1. Ang’o momiyo dwarore ni wadhi e nyasi mar paro tho Yesu ma itimoga higa ka higa?

 ONGE KIAWA ni iyie ni rawar e mich maduong’ie mogik ma Nyasaye osemiyo dhano! (2 Kor. 9:15) Inyalo bedo gi osiep machiegni ahinya gi Jehova Nyasaye nikech Yesu nochiwo ngimane mothoni. Bende, inyalo bedo gi geno mar dak nyaka chieng’. To mano kaka dwarore ni wago ne Jehova Nyasaye erokamano, nikech hera nochwale ma ooro Wuode mondo othonwa. (Rumi 5:8) Yesu nochako nyasi mar paro thone mitimoga higa ka higa, mondo okonywa siko ka wagoyo ne Jehova erokamano kuom chiwonwa rawar.—Luka 22:19, 20.

2. Ang’o ma wabiro nono e sulani?

² E higani, wabiro timo Rapar chieng’ Ngeso tarik 12, April 2025. Onge kiawa ni waduto wasechako timo chenro mondo kik wabare ne nyasino. Wabiro yudo ber ka waketo thuolo tenge mar paro matut e kinde mag Rapar gima Jehova kod Yesu osetimonwa. a E sulani, wabiro nono gima rawar puonjowa e wi Jehova kod Wuode. E sula ma luwo, ibiro konywa ng’eyo kaka mich mar rawar nyalo kelonwa ber, kod kaka wanyalo nyiso ni wagoyo erokamano ne michno.

ANG’O MA RAWAR PUONJOWA E WI JEHOVA

3. Ere kaka tho mar ng’ato achiel ne nyalo waro ji mang’eny? (Ne picha bende.)

³ Rawar puonjowa ni yore duto mag Jehova ni kare. (Rap. 32:4) E yo mane? Par ane wachni: Nikech Adam notamore  winjo Nyasaye, nonyuolwa e richo kendo mano miyo watho. (Rumi 5:12) Jehova nooro Yesu mondo othonwa, kendo ogolwa e tuech mar richo kod tho. Kata kamano, ere kaka tho mar ng’ato achiel makare ne nyalo waro ji mang’eny? Jaote Paulo nolero wachno niya: “Mana kaka kokalo kuom tim ng’ato achiel [Adam] mar ketho chik ji mang’eny nobedo joricho, e kaka bende kokalo kuom tim ng’ato achiel mar luwo chik [Yesu] ji mang’eny ibiro kwan kaka jo makare.” (Rumi 5:19; 1 Tim. 2:6) Gima Paulo ne temo wacho en ni ji duto nobedo joricho kendo githo nikech ng’ato achiel ma notamore luwo chik Nyasaye. Kuom mano, mondo ogonywa e tuech mar richo kod tho, ng’ato achiel makare ne nyaka winj Nyasaye.

4. Ang’o momiyo Jehova ne ok nyal weyo nyikwa Adam ma ne dhi winje mondo odag nyaka chieng’?

⁴ Be nochuno ni Yesu otho mondo e ka owarwa? Donge Jehova pod ne nyalo yie ne nyithind Adam ma ne dhi luwo chikene mondo odag nyaka chieng’? Dhano ma jaricho nyalo neno ni mano ne en yo maber ma Nyasaye nonego otigo e loso wachno. Kata kamano, mano ne ok dhi nyiso ni Jehova ng’adoga bura e yo makare. Nikech yore duto mag Jehova ni kare, ne ok onyal weyo ma ok okumo Adam bang’ ketho chikne goyiem.

5. Ang’o momiyo wanyalo bedo gadier ni kinde duto Jehova biro timo gik makare?

⁵ Ka di ne Jehova ok ochiwo rawar kendo weyo aweya mondo nyikwa Adam ma joricho odag nyaka chieng’, mano di ne omiyo Jehova oketho chikene mag gik makare kod gik ma ok kare. Bende, dhano di ne onene kaka Nyasaye ma ok ritga chikene, kendo ni ok obi timo gik mosingo e kinde mabiro. Be Nyasaye nyalo weyo ma ok ochopo moko kuom singoge? Mano gima ok nyal timore kata matin. Bedo ni Jehova noyie timo gima duong’ ahinya, tiende ni oro Wuode ma nohero mondo othonwa, mano miyo wabedo gadier ni kinde duto obiro timo gik makare.

