E DHOK ma nokwong ndikgo Muma, wach molok ni “gari” e Loko mar Piny Manyien itiyogago kiwuoyo kuom kit geche mopogore opogore. (Tich 8:28, 29, 38) Nenore ni Ja-Ethiopia ma ne Filipo odhi ireno ne nie gari maduong’ moloyo geche ma ne itiyogo e lweny kata e tuke mag piem. Ne ane moko kuom gik momiyo wawacho kamano.

Ja-Ethiopiano ne en jatelo maduong’ kendo nodhi e wuoth ma rabora. Ne en gi “teko e bwo Kandes ruoth ma dhako mar Jo-Ethiopia, kendo en e ma ne ochung’ ne mwandu duto mag ruodhno.” (Tich 8:27) Ethiopia machon noriwo Sudan ma sani kaachiel gi bath piny Misri (Egypt) ma sani. Kata obedo ni samoro noidho geche mopogore opogore e wuodhno duto, nyaka bed ni noting’o osike bende. Moko kuom geche ma niting’ogo jowuoth e kinde Jokristo mokwongo ne nigi tiende ang’wen. Buk moro ma lero weche motigo e bug Tich Joote wacho kama: “Geche ma kamago ne nyalo miyo ng’ato oting’ osike mang’eny, wuoth obedne mayot, kendo ne ginyalo miyo ng’ato odhi e wuoth mabor.”—Acts—An Exegetical Commentary.

Sama Filipo nodhi ir Ja-Ethiopiano, noyude kosomo. Muma wacho kama: “Filipo noringo nyaka e bath garino mi nowinjo ka Ja-Ethiopiano somo bug janabi Isaya gi dwol maduong’.” (Tich 8:30) Geche ma ne ting’o jowuoth ne ringoga mos. Mano e momiyo Ja-Ethiopiano ne nyalo somo ka gari ringo. Bende, mano e momiyo Filipo ne nyalo ringo gi tiende ma ojuk garino.

Ja-Ethiopiano “nokwayo Filipo mondo oidh obed kode e garino.” (Tich 8:31) E geche mag piem, ji ne chung’ga. Geche jowuoth to ne nigi thuolo moromo ma ji ne nyalo betie, e momiyo Ja-Ethiopiano nonyiso Filipo ni obed kode e garino.

Weche manie bug Tich Joote sula mar 8 kaachiel gi weche mamoko mag histori, osemiyo machiegnini bugewa tinde nyiso Ja-Ethiopiano koidho gari maduong’ moloyo geche lweny kata geche mag piem.