1. En ang’o ma Jehova osetimoni?

ERE kaka nibedo Janeno mar Jehova? Nyalo bedo ni nikwongo winjo “wach maber” koa kuom jonyuolni, jatich wadu, jaskul wadu, kata samoro nolendni ot ka ot. (Mar. 13:10) Kae to ng’ato notiyo gi thuolone mang’eny kotimo kinda mondo opuonji Muma. E kinde ma ne upuonjoruno, nichako hero Jehova kendo in be nifwenyo ni oheri. Jehova noywayi e adiera, kendo koro kaka japuonjre Yesu Kristo, in gi geno mar dak nyaka chieng’. (Joh. 6:44) Onge kiawa ni igoyo ne Jehova erokamano nikech nochwalo ng’ato mopuonji adiera kendo Jehova noyie rwaki kaka achiel kuom jotichne.

2. Ang’o ma wabiro nono e sulani?

² Nikech koro waseng’eyo adiera, wan bende wan gi thuolo makende mar konyo jomamoko mondo giriwre kodwa e wuodh ngima. Nyalo bedo ni lendo ot ka ot yotnwa. Kata kamano, samoro ok yotnwaga chako puonjruok Muma gi joma wa lendonegi ot ka ot kendo tayogi. Dibed ni gima kamano timoreni? Ka en kamano, to kare paro mibiro chiw e sulani nyalo konyi. Wabiro wuoyo e wi gima chwalowaga mondo walok ji obed jopuonjre Yesu. Wabiro nono bende pek ma nyalo monowa tayo puonjruok mar Muma. Mokwongo, we wanon ane gimomiyo onego wabed jopuonj mag wach maber, to ok mana joland wach maber kende.

3. En ang’o momiyo walendo?

³ Ka ne Yesu ni e pinyka, nomiyo jolupne chik ma noting’o migepe ariyo. Mokwongo, Yesu nonyisogi ni giland wach maber  mar Pinyruoth, kendo noleronegi kaka ne gidhi timo tijno. (Mat. 10:7; Luka 8:1) Kuom ranyisi, Yesu nonyisogi gima nonego gitim sama ji orwako wach kod sama ji ok orwako wach. (Luka 9:2-5) Nonyiso jopuonjrene bende okang’ ma ne gidhi landoe wach maber kowachonegi ni ne gidhi lando wach maber “e piny mangima mondo obed ranyisi ne ogendni duto.” (Mat. 24:14; Tich 1:8) Bed ni ji ne dhi rwako wach e yo mane, jopuonjrego ne onego owuo gi ji e wi Pinyruodh Nyasaye kod gima ne odhi timo.

4. Ka luwore gi Mathayo 28:18-20, en ang’o ma nyaka watim mopogore gi lando wach Pinyruoth?

⁴ Wach mar ariyo ma Yesu nochiko jopuonjrene ni otim en mane? Nonyiso jolupne ni gipuonj ji timo gik moko duto ma nochikogi. Kata kamano, be dibed ni tij lendo kod puonjo nomi mana Jokristo ma kinde mokwongo kende kaka jomoko wachoga? Ok en kamano kata matin. Yesu nowacho ni tijni ne dhi dhi nyime nyaka e “nyaka e giko mar ndalo,” tiende ni nyaka e ndalowagi. (Som Mathayo 28:18-20.) Nenore ni Yesu nochiwo chikni ka nofwenyore ne jopuonjrene mokalo 500. (1 Kor. 15:6) Kendo e fweny ma nomiyo Johana, Yesu nonyiso maler ni dwarore ni jopuonjrene duto okony jomamoko mondo ging’e Jehova.​—Fwe. 22:17.

5. Ka luwore gi 1 Jo-Korintho 3:6-9, en ranyisi mane ma Paulo nochiwo ma nyiso tudruok ma nitie e kind lendo kod puonjo?

⁵ Jaote Paulo nopimo tij loko ji obed jopuonjre gi tij japur konyisogo ni tijno oriwo gik mathoth moloyo mana pidho kodhi kende. Noparo ne Jo-Korintho kama: “An ne apitho, Apolo ne oolo pi, . . . un to un puoth Nyasaye ma opidho.” (Som 1 Jo-Korintho 3:6-9.) Kaka jotich e “puoth Nyasaye,” wapidho kodhi sama walando ne ji wach maber kendo waolo pi sama wapuonjogi. (Joh. 4:35) Kata kamano, wang’eyo ni Nyasaye e ma miyo kodhi dongo, tiende ni en e ma oywayo ji ire.

