1-2. Ang’o momiyo wadhiga e Rapar higa ka higa?

 CHIEGNI higni 2,000 mokalo, Yesu nochiwonwa ngimane kaka misango mondo wayud ngima ma nyaka chieng’. E otieno mogik ka ne pok Yesu otho, nochiko jolupne mondo giparga thone kuom timo nyasi moro ka gitiyo gi divai kod makate.—1 Kor. 11:23-26.

² Waluwo chik ma ne Yesu omiyo jolupneno nikech wahero Yesu. (Joh. 14:15) Higa ka higa e kinde Rapar, wanyisoga ni wamor gi gima Yesu notimonwa kuom paro matut e wi thone. Bende, wamedoga kinda e tij lendo kendo gwelo ji mang’eny kaka nyalore mondo giriwre kodwa e nyasino, kendo ok wayie mondo gimoro amora omonwa dhi e Rapar.

3. Ang’o ma wabiro nono e sulani?

³ E sulani, wabiro nono yore moko adek ma jotich Jehova osetimoe kinda mondo gipar tho Yesu: (1) Timo Rapar e yo ma Yesu nowacho ni otimego, (2) gwelo jomamoko e Rapar, kod (3) dhi e Rapar kata obedo ni wakalo e pek moko.

4. Gin adiera mage mileronwaga e Rapar, to ang’o momiyo ok onego wanegi kaka gik mapile? (Luka 22:19, 20)

⁴ Higa ka higa e Rapar, wawinjoga twak mowuok e Muma ma chiwoga dwoko mag penjo mopogore opogore. Wapuonjorega  gimomiyo ne dwarore ni owar dhano kod kaka tho mar ng’ato achiel nyalo chulo richo mag ji mang’eny. Iparonwaga gima makate gi divai ochung’ne, kod joma onego ocham makate kendo omadh divai. (Som Luka 22:19, 20.) Bende, wayudoga thuolo mag paro matut e wi gueth ma joma nigi geno mar dak e piny biro yudo. (Isa. 35:5, 6; 65:17, 21-23) Mago gin adiera makende ma ok onego wane mana kaka gik mapile. Nitie ji tara gi tara ma ok ong’eyo adierago, kendo ok ging’eyo kaka tho mar Yesu nyalo konyogi. Bende, ok gitimga Rapar e yo ma Yesu nowacho ni onego otimego. Ang’o momiyo en kamano?

5. Bang’ tho mar joote, ji nochako timo Rapar mar tho Yesu e yo mane?

⁵ Mapiyo bang’ tho mar joote Yesu, Jokristo mag miriambo nochako donjo e kanyakla. (Mat. 13:24-27, 37-39) Ne gichako puonjo “weche ma gwenyo adiera mondo giywago jopuonjre oluwgi.” (Tich 20:29, 30) Achiel kuom puonj ‘ma gwenyo adierago’ en ni Yesu ne ok ‘ochiwo ringrene dichiel ma ok bi nwo kendo’ kaka Muma wacho, to ni misangone nyaka nwo kinde ka kinde. (Hib. 9:27, 28) Kindewagi nitie ji mang’eny moyie gi puonj mar miriambono. Gichokorega nyading’eny e kanisnigi, seche moko kata mana pile mondo gicham sakrament bang’ misa ka misa. b Dinde moko to paroga tho Yesu mana dichiel ka dichiel. Kata kamano, thoth joma lemo e dindego ok ong’eyo e yo malong’o gimomiyo Yesu nochiwo misangono. Jomoko nyalo penjore ni, ‘Be tho Yesu nyalo miyo owena richona adier?’ Ang’o momiyo gipenjorega penjono? Thothne en nikech joma nigi kiawa e wi ber mar misango Yesu osewuondogi. Ere kaka jolup Yesu madier osebedo ka konyo ji mondo ging’e adiera e wi wachno?

6. Chop higa mar 1872, en paro mane ma Jopuonjre Muma nosechope?

⁶ E giko higni mag 1800, grup moro mar Jopuonjre Muma ma nitayo gi Charles Taze Russell nochako nono Ndiko e yo matut. Ne gidwaro ng’eyo adiera e wi misango mar Yesu, kod kaka onego otim Rapar mar thone. Chop higa mar 1872, ne gisechopo e paro achiel ka gitiyo gi Muma, ni misango mar Yesu nyalo konyo oganda dhano duto. Ne ok giling’ gi adiera ma ne gifwenyogo. Kar mano, ne gilandogi ne ji kokalo kuom buge kod gasede. Mapiyo bang’ mano, ne gichako timo Rapar mar tho Yesu higa ka higa mana kaka Jokristo mokwongo ne timega.  

