova osemiyogi geno makende ahinya mar dak e polo ka gin gi del ma ok nyal tho kendo ma ok tow, kendo gibiro tiyo kanyachiel gi Yesu Kristo kod Jokristo jowetegi mowal 144,000. To maduong’ moloyo, gin gi geno mar neno Jehova wang’ gi wang’! (1 Kor. 15:51-53; 1 Joh. 3:2) Jokristo mowal ong’eyo ni kata obedo ni gin gi thuolo makende mar dhi dak e polo, dwarore ni gisik ka gimakore gi Jehova nyaka e thogi e ka ginidonj e polo. (2 Tim. 4:7, 8) Paro kuom geno ma gin-gono miyogi mor ahinya. (Tito 2:13) To nade “rombe mamoko”? (Joh. 10:16) Gin to ang’o momiyo gidhiga e Rapar?

6. Ang’o momiyo rombe mamoko dhiga e Rapar higa ka higa?

⁶ Kata obedo ni rombe mamoko ok chamga makate kata madho divai e Rapar, pod gimor ahinya gi thuolo makende mar bedo e nyasino. Higa mar 1938 e ma nohang gwelie rombe mamoko e Rapar. Gaset mar The Watchtower ma Mach 1, 1938 nowacho kama: “En gima kare mondo [rombe mamoko] bende obed e Rapar kendo gine gik ma timore kanyo. . . . Rapar onego obed thuolo ma kelonegi mor gin bende.” Sama rombe mamoko odhi e Rapar, inyalo pimgi gi welo mogwel e arus, ma mor ahinya neno kaka arus chalo.

7. Ang’o momiyo rombe mamoko ritoga twag Rapar gi ilo?

⁷ Rombe mamoko bende paroga ahinya kuom geno ma gin-go. Giritoga twag Rapar gi ilo nikech ging’eyo ni twagno wuoyo ahinya-ahinya kuom gik ma Kristo gi Jokristo mowal 144,000 biro timo ne dhano momakore gi Nyasaye e kinde loch Kristo mar higni aluf achiel. Yesu kanyachiel gi joma biro locho kodego biro loko pinyni obed Paradiso kendo miyo ngima dhano obed makare chuth. Mano kaka en gima kelo mor sama rombe mamoko tara  gi tara mobiro e Rapar yudo thuolo mar paro weche ma Muma nokoro chon, ma biro chopo machiegnini, kaka manie Isaya 35:5, 6; 65:21-23; kod Fweny 21:3, 4! Sama giparo kaka gibiro dak kanyachiel gi wedegi kod osiepegi e piny manyien, geno ma gin-go medo bedo motegno kendo gimedo ng’ado e chunygi ni ok gibi weyo tiyo ne Jehova.​—Mat. 24:13; Gal. 6:9.

8. En ang’o machielo momiyo rombe mamoko dhiga e Rapar?

⁸ Ne ane gima chielo momiyo rombe mamoko dhiga e Rapar. Gineno Rapar kaka yo ma ginyisogo Jokristo mowal ni giherogi kendo giriwogi lwedo. Muma nosekoro chon ni Jokristo mowal kaachiel gi rombe mamoko ne dhi bedo osiepe ahinya. E yo mane? We wane ane ranyisi moko machuok.

9. Weche mokor e Zekaria 8:23 nyiso nade ni rombe mamoko ohero Jokristo mowal?

⁹ Som Zekaria 8:23. Wach mokor e ndikono nyiso kaka rombe mamoko ohero owetegi gi nyiminegi mowal. Weche motigo ni “Ja-Yahudi” kod “kodu” duto wuoyo kuom Jokristo mowal ma pod ni e piny ka. (Rumi 2:28, 29) “Ji apar moa e ogendni ma wacho dhok mopogore opogore” ochung’ ne rombe mamoko. Gimako “riak law” Jokristo mowal, tiende ni giriwore kodgi motegno e lamo madier. Omiyo, chieng’ Rapar, rombe mamoko nyisoga ayanga ni gimakore motegno gi Jokristo mowal kuom riwore kodgi e nyasino.

