1. Ang’o ma ji mang’eny tinde odichgo?

 BE ISEFWENYO ni tinde ji mang’eny odich mana gi timo dwachgi? Kuom ranyisi, nitie joma tiyoga gi kuonde mitudruokie gi ji e intanet mondo gipakre kendo ginyisre. Kata kamano, ji matin ahinya e ma miyoga Jehova duong’. E sulani, wabiro nono tiend miyo Jehova duong’, kod gima onego ochwalwa mondo watim kamano. Bende, wabiro puonjore kaka wanyalo miyo Nyasaye duong’ mowinjore oyudi kod kaka en owuon obiro miyo nyinge duong’ e kinde mokayo machiegni.

TIEND MIYO JEHOVA DUONG’ EN ANG’O?

2. Ere kaka Jehova nonyiso duong’ne e Got Sinai? (Ne picha manie gaset.)

² Miyo ng’ato duong’ tiende en ang’o? Nitie kinde ma Muma tiyoga gi wechego kowuoyo kuom pako ng’ato. Jehova nonyiso ni en Nyasaye ma nigi duong’ mana mapiyo bang’ ka oganda Jo-Israel nosegol e tuech e piny Misri. Temie paro gik ma notimore ka Jo-Israel mang’eny nochokore e tie Got Sinai mondo girom gi Nyasachgi: Boche polo ma rateng’ noimo wi godno. Apoya nono, piny noyiengni, polo nomil momor matek, kendo dwol maduong’ mar tung’ nowinjore e alworano te. (Wuok 19:16-18; 24:17; Zab. 68:8) Par ane kaka Jo-Israelgo nowinjo ka ne Jehova onyisogi duong’ne kod tekone!

3. Tiend miyo Jehova duong’ en ang’o?

³ To nade dhano? Be ginyalo miyo Jehova duong’? Ee, ginyalo. Achiel kuom yore ma wanyalo miyogo Jehova  duong’ en kuom wuoyo gi jomamoko e wi tekone kod kido mabeyo ma en-go. Bende, wanyalo miyo Nyasaye duong’ ka wagoyone erokamano nikech gik mosekonyowa timo. (Isa. 26:12) Ruoth Daudi noketonwa ranyisi maber e miyo Jehova duong’. Nitie kinde ma nolemo e nyim oganda Jo-Israel konyiso Nyasaye niya: “A Jehova, duong’ gi teko gi ber gi pak gi loch gin magi. Nimar gik moko duto manie polo gi piny gin magi.” Bang’ ka Daudi nosetieko lamono, “oganda duto nopako Jehova.”—1 We. 29:11, 20.

4. Ere kaka Yesu nomiyo Jehova duong’?

⁴ Ka ne Yesu nie piny kae, nomiyo Jehova duong’ kuom nyiso ji ni Jehova e ma nomiye teko mar timo honni. (Mar. 5:18-20) Bende, yo ma ne Yesu wuoyogo e wi Jehova kod gik ma notimo ne jomamoko ne miyo Wuon-gi duong’. Nitie kinde moro ma Yesu ne puonjo e sunagogi kendo achiel kuom joma ne winje ne en dhako moro ma jachien nosebedo ka chando kuom higni 18. Jachiendno nosemiyo dend dhakono odolore kendo ne ok onyal chung’ tir. Dhakono ne chandore malit! Yesu nokeche, mowuoyo kode e yo mang’won konyise niya: “Dhako, osegonyi kuom tuoni.” Yesu noketo lwete kuome, kendo gikanyono, noriere tir “mochako miyo Nyasaye duong’.” Nomor ahinya mor nikech Jehova nosechange! (Luka 13:10-13) Mano nomiyo dhakono omiyo Jehova duong’, to mano bende e gima wagombo timo.

ANG’O MA CHWALOWAGA MONDO WAMI JEHOVA DUONG’?

