1. Dwach Jehova en ang’o e kindegi?

 E KINDEGI, dwach Nyasaye en ni wach maber mar Pinyruoth oland e piny ngima. (Mar. 13:10; 1 Tim. 2:3, 4) Tij lendo en mar Jehova kendo en gima ber ahinya ni oseketo tijno e lwet Wuode. Wanyalo bedo gadier ni nikech Yesu e ma tayo tijno, ibiro time e okang’ ma Jehova dwaro ka giko pok ochopo.​—Mat. 24:14.

2. Ang’o ma wabiro nono e sulani?

² E sulani, wabiro neno kaka Yesu tiyo gi ‘jatichne mogen kendo mariek’ e chiwo chiemb chuny, kendo e chano jolupne mondo gitim tich maduong’ ma itimo e piny sani mar lando wach maber. (Mat. 24:45) Bende, wabiro neno gima ng’ato ka ng’ato kuomwa nyalo timo mondo wariw lwedo Yesu kod jatich mogen.

3. En tich mane ma nomi Yesu mondo ota?

³ Yesu e ma tayo tij lando wach maber. Ang’o momiyo wanyalo bedo gadier gi wachno? Mana matin ka pok Yesu nodok e polo, noromo gi jolupne e got moro ma ne ni Galili. Nonyisogi niya: “Osemiya teko duto e polo gi piny.” Kae to nonyisogi kama: “Kuom mano, dhiuru e ogendni duto mondo ulok ji obed jopuonjrena.” (Mat. 28:18, 19) Omiyo, e wi migepe mamoko ma ne Jehova omiyo Yesu, noketo nyaka tij lando wach maber e lwete.

4. Ang’o momiyo wanyalo bedo gadier ni Yesu pod tayo tij lendo nyaka e kindewagi?

 ⁴ Yesu nowacho ni tij lando wach maber kendo loko ji obed jopuonjrene ne idhi tim e “ogendni duto,” kendo ni nodhi bedo gi jolupne “kinde duto nyaka e giko mar ndalo.” (Mat. 28:20) Wechego nyiso maler ni Yesu e ma ne dhi tayo tij lendo nyaka e kindewagi.

5. Ere kaka wakonyo e chopo weche ma nokor e Zaburi 110:3?

⁵ Yesu ne onge gi kiawa moro amora ni joma ne dhi timo tijno ne dhi bedo mang’eny e ndalo mag gikogi. Ne en gadier ni weche ma nokor e Zaburi ne dhi chopo kare. Wechego wacho niya: “Jogi biro chiwore e odiechiengi mar lweny.” (Zab. 110:3) Ka po ni in achiel kuom joma lando wach maber, ng’e ni iriwo lwedo Yesu kod jatich mogen, kendo ikonyo e chopo weche ma nokorgo. Tijno pod dhi nyime, kata kamano, nitie pek ma waromogago sama watime.

6. Achiel kuom pek ma joland wach Pinyruoth romogago e kindegi en mane?

⁶ Achiel kuom pek ma joland wach Pinyruoth romogago en akwede. Joma ong’anyo moweyo adiera, jotend dinde mag miriambo, kod josiasa, osebedo ka wacho weche mag miriambo e wi tijwa. Ka po ni wedewa, osiepewa, kod jotich wetewa owinjo wechego, ginyalo thung’owa ni wawe tiyo ne Jehova kendo ni wawe tij lendo. Nitie pinje moko ma jo akwede osebwogowa gi weche maricho, gisemonjowa, kendo gisemako owetewa gi nyiminewa mi gitueyogi e jela. Weche ma kamago ok kawwa gi wuoro, nimar Yesu nowacho niya: “Ogendni duto nosin kodu nikech nyinga.” (Mat. 24:9) Gik maricho mitimonwago nyiso maler ni Jehova oyie kodwa. (Mat. 5:11, 12) Jachien e ma keloga akwedego. Kata kamano, Yesu nigi teko moloye! Nikech kony ma Yesu osebedo ka miyowa, wach maber sani ilando ne ogendni duto. Ne ane gimomiyo wawacho kamano.

7. En ang’o ma nyiso ni weche ma nokor e Fweny 14:6, 7 chopo e kindewagi?

⁷ Pek machielo ma waromogago sama walando wach Pinyruoth en ni wanyaloga romo gi joma wacho dhok ma ok wang’eyo. E fweny ma Yesu nomiyo jaote Johana, nonyise ni e kindewagi ne wadhi loyo pekno. (Som Fweny 14:6, 7.) E yo mane? Wasebedo ka wamiyo ji mang’eny kaka nyalore thuolo mar winjo wach maber ma walando. E kindegi, joma yudore e piny ngima nyalo somo weche mag Muma e websaitwa mar jw.org nikech websaitno nigi buge molok e dhok mokalo 1,000! Kendo Bura Matayo nopwodho mondo olok bug Inyalo Dak gi Mor Nyaka Chieng’! e dhok mokalo 700! Bugno e ma sani watiyogo e puonjo ji mondo gibed jopuonjre Yesu. Chiemb chuny bende oselos e yor vidio ne momni, kaachiel gi braille ne muofni. Waneno kaka weche ma nokor e Muma chopo kare. Ji “moa e ogendni ma wacho dhok mopogore opogore” sani puonjore wacho “dhok maler,” tiende ni adiera mag Muma. (Zek. 8:23; Zef. 3:9) Mago duto timore e bwo Yesu Kristo ma tayo tijno.