6. Tijwa mar puonjo oriwo timo ang’o?

⁶ Wamanyo joma chunygi “ni kare ne ngima mochwere.” (Tich 13:48) Mondo wakony joma kamago obed jopuonjre Yesu, nyaka wakonygi mondo (1) giwinj tiend gik mwapuonjogi e Muma, (2) giyie kodgi, kendo (3) gitim gik ma gisepuonjorego. (Joh. 17:3; Kol. 2:6, 7; 1 The. 2:13) Ji duto manie kanyakla nyalo konyo jopuonjre mag Muma kuom ketonegi ranyisi maber, nyisogi hera, kendo rwakogi gi mor sama gibiro e chokruoge. (Joh. 13:35) Jalendo ma puonjo ng’ato Muma bende biro dwarore ni okaw thuolo mang’eny ka okonyo japuonjre mondo owe puonj mag miriambo kod timbe maricho “mogurore motegno” e chunye. (2 Kor. 10:4, 5) Nyalo kawo dweche mathoth ka wakonyo ng’ato mondo okaw okengego mi ochop e batiso. Kata kamano, konyo ng’ato mondo okaw okengego keloga nyak mathoth.

7. En ang’o ma chwalowaga mondo walend ne ji kendo walokgi gibed jopuonjre Yesu?

⁷ Ang’o momiyo walando wach maber kendo loko ji obed jopuonjre Yesu? Mokwongo, en nikech wahero Jehova. Sama itimo duto minyalo mondo irit chik ma ne Yesu omiyowa mar lando wach maber kendo loko ji obed jopuonjrene, inyiso ni ihero Nyasaye. (1 Joh. 5:3) Par ane wachni: Hera miherogo Jehova e ma osemiyo idhiga lendo ot ka ot. Be chikno ne yotni luwo? Samoro ne ok en kamano. Chieng’ ma ne ihango lendo ot ka ot, be niwinjo kiluor? En adier ni samoro niluor! Kata kamano, ning’eyo ni ma e tich ma  Yesu dwaro ni mondo itim, kendo niyie luwo chikno. Bende, nyalo bedo ni kaka kinde ne medo kalo e kaka tij lendo ne medo mori. To nade tayo jopuonjre mag Muma? Be iwinjoga kiluor puonjo ji Muma? Samoro en kamano. Kata kamano, kikwayo Jehova mondo omiyi chir mar tayo jopuonjre, obiro konyi bedo gi siso mar loko ji obed jopuonjre Yesu.

8. Ka luwore gi Mariko 6:34, en ang’o machielo ma chwalowa mondo wapuonj jomamoko?

⁸ Mar ariyo, hero jowetewa chwalowa mondo wapuonjgi adiera. Nitie chieng’ ma Yesu kod jolupne nool bang’ tiyo matek ka giyalo wach maber. Ne gigombo ni gidhi kamoro giyueye, kata kamano, oganda moro maduong’ nofwenyo kuma ne gidhiyeno. Nikech Yesu nokechogi, nochako puonjogi “gik mang’eny.” (Som Mar. 6:34.) Nochukore ahinya mondo opuonj ji odiechieng’no. Ang’o momiyo notimo kamano? Yesu noketore e chal mar ogandano. Noneno kaka ogandano ne chandore kod kaka ne dwarore ni omigi geno, kendo noyie konyogi. Kamano e kaka ji chalo sani. Ginyalo nenore gi oko ka joma mor, to mano ok e adiera mar wach. Gichalo gi rombe ma bayo abaya molal, ma onge gi jakwath ma di tagi. Paulo nowacho ni joma kamago onge gi Nyasaye kendo gionge geno. (Efe. 2:12) Gin e yo “ma tero ji e kethruok.” (Mat. 7:13) Ka waketo e paro kaka joma ni e alworawa dwarore ni ong’e Nyasaye, hera ma waherogigo kod ng’wono ma wanyisogi biro chwalowa mondo wakonygi. To yo maber mwanyalo konyogi en yie puonjogi Muma.