5. Ang’o momiyo dwarore ni wami Jehova luor?

⁵ Wamiyo Jehova duong’ nikech luor matut ma wanyise. Nitie gik mang’eny ma miyo onego wami Jehova luor. En Nyasaye Manyalo Duto kendo tekone onge giko. (Zab. 96:4-7) Riekone nenore maler kokalo kuom gik ma nochueyo. Osemiyowa ngima kod gik moko duto ma dwarore mondo wadhi nyime bedo mangima. (Fwe. 4:11) Omakorega chuth gi joge. (Fwe. 15:4) Gik moko duto motimo dhiga maber, kendo oritoga singoge. (Jos. 23:14) To mano e momiyo janabi Jeremia nondiko kama e wi Jehova: “E kind jorieko mag ogendni kod pinjeruodhigi duto, onge ng’ato ang’ata machal kodi.” (Jer. 10:6, 7) Kuom adier, wan gi gik mang’eny ma chwalowa mondo wami Wuonwa manie polo luor. Kata kamano, ok wami mana Jehova luor kende, to bende wahere ahinya nikech kido mabeyo ma en-go.

6. Ang’o momiyo wahero Jehova?

⁶ Wamiyo Jehova duong’ nikech wahere gi chunywa duto. Par ane kido mang’eny ma Jehova nigo ma chwalowaga mondo wahere. Ong’won kendo okecho ji. (Zab. 103:13; Isa. 49:15) Owinjoga malit sama wachandore. (Zek. 2:8) Mako kode osiep yot ahinya. (Zab. 25:14; Tich 17:27) En Nyasaye ma bolore, nikech ‘okulorega mondo orang polo gi piny, kendo oting’o ng’at ma sandore malo kogole e lowo.’ (Zab. 113:6, 7) Ang’o ma dimi ng’ato otamre miyo Jehova Nyasaye duong’?—Zab. 86:12.

7. En thuolo mane makende ma wan-go?

⁷ Wamiyo Jehova duong’ nikech wadwaro ni jomamoko ong’eye. Ji mang’eny ok ong’eyo adiera e wi Jehova. Mano en nikech Satan osedino pachgi kokalo kuom miriambo mosebedo kowacho e wi Jehova. (2 Kor. 4:4) Satan osemiyo ji  obedo gi paro ni Jehova ok wega ne ji richo, ok odew dhano, kendo ni en e mokelonegi chandruoge. Kata kamano, wang’eyo ni mano ok en adier! Wan gi thuolo mar nyiso ji adiera kendo miyo Jehova duong’. (Isa. 43:10) Zaburi 96 wuoyo e wi miyo Jehova duong’. Sama wanono moko kuom weche ma yudore e zaburino, tem ane paro yore mamoko minyalo miyogo Jehova duong’ mowinjore yudo.

ERE KAKA WANYALO MIYO JEHOVA DUONG’ MOWINJORE OYUDI?

8. Achiel kuom yore ma wanyalo miyogo Jehova duong’ en mane? (Zaburi 96:1-3)

⁸ Som Zaburi 96:1-3. Wanyalo miyo Jehova duong’ kokalo kuom weche ma wawacho e wiye. Ndikono jiwo jotich Jehova mondo ‘owerne,’ ‘opake,’ ‘oland wach maber,’ kendo ‘giland duong’ne e kind ogendni.’ Mago gin yore ma wanyalo miyogo Wuonwa manie polo duong’. Jotich Jehova machon ne nigi kinda e nyiso jomamoko gik ma Jehova nosetimonegi kod adiera e wiye. (Dan. 3:16-18; Tich 4:29) Ere kaka wanyalo luwo ranyisigi?

9-10. Ang’o ma ipuonjori kuom ranyisi mar Angelena? (Ne picha bende.)

⁹ Ne ane ranyisi mar nyaminwa Angelena a modak e piny Amerka. Nowuoyo e wi Jehova gi chir kama notiye. Kambi ma nondiko Angelena ne niga gi chenro mar ng’eyo jotijegi manyien. E kinde kaka mago, jotich manyien ne wuoyoga e wi ngimagi. Omiyo, noluong Angelena kod jotich wetene ma pod ne nyien e kambino mondo ging’egi maber. Angelena noiko pichni moko ma ne nyiso mor mosebedogo e tij Jehova. Kata kamano, mana matin ka ne pok Angelena ochako wuoyo, jatich wadgi moro nohulore kendo nowacho ni nodongo e od Joneno mag Jehova. Nochako wuoyo marach e wi puonj ma wayiego. Angelena wacho kama: “Adundona nochako gwecho matek. Kata kamano, napenjora e chunya ni: ‘Be abiro ling’ aling’a sama ng’ato wacho miriambo e wi Jehova? Ooyo, ok onego aling’.’”

