1. Ang’o momiyo odiechieng’ mar paro tho Yesu en odiechieng’ makende ahinya e higa? (Luka 22:19, 20)

 JOTICH Jehova nenoga odiechieng paro tho Yesu kaka odiechieng’ makende ahinya e higa. Ma e nyasi kende ma ne Yesu ochiko jolupne ni otim. (Som Luka 22:19, 20.) Nitie gik momiyo wamorga ahinya dhi e nyasi mar Rapar. We wanon ane moko kuomgi.

2. Ang’o momiyo wageno ahinya nyasi mar Rapar?

² Odiechieng Rapar miyowaga thuolo mar paro matut e wi gimomiyo misango ma ne Yesu ochiwo en gima duong’ ahinya kod gueth ma misangono biro kelonwa. Oparonwa yore ma wanyalo nyisogo ni wamor gi misango ma Yesu nochiwo. (2 Kor. 5:14, 15) Bende, omiyowa thuolo mar ‘jiwore’ gi owetewa kod nyiminewa. (Rumi 1:12) Higa ka higa, jolendo modok chien biroga e Rapar. Moko kuomgi duogoga ir Jehova nikech norwakgi maber ka ne gibiro e Rapar. Bende, thoth ji manyien mobiro e nyasino chakoga puonjore Muma nikech gik ma giwinjo kod ma gineno e chokruogno. Mano e momiyo wageno ahinya nyasi mar Rapar.

3. Ere kaka Rapar riwoga owete gi nyimine e piny ngima? (Ne picha bende.)

³ Par ane bende kaka Rapar riwoga owete gi nyimine e piny ngima kanyachiel. E odiechieng Rapar, Joneno mag Jehova chokorega e piny ngima mondo gitim nyasino bang’ ka chieng’ osepodho. Waduto wawinjoga twak ma jiwo gimomiyo rawar en mich maduong’ ahinya. Waweroga wende moko ariyo mag pako Jehova, wakadhoga divai gi makate, kendo wagoyoga “amin” gi chunywa duto ne lamo ang’wen  migologa e chokruogno. Kuom seche 24 kama, kanyakla duto manie piny ngima luwoga chenro achiel achielno. Temie paro mor ma Jehova gi Yesu winjoga ka wariwore waduto e piny mangima mondo wamigi duong’ e yo ma kamano!

4. Ang’o ma wabiro nono e sulani?

⁴ E sulani, wabiro nono penjo ma luwogi: Ere kaka wanyalo iko chunywa ne Rapar? Ere kaka wanyalo konyo jomamoko mondo oyud ber e Rapar? To ere kaka wanyalo konyo jolendo modok chien? Dwoko mag penjogo biro konyowa ikore ne nyasi makendeno.

ERE KAKA WANYALO IKO CHUNYWA NE RAPAR?

5. (a) Ang’o momiyo onego wapar matut e wi nengo mar rawar? (Zaburi 49:7, 8) (b) Ang’o mipuonjori e vidio mar Ang’o Momiyo Yesu Notho?

⁵ Achiel kuom yore madongo ma wanyalo ikogo chunywa ne Rapar en paro matut kuom ber mar misango ma ne Yesu ochiwo. Wan wawegi ne ok wanyal wuok e tuech mar richo kod tho. (Som Zaburi 49:7, 8; ne vidio ma wiye wacho ni Ang’o Momiyo Yesu Notho?) a Kuom mano, Jehova nochano mondo Yesu ochiw ngimane kaka misango mondo owarwa. To mano kaka nochulo nengo maduong’ ahinya! (Rumi 6:23) Kaka wamedo paro matut e wi gik ma Jehova kod Yesu osetimonwa, e kaka wabiro medo bedo mamor gi mich mar rawar. Wadwaro nono moko kuom gik ma Jehova gi Yesu noyie timo mondo giwarwa. Kata kamano, we wakwong wane ane ni misango ma Yesu nochiwo noriwo ang’o.

6. Rapar oriwo ang’o?

⁶ Rawar en nengo michulo mondo owargo gimoro. Adam ma ne en dhano mokwongo ne en ng’at makare chuth ka nochueye. Ka notimo richo, nolalo geno mar dak nyaka chieng’, ne en kod nyithinde duto. Yesu nochiwo ngimane makare chuth kaka misango mondo owargo gima ne Adam olalo. Ka ne Yesu nie piny kae, “ne ok otimo richo moro amora, kendo onge wuondruok moro amora ma ne oyud e dhoge.” (1 Pet. 2:22) Sama ne otho, ngimane ne romre gi ngima Adam ka ne Adam pok otimo richo.—1 Kor. 15:45; 1 Tim. 2:6.

7. Moko kuom tembe ma Yesu noromogo ka ne en e piny ka gin mage?

⁷ Yesu noluwo mana kaka Wuon-gi manie polo ne chike kata obedo ni noromo gi tembe mang’eny. Ka ne en nyathi, nobolore ne jonyuolne ma ne gin joricho kata obedo ni en to noonge richo moro amora. (Luka 2:51) Ka ne en rawera, ne dwarore ni okwed gimoro amora ma ne nyalo miyo oketh chike Jehova. To ka nobedo ng’at maduong’, ne nyaka ochung’ motegno sama Satan Jachien ne teme, moriwo nyaka kinde ma ne Satan onyise achiel kachiel ni owe makore gi Nyasaye. (Mat. 4:1-11) Satan ne dwaro ni Yesu otim richo mondo kik ochul rawar.