9. Ka luwore gi Jo-Filipi 2:13, ere kaka Jehova nyalo konyi?

⁹ Samoro nyalo bedo ni idikori chako puonjruok Muma gi ji nikech iluor ni timo mano biroga kawo thuoloni mang’eny. Ka en kamano, to nyis Jehova wachno. Kwaye mondo okonyi gi gombo mar chako kendo tayo jopuonjre. (Som Jo-Filipi 2:13.) Jaote Johana nowacho ni sama wakwayo Jehova ka luwore gi dwache, to obiro winjowa. (1 Joh. 5:14, 15) Omiyo, bed gadier ni Jehova biro konyi mondo ibed gi gombo mar loko ji obed jopuonjre Yesu.

10-11. En ang’o ma nyalo miyo waluor tayo japuonjre mar Muma?

¹⁰ Wageno ahinya tijwa mar puonjo ji, kata obedo ni nitie chandruoge moko mwanyalo romogo ma nyalo monowa timo tijno kaka dwaher. We wane ane moko kuom pekgo kod yore ma wanyalo loyogigo.

¹¹ Chal marwa nyalo monowa puonjo ji e okang’ ma dwaher. Kuom ranyisi, jolendo moko nigi midekre kata hikgi be koro oseniang’. Dibed ni in achiel kuom jolendo ma kamago? Ka en kamano, ne ane achiel kuom puonj ma waseyudo e kinde mag tuo mar COVID-19. Wasefwenyo ni wanyalo tayo jopuonjre ma timo dongruok ka watiyo gi simu kata yore mamoko mag tudruok. Mano miyo inyalo chako puonjruok gi ng’ato kendo tayo puonjruogno mana ka in e odi. To nitie ber moro machielo bende. Nitie joma diher puonjore Muma, kata kamano, ok giyudrega sama owetewa kata nyiminewa odhi lendo e utegi. Samoro joma kamago nyalo yudorega gokinyi ahinya kata gotieno. Donge inyalo temo puonjo joma kamago Muma e seche ma giyudoreno? Yesu nopuonjo Nikodemo gotieno nikech mago e seche ma Nikodemo noyiero.​—Joh. 3:1, 2.

12. Gin ang’o ma nyalo miyo wabed gi chir ni wanyalo bedo jopuonj molony?

¹² Wanyalo paro ni waonge gi lony mar puonjo ji Muma. Samoro wanyalo paro ni onego  wabed gi ng’eyo mang’eny kata lony ma malo mondo e ka wapuonj ng’ato Muma. Ka kamano e kaka iwinjo, ne ane gik moko adek ma nyalo konyi bedo gi chir mar puonjo ji Muma. Mokwongo, Jehova neno ni iromo puonjo jomamoko Muma. (2 Kor. 3:5) Mar ariyo, Yesu jal ma Nyasaye osemiyo “teko duto e polo gi piny,” e ma ochiki mondo idhi ipuonj ji Muma. (Mat. 28:18) Mar adek, inyalo geno kony moa kuom jomamoko. Yesu nopuonjo ji mana weche ma Wuon-gi nopuonje, to in bende inyalo timo kamano. (Joh. 8:28; 12:49) E wi mano, inyalo wuoyo gi jarit grubu mar lendo, painia moro molony, kata jalendo moro molony mondo okonyi chako puonjruok Muma gi ng’ato kendo tayo puonjruogno. Achiel kuom gik ma nyalo miyi chir en neno kaka jolendo kaka mago tayo puonjruok mar Muma gi ng’ato.

13. Ang’o momiyo dwarore ni wang’i gi yo manyien mar puonjo ji Muma?

¹³ Wanyalo yudo ka ok yotnwa tiyo gi yore manyien mag lendo kod gik manyien mitiyogo e lendo. Yo ma wapuonjogo ji Muma sani oselokore. Bugwa mwatiyogo sani e puonjo ji Muma miluongo ni Inyalo Dak gi Mor Nyaka Chieng’!, dwaro ni waikre kendo wata puonjruok mar Muma e yo mopogore gi kaka ne watimoga e kinde mokalo. Wasomo mana paragraf matin kae to wabedo gi thuolo malach mar goyo mbaka gi japuonjre. Sama wapuonjo, watiyo gi vidio mang’eny kod gige puonjo mopogore opogore kaka JW Library^®. Ka ok ing’eyo kaka inyalo tiyo maber gi gige puonjogo, inyalo kwayo ng’ato mondo opuonji kaka itiyo kodgi. Kinde mang’eny, ok yotnwaga tiyo gi yore manyien ma ok wang’iyogo. Kata kamano, ka wayie mondo Jehova kod jomamoko okonywa to biro bedonwa mayot ng’iyo gi yore manyien mag puonjo ji Muma kendo wabiro mor timo kamano. Painia moro nowacho ni puonjruok e yo ma kamano “duogo chuny japuonjre kaachiel kod japuonj.”

