1. Ka luwore gi 3 Johana 3, 4, ang’o ma miyowaga mor?

PAR ane kaka jaote Johana ne mor ka nowinjo ni joma nosepuonjo adiera pod ne dhi nyime tiyo ne Jehova! Ne giromoga gi chandruoge mang’eny, kata kamano, jaote Johana nodhi nyime tego yiegi kendo nonenogi kaka nyithinde. Wan bende wabedoga ma mor ahinya e kindewagi sama waneno ka nyithindwa ma wanyuolo kata joma wapuonjo adiera, chiwo ngimagi ne Jehova kendo gidhi nyime tiyone.​—Som 3 Johana 3, 4.

2. Ang’o momiyo Johana nondiko barupene adek?

² Nyalo bedo ni Johana nodak e taon mar Efeso kata machiegni gi taondno e higa mar 98. Nyalo bedo ni nodar odhi kuno bang’ ka nosegonye e tuech e chula mar Patmo. E kindeno e ma roho mar Jehova notaye mi ondiko barupe adek. Gima duong’ momiyo nondiko barupego ne en ni mondo ojiw Jokristo odhi nyime bedo gi yie motegno kuom Yesu kendo gisik ka giwuotho e adiera.

3. Gin penjo mage ma wabiro yudo dwokogi?

³ Johana e jaote ma nodak higni mang’eny moloyo joote mamoko, kendo puonj mag miriambo ma nosedonjo e kanyakla ne chando chunye ahinya. * (1 Joh. 2:18, 19, 26) Joma nong’anjo ma ne puonjo miriambogo ne wacho ni ne ging’eyo Nyasaye, kata kamano, ne ok giluw chikene. We wanon ane siem ma Johana nochiwo e barupego. Sama watimo mano, wabiro yudo dwoko mag penjo adekgi: Tiend wuotho e adiera en ang’o? Ang’o ma nyalo monowa wuotho e adiera? To ere kaka wanyalo konyo jowetewa mondo gisik e adiera?

4. Ka luwore gi 1 Johana 2:3-6 kod 2 Johana 4, 6, wuotho e adiera oriwo timo ang’o?

⁴ Mondo wawuoth e adiera, nyaka wang’e adiera ma yudore e Muma ma en Wach Nyasaye. E wi mano, nyaka ‘wamak chike Jehova.’ (Som 1 Johana 2:3-6; 2 Johana 4, 6.) Yesu noketonwa ranyisi maber mogik e luwo chike Jehova. Omiyo, achiel kuom yore madongo ma wanyisogo ni wamako chike Jehova en luwo ondamo mag Yesu machiegni kaka nyalore.​—Joh. 8:29; 1 Pet. 2:21.

5. Mondo wadhi nyime wuotho e adiera, ang’o ma nyaka wabedgo gadier?

⁵ Mondo wadhi nyime wuotho e adiera, nyaka wabed gadier chuth ni Jehova e Nyasaye ma puonjowa adiera, kendo ni gimoro amora monyisowa e Muma en adier. Bende, nyaka wabed gadier chuth ni Yesu e Mesia ma nosingi. E kindewagi, ji mang’eny keto kiawa ka be oseket Yesu obedo Ruoth e Pinyruodh Nyasaye. Johana nowacho ni ne nitie “jowuond mang’eny” ma ne nyalo wuondo joma ne ok oikore siro adiera ma ne ging’eyo e wi Jehova gi Yesu. (2 Joh. 7-11) Nondiko kama: “Jamiriambo en ng’a, ka ok mana jal ma kwer ni Yesu ok en Kristo?” (1 Joh. 2:22) Ka ok wadwar ni owuondwa, nyaka wapuonjre Wach Nyasaye adimba. Mano kende e yo ma wanyalo ng’eyogo Jehova kod Yesu. (Joh. 17:3) To mano e ka wabiro bedo gadier ni wawuotho e adiera.

6. Achiel kuom gik ma nyalo mono Jokristo ma pod tindo wuotho e adiera en ang’o?

⁶ Jokristo duto nyaka sik kotang’ mondo puonj mag dhano kik lalgi. (1 Joh. 2:26) To moloyo, Jokristo ma hikgi tin onego otang’ ahinya gi obadhono. Nyaminwa Alexia * ma jahigni 25 ma a e piny France wacho kama: “Ka ne pod atin, puonj mag pinyni ne chochoga pacha ahinya, kuom ranyisi, puonj ma wacho ni gik moko nosieko kendgi ma ok ochuegi, kod puonj mamoko mag dhano. Nitie kata kinde ma puonjgo nochako mora. Kata kamano, chunya ne nyisa ni ne ok onego achak kwedo puonj mag  Jehova kendo yie ayiea gi gik ma jopuonj ne puonjo e skul.” Alexia nonono buk miluongo ni Life​—How Did It Get Here? By Evolution or by Creation? Bang’ jumbe matin, kiawa ma ne en-go e wi chuech norumo. Owacho kama: “Bugno nokonya bedo gadier ni Muma puonjo adiera. Nafwenyo ni luwo puonj mag Muma e ma ne dhi miya mor kod kue.”