6. Achiel kuom yore ma rawar nyisogo hera mar Jehova en mane? (1 Johana 4:9, 10)

⁶ Kata obedo ni rawar konyowa ng’eyo ni Jehova ng’adoga bura e yo makare, opuonjowa bende ng’eyo hera matut ma Jehova oherowago. (Joh. 3:16; som 1 Johana 4:9, 10.) Kokalo kuom rawar, wapuonjore ni Jehova dwaro ni wadag nyaka chieng’, kendo ni wabed joode. Parie wachni: Ka ne Adam otimo richo, Jehova ne oriembe mondo kik obed achiel  kuom joode. Mano nomiyo onyuolwa ka waonge gi winjruok maber gi Wuonwa manie polo. Kata kamano, nikech misango mar rawar, dhano duto ma nyiso yie kuom Nyasaye kendo luwo chikene nigi geno ni chieng’ moro gibiro bedo jood Jehova kendo. Kata mana gie kindegi wanyalo bedo gi winjruok maber gi Jehova kaachiel gi owetewa gi nyiminewa. Wan gadiera chuth ni Jehova oherowa ahinya.—Rumi 5:10, 11.

7. Yo ma nosandgo Yesu puonjowa ang’o e wi hera ma Jehova oherowago?

⁷ Wanyalo ng’eyo kaka Jehova oherowa ka wanono kaka nowinjo malit ka ne isando Wuode mogeno ahinya. Satan wachoga ni onge jatich Nyasaye ma nyalo makore kode ka po ni okalo e chal moro matek ahinya. Mondo Jehova onyis ni Satan riambo, ne oyie mondo Yesu okal e sand malit ka pok otho. (Ayub 2:1-5; 1 Pet. 2:21) Jehova noneno kaka jotend din ne jaro Yesu, kaka jolweny ne chwade, kendo kaka nogure e yadh-sand. Bang’e, Jehova noneno kaka Wuode ma nohero notho malit. (Mat. 27:28-31, 39) Jehova ne nigi teko mar geng’o ne Wuode gik ma kamago. Kuom ranyisi, ka ne jo akwede jare ka wacho niya: “Nyasaye mondo orese ane ka odware,” Jehova ne nyalo timo kamano. (Mat. 27:42, 43) Kata kamano, ka di ne Nyasaye orese, di ne ok ochul rawar, kendo di ne wabedo ma onge geno. Kuom mano, Jehova noyie mondo osand Wuode nyaka e tho.

8. Be Jehova nowinjo malit ka noneno ka isando Wuode? Ler ane. (Ne picha bende.)

⁸ Ok onego wapar ni nikech Jehova en Nyasaye Manyalo Duto, ni koro ok onyal winjo malit e chunye! Nikech ochuewa e kit Nyasaye kendo wawinjoga malit sama ochwanywa, mano nyiso ni en bende owinjoga malit. Muma wacho ni Jo-Israel ‘nowang’o i Jehova ding’eny’ kendo ‘ne gimiye chuny lit.’ (Zab. 78:40, 41) Par ane bende gima ne otimore ne Ibrahim kod Isaka. Nyasaye nonyiso Ibrahim ni ochiw Isaka wuode makende. (Cha. 22:9-12; Hib. 11:17-19) Wanyalo mana temo paro kaka Ibrahim ne winjo malit ka noikore nego Isaka wuode ma nohero ahinya. Donge mano konyowa ng’eyo kaka Jehova nowinjo malit ahinya ka noneno ka jowasigu sando Wuode ma nogeno nyaka e thone!—Ne vidio ma wiye wacho ni Luw Yie Margi—Ibrahim, Kare mar 2 e jw.org/luo.

