SULA MAR PUONJRUOK 5
WER 108 Hera mar Nyasaye
Kaka Hera mar Jehova Kelonwa Ber
“Kristo Yesu nobiro e piny mondo ores joricho.”—1 TIM. 1:15.
GIMA SULANI WUOYE
Sulani biro konyowa neno gueth ma wayudo nikech rawar, kod kaka wanyalo goyo ne Jehova erokamano nikech michno.
1. Ere kaka wanyalo miyo Jehova mor?
TEMIE paro ni imiyo ng’at moro migeno mich makende, ma jaber, kendo ma nyalo konye. Donge ibiro winjo marach ka po ni ng’atno okawo michno mokete e sto, kendo ok otiyo kode e yo maber? To komachielo, ibiro bedo mamor ahinya ka ng’atno otiyo gi michno e yo maber kendo onyiso ni omor gi michno. Ere kaka ranyisini otudore gi mich mar rawar ma Jehova nomiyowa? Jehova nooro Wuode mondo othonwa. To mano kaka nyaka bed ni Jehova morga sama wanyiso ni wagoyo erokamano kuom hera moherowago ma nochwale mondo oor Wuode othonwa!—Joh. 3:16; Rumi 5:7, 8.
2. Ang’o ma wabiro nono e sulani?
2 Kaka kinde medo kalo, wanyalo chako neno mich mar rawar mana kaka mich moro amora. Timo kamano nyalo chalo gi keto mich makende ma Nyasaye omiyowano e sto. Wanyalo bedo mamor gi michno, kata kamano, ok wati kode e yo maber. Mondo gima kamano kik timre, dwarore ni pile ka pile wapar matut kuom gima Nyasaye gi Kristo osetimonwa. Sulani biro konyowa timo kamano. Wabiro nono ber ma wayudo e kindegi nikech rawar, kod ma wabiro yudo e kinde ma biro. Bende, wabiro neno kaka wanyalo goyo ne Jehova erokamano nikech hera mosenyisowa, to moloyo e kinde mag Rapar.
BER MA RAWAR KELONWA E KINDEGI
3. Yo achiel ma wayudogo ber nikech rawar e kindegi en mane?
3 Kata mana e kindegi, wayudo ber nikech misango ma Yesu nochiwo. Jehova weyonwaga richowa nikech misango mar rawar. Ok ochuno ni Jehova owenwa richowa, to en owuon e moyiero timo kamano. Jandik zaburi nogoyo ne Jehova erokamano nikech wachno ka nondiko niya: “A Jehova, iber kendo iikori weyo ne ji richogi.”—Zab. 86:5; 103:3, 10-13.
4. Jehova nochiwo rawar ne jomage? (Luka 5:32; 1 Timotheo 1:15)
4 Nitie joma nyalo paro ni ok giwinjore yudo ng’wono ma Jehova nyisogi. Kiwacho awacha adier, waduto ok wawinjore yudo ng’wonono. Jaote Paulo nowacho ni ne ok owinjore mondo oluonge ni jaote. Kata kamano, nomedo wacho kama: “Kuom ng’wono mogundho mar Nyasaye an gima sani an.” (1 Kor. 15:9, 10) Sama waloko chunywa gadier ma waweyo richo, Jehova weyonwaga richowa. Nikech ang’o? En nikech oherowa. Ka po ni seche moko iparoga ni ok iwinjori yudo ng’wono mar Nyasaye, par ni Jehova nochiwo rawar ne joricho ma ne dhi loko chunygi, to ok nochiwe ne joma kare chuth.—Som Luka 5:32; 1 Timotheo 1:15.
5. Be ng’ato ang’ata onego opar ni en gi ratiro mar yudo ng’wono mar Jehova? Ler ane.
5 Onge ng’ato ang’ata kuomwa monego ochak paro ni Jehova nyaka wene richone mana nikech osetiyone kuom higni mang’eny. Adiera en ni Jehova morga ahinya gi kinda ma watimo e tije. (Hib. 6:10) Nochiwo Wuode mondo othonwa, to ok ni mondo ochulwa nikech gik mabeyo ma wasebedo ka watimone. Ka po ni wachako paro ni wan gi ratiro mar yudo ng’wono mar Jehova kata ni onego odhialwa e yo moro makende, wanyalo chalo gi joma wacho ni Kristo notho kayiem nono.—Pim gi Jo-Galatia 2:21.
6. Ang’o momiyo Paulo notimo kinda ahinya e tij Jehova?
6 Paulo nong’eyo ni kata otim kinda maromo nade e tij Jehova, mano ne ok dhi miye ratiro mar yudo ng’wono mar Nyasaye. To ang’o momiyo pod notiyo matek ahinya e tij Jehova? Notimo kamano mondo onyis kaka nomor gi ng’wono mogundho mar Nyasaye kod kaka nosekeche. (Efe. 3:7) Mana kaka Paulo, wan bende watimo kinda e tij Jehova, ok ni mondo onyiswa ng’wono, to nikech wamor gi ng’wono mosenyisowa.
