SULA MAR PUONJRUOK 3
WER 35 “Uyang Gadier Gik ma Dwarore Moloyo”
Tim Yiero ma Moro Jehova
“Luoro Jehova e chakruok mar rieko, kendo ng’eyo Ng’at Maler Moloyo, e winjo tiend wach.”—NGE. 9:10.
Gima Sulani Wuoye
Wabiro puonjore kaka wanyalo tiyo gi ng’eyo makare ma wan-go, nyalo mar winjo tiend wach, kod nyalo mar pogo weche mondo watim yiero mabeyo.
1. En ang’o ma seche moko ok yotnwaga timo?
PILE KA PILE dwarore ni watim yiero. Nitie yiero moko ma yot timo, kaka gima wabiro chamo gokinyi, kata seche ma wabiro nindoe. Yiero moko to ok yot timo, ginyalo mulo ngimawa, mor ma wan-go, osiepewa, wedewa, kata lamowa. Wadwaro ni yiero ma watimo okelnwa ber kaachiel gi joodwa to moloyo duto, wadwaro ni yiero ma watimo omor Jehova.—Rumi 12:1, 2.
2. Gin okenge mage ma biro konyi timo yiero mabeyo?
2 Inyalo timo yiero maber ka (1) itemo ming’eyo weche duto, (2) inono paro ma Jehova nigo e wi wachno, kendo (3) iparo wachno e yo matut ka pok itimo yiero mogik. Sulani biro wuoyo e wi okengego, kendo obiro konyowa neno kaka wanyalo tiego nyalowa mar winjo tiend weche.—Nge. 2:11.
TEM ING’E WECHE DUTO
3. Ler ane gimomiyo dwarore ni ing’e weche duto ka pok itimo yiero.
3 Okang’ mokwongo ma biro konyi timo yiero maber en ng’eyo weche duto. Ang’o momiyo mano dwarore? Par ane ni jatuo moro odhi ir laktar kotuo ahinya. Be laktar biro chako thiedhe ka ok okwongo opime kata penje penjo moko? Ooyo! Mana kaka laktar ma nono jatuo ka pok ochako thiedhe, in bende inyalo timo yiero maber ka ikwongo inono weche duto motudore gi wach midwaro timoe yierono. Ere kaka inyalo timo kamano?
4. Ka luwore gi Ngeche 18:13, ang’o minyalo timo mondo ibed gadier gi weche duto? (Ne picha bende.)
4 Kinde mang’eny, penjo penjo moko nyalo konyi ng’eyo weche momedore. Wawach ni ogweli e budho kata e nyasi moro. Be ibiro dhi adhiya ka ok ing’eyo ng’at mochane, kata weche motudore gi budhono? Inyalo penjo ng’at mogwelino penjo kaka: “Ibiro time kanye? Ibiro time karang’o? Obiro bedo gi ji adi? Ng’ano ma biro taye? Jomage mabiro betie? Gin gik mage mibiro tim kanyo? Be kong’o biro betie?” Dwoko mag penjogo biro konyi timo yiero maber.—Som Ngeche 18:13.
Penj penjo kidwaro ng’eyo weche momedore (Ne paragraf mar 4) a
5. Ang’o monego itim bang’ kiseng’eyo weche duto?
5 Bang’ yudo dwoko mag penjogo, koro tem ane paro kaka budhono biro chalo. Kuom ranyisi, ka po ni ifwenyo ni moko kuom joma biro bedoe gin joma ok luw puonj mag Muma, kata ni onge ng’at ma ibiro ket mondo one ni ji ok madh kong’o mokalo tong’, donge inyalo temo goyo picha e pachi mondo ine kaka budhono nyalo lokore ma bed nyasi mopong’ gi koko? (1 Pet. 4:3) To komachielo, be odiechieng’ mitime nyasino nyalo chocho chenroni mar dhi e chokruok kata e tij lendo? Bang’ nono weche duto, mano biro konyi timo yiero maber. Kata kamano, nitie okang’ machielo monego ikaw. Koro, nikech iseng’eyo weche duto motudore gi wachno, penjri ane niya, ‘Jehova nigi paro mane e wi wachno?’—Nge. 2:6.
NON PARO MA JEHOVA NIGO
6. Ka luwore Jakobo 1:5, ang’o monego wakwa Jehova e lamo?
6 Non paro ma Jehova nigo e wi wachno. Kwa Jehova mondo okonyi ibed gi paro ma en-go e wi wach moro. Jehova osingo ni obiro miyowa rieko mondo watim yiero ma more. Ochiwoga rieko ma kamano “ne ji duto e yo mogundho ma ok omany ketho kuom ng’ato.”—Som Jakobo 1:5.