10. Ang’o ma Jehova osetimo mondo ochop weche ma nokor e Ezekiel 37:15-19, 24, 25?

¹⁰ Som Ezekiel 37:15-19, 24, 25. Jehova nochopo weche ma nokorgo kuom miyo Jokristo mowal kod rombe mamoko oti kanyachiel kendo makore motegno ahinya. Weche ma nokorgo wuoyo kuom ludhe moko ariyo. Jokristo ma nigi geno mar dhi e polo e ma ipimo gi luth “mar Juda” (ma e dhoot ma ruodhi mag Jo-Israel ne wuokiega), to jogo man gi geno mar dak e piny e ma ipimo gi “ludh Efraim.” * Jehova ne dhi riwo ludhe ariyogo mondo obed “luth achiel.” Mano nyiso ni giduto gitiyo ka gimakore kanyachiel e bwo ruoth achiel ma en Yesu Kristo. Higa ka higa, Jokristo mowal kaachiel gi rombe mamoko dhiga e Rapar, ok kaka grube ariyo mopogore, to kaka “kueth achiel e bwo jakwath achiel.”​—Joh. 10:16.

11. En yo mane maduong’ ma “rombe” miwuoye e Mathayo 25:31-36, 40 nyisogo ni gisiro owete Kristo?

¹¹ Som Mathayo 25:31-36, 40. “Rombe” miwuoye e ngeroni ochung’ ne joma kare e ndalo mag gikogi man gi geno mar dak e piny nyaka chieng’, tiende ni rombe mamoko. Gikonyo owete Kristo ma pod ni e piny ka, to ahinya-ahinya kuom sirogi e tich maduong’ ma gin-go mar yalo wach maber e piny ngima kendo loko ji obed jopuonjre Yesu.​—Mat. 24:14; 28:19, 20.

12-13. Gin yore mage momedore ma rombe mamoko nyisogo ni gisiro owete Kristo mowal?

¹² Higa ka higa kodong’ jumbe matin to ji dhi e Rapar, rombe mamoko nyisoga ni gisiro owete Kristo kuom timo kampen ma ratipo mar gwelo ji e nyasino. (Ne sanduk ma wiye wacho ni, “ Be Isechako  Ikori ne Kinde Rapar?”) Bende, gitemo matek mondo gine ni otim Rapar kuonde duto e piny ngima kata obedo ni kanyakla mang’eny onge gi ji ma chamo makate kata madho divai e nyasino. Rombe mamoko mor ahinya gi thuolo mar siro owete Kristo e yore kaka mago. Ging’eyo ni Yesu neno kony ma gikonyogo owetene mowalgo mana ka gima en owuon e ma gikonye.​—Mat. 25:37-40.

¹³ Gin weche mage mamoko ma miyo waduto wadhiga e Rapar bed ni wan gi geno mane?

14. Ere kaka Jehova gi Yesu osenyiso ni giherowa?

¹⁴Wagoyo erokamano kuom hera ma Jehova gi Yesu osenyisowa. Nitie yore mang’eny ma Jehova osenyisogo ni oherowa, kata kamano, nitie yo moro achiel makende ahinya. Jehova Nyasachwa nonyiso ni oherowa ahinya kuom oro Wuode ma miderma mondo osandre mothonwa. (Joh. 3:16) Yesu bende nonyisowa hera maduong’ ahinya kuom yie thonwa. (Joh. 15:13) Onge gima dwachul Jehova gi Yesu kuom hera ma gisenyisowa. Kata kamano, wanyalo nyiso ni wagoyonegi erokamano kuom dak e ngima ma morogi pile ka pile. (Kol. 3:15) Bende, wadhiga e Rapar mondo wapar hera ma giherowago kendo wanyisgi kaka waherogi.