14. En ang’o monego wapar ka po ni walendo e alwora ma ji ok rwakie wach, to ere kaka 1 Jo-Korintho 3:6, 7 jiwowa?

¹⁴ Nyalo bedo ni wadak e alwora ma chako puonjruok Muma gi ji ok yot. Nitie joma nyalo nenore ka joma ok ohero wach ma walando, to moko be nyalo kwedo wach mwalandonegi achiel ka achiel. Ang’o ma nyalo konyowa ka po ni walendo e alwora ma chal kamano? Nikech chal mar ji lokorega, nyalo bet ni joma ne ok rwakga wach ma ne walandonegi chon koro sani nyalo yie rwako wach. (Mat. 5:3) Nitie joma chon ne ok kawga bugewa, kata kamano, bang’e ne giyie ma gichako puonjore Muma. Bende, wang’eyo ni Jehova e Ruodh keyo. (Mat. 9:38) Odwaro ni wan wachwo kodhi kendo wadhi nyime olo pi, kata kamano, en e momiyo kodhigo dongo. (1 Kor. 3:6, 7) En gima jiwowa ng’eyo ni Jehova guedhowa nikech kinda ma watimo mondo wakony ji to ok oguedhwa nikech kwan mar joma wasepuonjo kata ma wasemiyo bugewa! *

15. Jehova winjoga nade sama ng’ato oyie puonjore Muma kendo tiyo gi gik mopuonjore?

¹⁵ Jehova bedoga mamor sama ng’ato orwako adiera mag Muma kendo sama ng’atno bende ochako nyiso jomamoko adierago. (Nge. 23:15, 16) Wan gadier ni Jehova mor sama oneno ka joge timo kinda e tij lendo kod puonjo. Kata obedo ni tuo mar COVID-19 nomako piny mangima e higa mar  tijwa ma 2020, pod ne watayo jopuonjre 7,705,765, kendo ne wakonyo ji 241,994 mondo ochiwre ne Jehova kendo obatisgi. Jopuonjre manyien-go bende biro konyo jomamoko mang’eny mondo obed jopuonjre Yesu. (Luka 6:40) Onge kiawa ni Jehova bedoga mamor sama watimo kinda e tij loko ji obed jopuonjre Yesu.

16. En chenro mane maber ma ng’ato ka ng’ato kuomwa nyalo bedogo?

¹⁶ Loko ji obed jopuonjre Yesu ok en tich mayot, kata kamano, Jehova Wuonwa manie polo biro konyowa sama wakonyo jomamoko mondo ohere. Donge wanyalo keto chenro mar chako puonjruok gi ng’ato Muma, kata mana ng’ato achiel kende? Wanyalo wuoro ahinya nyak ma wanyalo bedogo ka wapenjo ng’ato ang’ata ma walendone ka be doher puonjore Muma. Wan gadier ni Jehova biro guedho kinda ma watimo.

17. En ang’o ma wabiro yudo ka wapuonjo ng’ato Muma?

¹⁷ Wan gi thuolo makende mar lando ne ji wach maber kendo puonjogi adiera! Tijno miyowa mor madier. Jaote Paulo ma nokonyo ji mang’eny Thesalonika mondo obed jopuonjre Yesu nowacho kaka tijno ne miyo owinjo e chunye. Nowacho kama: “Genowa en mane, kata morwa, kata osimbowa ma miyowa ilo e nyim Ruodhwa Yesu e kinde ma biro yudo ka entie? Donge adier en mana un? Kuom adier, un e duong’ kod morwa.” (1 The. 2:19, 20; Tich 17:1-4) Ji mang’eny osewinjo kaka Paulo nowinjono. Nyaminwa moro miluongo ni Stéphanie kaachiel gi jaode osekonyo ji mathoth ma gichiwo ngimagi ne Jehova kendo obatisgi. Nyaminwano wacho kama: “Onge mor maduong’ minyalo pim gi mor ma ng’ato bedogo sama okonyo ng’ato mochiwore ne Jehova.”