1. Ang’o momiyo wanyalo wacho ni Jehova e wuon gik moko duto? (Ne picha man malo.)

JEHOVA e wuon gik moko duto! Muma wacho ni ‘polo, piny, kod gik moko duto ma ni e piny’ gin meke. (Rap. 10:14; Fwe. 4:11) Kuom mano, nikech dhano bende ni e piny, giduto gin mag Jehova. (Zab. 100:3) Kata kamano, kuom higni duto, Jehova osebedoga gi joma oyiero mondo obed joge.

2. Gin jomage ma Muma wacho ni gin jo Jehova e yo makende ahinya?

² Kuom ranyisi, Zaburi 135 luongo Jo-Israel ma ne gin jotich Jehova ni “mwandune moyier.” (Zab. 135:4) E wi mano, bug janabi Hosea nokoro ni jomamoko ma ok gin Jo-Israel bende ne dhi bedo jo Jehova. (Hos. 2:23) Weche ma ne Hosea okorogo nochopo ka ne Jehova ochako rwako joma a e ogendni mamoko mondo gin bende giyud thuolo mar dhi locho gi Kristo. (Tich 10:45; Rumi 9:23-26) ‘Oganda malerno’ bedo jo Jehova e yo makende ahinya nikech owalgi gi roho maler, kendo gibiro yudo ngima e polo. (1 Pet. 2:9, 10) To nade Jokristo mathoth e kindewagi ma nigi geno mar dak nyaka chieng’ e piny ka? Gin bende Jehova luongogi ni ‘joge moyiedho.’​—Isa. 65:22.

3. (a) E kindegi, gin jomage ma nigi winjruok maber gi Jehova? (b) Ang’o ma wadwaro nono e sulani?

 ³ E kindegi, “kueth matin” ma nigi geno mar dhi e polo kod “rombe mamoko” ma nigi geno mar dak e piny loso “kueth achiel” ma Jehova ogeno ahinya kaka joge. (Luka 12:32; Joh. 10:16) Dwaher nyiso kinde duto ni wamor gi thuolo ma jaber ma Jehova omiyowa mar bedo gi winjruok maber kode. Sulani dwaro konyowa neno yore ma wanyalo timogo mano.

4. Achiel kuom yore ma wanyisogo Jehova ni wamor gi thuolo momiyowa en mane, to Yesu notimo mano nade?

⁴ Achiel kuom yore ma wanyisogo Jehova ni wamor gi thuolo ma omiyowa en chiworene gi chunywa duto. Sama itisowa e pi, wanyiso e lela ni wan mag Jehova kendo ni wayie bolorene. (Hib. 12:9) Mano e gima Yesu notimo. Sama ne itise, ne chalo ka gima onyiso Jehova ni, “A Nyasacha, amor ahinya timo gi midwaro.” (Zab. 40:7, 8) Kata obedo ni Yesu ne onyuol e oganda ma ne osechiwore ne Jehova, pod nonyiso kokalo kuom batiso ni noyie chiwore mondo otim dwach Jehova.

5, 6. (a) Jehova nowinjo nade ka ne obatis Yesu? (b) Chiw ane ranyisi ma nyiso ni Jehova morga sama wachiworene kata obedo ni en e wuon gik moko te.

⁵ Jehova nowinjo nade ka ne obatis Yesu? Muma nyisowa kama: “Bang’ ka nosebatise, gikanyono Yesu noa e pi; to ne! polo noyawore kendo noneno roho mar Nyasaye ka biro kuome e kit akuru. Kendo ne! Dwol moro bende noa e polo ka wacho niya: ‘Ma en Wuoda ma ahero kendo ma aseyiego.’” (Mat. 3:16, 17) Kata obedo ni Yesu ne en Wuod Jehova chakre chon, Jehova pod ne mor ka noneno ka Wuodeno nyiso ayanga ni noikore tiyone e okang’ malach. Wan bende Jehova bedo ma mor kodwa sama wachiworene kendo oguedhowa.​—Zab. 149:4.

⁶ Par ane ranyisini: Wuoro moro oheroga miyo nyare ma pod dhi skul pesa matin monyalo ng’iewogo tamtam. Chieng’ moro, nyareno poye gi tai moro ma jaber. Kare nyareno osegabedo ka kuno moko kuom pesa ma wuon-gi miyega! Donge pesa ma nyakono ong’iewogo tai gin agina mag wuon-gi? Donge mano chalo mana ka gima odwoko ne wuon-gi gima wuon-gi e ma omiye? Wuoro ma jahera ok bi penjore penjo ma kamago. Kar mano, obiro kawo taino gi mor nikech ong’eyo ni mano yo ma nyare onyisego ni ohere. Obiro rito taino maber ahinya. E yo ma chalo kamano, Jehova morga matek sama watimo gik ma nyiso ni wahere kendo ni en kende e ma wachiworene.​—Wuok 34:14.