7. Yo machielo ma wayudogo ber nikech rawar e kindegi en mane? (Jo-Rumi 5:1; Jakobo 2:23)
7 Yo machielo ma wayudogo ber nikech misango mar rawar e kindegi en ni wanyalo bedo gi osiep machiegni ahinya gi Jehova. a Mana kaka ne waneno e sula mokalo, ka ne onyuolwa, ne waonge gi winjruok maber gi Nyasaye. To nikech rawar wanyalo bedo gi kuwe e kindwa gi Nyasaye kendo sudo machiegni kode.—Som Jo-Rumi 5:1; Jakobo 2:23.
8. Ang’o momiyo onego wago ne Jehova erokamano nikech thuolo mar wuoyo kode e lamo?
8 Wanyalo wuoyo gi Jehova e lamo nikech wan gi winjruok maber kode. Jehova ok winjga mana lamo mag jotichne mang’eny kochokore kanyachiel, to owinjoga nyaka sama jatichne moro amora lemo ka en kar kende. Lamo nyalo konyowa golo parruok kod luoro ma wanyalo bedogo, kendo onyalo miyo wabed gi chuny mokuwe. To mago ok e ber kende ma wayudo sama walemo. Lamo nyalo tego osiep manie kindwa gi Nyasaye. (Zab. 65:2; Jak. 4:8; 1 Joh. 5:14) Ka ne Yesu nie piny kae nowuoyoga gi Jehova e lamo nyading’eny nikech nong’eyo ni Jehova ne winje, kendo timo kamano ne tego osiep ma ne nie kindgi. (Luka 5:16) Donge wagoyo erokamano nikech kokalo kuom rawar wanyalo bedo osiepe Jehova kendo wuoyo kode e lamo?
KAKA RAWAR BIRO KELONWA BER E KINDE MABIRO
9. En ber mane ma jotich Jehova biro yudo e kinde mabiro nikech rawar?
9 Ber mage ma jotich Jehova biro yudo e kinde mabiro nikech rawar? Gibiro yudo ngima ma nyaka chieng’. Ji mang’eny paroga ni mano ok nyalre nikech dhano osebedo ka tho kuom higni mang’eny. Kata kamano, dwach Jehova ne en ni dhano odag nyaka chieng’. Ka di ne Adam ok otimo richo, onge ng’ato ang’ata ma ne nyalo paro ni ngima ma nyaka chieng’ ok nyalre. Kata obedo ni seche moko nyalo bedonwa matek paro ni wanyalo dak nyaka chieng’, gima nyalo konyowa neno kaka mano gima nyalore, en paro nengo ma Jehova nochulo ka nooro Wuode mondo othonwa mondo wayud ngima ma nyaka chieng’.—Rumi 8:32.
10. Ang’o ma Jokristo mowal kaachiel gi rombe mamoko rito gi siso?
10 Kata obedo ni wabiro yudo ngima ma nyaka chieng’ e kinde mabiro, Jehova dwaro ni wachak paro matut e wi ngimano e kindegi. Jokristo mowal rito gi siso kinde ma gibiro locho e wi piny ka gin gi Yesu e polo. (Fwe. 20:6) Rombe mamoko to rito gi siso dak e Paradiso e piny kae kama kuyo gi rem ok nobedie. (Fwe. 21:3, 4) Be in e grup mar rombe mamoko ma geno dak nyaka chieng’ e piny kae? Mano ok en mich matin mana nikech ok ibi dhi e polo. Dhano nochue mondo odag e piny nyaka chieng’. Dak e piny biro kelonwa mor matamre gi nono!
11-12. Moko kuom gueth ma warito yudo e Paradiso gin kaka mage? (Ne pichni bende.)
11 Tem ane paro kaka ngimani biro chalo ka idak e Paradiso. Parruok ma wajobedogo nikech tuoche kod tho ok nobedie. (Isa. 25:8; 33:24) Jehova biro miyi gimoro amora midwaro. Diher puonjori mondo ibed gi lony e weche mage? Be diher puonjori weche mag Sayans? Le? Wer? Goro, kata mamoko? En adier ni joma goro plan mag udi, jogedo, kod jopur, biro dwarore e Paradiso. Ji bende biro pidho cham kendo loso chiemo, gibiro loso gige tich, bende, gibiro pidho maupe kendo ritogi maber. (Isa. 35:1; 65:21) Nikech ibiro dak nyaka chieng’, ibiro yudo thuolo mar puonjori kendo bedo gi lony mang’eny e tich moro amora mibiro yiero timo.
12 To nade mor ma wabiro bedogo sama waromo gi osiepewa kod wedewa ma ibiro chier! (Tich 24:15) Parie bende kaka ibiro bedo mamor kipuonjori weche momedore e wi Jehova kod chuechne miwuoro. (Zab. 104:24; Isa. 11:9) To maduong’ie moloyo, parie kaka ibiro winjo kilamo Jehova ka in ng’at makare chuth ma ok ochuno ni ikwaye mondo oweni richoni! Be inyalo yie wilo gueth mabeyogo gi “mor mar richo ma rumo bang’ ndalo manok”? (Hib. 11:25) Ok diher timo gima kamano! Guethgo duong’ moloyo gimoro amora ma wanyalo tuonore e pinyni. Geno mar dak e Paradiso biro chopo gadier, kendo wabiro neno ka gik ma Nyasaye osingo duto timore. Mago duto nyalore nikech Jehova noherowa mochiwo Wuode mondo othonwa.