¹⁰ Bang’ ka jatich wadgino nosetieko wuoyo, Angelena nolemo mapiyo gie  chunye. Kae to Angelena nowuoyo kode e yo mang’won ka nyise niya: “Nenore ni ne wapon machal. An bende nadongo e od Joneno mag Jehova kendo nyaka kawuono pod an Janeno.” Kata obedo ni chal ma noyudeno ne ok yot, Angelena nosiko kokuwe mos kendo nyiso jotich wetenego pichni mopogore opogore ma nosegoyo gi Joneno wetene ka gimor, kendo noleronegi nyaka puonj mag Muma moyiego. (1 Pet. 3:15) Mano nokelo ber mane? Ka ne Angelena chiegni tieko wuoyo, ng’atno nosechako bedo gi paro mowinjore kuom Joneno. Nowacho ni en bende noparo gik mabeyo ma notimo gi osiepene ma ne gin Joneno ka ne pod gitindo. Angelena wacho kama: “Owinjore waked ne nying Jehova. Sama watimo kamano, wamiye duong’.” Wan gi migawo mar pako Jehova kendo miye duong’ kata sama jomamoko ok tim kamano.

11. Ere kaka jotich Jehova osebedo ka luwo puonj ma yudore e Zaburi 96:8?

¹¹ Som Zaburi 96:8. Wanyalo tiyo gi mwanduwa e miyo Jehova duong’. Jotich Jehova osebedo ka timo kamano kuom higni mang’eny. (Nge. 3:9) Kuom ranyisi, Jo-Israel nochiwo gigegi mag ringruok ma notigo e gero hekalu kendo rite. (2 Ru. 12:4, 5; 1 We. 29:3-9) Jopuonjre Yesu noyie ‘tiyo gi gigegi’ mondo gikony Yesu kod jootene. (Luka 8:1-3) E kinde joote, Jokristo nochiwo mwandugi mondo gikonygo owete gi nyimine. (Tich 11:27-29) E kindegi, wan bende wanyalo miyo Jehova duong’ kokalo kuom chiwo ma wagolo.

12. Ere kaka chiwo ma wagolo nyalo kelo ne Jehova duong’? (Ne picha bende.)

¹² Ne ane ranyisi achiel ma nyiso kaka chiwo ma wagolo kelo ne Jehova duong’. E higa mar 2020, koth ne ok ochue e piny Zimbabwe kuom kinde malach. Ji milionde mang’eny ne onge chiemo, to mano noriwo nyaka nyaminwa moro miluongo ni Prisca. Kata obedo ni weche ne tek kamano, Prisca nodhi nyime gi chenrone mar lendo chieng’ Tich Adek kod Tich Abich, kata e kinde ma ji ne puro. Jirendene nojare ka nodhi e tij lendo, kendo ne ginyisega ni, “Kech biro negi.” Prisca ne janyisogi ka en gi chir ni, “Jehova pok ojwang’oga jotichne.”  Bang’ kinde, en bende nomiye gige ringruok ma riwruogwa chiwoga ne joma oyudo masira. Prisca gi jomamoko noyudo gik ma gikonyorego nikech chiwo ma ng’ato ka ng’ato kuomwa gologa. Jirende Prisca nowuoro ahinya kendo ne ginyise ni, “Nyasaye pok oweyouga, omiyo, wadwaro puonjore weche momedore e wiye.” Jirendene abiriyo nochako dhi e chokruogewa mag kanyakla.