8. Gin tembe mage mamoko ma Yesu nonanoe ka ne en e piny ka?

⁸ Ka ne Yesu lendo e piny ka, nonano e bwo tembe mamoko. Jowasike nosande kendo ne gitemo nege. (Luka 4:28, 29; 13:31) Bende, ne nyaka onan gi nyawo mag jolupne. (Mar. 9:33, 34) Ka niyale, nosande kendo nojare. Kae to nonege e yo malit ahinya kendo ma ne kelo wich-kuot. (Hib. 12:1-3) E giko ngimane, ne nyaka onan e chandruoge ma nokaloe, ma Jehova ok orite. b—Mat. 27:46.

9. Misango ma Yesu nochiwo miyo iwinjo nade? (1 Petro 1:8)

 ⁹ Nenore maler ni Yesu nokalo e sand mager mondo ochiw ngimane kaka misango. Sama waparo matut kaka Yesu noyie chiwo ngimane nikech wan, donge mano miyo wamedo here ahinya?—Som 1 Petro 1:8.

10. Jehova nochulo nengo ma romo nade mondo ochiw rawar?

¹⁰ To nade Jehova? En nengo mane ma nochulo mondo Yesu ochiw ngimane kaka misango? Jehova kod Yesu nigi winjruok machiegni ahinya ma wuoro kod wuode nyalo bedogo. (Nge. 8:30) Temie paro kaka Jehova ne winjo ka noneno Yesu ka nano e bwo tembe ma noromogo e piny ka. Onge kiawa ni Jehova nowinjo malit ahinya ka noneno kaka nisando wuode, nikwede, kendo niteme.

11. Chiw ane ranyisi ma nyiso kaka Jehova nowinjo ka ne oneg Yesu.

¹¹ Janyuol moro amora ma nyathine osegatho ong’eyo lit kod kuyo ma tho keloga. Wan gi yie motegno ni ibiro chier jomotho, kata kamano, mano ok golnwa lit ma wawinjoga sama ng’at ma wahero otho. Nyaka bed ni Jehova nowinjo malit ahinya ka noneno kaka wuode mohero nosandore kendo notho e higa mar 33. c—Mat. 3:17.

12. Ere kaka wanyalo iko chunywa ka pok odiechieng Rapar ochopo?

¹² Chakre sani nyaka odiechieng Rapar, donge inyalo nono weche moko e wi rawar e puonjruokni iwuon kata e lamo mar joot? Inyalo timo mano kitiyo gi Buk Makonyo Joneno mag Jehova e Timo Nonro kata buge mamoko. d Bende, inyalo luwori gi chenro mar somo Muma e kinde Rapar ma yudore e bugwa mar Ngimawa kod Tijwa Kaka Jokristo—Chenro mar Chokruok. To e odiechieng Rapar, kik wiyi wil gi neno program makende mar Lamo Mokinyi. Ka waiko chunywa ne odiechieng Rapar, mano biro miyo wakony jomamoko bende oyud ber ka gibiro e Rapar.—Ezra 7:10.

KONY JOMAMOKO MONDO GIYUD BER E RAPAR

13. En ang’o mokwongo ma wanyalo timo mondo wakony jomamoko yudo ber e Rapar?

¹³ Ere kaka wanyalo konyo jomamoko mondo giyud ber e Rapar? Gima okwongo ma  wanyalo timo en gwelogi mondo gibi e Rapar. Wanyalo gwelo ji sama walendo kendo wanyalo loso list mar joma wang’eyo ma wanyalo gwelo. Jogo nyalo bedo wedewa, joma watiyogo, joma wasomogo, kata jomamoko. Ka po ni waonge gi kalatese mag gwelo ji moromo, wanyalo gwelogi e yor dijitol. Nyalo kawowa gi wuoro neno kwan mar joma nyalo biro e Rapar nikech kinda ma watimo.—Ekl. 11:6.

14. Chiw ane ranyisi ma nyiso ber mathoth ma wayudoga sama wagwelo ng’at ma wang’eyo e Rapar.

¹⁴ Gwelo ng’at ming’eyo nyalo kelo ber mathoth. Chieng’ moro, nyaminwa moro ma jaode ok en Janeno nobwok ahinya ka jaodeno nonyise ni nochano dhi kode e Rapar. Ang’o momiyo wachno nobwoge? En nikech kinde mang’eny nosegagwele e Rapar to pok nobiroga. Ang’o momiyo wang’ni to noyie dhi? Jaod nyaminwano nowacho kama: “Nitie ng’ama nomiya kalatas migwelogo ji.” Nolero ni jaduong’-kanyakla moro ma nong’iyogago e ma nogwele. Dichwono nodhi e Rapar ma notim higano kod mamoko ma noluwo.