9. Ang’o ma ipuonjori e Jo-Rumi 8:32, 38, 39 e wi hera ma Jehova oherigo kaachiel gi jotichne mamoko?

⁹ Misango mar rawar puonjowa ni onge  ng’ato ang’ata moherowa moloyo Jehova—obed wedewa kata osiepewa ma wageno. (Som Jo-Rumi 8:32, 38, 39.) Onge kiawa ni Jehova oherowa moloyo kaka waherore wawegi. Be diher dak nyaka chieng’? Bed gadier ni Jehova gombo ni idag nyaka chieng’ moloyo kaka iparo. Be diher ni oweni richoni? Jehova gombo mondo oweni richoni moloyo kata kaka in iparo. Odwaro mana ni wanyis ni wagoyo erokamano nikech misango mar rawar kuom bedo gi yie kendo luwo chikene. Misango mar rawar en mich makende ahinya ma nyiso kaka Jehova oherowa. E piny manyien pod wabiro dhi nyime puonjore gik mang’eny ma nyiso kaka Jehova oherowa.​—Ekl. 3:11.

ANG’O MA RAWAR PUONJOWA E WI YESU?

10. (a) Ang’o momiyo chuny Yesu ne chande ahinya ka ne pok onege? (b) Gin yore mage ma Yesu nomiyogo nying Wuon-gi duong’? (Ne bende sanduk ma wiye wacho ni, “ Timbe Makare mag Yesu Nomiyo Nying Jehova Duong’.”)

¹⁰ Yesu okawo mapek paro ma ji nigo e wi Wuon-gi. (Joh. 14:31) Yesu nowinjo malit ahinya ka ne ohangne ni ne oyanyo Nyasaye kendo ni ne en ja mahundu, nikech mano ne dhi ketho nying Wuon-gi. Mano e momiyo nolamo niya: “Wuora, ka nyalore to gol okombeni oa kuoma.” (Mat. 26:39) Yesu nonyiso ni Satan en jamiriambo ka nomakore gi Jehova nyaka e thone.

11. Ere kaka Yesu nonyiso dhano hera matut? (Johana 13:1)

¹¹ Rawar bende puonjowa ni Yesu dewo dhano, to moloyo, odewo jopuonjrene ahinya. (Nge. 8:31; Som Johana 13:1.) Kuom ranyisi, Yesu nong’eyo ni moko kuom migepe ma nodhi timo e piny kae  ne ok dhi bedo mayot, to ahinya ahinya, thone. Kata kamano, sama ne otimo migepene ne ok otimgi atima nikech Jehova noore, to notimogi nikech nohero dhano. Yesu nolendo, nopuonjo, kendo nokonyo ji gi chunye duto. Kata mana e otieno mogik ka pok onege, Yesu pod nolwoko tiende jootene kendo nojiwogi mohoyo chunygi gi weche mabeyo. (Joh. 13:12-15) Ka ne en e yadh-sand, pod ne omiyo jaricho ma ne ogur e bathe geno ni ne odhi bedo kode e paradiso, kendo notimo chenro mondo orit min-gi. (Luka 23:42, 43; Joh. 19:26, 27) Yesu nonyiso kaka nohero dhano, ok mana kuom thonegi kende, to bende kuom kechogi kendo nyisogi ng’wono.

12. Ere kaka Yesu pod dhi nyime konyowa nyaka e kindegi?

¹² Kata obedo ni Yesu “ne otho dichiel,” ma ok bi nwo kendo, pod odhi nyime konyowa nyaka e kindegi. (Rumi 6:10) Otimo kamano nade? Okonyowa mondo wayud ber ma rawar kelo. Tem ane paro moko kuom gik motimo sani. En e Ruodhwa, Jadolowa Maduong’, kendo wi kanyakla. (1 Kor. 15:25; Efe. 5:23; Hib. 2:17) En e ma ochung’ ne tij choko Jokristo mowal kaachiel gi oganda mang’ongo, kendo tijno biro rumo ka pok masira maduong’ ochopo e gikone. b (Mat. 25:32; Mar. 13:27) Bende, otimoga matek mondo one ni jotich Jehova oyudo chiemb chuny e kinde mag gikogi. (Mat. 24:45) Obiro dhi nyime ritowa nyaka e kinde Lochne mar Higni Aluf Achiel. Kuom adier, ka ne Jehova ochiwonwa Wuode, ne ok ochiwe mana mondo othonwa, to nochiwe mondo okonywa e yore mamoko mang’eny!