8. Tijwa mar lendo osekelo ber mage e kindegi?

⁸ E kindegi, ji mokalo milion 8 manie pinje 240 riwo lwedo riwruok mar oganda Jehova, kendo higa ka higa ibatisoga ji alufe mang’eny! Kata kamano, gimaduong’ moloyo kwan mar ji en kido mabeyo ma jopuonjre manyien mag Yesu rwakoga, tiende  ni “kit dhano manyien.” (Kol. 3:8-10) Thothgi oseweyo timbe mochido, timbe mag gero, buono ji, kod kedo ne pinjegi. Weche ma nokor e Isaya 2:4 chopo e kindegi nikech jogo ‘ok puonjrega lweny kendo.’ Sama watimo matek mondo warwak kit dhano manyien, joma nenowa riworega kodwa e riwruok mar oganda Jehova, kendo mano nyiso ni waluwo Jaritwa ma en Yesu Kristo. (Joh. 13:35; 1 Pet. 2:12) Wechego ok timre atima nyalhodia; Yesu e mosebedo ka konyowa.

9. Ka luwore gi Mathayo 24:45-47, en ang’o ma nokor ni ne dhi timore e ndalo mag giko?

⁹ Som Mathayo 24:45-47. Yesu nowacho ni e ndalo mag giko nodhi keto “jatich mogen kendo mariek” mondo ochiw chiemb chuny. Mano nyiso ni jatijno ne dhi tiyo matek ahinya e kindegi. To mano e ma osebedo ka timore. Jaritwa ma en Yesu Kristo osebedo ka tiyo gi grup matin mar Jokristo mowal mondo ochiw chiemb chuny e “kinde mowinjore” ne jotich Nyasaye kaachiel gi joma orwako wach maber. Grubno ok ketrega kaka ruodhi e wi yie mar jomamoko. (2 Kor. 1:24) Kar mano, ging’eyo maler ni Yesu e “ruoth kendo jatend” joge.​—Isa. 55:4.

10. En buk mane monyis e picha ma nomiyo ibedo gadier ni iseyudo yo ma teri e ngima ma nyaka chieng’?

¹⁰ Chakre higa mar 1919, jatich mogen osebedo ka loso buge mopogore opogore ma osemiyo joma nyien morwako wach siso mar puonjruok Muma. E higa mar 1921, jatijno nogoyo buk miluongo ni The Harp of God mondo okony joma norwako wach maber ng’eyo puonj mag mise mag Muma. Kaka kinde ne medo kalo, e kaka jatich mogen nomedo nogoyo buge mamoko. En buk  mane ma nokonyi ng’eyo Wuonwa manie polo kendo here? Dibed ni en bug “Let God Be True,” Adiera Materi e Ngima Mochwere, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Ang’o ma Muma Puonjo Kuom Adier?, Gima Muma Puonjo, koso Inyalo Dak gi Mor Nyaka Chieng’! ma sani watiyogo? Moro ka moro kuom bugego nogo mondo okonywa loko ji obed jopuonjre Yesu, kendo nogogi e kinde mowinjore.

11. Ang’o momiyo dwarore ahinya ni waduto wayud chiemb chuny e kindegi?

¹¹ Waduto dwarore ni wacham chiemb chuny motegno, to ok mana joma nyien e adiera kende. Jaote Paulo nondiko niya: “Chiemo motegno en mar jo mosetegno.” Nomedo wacho ni sama watiyo gi gik ma wapuonjore e Muma, wabiro bedo gi nyalo mar ‘pogo gik makare kod gik ma ok kare.’ (Hib. 5:14) E ndalo matekgi kendo ma timbe maricho onya ahinya, nyalo bedo matek luwo puonj makare mag Jehova. Kata kamano, Yesu osebedo ka neno ni omiwa chiemb chuny ma tego yiewa. Chiemb chuny duto igologa e Muma ma en Wach Nyasaye. Yesu e ma tayoga jatich mogen e loso chiemb chuny kendo poge.

12. Mana kaka Yesu, ere kaka wasebedo ka wamiyo nying Nyasaye duong’?

¹² Mana kaka Yesu, wan bende wasemiyo nying Nyasaye duong’ mowinjore oyudi. (Joh. 17:6, 26) Kuom ranyisi, e higa mar 1931, ne wachako luongore ni Joneno mag Jehova, ma en nying ma ne wagolo e Muma. Kuom timo kamano, ne wanyiso ni nyingno en nying makende, kendo ni wadwaro ni ji ong’ewa gi nying Wuonwa manie polo. (Isa. 43:10-12) Bende, chakre Oktoba higa mar 1931, wasebedo ka waketo  nying Jehova e nyim gaset mar Ohinga mar Jarito. E wi mano, Muma mar Loko mar Piny Manyien osedwoko nying Nyasaye kuonde duto ma ne nyingno yudoree ka nondik Muma. To mano kaka wapogore gi dinde mamoko ma luongore ni Jokristo, mosegolo nying Jehova e thoth Mumbegi!

13. