1. Onego wane nade thuolo mar wuoyo gi Jehova e lamo?

 OSEDHIALWA gi mich makende ma en thuolo mar wuoyo gi Jachuech mar polo gi piny e lamo. Temie paro wachni: Wanyalo olo chunywa ne Jehova e lamo samoro amora kendo e dhok moro amora, ma ok ochuno ni wachan kode chon. Wanyalo wuoyo kode e lamo, bed ni wan e otanda mar midekre e osiptal, kata e jela, ka wan gadier ni Wuonwa ma jahera biro winjowa. Mich mar lamo en gima wageno ahinya.

2. Ere kaka Ruoth Daudi nonyiso ni nogeno thuolo makende mar wuoyo gi Jehova e lamo?

² Ruoth Daudi nogeno ahinya thuolo mar wuoyo gi Jehova e lamo. Nower ne Jehova kama: “Mad lamona obedni ka ubani moik maber e nyimi.” (Zab. 141:1, 2) Ubani ma ne jodolo tiyogo e lamo madier ne iiko e yo maber ahinya. (Wuok 30:34, 35) Ka ne Ruoth Daudi opimo lamo gi ubani, nonyiso kaka nodwaro ni oik maber weche ma nodhi wacho ne Wuon-gi manie polo. Mano bende e gombowa maduong’. Wadwaro ni lamowa omor Jehova.

3. En paro mane monego wabedgo sama wawuoyo gi Jehova e lamo, to nikech ang’o?

³ Sama wawuoyo gi Jehova e lamo, ok onego wawuo awuoya kode kaka dwawuo gi dhano wadwa. Onego wamiye luor matut. Tem ane paro fweny moko makende ma Isaya, Ezekiel, Daniel, kod Johana noneno. Kata obedo ni fweny ma ne ginenogo nopogore opogore, ne nitie gimoro achiel ma ne gichalree. Giduto ne ginyiso kaka Jehova en Ruoth ma nigi duong’ ahinya. Isaya ‘noneno Jehova kobet e kom-lochne moting’ore malo kendo ma nigi duong’.’  (Isa. 6:1-3) Ezekiel noneno Jehova kobet e gache mar lweny, kendo “ler marieny ne olwore koni gi koni mana ka lihudu.” (Eze. 1:26-28) Daniel noneno “Ng’at ma Hike Ng’eny” ma en Jehova, korwakore gi lewni ma rochere kendo ligek mach ne wuok e kom-lochne. (Dan. 7:9, 10) Johana to noneno Jehova kobet e kom-lochne kendo nolwore gi lihudu ma chalo gi kidi mar zumaridi. (Fwe. 4:2-4) Paro matut e wi duong’ ma Jehova nigo konyowa ng’eyo gimomiyo onego wagen ahinya thuolo makende mar wuoyo kode e lamo, kod gimomiyo onego watim kamano gi luor matut. Kata kamano, gin ang’o ma wanyalo wacho e lamo?

4. Ang’o ma wapuonjore kuom weche michakogo lamo ma yudore e Mathayo 6:9, 10?

⁴ Som Mathayo 6:9, 10. E twak ma ne Yesu ogolo e wi got, nopuonjo jolupne kaka ginyalo lemo e yo ma moro Nyasaye. Bang’ ka Yesu nosewacho ni “un to onego ulem kama,” nowacho weche moko madongo motudore gi dwach Jehova, ma gin: Kwayo mondo nying Nyasaye obed maler; kwayo mondo Pinyruodhe obi, ma en Pinyruoth ma biro ketho jowasik Nyasaye; kod kwayo mondo gik mabeyo ma Nyasaye osingo otimre ne dhano makare, kendo ne piny. Sama wawacho weche kaka mago e lamo, wanyiso ni dwach Nyasaye e gima duong’ e ngimawa.

5. Ang’o momiyo en gima owinjore kwayo Jehova gik motudore gi ngimawa?

⁵ Weche mamoko ma Yesu nowacho bang’ mago nyiso ni en gima owinjore wacho gik motudore gi ngimawa e lamo. Wanyalo kwayo Jehova mondo omiwa chiembwa ma pile, owenwa richowa, kik oterwa e tem, kendo oreswa kuom ng’at marach. (Mat. 6:11-13) Ka wakwayo Jehova gigo, wanyiso ni wageno kuome kendo wadwaro more.

6. Sama walemo, be weche ma wawacho onego obed mana weche ma yudore e lamo mar Ruoth kende? Ler ane.

⁶ Yesu ne ok ogeno ni jolupne ne dhi luwo aluwa lamo mar Ruoth rondi sama gilemo. E lamo mamoko, Yesu nowacho weche  mopogore opogore ma notudore gi ngimane gie sechego. (Mat. 26:39, 42; Joh. 17:1-26) Wan bende wanyalo wacho gimoro amora ma chandowa e lamo. Sama dwarore ni watim yiero moro, wanyalo kwayo Jehova mondo omiwa rieko mar timo yiero maber. (Zab. 119:33, 34) Sama wayudo migawo moro matek, wanyalo kwayo Jehova mondo omiwa rieko ma nyalo konyowa chopo migawono e yo maber. (Nge. 2:6) Jonyuol nyalo lemo ne nyithindgi, to nyithindo bende nyalo lemo ne jonyuolgi, kendo waduto onego walem ne joma wapuonjorego Muma kaachiel gi joma walendonegi. En adier ni lamowa ok onego obed mana mag kwayo kende.

7. Ang’o momiyo onego wapak Jehova sama walemo?

⁷ Sama walemo, onego wapar bende pako Jehova. Jehova Nyasachwa kende e ng’at monego wapak moloyo ji duto. ‘Ober kendo oikore weyo ne ji richogi.’ Bende, en Nyasaye ‘mang’won kendo ma kecho ji, iye ok wang’ piyo, ogundho gi hera mosiko kod adiera.’ (Zab. 86:5, 15) Kuom adier, dwarore ni wapak Jehova nikech kido mage kod gik mabeyo motimo.

8. Moko kuom gik ma wanyalo goyonee Jehova erokamano gin mage? (Zaburi 104:12-15, 24)

⁸ Mopogore gi pako Jehova sama walemo, dwarore bende ni wagone erokamano kuom gik mabeyo mosemiyowa. Kuom ranyisi, wanyalo goyone erokamano kuom miyowa maupe mabeyo mopogore opogore, kit chiemo mopogore opogore, kod osiepe mabeyo. Wuonwa moherowa miyowaga gik ma kamago kod mamoko mabeyo, mana ni mondo wabed mamor. (Som Zaburi 104:12-15, 24.) To moloyo mago duto, onego wago ne Jehova erokamano nikech chiemb chuny mogundho momiyowa kod geno ma jaber mar kinde mabiro.

9. En ang’o mwanyalo timo mondo okonyowa paro goyo ne Jehova erokamano sama walemo? (1 Jo-Thesalonika 5:17, 18)

⁹ Yot ahinya mondo wiwa owil gi goyo erokamano kuom gik ma Jehova timonwa. Ang’o ma nyalo konyi paro goyone erokamano  sama ilemo? Inyalo bedo gi list moting’o weche misekwayo Jehova e lamo, kendo kinde ka kinde, inyalo nono kaka Jehova osebedo ka dwoko kwayogigo. Kae to inyalo goyone erokamano kuom kony mosemiyi. (Som 1 Jo-Thesalonika 5:17, 18.) Par ane wachni: Donge wabedoga mamor sama jomamoko ogoyonwa erokamano nikech kony ma wamiyogi. Jehova bende biro bedo mamor ka wagoyone erokamano kuom gik motimonwa. (Kol. 3:15) En wach mane machielo monego wagonee Jehova erokamano?

10. Ka luwore gi 1 Petro 2:21, ang’o momiyo onego wago ne Jehova erokamano kuom oro Yesu e piny kae?

¹⁰ Som 1 Petro 2:21. Onego wago ne Jehova erokamano nikech nooro Wuode mohero mondo opuonjwa. Wapuonjorega gik mathoth e wi Jehova kod gik ma more ka wanono ngima Yesu. Ka waketo yie kuom misango mar Yesu, wabiro bedo gi winjruok maber gi Jehova Nyasaye kendo wabiro bedo gi kuwe kode.​—Rumi 5:1.

11. Ang’o momiyo onego walem kokalo e nying Yesu?

¹¹ Wagoyoga ne Jehova erokamano nikech wanyalo wuoyo kode e lamo kokalo kuom Wuode. Yesu e ma Jehova tiyogo e dwoko kwayo magwa. Jehova winjoga lamo mowach e nying Yesu, kendo odwokoga lamo ma kamago. Yesu nolero kama: “Gima ukwayo e nyinga, abiro timonu mondo Wuora oyud duong’ kokalo kuom Wuode.”​—Joh. 14:13, 14.

12. En ang’o machielo momiyo onego wago ne Jehova erokamano kuom chiwonwa Wuode?

¹² Jehova weyonwaga richowa kokalo kuom misango ma Yesu nochiwo. Muma wacho ni Yesu en ‘jadolowa maduong’ mobet piny e bat korachwich mar kom-loch mar Nyasaye e polo.’ (Hib. 8:1) Yesu e ‘jakonywa moa kuom Wuoro.’ (1 Joh. 2:1) Wagoyo ne Jehova erokamano kuom miyowa Jadolo Maduong’ ma nyalo kechowa, mong’eyo nyawowa, kendo ma ‘sayonwaga’! (Rumi 8:34; Hib. 4:15) Wan dhano morem, omiyo, ka di ne misango mar Yesu onge, di ne ok wanyalo wuoyo gi Jehova e lamo. Kuom adier, onge gimoro amora ma wanyalo miyo Jehova ma diromre gi mich ma jaber ma nochiwonwa, ma en Wuode mohero!