DHI NYIME PUONJORI GIK MANYIEN

13. Ere kaka paro matut nyalo konyowa dhi nyime puonjore e wi hera ma Jehova kod Kristo oherowago?

¹³ Inyalo dhi nyime puonjori e wi hera ma Jehova Nyasaye kod Yesu Kristo oherigo, ka idhi nyime paro matut kuom gik ma gisetimoni. Kinde mag Rapar ma higani, inyalo kawo thuolo mondo isom buge mag Injili kata mana achiel kuomgi. Kik isom sula mang’eny dichiel. Kar mano, inyalo somo mana kamoro matin, kendo nono kaka ka misomono nyalo konyi  medo hero Jehova kod Yesu. To e wi mano, tem matek mondo inyis jomoko gik mipuonjori.

14. Ka luwore gi Zaburi 119:97 kod weche moler piny, ere kaka timo nonro nyalo konyowa dhi nyime puonjore e wi rawar kaachiel gi puonj mamoko? (Ne picha bende.)

¹⁴ Samoro isebedo e adiera kuom higni mang’eny, kendo nyalo bedo ni ipenjori ka be nitiere gimoro amora manyien ma inyalo puonjori e wi weche kaka bura mar Nyasaye, herane, kod rawar. Adiera en ni onge giko mar puonjruok e wi wechego kaachiel gi weche mamoko. Ang’o ma inyalo timo? Som kendo ipuonjri weche mang’eny ma yudore e bugewa ma lero Muma. Ka isomo kamoro ma ok iwinj tiende maber, tim nonro. Kae to e odiechieng’ mangima, par matut e wi gik ma isepuonjori e wi Jehova, Wuode, kod hera ma giherigo.—Som Zaburi 119:97 kod weche moler piny.

15. Ang’o momiyo dwarore ni wadhi nyime manyo adiera mag Muma?

¹⁵ Kik chunyi jogi ka ok iyudo wach moro manyien kata ma mori sama ipuonjori kata sama itimo nonro. Ket e paro ni ichalo gi ng’at ma manyo dhahabu. Jokuny dhahabu horega nikech ginyalo tieko seche mang’eny kata ndalo moko ka pok giyudo kata mana dhahabu matinie mogik. Kata kamano, gitimoga kinda ahinya nikech ging’eyo ber ma dhahabu nigo. Adiera mag Muma to duong’ ma ok nyal pim kata gi dhahabu. (Zab. 119:127; Nge. 8:10) Kuom mano, hori kendo makri gi chenroni mar somo Muma.—Zab. 1:2.

16. Ere kaka wanyalo luwo ranyisi mar Jehova gi Yesu?

¹⁶ Sama ipuonjori, many yore minyalo tiyogo gi gik ma ipuonjori. Kuom ranyisi, sama ipuonjori e wi kaka Jehova ng’adoga bura, inyalo luwo ranyisine kuom timo ne jomoko gik mabeyo ma ok ibuonogi. Luw ranyisi mar Yesu e yo ma noherogo Wuon-gi kod jomamoko, kuom timo duto minyalo mondo iked ne nying Jehova kendo kuom chiwori mondo ikony Jokristo weteni e kinde ma weche tek. Bende, luw ranyisi mar Yesu mar lendo ne jomamoko mondo gin bende giyud thuolo mar ng’eyo mich maduong’ie mogik ma Jehova osemiyogi.

17. En ang’o ma wabiro nono e sula ma luwo?

¹⁷ Kaka wamedo puonjore e wi rawar, e kaka wabiro medo hero Jehova kod Yesu, to mano biro miyo gin bende giherwa ahinya. (Joh. 14:21; Jak. 4:8) Kuom mano, wadhiuru nyime tiyo gi gimoro amora ma Jehova osemiyowa mondo wapuonjre e wi rawar. Sula ma luwo biro wuoyo e wi yore mamoko ma rawar nyalo kelonwago ber kod kaka wanyalo goyo ne Jehova erokamano nikech herane.