Gin gueth mage ma irito gi siso neno ka chopo e Paradiso? (Ne paragraf mar 11-12)
NYIS NI IMOR GI HERA MAR JEHOVA
13. Ere kaka wanyalo nyiso ni wamor gi hera ma Jehova osenyisowa? (2 Jo-Korintho 6:1)
13 Ere kaka wanyalo nyiso ni wamor gi mich mar rawar ma Jehova nomiyowa? Kuom keto tije obed mokwongo e ngimawa. (Mat. 6:33) Yesu notho “mondo jo mangima kik dhi nyime bedo mangima ne dwachgi giwegi, to ne dwach jalo ma ne othonegi, kendo ma nochier.” (2 Kor. 5:15) Ok dwaher ni wiwa owil gi gimomiyo Jehova nonyisowa ng’wono mogundho ma ok ne wawinjore yudo.—Som 2 Jo-Korintho 6:1.
14. Ere kaka wanyalo nyiso ni wayie gi yo ma Jehova tayowago?
14 Wanyalo nyiso ni wamor gi hera mar Jehova kuom nyiso ni wayie gi yo motayowago. Wanyalo timo mano nade? Sama dwarore ni watim yiero e weche kaka somo kata tich, wabiro nono gima Jehova wacho ka pok wang’ado paro mogik. (1 Kor. 10:31; 2 Kor. 5:7) Ka watimo gik ma nyiso ni wan gi yie, mano biro medo tego yiewa kod osiep mantie e kindwa gi Jehova. Genowa bende biro medo bedo motegno.—Rumi 5:3-5; Jak. 2:21, 22.
15. Ere kaka wanyalo nyiso ni wamor gi misango mar rawar e kinde Rapar?
15 Nitie yo machielo bende ma wanyalo nyisogo ni wamor gi hera ma Jehova osenyisowa. En kuom tiyo gi kinde mag Rapar e nyiso ni wagoyo ne Jehova erokamano kuom misango mar rawar. Sama wachano kaka wabiro dhi e Rapar, wanyalo paro gwelo jomamoko bende. (1 Tim. 2:4) Tem iler ne joma igwelo gik ma biro timore e nyasino. Inyalo tugonegi vidio mar Ang’o Momiyo Yesu Notho? kod Par Tho Yesu, ma yudore e jw.org/luo. Jodong-kanyakla onego otem matek mondo gigwel joma odok chien e tij Nyasaye. Parie mor maduong’ ma bedoga e polo kod e piny sama moko kuom rombe Jehova molal, oduogo e kueth. (Luka 15:4-7) Sama wan e Rapar, dwaher timo duto ma wanyalo mondo wamos joma nyien kod joma osebudho ka ok bi e chokruogewa. Dwaher ni giwinj e chunygi ni orwakogi gadier!—Rumi 12:13.
16. Ang’o momiyo ber ka wanono chalwa ka be wanyalo timo momedore e kinde mag Rapar?
16 Donge inyalo timo momedore e tij Nyasaye e kinde mag Rapar? Timo kamano en yo maber ma nyiso ni igoyo erokamano kuom gik moko duto mabeyo ma Nyasaye kod Kristo osetimonwa. Kaka wamedo chiwore e tij Nyasaye, e kaka wabiro medo neno kaka okonyowa, kendo mano biro tego genowa kuome. (1 Kor. 3:9) Bende, tem iluwri gi chenro mar Somo Muma e kinde Rapar ma yudore e bug Nono Ndiko Pile kata e chat manie bug chenro mar chokruogwa ma kor juma. Inyalo kata timo puonjruok ma mari kitiyo gi ndikogo.
17. Ang’o ma moroga Jehova? (Ne bende sanduk ma wiye wacho ni “ Yore ma Wanyalo Nyisogo ni Wamor gi Hera mar Jehova.”)
17 Samoro chal mari ok nyal yieni timo gik moko duto moler e sulani. Kata kamano, par ni Jehova ok pimga gik mitimone gi gik ma jomamoko timone, to ong’iyoga gima nie chunyi. Omorga ahinya sama oneno kitimo duto minyalo mondo igone erokamano kuom misango mar rawar.—1 Sa. 16:7; Mar. 12:41-44.
18. Ang’o momiyo wagoyo ne Jehova Nyasaye kod Yesu Kristo erokamano?
18 Misango mar rawar e yo kende minyalo wenwago richowa, ma nyalo miyo wabed osiepe Jehova, kendo ma miyowa geno mar dak nyaka chieng’. Mad kinde duto wanyis ni wagoyo erokamano ne hera mar Jehova ma nochwale timonwa gima miyo wayudo gueth mogundho. (1 Joh. 4:19) Bende, wadhiuru nyime goyo erokamano ne Yesu nikech noyie thonwa!—Joh. 15:13.
WER 154 Hera ma Ok Orem