15. Ang’o momiyo Jokristo mowal kod rombe mamoko mor ahinya gi mich mar rawar?

¹⁵Wamor ahinya gi mich mar rawar. (Mat. 20:28) Jokristo mowal mor gi rawar nikech mano e ma miyo geno ma gin-go biro chopo. Nikech yie ma gin-go kuom misango mar Yesu, Jehova koro kwanogi kaka joma kare kendo kaka nyithinde. (Rumi 5:1; 8:15-17, 23) Rombe mamoko bende mor ahinya gi rawar. Nikech yie ma gin-go kuom remb Yesu ma nochuer, koro Nyasaye nyalo kwanogi kaka joma kare, ginyalo tiyone, kendo gin gi geno mar tony e “masira maduong’.” (Fwe. 7:13-15) Achiel kuom yore ma Jokristo mowal kod rombe mamoko nyisogo ni gimor gi rawar en bedo e nyasi mar Rapar higa ka higa.

16. En wach mane machielo momiyo wadhiga e Rapar?

¹⁶ Gima chielo momiyo wadhiga e Rapar en ni dwaher timo kaka Yesu nochikowa. Bed ni wan gi geno mane, ng’ato ka ng’ato kuomwa kawo mapek ahinya chik ma Yesu nochiwo bang’ chako nyasi mar paro thone niya: “Sikuru ka utimo ma mondo uparago.”​—1 Kor. 11:23, 24.

17. Ere kaka Rapar miyo wamedo sudo machiegni gi Jehova?

¹⁷Wamedo sudo machiegni gi Jehova. (Jak. 4:8) Mana kaka waseneno, Rapar miyowaga thuolo mar paro matut e wi geno ma Jehova osemiyowa kod hera mosenyisowa. (Jer. 29:11; 1 Joh. 4:8-10) Sama waparo kuom weche ariyogo, wamedo hero Jehova kendo osiep manie kindwa kode medo bedo motegno.​—Rumi 8:38, 39.

18. Sama waparo matut kuom ranyisi mar Yesu, mano chwalowaga mondo watim ang’o?

¹⁸Wayudo jip ma konyowa dhi nyime luwo ranyisi mar Yesu. (1 Pet. 2:21) Kodong’ odiechienge matin to Rapar chopo, wajasomoga weche moko e Muma ma lero gik ma notimore e juma mogik ka ne Yesu  ni e piny ka, thone, kod chierne. Kae to twak migologa chieng’ Rapar paronwaga bende kaka Yesu oherowa. (Efe. 5:2; 1 Joh. 3:16) Sama wasomo kaka Yesu nochiwore nikech wan kendo waparo matut kuom wechego, mano chwalowaga mondo ‘wadhi nyime wuotho mana kaka nowuotho.’​—1 Joh. 2:6.

19. Ere kaka wanyalo siko e hera mar Jehova?

¹⁹Wadwaro ni wasik e hera mar Nyasaye. (Juda 20, 21) Wasiko e hera mar Nyasaye kuom timo duto ma dwarore mondo wawinje, wami nyinge obed maler, kendo wamor chunye. (Nge. 27:11; Mat. 6:9; 1 Joh. 5:3) Nyasi mar Rapar jiwowaga mondo wadag e ngima ma moro Jehova mondo pile ka pile wachal joma nyise ni, ‘Jehova, daher siko e herani nyaka chieng’!’

20. Ang’o momiyo wadhiga e Rapar?

²⁰ Bed ni wan gi geno mar dak e polo kata e piny, waduto nitie gik momiyo onego wadhi e Rapar. Higa ka higa, sama wadhi e Rapar, wayudoga thuolo mar paro tho mar ng’at mwahero ahinya, Yesu Kristo. To maduong’ moloyo, wayudo thuolo mar paro hera malich ahinya ma Jehova nonyisowa kuom chiwo Wuode mondo othonwa. Higani ibiro tim Rapar Tich Abich, April 15, 2022 godhiambo. Wahero Jehova gi Wuode. Omiyo, ka chieng’ paro tho Yesu ochopo, ok wabi yie mondo gimoro amora omonwa dhi e Rapar mar thone.