7. En obadho mane ma nyaka watang’go, to nikech ang’o?

⁷ Jokristo duto​—bed ni gin joma dongo kata joma tindo​—onego otem ahinya mondo kik gidonj e obadho mar wuondore ni gitiyo ne Jehova to konchiel gitimo timbe ma ok more. Johana nowacho ni ok wanyal wuotho e adiera to e sechego bende wadak e ngima mar anjawo. (1 Joh. 1:6) Ka po ni wadwaro ni Jehova oyie kodwa sani kod e kinde ma biro, nyaka watim gik moko ka waketo e pachwa ni onenowa kinde duto. Kuom adier, onge richo moro amora ma wanyalo pando Jehova.​—Hib. 4:13.

8. En paro mane ma nyaka wakwed?

⁸ Nyaka wakwed paro ma jopiny nigo e wi richo. Jaote Johana nondiko niya: “Ka wawacho ni, ‘Waonge gi richo,’ wawuondore wawegi.” (1 Joh. 1:8) E ndalo Johana, joma nong’anjo moweyo adiera ne wacho ni ng’ato nyalo timo atima richo goyiem to pod Jehova yie ayiea kode. Mano e paro ma ji mang’eny nigo e kindewagi. Giwacho ni giyie kuom Nyasaye, to kata kamano, ok giluw gima Jehova wacho e wi richo, to ahinya-ahinya kodok korka weche terruok. Gineno ni gin gi ratiro mar timo gik ma gihero ma ok gidewo ni Jehova to wacho ang’o.

9. Gin ber mage ma Jokristo ma pod tindo yudoga sama gimakore motegno gi puonj mag Muma?

⁹ Jokristo ma pod tindo nyalo yudo  ka seche moko jo klasgi kata joma gitiyogo thung’ogi mondo gidonj e timbe mag terruok. Mano e gima notimore ne Aleksandar. Owacho kama: “Nyiri moko e skundwa nochako sera. Ne ginyisa ni ka aonge gi osiepna ma nyako to kare nanindoga gi chwo wetena.” Ka po ni iromo gi pek ma kamago, ng’e ni kimakori motegno gi puonj mag Muma, ibiro winjo maber e chunyi, ibiro geng’o tuoche moko, kendo ok ibi ketho winjruok mari gi Jehova. Kendo sa asaya miloyo tem moro, ibiro yudo teko mar loyo tembe mamoko. Ng’e bende ni paro mochochni ma ji nigo e wi nindruok a kuom Satan. Omiyo, sama ikwedo parogo, ‘iloyo ng’at marach.’​—1 Joh. 2:14.

10. Weche ma ni e 1 Johana 1:9 nyalo jiwowa nade mondo wati ne Jehova gi chuny maler?

¹⁰ Wang’eyo ni Jehova e ma nigi ratiro mar nyisowa ni tim moro en richo kata ooyo. Kendo watemo ahinya mondo kik wadonj e richo. Bende, ka watimo richo, wahulo richowa ne Jehova e lamo. (Som 1 Johana 1:9.) To ka en richo maduong’, wamanyo kony kuom jodongo ma Jehova oketo mondo otawa. (Jak. 5:14-16) Kata kamano, ok onego wayie mondo richo ma Jehova noseweyonwa osik ka chando chunywa. Nikech ang’o? En nikech Wuonwa ma jahera nosechiwonwa misango mar Wuode mondo owenwa richowa. Sama Jehova oweyo ne ng’ato richone, oweyone chuth. Omiyo, wanyalo tiyo ne Jehova gi chuny maler.​—1 Joh. 2:1, 2, 12; 3:19, 20.

11. Ang’o monego watim mondo miriambo ma jowasikwa lando kik keth yiewa?

¹¹ Nyaka wakwed puonj mag joma ong’anjo moweyo adiera. Chakre kinde Jokristo mokwongo nyaka sani, Jachien osebedo ka tiyo gi jowuond e pidho  kodhi mag kiawa e pach jotich Nyasaye. Omiyo, onego wang’e pogo adiera gi miriambo. * Jowasikwa nyalo tiyo gi intanet mondo gimi kik wagen kuom Jehova kod owetewa. Ng’e ni miriambogo duto owuok kuom Satan, omiyo, kwedgi matek!​—1 Joh. 4:1, 6; Fwe. 12:9.