7. Bug Malaki nyiso nade kaka Jehova winjo e chunye sama ng’ato ochiwore mondo otine?

⁷ Som Malaki 3:16. Ka po ni pok ichiwori ne Jehova mi obatisi, par ane gimomiyo dwarore ni ikaw okang’ ma kamano. En adier ni chakre sama nomakie ichni, ne ibedo mwandu Jehova mana kaka dhano mamoko duto. Kata kamano, par ane kaka Jehova nyalo bedo ma mor kichiwori mondo itim dwache nikech ing’eyo ni en e jaloch e wi gik moko duto. (Nge. 23:15) Jehova bedo ma mor sama ng’ato ochiworene, kendo ondiko nying ng’atno e ‘kitape mar paro.’

8, 9. Ang’o ma Jehova dwaro ni joma nyinggi ni e ‘kitape mar paro’ otim?

 ⁸ Sama Jehova ondiko nyingwa e ‘kitape mar paro,’ nitie gik ma koro nyaka watim. Malaki nowacho ni nyaka ‘waluor Jehova kendo wapar nyinge.’ Ka wabukore wachako chiwore ne gimoro machielo, mano nyalo miyo Jehova oruch nyingwa e kitap ngima.​—Wuok 32:33; Zab. 69:28.

⁹ Omiyo, chiwruok ne Jehova ok en mana singruok kod batiso kende. Mago gin mana gik ma ng’ato timo dichiel to kalo. Mondo wanyis ni wan mag Jehova, nyaka wadhi nyime luwo chikene kendo timo dwache e ngimawa duto.​—1 Pet. 4:1, 2.

10. En pogruok mane ma nyaka nenre ayanga e kind joma tiyo ne Jehova kod joma ok tine?

¹⁰ E sula mokalo, ne wawuoyo e wi Kain, Solomon, kod Jo-Israel. Giduto ne giwacho ni gilamo Jehova, kata kamano, ne ok gichiworene gi chunygi duto. Ranyisi ma ne wanenogo nyiso maler ni ng’ato ang’ata ma wacho ni en ng’at Jehova adier nyaka makre gi gik makare kendo osin gi gik maricho. (Rumi 12:9) Mano e momiyo bang’ ka Malaki nosewacho ni nitie joma Jehova ndiko nyinggi e ‘kitape mar paro,’ Jehova nowacho ni pogruok nyaka nenre ayanga ‘e kind joma kare gi joma richo, kendo e kind joma tiyone gi joma ok tine.’​—Mal. 3:18.

11. Ang’o momiyo onego onenre ayanga ni wachiwore ne Jehova gi chunywa duto?

¹¹ Kare nitie yo machielo ma wanyalo nyisogo ni wamor gi thuolo ma Jehova omiyowa mar bedo joge. Dongruok ma watimo e weche Nyasaye nyaka ‘nenre ayanga ne ji duto.’ (1 Tim. 4:15; Mat. 5:16) Penjri kama: ‘Be jomamoko nyalo neno ayanga ni achiwora ne Jehova gi chunya duto? Be amanyoga thuolo mag nyiso jomamoko ni an Janeno mar Jehova?’ Jehova nyalo winjo marach ahinya ka ok wanyis jomamoko ni wan joge, to oseyierowa mondo wabed joge.​—Zab. 119:46; som Mariko 8:38.

12, 13. Ang’o ma Jokristo moko timo ma miyo tek ng’eyo ni gin Joneno mag Jehova?

 ¹² Gima lit en ni nitie Jokristo moko ma tek ng’eyo ka be ‘gitiyo ne Nyasaye kata ok gitine’ nikech gitemo kopo “chuny kod paro ma chiko pinyni.” (1 Kor. 2:12, weche moler piny) Mano e chuny ma miyo ji luwo “gombo mag ringruok.” (Efe. 2:3) Kuom ranyisi, kata obedo ni osenyiswa nyading’eny yo monego warwakrego kendo wabidhrego, nitie Jokristo moko ma pod rwakore marach. Girwako lewni moridogi ti kata ma nyiso duggi, kendo seche moko giyoro gi lewnigo nyaka e chokruogewa mag lamo. Moko bende lielo wigi ma galagala kata suko wigi e yo ma mako mana dho ji. (1 Tim. 2:9, 10) Omiyo, sama gin e kind ji, tek pogo ni gin jo Jehova koso gin ‘osiepe piny.’​—Jak. 4:4.

¹³ Nitie yore mamoko bende ma Joneno moko osenyisogo ni pok giwere gi pinyni chuth. Kuom ranyisi, kit miel ma gimielo sama gin e nyasi moko kata gik ma gitimo kuno ok owinjore gi Jokristo. Bende, pichnigi ma giketo kuonde mitudruokie gi osiepe e Intanet kod gik ma gindiko kuondego ok owinjore gi joma wacho ni gin jo Jehova. Kata obedo ni samoro pok gitimo richo madongo ma dimi kanyakla okawnegi okang’, timbegigo nyalo ketho mbesegi gi osiepegi ma temo matek mondo gisik ka giler e wang’ Jehova kod joge.​—Som 1 Petro 2:11, 12.