13. Ere kaka timbewa nyalo miyo Jehova duong’? (Zaburi 96:9)

¹³ Som Zaburi 96:9. Wanyalo miyo Jehova duong’ kokalo kuom timbewa. Ne dwarore ni jodolo ma ne tiyo ne Jehova e hekalu olwok dendgi. (Wuok 40:30-32) Wan bende dwarore ni wabed maler, ok e dendwa kende, to nyaka e timbewa. (Zab. 24:3, 4; 1 Pet. 1:15, 16) Dwarore ni watim kinda mondo walony “kit dhano machon,” tiende ni timbe ma ok ler, kendo warwak “kit dhano manyien,” tiende ni paro kod timbe ma luwore gi chike mag Jehova. (Kol. 3:9, 10) Jehova nyalo konyo kata mana joma timbe maricho nogurore e chunygi, mi giwe timbego kendo bedo joma beyo.

14. Ranyisi mar Jack puonji ang’o? (Ne picha bende.)

¹⁴ Par ane ranyisi mar dichwo moro ma niluongo ni Jack ma nohero timbe gero ahinya. Nochopo kama ji nochako luonge ni Jachien. Nikech timbege marichogo, noyale mong’ad ne buch tho. E kinde ma pod norito odiechieng’ ma ne idhi nege, Jack noyie puonjore Muma gi owadwa moro ma nodhi limo joma notue e jelano. Kata obedo ni timbe marichogo nosegurore e chuny Jack, notimo lokruok, kendo bang’ kinde nobatise. Jack notimo lokruoge madongo ahinya, ma odiechieng’ ma ne idhi nege, moko kuom askeche ma ne tiyo e jelano noywak sama ne gigone oriti. Askari moro ma ne tiyo e jelano nowacho kama: “Jack nobiro kae ka en mabus marachie mogik. To koro en achiel kuom mabuse mabeyo ahinya.” Juma achiel kama bang’ ka noseneg Jack, owete ma nodhi timo chokruoge ma juma ka juma e jelano noromo gi mabus moro ma eka nohango biro e chokruogego. Ang’o ma nomiyo obiro e chokruoge? Nomor gi lokruoge ma Jack nosetimo, kendo nogombo  ng’eyo gima onego otim mondo olam Jehova. Nenore maler ni timbewa nyalo miyo Wuonwa manie polo duong’!—1 Pet. 2:12.

ERE KAKA JEHOVA BIRO MIYO NYINGE DUONG’ E KINDE MOKAYO MACHIEGNI?

15. Ere kaka Jehova biro miyo nyinge duong’ e kinde mokayo machiegni? (Zaburi 96:10-13)

¹⁵ Som Zaburi 96:10-13. Ndikono wuoyo kuom Jehova kaka Jang’ad Bura makare kendo Ruoth. Ere kaka Jehova biro miyo nyinge duong’ e kinde mokayo machiegni? Obiro timo kamano kokalo kuom bura mobiro ng’ado. Machiegnini, obiro ketho Babulon Maduong’ mosebedo ka ketho nyinge maler. (Fwe. 17:5, 16; 19:1, 2) Moko kuom joma biro neno ka iketho Babulon Maduong’ nyalo riwore kodwa e lamo madier. Gikone, e Har–​Magedon, Jehova biro ketho piny Satan kaachiel gi joma osebedo ka kwede kendo ketho nyinge. Kata kamano, obiro reso jo mohere, ma winje, kendo ma miyo nyinge duong’. (Mar. 8:38; 2 The. 1:6-10) Bang’ tem mogik ma nobi e giko higni 1000 mar Loch Kristo, biro yudo ka Jehova oseketo nyinge obedo maler chuth. (Fwe. 20:7-10) E kindeno, “piny duto biro pong’ gi jo ma ong’eyo duong’ mar Jehova mana ka pige mopong’o nam.”—Hab. 2:14.

16. En ang’o ming’ado e chunyi ni ibiro timo? (Ne picha bende.)

¹⁶ To mano kaka kindeno biro bedo maber, nimar ng’ato ka ng’ato biro miyo Jehova duong’ mowinjore oyudi! Kata kamano, ka pok kindeno ochopo, wadwaro timo duto ma wanyalo mondo wami Jehova duong’ e thuolo moro amora moneno. Mondo okonywa timo mano, Bura Matayo oseyiero Zaburi 96:8 mondo obed ndiko mar higa 2025: “Miuru Jehova duong’ mowinjore gi nyinge.”