1. Ang’o ma biroga e pachi sama iwuoyo e wi Jehova?

 BE ISEGATEMO paro ni Jehova en Nyasaye ma chalo nade? Sama iwuoyo kode e lamo, ang’o ma biroga e pachi? Kata obedo ni ok wanyal neno Nyasaye, Muma wuoyo kuome e yore mopogore opogore. Kuom ranyisi, Muma luongo Jehova ni “wang’ chieng’,” “okumba,” kod “mach mager.” (Zab. 84:11; Hib. 12:29) E fweny moro ma Ezekiel noneno, nopimo Jehova gi kidi mar safir, chuma ma rieny, kod lihudu ma jaber. (Eze. 1:26-28) Weche ma samoro itiyogago kiwuoyo kuom Jehova nyalo miyo wawinj ka waluore, kata wanere kaka joma nono e nyime.

2. Ang’o ma nyalo mono jomoko sudo machiegni gi Jehova?

² Nikech ok wanyal neno Jehova, nyalo bedonwa matek yie ni oherowa. Nitie joma paro ni Jehova ok nyal herogi nikech ngima ma ne giponie. Samoro wuonegi ne ok oherogi. Kata kamano, Jehova to oherowa kendo ong’eyo kaka wawinjo e chunywa. Onyisowaga kite mabeyo mopogore opogore e Muma.

3. Ang’o momiyo dwarore ni wanon hera ma Jehova oherowago?

³ Kido maber mogik ma Jehova nigo en hera. (1 Joh. 4:8) Gimoro amora ma Jehova timo otudore gi herane. Hera mar Jehova tut e okang’ ma miyo ohero nyaka joma ok ohere. (Mat. 5:44, 45) E sulani, wabiro puonjore e wi Jehova kod hera ma oherowago. Kaka wamedo puonjore e wi Jehova Nyasachwa, e kaka wabiro medo here.

 JEHOVA OHEROWA AHINYA

4. Hera ma Jehova oherigo miyo iwinjo nade? (Ne picha bende.)

⁴ “Jehova ogundho gi hera matut.” (Jak. 5:11) E Muma, ipime gi miyo mohero nyathine. (Isa. 66:12, 13) Temie paro miyo ma timo duto monyalo mondo orit nyathine. Opire e chonge kendo owuoyo kode gi dwol mamuol. Sama nyathine ywak kata nigi rem moro, otemo matek mondo ohoye. Wan bende, sama gimoro chandowa, wanyalo bedo gadier ni Jehova biro hoyowa nikech oherowa. Jandik-zaburi nowacho kama: “Ka ne parruok opong’o chunya, in e ma ne ihoya.”—Zab. 94:19.

5. Ere kaka Jehova makorega gi osiepene?

⁵ Jehova makorega gi osiepene. (Zab. 103:8) Chunye ok jogga kodwa sama watimo gimoro marach. Jo-Israel nochwanyo Jehova nyading’eny. Kata kamano, ka ne giloko chunygi pod nodhi nyime herogi. Nonyisogi kama: “Ne akwani ka ng’at ma nengone duong’, ne aheri ahinya, kendo ne [amiyi] duong’.” (Isa. 43:4, 5) Mano e hera ma Jehova pod oherowago kata mana e kindewagi. Kinde duto wanyalo geno kuome. Kata sama watimo richo moro maduong’, Jehova ok jwang’waga. Ka waloko chunywa gadier kendo wadok ire, pod obiro dhi nyime herowa. Osingonwa ni obiro ‘ng’wononwa e yo malach.’ (Isa. 55:7) Muma wacho ni sama Jehova ong’wononwa, ‘omiyowaga kinde mag yueyo.’—Tich 3:19.

6. Ang’o ma Zekaria 2:8 puonjowa e wi Jehova?

⁶ Som Zekaria 2:8. Nikech Jehova oherowa, kendo odewo kaka wawinjo e chunywa, oikore timo gimoro amora mondo oritwa. Sama wan gi lit, en bende owinjo lit. Kuom mano, wanyalo kwaye kama: “Rita ka tong wang’i.” (Zab. 17:8) Wang’ en fuoni makende kendo ma wageno ahinya. Sama Jehova pimowa gi tong wang’e, chal ka gima owacho kama: ‘Ng’ato ang’ata ma hinyo joga ma ageno, hinyo tong wang’a.’