7. Ere kaka inyalo ng’eyo paro ma Jehova nigo e wach moro? Chiw ane ranyisi.
7 Bang’ ka isekwayo Jehova e lamo mondo okonyi, tem bedo akicha mondo ine kaka odwoko lamoni. Wati ane gi ranyisini: Wawach ni idhi e wuoth moro kae to yo orwenyi. Donge ibiro kwayo ng’at manie alworano mondo onyisi yo monego iluw? To be ibiro wuok ka pok otieko nyisi yo maber? Ooyo. Ibiro chiko iti maber sama oleroni yo mowinjore iluw. E yo machalo kamano, bang’ kisekwayo Jehova mondo omiyi rieko, tem nono dwoko momiyi ka inono chike mag Muma kod puonj motudore gi wachno. Kuom ranyisi, ka pok ing’ado ni ibiro dhi e budho ma ne wasewuoyecha, inyalo nono gima Muma wacho e wi nyasi motimo koko, osiepe maricho, kod gimomiyo dwarore ni waket Pinyruoth motelo ne dwachwa.—Mat. 6:33; Rumi 13:13; 1 Kor. 15:33.
8. Inyalo timo ang’o ka po ni idwaro yudo weche momedore sama itimo nonro? (Ne picha bende.)
8 Nitie kinde ma kidwaro ng’eyo weche momedore e wi wach moro, nyalo dwarore ni ikwa kony. Inyalo kwayo Jakristo wadu moro motegno mondo okonyi gi paro moko. Kata kamano, in bende ibiro yudo ber ka itimo nonro. Inyalo yudo weche mang’eny motudore gi wachno kitiyo gi bugewa kaka, Buk Makonyo Joneno mag Jehova e Timo Nonro kod Ndiko ma Konyowa Dak Kaka Jokristo. Ket e paro ni gima duong’ en timo yiero ma biro moro Jehova.
Non paro ma Jehova nigo e wi wachno (Ne paragraf 8) b
9. Ere kaka wanyalo bedo gadier ni yiero ma watimo biro moro Jehova? (Jo-Efeso 5:17)
9 Ere kaka wanyalo bedo gadier ni yiero ma watimo biro moro Jehova? Mokwongo, dwarore ni wang’e Jehova e yo maber. Muma wacho kama: “Ng’eyo Ng’at Maler Moloyo, e winjo tiend wach.” (Nge. 9:10). Adiera en ni ka wang’eyo kido mag Jehova, dwache, gik mohero, kod gik mosin-go, e ka wanyalo winjo tiend weche. Penjri ane ni, ‘Ka luwore gi kaka ang’eyo Jehova, en yiero mane ma ka atimo to abiro more?’—Som Jo-Efeso 5:17.
10. Ang’o momiyo puonj mag Muma beyo moloyo chike mag joot kata timbe mag ji e alworawa?
10 Nitie sama yiero ma watimo ok bi moro osiepewa nikech wadwaro moro Jehova. Kuom ranyisi, jonyuol moko ma paro ni konyo nyithindgi nyalo chuno nyargi moro mondo odonj e kend gi dichwo ma nigi pesa mang’eny, kata obedo ni winjruok ma dichwono nigo gi Jehova ok otegno. En adier ni gigombo ni nyathigi odag e ngima maber. Kata kamano, ng’ano ma biro konyo nyathigino tego winjruokne gi Nyasaye? Ere kaka Jehova neno wachno? Wanyalo yudo dwoko e Mathayo 6:33. Ndikono jiwo Jokristo mondo gidwar Pinyruoth mokwongo. Kata obedo ni wamiyo jonyuolwa kod joma nie alworawa luor, dwarowa maduong’ en moro chuny Jehova.
PAR MATUT KA POK ITIMO YIERO MOGIK
11. En kido mane miwuoye e Jo-Filipi 1:9, 10 ma biro konyi paro matut ka pok itimo yiero mogik?
11 Bang’ nono kaka puonj mag Muma otudore gi yiero moro midwaro timo, dwarore ni ipar matut kuom gik mopogore opogore ka pok itimo yiero mogik. (Som Jo-Filipi 1:9, 10; ne “full discernment” e study Bible.) Nyalo ma in-go mar pogo weche biro konyi ng’eyo gima yiero ka yiero mibiro timo nyalo keloni. Nitie kinde ma timo yiero moro nyalo bedoni mayot. Kata kamano, nitie yiero moko ma ok yotga timo. Nyalo mar pogo weche biro konyi timo yiero mabeyo kata sama en wach ma kore tek.