7. Ere kaka nonro ma Jopuonjre Muma notimo konyowa e kindegi?

⁷ Nonro ma Jopuonjre Mumago notimo pod konyowa nyaka sani. E yo mane? Jehova oseyawo wang’wa ma wang’eyo adiera e wi misango mar Yesu, kod kaka misangono nyalo konyowa. (1 Joh. 2:1, 2) Wasepuonjore bende ni joma winjo Jehova Nyasaye nigi geno ariyo mopogore. Moko kuomgi biro yudo ngima mochwere e polo ka gin gi del ma ok nyal tho, to moko tara gi tara biro yudo ngima mochwere e piny kae. Wamedo sudo machiegni gi Jehova sama wapuonjore kaka oherowa kod kaka misango mar Yesu konyowa ng’ato ka ng’ato. (1 Pet. 3:18; 1 Joh. 4:9) Omiyo, mana kaka owetewa gi  nyiminewa ma kinde mokalo, wagweloga ji mondo gibi e Rapar ma watimoga ka waluwo ranyisi mar Yesu.

8. Ang’o ma jotich Jehova osebedo ka timo mondo gigwel ji e Rapar? (Ne picha.)

⁸ Kuom higni mang’eny, jotich Jehova osebedo ka gweloga ji e Rapar. E higa mar 1881, ne ogwel owete gi nyimine ma ne nie piny Amerka mondo gichokre ne Rapar e dala owadwa moro kama iluongo ni Allegheny, Pennsylvania. Bang’e, kanyakla ka kanyakla nochako timo Rapar. E dwe mar Mach 1940, nojiw jolendo mondo gigwel joma odak e alworagi e Rapar. E higa mar 1960, Bethel nogoyo kalatese mag gwelo ji e Rapar kendo kowogi ne kanyakla mopogore opogore, kendo mano e kinde ma ne gihango timoe kamano. Chakre kindeno nyaka sani, osechiw kalatese bilionde modhuro mag gwelo ji e Rapar. Ang’o momiyo watimoga kinda kendo tiyo gi thuolo mang’eny e gwelo jomamoko e Rapar?

9-10. Kinda ma watimoga e gwelo ji e Rapar konyo jomage? (Johana 3:16)

⁹ Achiel kuom gik momiyo wagweloga ji e Rapar en ni mondo joma e ka ohango biro e Rapar opuonjre adiera e wi gima Jehova gi Yesu osetimonwa. (Som Johana 3:16.) Wageno ni gibiro neno kendo winjo kaka Rapar nyalo jiwogi mondo gipuonjre weche momedore e wi Jehova kendo gibed jotichne. Kata kamano, nitie jomamoko ma bende Rapar konyoga.

 ¹⁰ Wagweloga bende joma chon ne tiyo ne Jehova to tinde ok gitim kamano. Rapar miyogi thuolo mar ng’eyo ni Jehova pod oherogi ahinya. Thothgi yiega biro sama wagwelogi kendo wamorga ahinya nenogi. Bedo kodgi kanyachiel e Rapar, paronegiga kinde ma ne gimor ahinya ka ne gitiyo ne Jehova. Ne ane ranyisi mar Monica. c Chon ne en jalendo to nodok chien moweyo tij lendo. E kinde korona, nokonye mi ochako lendo kendo. Bang’ Rapar ma higa 2021, nowacho kama: “Aneno Rapar ma higani kaka Rapar makende ahinya. Bang’ higni 20 te, wang’ni e ka ayudo thuolo kendo mar lendo ne ji kendo gwelogi e Rapar! Naketo chunya duto e gwelo ji nikech amor gi gima Jehova gi Yesu osetimona.” (Zab. 103:1-4) Bed ni joma wagwelo e Rapar obiro kata ooyo, wan wabiro dhi nyime gwelo ji nikech wang’eyo ni Jehova mor gi kinda ma watimo.

11. Ere kaka Jehova osebedo ka guedho kinda ma watimo e gwelo ji e Rapar? (Hagai 2:7)

¹¹ Jehova osebedo ka guedho kinda ma watimo e gwelo ji e Rapar. E higa mar 2021, kata obedo ni tuo mar korona nomono ji timo gik mang’eny, joma nobiro e Rapar ne gin ji 21,367,603, ma en kwan mamalo mogik nyaka ne wachak timo Rapar. Mano ohingo kwan mar Joneno mag Jehova chiegni nyadiriyo gi nus. Adiera en ni Jehova ok odich mana gi kwan mar joma biro e Rapar, to odich gi ng’ato ka ng’ato ma biroga. (Luka 15:7; 1 Tim. 2:3, 4) Kata kamano, wan gadier ni kampen ma watimoga mar gwelo ji e Rapar e yo ma Jehova tiyogo e ywayo joma chunygi ni kare mondo gibi e adiera.—Som Hagai 2:7.