7. Ang’o momiyo dwarore ni wabed gadier ni Jehova oherowa?

⁷ Jehova dwaro ni wabed gadier ni oherowa ng’ato ka ng’ato. Kata kamano, ong’eyo bende ni nikech weche moko ma wakaloe e ngimawa, wanyalo bedo gi kiawa ka be oherowa.  Kata, samoro nyalo bedo ni nitie pek moro ma wakaloe sani ma nyalo miyo wapenjre ka be Jehova oherowa. Ang’o ma nyalo konyowa bedo gadier ni Jehova oherowa? En kuom nono kaka Jehova osenyiso ni ohero Yesu, Jokristo mowal, kod wan bende.

KAKA JEHOVA OSENYISO HERANE

8. Ang’o momiyo Yesu ne ni gadier ni Wuon-gi ohere?

⁸ Kuom higni mang’eny ahinya, Jehova gi Wuode mogeno ahinya osebedo gi winjruok machiegni, kendo giherore ahinya. Gin e ma gisebedo osiepe kuom kinde malach moloyo ng’ato ang’ata. Jehova nonyiso ni ohero Yesu mana kaka iwachonwa e Mathayo 17:5. Jehova ne nyalo mana wacho kama: ‘Ma Wuoda ma amorgo.’ Kata kamano, nodwaro ni wang’e okang’ moherogo Yesu. Omiyo, nowacho kama: “Ma Wuoda ma ahero.” Jehova ne mor ahinya gi Yesu, to ahinya-ahinya nikech noyie timo dwache, moriwo nyaka chiwo ngimane kaka misango. (Efe. 1:7) Yesu ne onge kiawa moro amora gi hera ma Wuon-gi noherego. Mano en gima nowinjo e chunye. Nowacho nyadinwoya ni Wuon-gi ohere.—Joh. 3:35; 10:17; 17:24.

9. Gin weche mage ma lero okang’ ma Jehova oherogo Jokristo mowal? (Jo-Rumi 5:5)

⁹ Jehova osenyiso herane ne Jokristo mowal bende. (Som Jo-Rumi 5:5.) Ne ane wach motigo e ndikono ni “hera mar Nyasaye oseol.” Buk moro ma wuoyo kuom weche motigo e Muma lero wechego kama: “Herane olore kuomwa mana kaka aora.” To mano doko ranyisi maber motigo e lero okang’ ma Jehova oherogo Jokristo mowal! Jokristo mowal ong’eyo ni ‘Nyasaye oherogi.’ (Juda 1) Jaote Johana nonyiso kaka Jokristo mowal winjo e chunygi nikech wachno ka nondiko kama: “Neuru hera ma Wuoro osemiyowa mondo oluongwa ni nyithind Nyasaye!” (1 Joh. 3:1) Be Jehova ohero mana Jokristo mowal kende? Ooyo, Jehova osenyiso ni oherowa waduto.

10. En ang’o maduong’ ma Jehova osetimo ma nyiso ni oheri?

¹⁰ Ang’o maduong’ ma Jehova osetimo ma nyiso ni oherowa? Nomiyowa misango mar rawar. Mano nonyiso kaka Jehova ohero dhano e okang’ malach. (Joh. 3:16; Rumi 5:8) Jehova nochiwo Wuode mohero ahinya, motho ne ji duto mondo owenwa richowa kendo wabed osiepene. (1 Joh. 4:10) Ka waparo matut e wi nengo ma Jehova kod Yesu nochulo nikech wan, mano biro konyowa neno okang’ ma giherowago. (Gal. 2:20) Jehova ne ok ochiwo Wuode ma nohero ahinya mana ni mondo ochulgo gima noselal. To nochiwe nikech hera matut ma noherogo dhano. Noyie mondo Wuode osandre malit kendo otho nikech wan. To mano doko mich maduong’!