14. En ang’o ma nyaka watim ka wadwaro ni wasik ka wan gi winjruok maber gi Jehova?

¹⁴ Piny sani jiwo ahinya “gombo mag ringruok, gi gombo mag wang’, kod nyisruok nikech gik ma ng’ato nigo e ngima.” (1 Joh. 2:16) To nikech wan mag Jehova, ijiwowa ni “watamre timbe ma ok nyis luoro Nyasaye kod gombo mag piny, kendo mondo wadag ka wanyiso ni wan gi paro malong’o gi tim makare kod chiwruok chuth ne Nyasaye e ndalo ma sani.” (Tito 2:12) Gimoro amora ma watimo, obed gik ma wawacho, yo ma wachiemogo kata methogo, rwakruokwa, bidhruokwa, kod yo ma watimogo tijewa, onego onyis ayanga ni wachiwore ne  Jehova gi chunywa duto.​—Som 1 Jo-Korintho 10:31, 32.

15. Ang’o momiyo onego watim gik ma nyiso ni wahero owetewa gi nyiminewa kendo wabed mang’won kodgi?

¹⁵ Yo machielo ma wanyisogo ni wamor gi thuolo ma Jehova omiyowa mar bedo joge en hero Jokristo wetewa. Gin bende gin mag Jehova. Ka waparo mano kinde duto, wabiro siko ka watimo gik ma nyiso ni wahero owetewa gi nyiminewa kendo wang’won kodgi. (1 The. 5:15) Yesu nonyiso jolupne niya: “Ma e ma nomi ji duto ong’e ni un jopuonjrena​—ka un gi hera e kindu uwegi.”​—Joh. 13:35.

16. En ranyisi mane ma yudore e Chik Musa ma konyowa ng’eyo yo ma Jehova nenogo jotichne?

¹⁶ Mondo wang’e kaka onego wane jomamoko e kanyakla, wapar ane ranyisini. Gik ma nitiyogo e hekalu mar Jehova ne gin gik mowal mondo otigo mana e lamo maler kende. Chik Musa nonyiso maler kaka nonego bed ni irito gigo, kendo joma noketho chikno ne inego. (Kwan 1:50, 51) Ka koro Jehova ne dwaro ni ji orit gik ma ne itiyogo e hekalugo maber, donge mano nyiso ni doher ni joge mochiworene orit maber moloyo? Nitie kinde ma nowacho ne joge wach moro ma konyowa ng’eyo kaka onenowa. Nonyisogi kama: ‘Ng’ama mulou mulo tong wang’a.’​—Zek. 2:8.

17. Gin ang’o ma Jehova ‘chikone ite kendo owinjo’?

¹⁷ Malaki nowacho ni Jehova “chiko ite, kendo owinjo” gik ma jotichne wacho e kindgi. (Mal. 3:16) Kuom adier, “Jehova ong’eyo . . . joge.” (2 Tim. 2:19) Ong’eyo maler gik moko duto ma watimo kendo ma wawacho. (Hib. 4:13) Ka ok wabedo mang’won gi Jokristo wetewa, Jehova neno mano. To koma chielo, ka warwakogi, wachiwonegi gigewa, waweyonegi kethogi, kendo wang’won kodgi, mago be Jehova neno.​—Hib. 13:16; 1 Pet. 4:8, 9.

18. Ere kaka wanyalo dhi nyime nyiso Jehova ni wamor gi thuolo makende momiyowa mar bedo joge?

¹⁸ Dwaher ahinya dhi nyime nyiso Jehova ni wamor gi thuolo makende momiyowa mar bedo joge. Waseng’eyo ni bedo joge kendo chiworene gi chunywa duto en gima nyiso rieko. Kata obedo ni wadak “e kind tieng’ morochore kendo mobam,” dwaher ni ji duto ong’ewa kaka joma ‘ler kendo ma onge bura,’ kendo ma ‘rieny kaka ler e piny.’ (Fil. 2:15) Wakwedo gik maricho duto. (Jak. 4:7) Bende, wahero Jokristo wetewa kendo wamiyogi luor ka wang’eyo maler ni gin be gin mag Jehova.​—Rumi 12:10.

19. Gin ang’o ma Jehova singo ne joge?

¹⁹ Muma singonwa ni “Jehova ok nowit joge.” (Zab. 94:14) Wan gadier gi wachno ma kata bed ni waromo gi chandruok mane. Kata mana tho ok nyal pogowa gi hera ma Jehova oherowago. (Rumi 8:38, 39) “Ka wangima, wangima mondo wami Jehova duong’, kendo ka watho, watho mondo wami Jehova duong’. Omiyo, bed ni wangima kata watho, pod wan mag Jehova.” (Rumi 14:8) Warito gi siso kinde ma Jehova biro chieroe osiepene duto mosetho. (Mat. 22:32) To kata mana gi e sani, nitie gueth mang’eny ma wayudo. Mana kaka Muma wacho, “oganda ma mor en oganda ma Jehova e Nyasachgi, joma oseyiero mondo obed joge.”​—Zab. 33:12, NW.