12. Ang’o momiyo dwarore ni wagen adiera ma wasepuonjore?

¹² Mondo wakwed Satan, nyaka wabed gi yie kuom Yesu kendo wachiw luor ne migawo ma en-go e chopo dwach Nyasaye. Bende, nyaka wagen yo ma Jehova tiyogo e pidho joge e kindewagi. (Mat. 24:45-47) Mondo mano onyalre, dwarore ni wapuonjre Wach Nyasaye pile. Kae to yiewa biro chalo gi yath ma tiendene ogurore maber e lowo. Paulo nojiwo wachno ka nondiko ne kanyakla ma ne ni Kolosai. Nondiko kama: “Mana kaka userwako Kristo Yesu Ruoth, dhiuru nyime wuotho e winjruok achiel kode ka uguroru kendo ka igerou kuome, bende ka umedo chung’ motegno e yie.” (Kol. 2:6, 7) Kata Satan gi lange tim ang’o, ok ginyal mono Jakristo wuotho e adiera ka Jakristono osetimo duto monyalo mondo oteg yiene.​—2 Joh. 8, 9.

13. Ang’o ma wang’eyo ni Satan nyalo timonwa, to nikech ang’o?

¹³ Ok onego wahum sama jopinyni osin kodwa. (1 Joh. 3:13) Johana paronwa ni “piny duto ni e teko mar ng’at marach.” (1 Joh. 5:19) Kaka giko mar pinyni medo kayo machiegni, e kaka mirimb Satan be medo bedo mager. (Fwe. 12:12) Nitie yore mamoko motiyogo e monjowa mopogore mana gi terruok kod miriambo mag joma ong’anjo ne adiera. Kuom ranyisi, onyalo tiyo bende gi sand. Satan ong’eyo ni odong’ gi kinde machuok monyalo temo chochogo tijwa mar lendo kata ketho yiewa. Mano e momiyo pinje moko ogoyo tijwa marfuk. To mano ok mon owetewa gi nyiminewa ma ni e pinjego dhi nyime nano. Kinda margi nyiso maler ni kata Jachien sandwa manade, pod wanyalo loye!

14. En yo mane ma wanyalo konyogo owetewa gi nyiminewa mondo gisik e adiera?

¹⁴ Ka wadwaro konyo owetewa gi nyiminewa mondo gisik e adiera, nyaka wakechgi. (1 Joh. 3:10, 11, 16-18) Dwarore ni waherre, ok mana sama weche dhi maber kende, to bende sama nitie chandruok. Kuom ranyisi, be ing’eyo owadwa kata nyaminwa moro ma watne otho, kendo odwaro hoch kata kony moro amora? Koso dibed ni isewinjo ni masira moro oyudo Jokristo wetewa moko mi oketho utegi kod Ute Romo maggi? Wanyiso ni wahero Jokristo wetewa kendo wakechogi kokalo kuom gik ma wawacho kod ma watimo.

15. Ang’o monego watim ka luwore gi 1 Johana 4:7, 8?

¹⁵ Sama waherore, waluwo ranyisi mar Wuonwa ma ni e polo. (Som 1 Johana 4:7, 8.) Yo maduong’ ma wanyisogo jowetewa hera en weyonegi kethogi. Kuom ranyisi, ng’ato nyalo chwanyowa kae to okwayowa ng’wono. Wanyalo nyiso ni wahere kuom weyone kethoneno ma ok wachieronego kendo. (Kol. 3:13) Owadwa moro ma nyinge Aldo nowinjo ka owadwa machielo ma nomiyo luor  ahinya wuoyo marach kuom ogandagi. Aldo wacho kama: “Nasiko ka akwayo Jehova mondo okonya agol kuoma paro moro amora marach ma nanyalo bedogo e wi owadwano.” To nitie gima chielo ma Aldo notimo. Nokwayo owadwano mondo gidhi kode e tij lendo. Sama ne gilendo, Aldo nonyise kaka wach ma nowachono nochwanye. Aldo medo wacho kama: “Ka ne owadwano owinjo kaka wechenego nochwanya, nokwaya ng’wono. Dwonde ne nyiso maler ni noywago ang’e kuom gima nowachono. Ne watieko lendo ka koro wan osiepe.”

16-17. Ang’o monego wang’ad e chunywa?

¹⁶ Barupe adek ma Johana nondiko ne Jokristo wetene nyiso maler kaka noherogi kendo nodewogi. To mano kaka wamor ng’eyo ni Jehova osewalo owete gi nyimine ma bende oherowa kaka Johana mondo obi oloch gi Kristo e polo!​—1 Joh. 2:27.

¹⁷ Warwakuru puonj ma wayudo e sulani. Wang’aduru e chunywa ni wabiro dhi nyime wuotho e adiera kendo luwo chike mag Jehova e ngimawa duto. Puonjri Muma kendo igen kuom gik mipuonjorigo. Bed gi yie motegno kuom Yesu. Kwed puonj mag dhano kod miriambo mag joma ong’anjo moweyo adiera. Ked matek mondo kik idag e ngima mar wuondruok kendo kik idonj e richo. Luw chike mag Jehova gi chunyi duto. Bende, kony oweteni gi nyimineni mondo gisik ka giwuotho e adiera kuom weyonegi kethogi sama gichwanyi, kendo konyogi sama gin gi chandruok. Ka watimo kamano, wabiro dhi nyime wuotho e adiera kata bed ni waromo gi pek ma chalo nade.