11. Ang’o ma wapuonjore e Jeremia 31:3?

¹¹ Mana kaka waseneno, Jehova osenyiso ni oherowa. Ok oling’ga aling’a gi wachno e chunye. (Som Jeremia 31:3.) Oseywayowa ire nikech oherowa. (Pim gi Rapar mar Chik 7:7, 8.) Onge gimoro amora kata ng’ato ang’ata ma nyalo pogowa gi herane. (Rumi 8:38, 39) Mano miyo iwinjo nade? Som Zaburi 23 mondo ine kaka hera ma Jehova noherogo Daudi nomiyo owinjo e chunye, kod kaka wan bende heraneno nyalo miyo wawinj e chunywa.

HERA MA JEHOVA OHERIGO MIYO IWINJO NADE?

12. Ler ane gima Zaburi 23 konyowa ng’eyo e wi Jehova.

¹² Som Zaburi 23:1-6. Weche motigo e Zaburi 23 nyiso kaka Jehova oherowa. Daudi ma nondiko zaburino nonyiso kaka ne en gi  winjruok motegno ahinya gi Jakwadhe, ma en Jehova. Daudi nowinjo ka en gi arita maber ka Jehova e ma ne taye, kendo nogeno kuome. Nong’eyo ni hera mar Jehova ne dhi luwe ndalo duto mag ngimane. Ang’o momiyo ne en gadier gi wachno?

13. Ang’o momiyo Daudi ne ni gadier ni Jehova ne dhi rite?

¹³ “Ok abi chando gimoro.” Daudi nowinjo ka en gi arita maber nikech Jehova e ma ne sire kinde duto. Nong’eyo bende ni Jehova ne en osiepne, kendo ni ne omor kode. Mano e momiyo ne en gadier ni kata orom mana gang’o, to Jehova ne dhi rite. Nikech Daudi nong’eyo ni Jehova ohere, mano nokonye loyo parruok ma ne en-go mobedo gi chuny mokuwe.—Zab. 16:11.

14. Ere kaka Jehova nyalo nyiso ni oherowa?

¹⁴ Jehova dewowa ahinya, to moloyo sama waromo gi pek moko e ngimawa. Claire, a mosebedo ka tiyo e Bethel kuom higni mokalo 20, nowinjo ka chunye onyosore ahinya bang’ joodgi yudo chandruoge mopogore opogore, moro bang’ machielo. Tuo mar abach (stroke) nogoyo wuon-gi, nogol nyamin-gi e kanyakla, kendo joodgi nolalo ohandgi kaachiel gi odgi. Ere kaka Jehova nonyiso ni oherogi? Claire wacho kama: “Jehova noneno ni joodwa oyudo gik ma ne gichando odiechieng’ kodiechieng’. Nyading’eny, Jehova nomiyowa gik ma ne wachando moloyo kata kaka ne waparo! Ajaparoga yore ma Jehova osenyisago herane, kendo wiya ok nyal wil gi yorego kata matin. Weche kaka mago osekonya nano e chandruoge ma aromogo.”

15. Ang’o momiyo Daudi nowinjo ka chunye oduogo? (Ne picha bende.)

 ¹⁵ “Oduogo chunya.” Nitie kinde ma Daudi ne winjoga ka chunye onyosore ahinya nikech chandruoge kod tembe ma noromogo. (Zab. 18:4-6) Kata kamano, hera ma Jehova noherego noduogo chunye. Jehova notayo osiepne ma noolno nyaka kuonde yueyo ma nigi “lum mang’ich” kendo “ma nigi pi.” Mano nomiyo Daudi teko mar dhi nyime nano.—Zab. 18:28-32.

16. Ere kaka hera ma Jehova oherigo oseduogo chunyi?

¹⁶ E kindewagi, ‘hera madier mar Jehova e ma miyo ok tiekwa chuth’ sama waromo gi chandruoge kod tembe mopogore opogore. (Ywa. 3:22; Kol. 1:11) Ne ane ranyisi mar Nyaminwa Rachel. Nowinjo malit ahinya ka ne jaode oweyo tiyo ne Jehova, kendo oketho kend margi e kinde tuo mar korona. Ere kaka Jehova nokonye? Owacho kama: “Jehova nonyisa herane. Nomiya osiepe ma ne ni koda kinde duto, ne gikelona chiemo, ne giorona ote machuok kod ndiko ma nojiwa, ne gibwonjo koda, kendo ne gisiko ka giparona ni Jehova ohera. Agoyonega Jehova erokamano kinde duto kuom miya thuolo mar bedo e riwruok mar ogandane.”