13. E otieno mogik ka Yesu ne pok otho, ere kaka nonyiso ni ohero jolupne?

¹³ Otieno mogik ka pok Yesu notho, nolemo ne jolupne gaming’a kokwayo Wuon-gi ‘mondo oritgi nikech ng’at marach.’ (Joh. 17:15) To mano kaka Yesu nonyiso ni oherogi! Kata obedo ni nochiegni kalo e tem moro maduong’ ahinya, pod nodewo ahinya jootene.

14. Ere kaka wanyalo nyiso ni wahero owetewa gi nyiminewa?

¹⁴ Wan be wanyalo luwo ranyisi mar Yesu ka ok waketo pachwa kuom dwachwa wawegi. Onego walem ne owetewa gi nyiminewa pile ka pile. Ka watimo kamano, wanyiso ni waluwo chik ma Yesu nowacho ni waher jowetewa, kendo wanyiso Jehova kaka wahero Jokristo wetewa. (Joh. 13:34) Lemo ne owetewa gi nyiminewa ok en ketho sa. Wach Nyasaye wachonwa ni “kwayo mar ng’at makare nigi teko.”​—Jak. 5:16.

15. Ang’o momiyo onego walem ne Jokristo wetewa?

¹⁵ Dwarore ni walem ne Jokristo wetewa  nikech giromoga gi tembe mang’eny. Wanyalo kwayo Jehova mondo okonygi nano e tuoche, masiche ma timore apoya, lwenje, sand, kata pek mamoko. Onego walem bende ne owete gi nyimine mochiwore konyo kuonde ma ji oyudoe masira. Samoro nyalo bedo ni ing’eyo achiel kachiel moko kuom joma kalo e pek kaka mago. Donge inyalo luongogi gi nyinggi sama ilemonegi? Wanyiso ni waherogi gadier sama wakwayo Jehova mondo okonygi nano.

16. Ang’o momiyo onego walem ne owete ma tayowa?

¹⁶ Owete ma tayowa e kanyakla bende morga ahinya sama walemonegi, kendo lamo ma kamago konyogiga ahinya. Mano be e gima Paulo ne gombo ni otimne. Nondiko kama: “An bende ulamna mondo omiya weche ma dawach sa ma ayawo dhoga, mondo abed gi nyalo mar wuoyo gi chir e lando wach maler moum mar wach maber.” (Efe. 6:19) E kindewagi bende, nitie owetewa ma tiyo matek mondo gitawa. Wanyiso ni waherogi kuom kwayo Jehova mondo oguedh tijgi.

17-18. Gin kinde mage minyalo kwawa mondo walem e lo jomamoko, to ang’o monego waket e paro sama watimo kamano?

¹⁷ Seche moko, inyalo kwawa mondo walem e lo jomamoko. Kuom ranyisi, nyaminwa moro ma tayo puonjruok Muma nyalo kwayo nyaminwa ma konye tayo puonjruogno mondo olem. Nyaminwa ma konye tayono nyalo bedo ni ok ong’eyo japuonjre e yo maber, omiyo, onyalo yiero mondo olem e giko puonjruogno. Timo kamano biro konye mondo ong’e japuonjre maber seche ma gipuonjore, kae to koro onyalo lamo ka luwore gi chal mar japuonjre.

¹⁸ Owadwa moro inyalo kwa mondo olem e romo mar dhi lendo kata e chokruok mar kanyakla. Owete ma nigi migawo mar lemo onego ong’e gimomiyo otim romono kata chokruogno. Lamo ok onego obed yo moro michiwogo siem kata mitimogo lendo moro. E chokruoge mang’eny mag kanyakla, lamo kod wer imiyoga dakika abich koriw. Omiyo, owadwa ma lamo ok onego  oti gi “weche mang’eny” sama olemo, to ahinya-ahinya sama ichako chokruok.​—Mat. 6:7.

19. En ang’o ma biro konyowa bedo moikore ne odiechieng Jehova mar ng’ado bura?

¹⁹ Onego wane lamo kaka gima duong’ e ngimawa, to moloyo sama koro wachomo odiechieng’ maduong’ mar Jehova mar ng’ado bura. Yesu nowacho kama ka luwore gi odiechiengno: “Sikuru ka uneno kendo ka usayo kinde duto mondo ubi utony e gigo duto ma nyaka timre.” (Luka 21:36) Ee, ka wasiko ka walamo, mano biro konyowa bedo gi winjruok maber gi Jehova kendo bedo motang’ mondo kik odiechieng Jehova powa.

20. Ere kaka lamowa nyalo chalo gi ubani ma golo suya mamit?

²⁰ Ang’o ma wasepuonjore? Wageno thuolo ma jaber ma wan-go mar lamo. Weche madongo monego wawach e lamo onego otudre gi dwach Jehova. Onego wago ne Jehova erokamano nikech Wuode mosemiyowa, Pinyruodhe, kaachiel gi Jokristo wetewa. Onego wakwa Jehova mondo omiwa gige ringruok kendo okonywa bedo gi yie motegno. Ka waparo matut gik ma wawacho e lamo, wanyiso ni wageno ahinya mich makendeni. Wechewa biro chalo gi ubani ma golo suya mamit ne Jehova kendo gibiro “moro chunye.”​—Nge. 15:8.