12. Gin weche kaka mage ma nyalo miyo dhi e Rapar ok bednwa mayot? (Ne picha.)

¹² Yesu nowacho ni e ndalo mag giko, ne wadhi bedo gi pek mopogore opogore, kuom ranyisi akwede ma wuok kuom joodwa, sand, lwenje, tuoche ma landore, kod mamoko. (Mat. 10:36; Mar. 13:9; Luka 21:10, 11) Seche moko pek ma kamago miyoga ok yotnwa dhi e Rapar mar tho Yesu. Ang’o ma owetewa gi nyiminewa osebedo ka timo mondo gilo pekgo, to ere kaka Jehova osekonyogi?

13. Ere kaka Jehova noguedho kinda ma Artem notimo kod chir ma nonyiso e timo Rapar ka en e jela?

¹³ Tuech e jela. Jokristo wetewa manie jela nikech yiegi timoga duto ma ginyalo mondo gipar tho Yesu. Ne ane ranyisi mar Artem. E kinde Rapar ma higa 2020, notueye e sel ma lachne romo mita 17 koni gi koni, kendo ma noting’o ji abich. Kata obedo ni ne en e sel, notemo matek moyudo gik ma nonyalo tiyogo kaka makate gi divai kendo nochano golo twag Rapar mondo ojiwe. Kata kamano, joma ne en-go e sel ne madhoga ndawa ahinya kendo ne gitiyo gi weche mochido. Artem notimo ang’o? Nokwayogi ka be ne ginyalo weyo madho ndawa kod tiyo gi weche mochido mana kuom sa achiel kende. Ne giyie timo kamano, kendo wachno nokawo Artem gi wuoro ahinya. Owacho kama: “Ne aleronegi weche momedore e wi Rapar.” Kata obedo ni ne giwacho ni ok ne gidhi bedo e Rapar, bang’ nene kotimo Rapar kendo winjo weche ma nowacho, ne gipenje penjo mang’eny e wi nyasino.

14. Gin kinda mage ma owete notimo mondo gitim Rapar e kinde tuo mar korona?

 ¹⁴ Tuo mar korona. Ka ne tuo mar korona omuoch, Joneno mag Jehova ne ok nyal timo Rapar aching’. Kata kamano, mano ne ok omonogi timo nyasino. d Kanyakla ma nigi nyalo mar donjo e intanet notimo Rapar e yor vidio. To nade owete gi nyimine tara gi tara man kuonde ma intanet ok yudre e yo mayot? E pinje moko ne otim chenro mondo otug twak mar Rapar e stesende mag TV kod redio. Bende, ofisewa moko notimo chenro mondo omak twegego e dhok mokalo 500, mondo okony owete manie gwenge ma intanet ongee, to TV gi redio bende nok. Owete nokowo twege momakgo ne owete gi nyimine duto ma ne dwarogi.

15. Ranyisi mar japuonjre Muma miluongo ni Sue opuonji ang’o?

¹⁵ Akwede ma wuok kuom joot. Pek maduong’ ma jomoko romogago en sama joodgi tamogi dhi e Rapar. Ne ane ranyisi  mar japuonjre Muma moro ma nyinge Sue. E higa mar 2021, kodong’ odiechieng’ achiel to itimo Rapar, Sue nonyiso japuonjne mar Muma ni ne ok odhi bedo e Rapar nikech akwede ma noromogo e odgi. Japuonjne nosomone Luka 22:44. Kae to nolerone ni sama wakalo e pek moro, onego waluw ranyisi mar Yesu kuom nyiso Jehova gima chandowa kendo geno kuome. Kinyne, Sue noiko makate gi divai kendo noneno program makende mar Lamo Mokinyi e jw.org. Ka nochopo odhiambo, nodhi e rumne kar kende motudo program mar Rapar e simbe. Bang’e Sue nondiko ne japuonjne mar Muma kama: “Nijiwa ahinya nyoro. Natimo duto ma anyalo mondo abed e Rapar. Kae to naweyo weche e lwet Jehova. An gi mor mokalo apima!” Be iparo ni in be Jehova nyalo konyi kiyudori e chal ma kamano?

16. Ang’o momiyo wanyalo bedo gadier chuth ni Jehova biro guedho kinda ma watimo mar dhi e Rapar? (Jo-Rumi 8:31, 32)

¹⁶ Jehova mor ahinya gi kinda ma watimoga mondo watim Rapar mar tho Wuode. Wanyalo bedo gadier chuth ni obiro guedhowa nikech mano. (Som Jo-Rumi 8:31, 32.) Omiyo, wang’aduru e chunywa ni kata ang’o ma timre, ok wabi bare ne Rapar ma higani, kendo wabiro timo duto ma wanyalo mondo wagwel ji mang’eny kaka nyalore mondo gibi giriwre kodwa e paro tho mar Yesu.