17. Ang’o momiyo Daudi ne ‘ok oluoro gimoro amora’?

¹⁷ “Ok aluoro gimora amora, nikech in koda.” Thothne, ngima Daudi ne ni kama rach, kendo joma ne kedo kode ne gin joroteke. Kata kamano, nikech hera ma Jehova noherego, nowinjo ka en gi arita maber. Daudi ne neno ni Jehova ne ni kode e chandruogene duto, to mano nojiwe ahinya. Mano e momiyo nowero kama: “[Jehova] notiekona luoro duto ma ne an-go.” (Zab. 34:4) En adier ni Daudi noromo gi chandruoge madongo, kata kamano, hera ma noherogo Jehova nomiyo oloyo luoro ma ne en-go.

18. Ere kaka hera miherogo Jehova nyalo tegi sama iwinjo kiluor?

¹⁸ Ere kaka ng’eyo ni Jehova oherowa miyo wabedo jochir sama waromo gi weche ma miyowa luoro? Susi ma en painia wacho kaka en gi jaode ne giwinjo e chunygi ka wuodgi nodere. Owacho kama: “Masiche ma apoya kaka mago weyoga ng’ato ka en gi luoro ahinya kendo ka chunye onyosore. Kata kamano, hera ma Jehova oherowago osemiyo wabedo jochir kendo winjo ni oritwa maber.” Rachel, ma nosewuo kuome motelo wacho kama: “Chieng’ moro gotieno, chunya ne lit  kendo ne an gi parruok ahinya. Nalemo ka aywak matek ne Jehova. Gikanyono, nawinjo ka Jehova hoya ma chunya okuwe mana kaka nyathi ma min-gi hoyo. Wiya ok nyal wil gi kinde kaka mago.” Jaduong’-kanyakla moro miluongo ni Tasos nobedo e jela kuom higni ang’wen nikech notamore dhi e lweny. Ere kaka Jehova nonyiso ni ohere e kindego? Owacho kama: “Jehova nomiya gimoro amora ma nachando. Mano nomiyo abedo gadier ni anyalo gene. E wi mago, kokalo kuom roho mare maler, Jehova nomiyo abedo mamor kata obedo ni ne an e chal matek. Mano nomiyo abedo gadier ni kaka amedo sudo machiegni kode, e kaka nodhi medo guedha ahinya. Omiyo, nachako tiyone kaka painia mapile ka an e jela.”

SUD MACHIEGNI GI NYASACHI MA JAHERA

19. (a) Ere kaka ng’eyo ni Jehova oherowa nyalo mulo yo ma wawuoyogo kode e lamo? (b) En yo mane ma oselergo hera mar Jehova ma mori ahinya? (Ne sanduk ma wiye wacho ni, “ Weche ma Miyo Wabedo Gadier ni Jehova Oherowa.”)

¹⁹ Ranyisi ma wasenonogo konyowa ng’eyo ni Jehova ma en “Nyasach hera,” ni kodwa. (2 Kor. 13:11) Ohero ng’ato ka ng’ato kuomwa. Wan gadier ni “hera mosiko mar Jehova olworo jo mogene.” (Zab. 32:10) Kaka wamedo paro matut kuom yo mosenyisowago hera, e kaka wabiro medo here. Wanyalo wuoyo kode e lamo ka wan thuolo kendo nyise kaka wagombo ni omed herowa. Wanyalo nyise gimoro amora ma chandowa ka wan gadier ni ong’eyo maber gik ma wakaloe kendo ni oikore konyowa.—Zab. 145:18, 19.

20. Ere kaka hera mar Jehova chwalowa machiegni kode?

²⁰ Mana kaka wagomboga bedo but mach sama koyo ng’ich, e kaka wagombo bedo e bwo hera mar Jehova. Hera mar Jehova duong’ kendo ogundho. Omiyo, bed mamor nikech Jehova oheri ahinya. Mad ng’ato ka ng’ato kuomwa okog matek kowacho niya: “Ahero Jehova”!—Zab. 116:1.