15. Gin ang’o monego waket e paro sama wagwelo ji e Rapar?

¹⁵ Ket e paro ni joma wagweloga e Rapar niga gi penjo moko, to ahinya-ahinya ka gin joma ne pok obiroga e chokruogewa. Ber paro motelo penjo ma ginyalo bedogo kod dwoko ma wanyalo miyogi. (Kol. 4:6) Kuom ranyisi, jomoko nyalo penjore kama: ‘Ang’o ma biro timore e nyasino?’ ‘Obiro kawo seche adi?’ ‘Be nitie yo ma ji onego orwakrego?’ ‘Be nitie pesa moro monego ochul ka pok ng’ato odonjo?’ ‘Be ibiro chok sadaka?’ Sama wagwelo ng’ato mondo obi e Rapar, wanyalo penje ni, “Be in gi penjo moro amora?” kae to wanyalo dwoko penjo monyalo bedogo. Bende, wanyalo tiyo gi vidio mag Par Tho Yesu kod Ang’o ma Timorega e Kingdom Hall? mondo wakonye neno kaka watimoga chokruogewa. Sula mar 28 e bug Inyalo Dak gi Mor Nyaka Chieng’! nigi paro mabeyo ma wanyalo tiyogo.

16. Gin penjo mage mamoko ma joma obiro e Rapar nyalo bedogo?

 ¹⁶ Bang’ biro e Rapar, joma nyien nyalo bedo gi penjo moko momedore. Ginyalo penjore gimomiyo onge joma nochamo makate kendo madho divai kata gimomiyo ji manok kende e ma notimo kamano. Bende, ginyalo dwaro ng’eyo ni watimoga nyasi mar Rapar nyadidi e higa. E wi mano, ginyalo dwaro ng’eyo ka be chokruoge duto mag Joneno mag Jehova itimoga mana kamano. Kata obedo ni thoth wechego ileroga e twak mar Rapar, nyalo dwarore ni waler ne joma wagwelo weche momedore. Sula ma wiye wacho ni, “Ang’o Momiyo Joneno mag Jehova Timoga Sap Ruoth e Yo Mopogore gi Dinde Mamoko?” ma yudore e jw.org nyalo konyowa dwoko moko kuom penjo ma joma nyien nyalo bedogo. Wadwaro ni watim duto ma wanyalo mondo wakony joma ‘chunygi ni kare’ oyud ber sama gibiro e Rapar. (Tich 13:48) Dwaher ni wakonygi ka pok Rapar ochopo, chieng’ Rapar, kod bang’e.

KONY JOLENDO MODOK CHIEN

17. Ere kaka jodongo nyalo konyo jolendo modok chien? (Ezekiel 34:12, 16)

¹⁷ E kinde Rapar, ere kaka jodong-kanyakla nyalo konyo jolendo modok chien? Ginyalo nyiso ni gidewogi. (Som Ezekiel 34:12, 16.) Ka pok Rapar ochopo, jodongo nyalo temo mondo gilim joma kamago ding’eny kaka nyalore. Ginyalo nyisogi ni giherogi kendo gigombo konyogi e yo moro amora. Ginyalo gwelogi mondo gibi e Rapar. Ka po ni gibiro e Rapar, jodongo nyalo rwakogi maber. Bang’ Rapar, ginyalo dhi nyime limogi kata goyonegi simu kendo konyogi e yor chuny mondo giduog ir Jehova.—1 Pet. 2:25.

18. Ere kaka waduto wanyalo konyo joma odok chien? (Jo-Rumi 12:10)

¹⁸ Ji duto manie kanyakla nyalo konyo jolendo modok chien mobiro e Rapar. E yo mane? Kuom nyisogi hera, ng’wono, kendo miyogi luor. (Som Jo-Rumi 12:10.) Par ni rombe Nyasaye moherogo samoro osegabedo maluor biro e chokruok. Samoro luoro  makogiga ka giparo kaka idhi rwakgi kata weche ma idhi wachnegi. e Omiyo, tang’ kik ipenjgi penjo ma nyalo kuodo wigi kata wacho weche ma nyalo nyoso chunygi. (1 The. 5:11) Owete gi nyiminego gin Jokristo wetewa. Wagombo ahinya tiyo ne Jehova kanyachiel kodgi kendo.—Zab. 119:176; Tich 20:35.

19. Gin ber mage ma wayudo ka waparo tho Yesu?

¹⁹ Wamor ahinya ni Yesu nochikowa ni wapar thone higa ka higa, kendo wang’eyo gimomiyo timo kamano en gima duong’ ahinya. Sama wadhi e Rapar, wayudo ber mathoth kendo wakonyo jomamoko mondo gin bende giyud ber. (Isa. 48:17, 18) Hera ma waherogo Jehova kod Yesu medo bedo motegno. Bende, wanyiso ni wamor gi gik moko duto ma gisetimonwa. Dhi e Rapar tego winjruok manie kindwa gi Jokristo wetewa. Bende, wanyalo konyo jomamoko mondo gin bende giyud gueth mag mich mar rawar. Mad watim duto ma wanyalo mondo waikre ne Rapar, ma en odiechieng’ makende ahinya e higa!