Kata obedo ni Jokristo onego okaw okenge ma owinjore mondo giritre, ber ka gitimo kamano ka giluwo puonj mag Muma. Puonjgo nyiso maler ni ok en gima owinjore mondo Jakristo obed gi bunde moritorego sama jomoko omonje. Ne ane weche ma luwogi:

Ngima en gima ler e wang’ Jehova, to ahinya ahinya ngima dhano. Daudi nong’eyo maler ni Jehova e “soko mar ngima.” (Zab. 36:9) Omiyo, kapo ni Jakristo okawo okenge mopogore opogore mondo oritgo ngimane kata mwandune, onego otim duto monyalo mondo kik oneg ng’ato kendo kik obed gi buch remo.—Rap. 22:8; Zab. 51:14.

Kata obedo ni tiyo gi gik mopogore opogore nyalo miyo ng’ato obed gi buch remo, bedo gi bunde to nyalo miyo ng’ato onek e yo mayot, bed ni otimo kamano ka obothne kata ka ong’eyo. * E wi mano, kapo ni ng’at ma omonji oneno ka in gi bunde, weche nyalo bedo maricho ma tho wuogie.

Ka ne Yesu onyiso jopuonjrene mondo giting’ ligangla e otieno mogik ma ne en e piny ka, ne ok owacho ni giting’gi mondo giritrego. (Luka 22:36, 38) Kar mano, ne onyisogi ni giting’ ligangla nikech ne odwa puonjogi wach moro maduong’. Puonjno en ni jolupne ok onego ogore gi jomoko kata kapo ni omonjgi gi ligangla. (Luka 22:52) Ka ne  Petro ochadho misumba mar jadolo maduong’, Yesu nonyiso Petro niya: “Duok liganglani kare.” Kae to Yesu nowuoyo e adiera moro ma pod tayo jolupne nyaka kawuono, nowacho kama: “Jogo duto ma tiyo gi ligangla notho tho ligangla.”—Mat. 26:51, 52.

Ka luwore gi Mika 4:3, jotich Nyasaye ‘thedho ligenginigi doko kweye, kendo tongegi doko rabetini.’ Jokristo madier gin joma ohero kuwe. Omiyo, giluwo chik ma Nyasaye nomiyo jaote Paulo niya: “Kik uchul richo kar richo ne ng’ato ang’ata. . . . Ka nyalore, to temuru matek mondo udag gi kuwe gi ji duto.” (Rumi 12:17, 18) Kata obedo ni Paulo ne okalo e chandruoge mathoth moriwo nyaka “chandruok e lwet jomecho,” ne ok otemo ketho puonj mag Muma mondo ores ngimane. (2 Kor. 11:26) Kar mano, nogeno kuom Nyasaye kendo nogeno rieko ma wuok e Wach Nyasaye ma en ‘rieko moloyo gik lwenje gi ber.’—Ekl. 9:18.

Jokristo neno ngima kaka gima duong’ moloyo mwandu mag ringruok. Muma wacho ni ngima ok otenore kuom gik mang’eny ma ng’ato nigo. (Luka 12:15) Omiyo, kapo ni isetemo wuoyo e yo mamuol gi jamahundu ma omonji gi bunde to otamore winjo, ber luwo weche ma Yesu nowacho niya: “Kik itam ng’at marach.” Seche moko nyalo kata chunowa ni wamiye gima odwaro. (Mat. 5:39, 40; Luka 6:29) * Gima ber ma nyalo konyowa en ng’eyo kaka wanyalo tang’ mondo kik jomahundu monjwa. Ka wakwedo timbe mag ‘nyisruok nikech gik ma wan-go’ kendo wang’ere kaka Joneno mag Jehova ma ohero kuwe, ok bi bedo mayot mondo jomahundu omonjwa.—1 Joh. 2:16; Nge. 18:10.

Jokristo dewo ahinya kaka jomamoko winjo e chunygi. (Rumi 14:21) Kapo ni Jokristo ofwenyo ni owadwa kata nyaminwa moro nigi bunde moritorego ne joma nyalo monje, mano nyalo bwogogi kendo chwanyogi. Hera ma waherogo owetewa biro chwalowa mondo waket dwachgi motelo ne mekwa kata ka ochuno ni wawe timo moko kuom gik ma sirkal omiyowa rusa mar timo.—1 Kor. 10:32, 33; 13:4, 5.

Jokristo onego ket ranyisi maber. (2 Kor. 4:2; 1 Pet. 5:2, 3) Kapo ni Jakristo moro nigi bunde ma oritorego ka jomoko dwaro monje to osemiye siem to pod odhi nyime timo kamano, mano nyiso ni ok oket ranyisi maber. Ok obi winjore yudo migepe e kanyakla. Mano bende e gima biro timore ne Jakristo ma ting’o bunde nikech tich motiyo. Nyalo bedo maber ka Jakristono omanyo tich machielo. *

Kaka Jakristo yiero mar rito ngimane, joode, kod mwandune en yiero mare owuon, mana kaka oyieroga tich ma doher timo. Puonj manie Muma nyiso rieko ma Nyasaye nigo kod kaka oherowa. Jokristo motegno ma luwo puonjgo ok bi bedo gi bunde ma giritorego ka jomoko omonjogi. Ging’eyo maler ni ka giketo genogi kuom Nyasaye kendo giluwo puonj mag Muma e ngimagi, Nyasaye biro ritogi e yo maber.—Zab. 97:10; Nge. 1:33; 2:6, 7.