12-13. Ere kaka nyalo mar pogo weche nyalo konyi timo yiero maber e weche mag tich?
12 Par ane ranyisini. Wawach ni imanyo tich ma nyalo konyi pidho joodi, to iyudo tije ariyo mopogore. Ibiro nono weche duto motudore gi tijego kaka, gichalo nade, ibiro tiyo kuom seche adi, biro kawi seche adi dhi gi duogo pile ka pile, gi weche mamoko kaka mago. Tijego duto ok tuomre gi puonj moro amora mar Muma. Samoro inyalo hero tich achiel e kind tije ariyogo nikech en tich mihero, kata nikech osache ber. Kata kamano, nitie weche moko ma dwarore ni inon ka pok itimo yiero mogik.
13 Kuom ranyisi, be achiel kuom tijego nyalo chocho chenroni mar dhi e chokruoge mag kanyakla? Be tijno biro mayi thuolo mar bedo gi joodi kikonyogi e weche mamoko moriwo nyaka weche mag chuny? Penjo kaka mago biro konyi yango gadier gik ma dwarore moloyo, tiende ni winjruokni gi Jehova kod rito joodi moloyo mana neno kaka tijno biro miyi pesa mang’eny. Mano biro konyi timo yiero maber ma biro moro Jehova.
14. Ere kaka hera kod nyalo mar pogo weche biro konyowa mondo kik watim gik ma chwanyo jomamoko?
14 Nyalo mar pogo weche bende biro konyowa nono kaka yiero ma wadwaro timo biro mulo jomamoko mondo ‘kik wachwanygi.’ (Fil. 1:10) Mano en gima dwarore ahinya sama watimo yiero e weche kaka rwakruok kod bidhruok. Kuom ranyisi, wanyalo yiero kit rwakruok kata bidhruok moro. To nade ka yiero ma watimo e wechego chwanyo joma ok lam Jehova, kata owete gi nyimine manie kanyakla? Nyalo mar pogo weche biro konyowa chiwo luor ne paro ma gin-go. Hera biro konyowa mondo watim gik ma kelo ber ne jomamoko kendo kik wakal tong’. (1 Kor. 10:23, 24, 32; 1 Tim. 2:9, 10) Mano biro konyowa timo yiero ma nyiso hera kendo ma miyo jomamoko luor.
15. Gin ang’o ma dwarore ni watim ka pok watimo yiero mogik?
15 Ka pok itimo yiero moro maduong’, tem nono gik ma biro dwarore e chopo wachno. Yesu nopuonjowa ni ber “kwano nengo mondi” ka pok wachako timo gimoro. (Luka 14:28) Kuom mano, ber nono thuolo, pesa, kod gik mamoko ma biro dwarore ni itigo mondo itim gima idwaro yierono. Nitie sama nyalo dwarore ni iwuo gi joodu mondo ing’e kaka gibiro konyi timo gima iyierono. Ere kaka timo mano nyalo konyi? Inyalo fwenyo ka dwarore ni itim lokruok moko e yierono, kata ka samoro nitie yiero machielo maber moloyo mano. Bende, ka po ni iriwo joodu e yiero midwaro timono kendo winjo pachgi, biro bedonegi mayot konyi chope.—Nge. 15:22.
TIM YIERO MABIRO MIYO WECHE ODHINI MABER
16. Gin okenge mage ma biro konyi timo yiero maber? (Ne bende sanduk ma wiye wacho ni, “ Kaka Inyalo Timo Yiero Mabeyo.”)
16 Ka iseluwo okenge ma wawuoye malogo, koro iikori timo yiero maber. Bang’ kisetemo ming’eyo weche duto kendo nono puonj mag Muma, inyalo timo yiero ma moro Jehova. Kwaye mondo okonyi timo yiero ma biro miyo weche odhini maber.
17. En ang’o ma dwarore moloyo ma biro konyi timo yiero maber?
17 Kata ka isegatimo yiero mabeyo e kinde mokalo, kik igen rieko kod lony ma in-go, kar mano, ber kigeno Jehova ka pok itimo yiero moro amora. En kende e monyalo miyi ng’eyo makare, onyalo miyo weche odonjni, kendo onyalo miyi nyalo mar pogo weche, ma gin mise mar rieko moa kuome. (Nge. 2:1-5) Jehova nyalo konyi timo yiero ma biro more.—Zab. 23:2, 3.
WER 28 Mako Osiep gi Jehova
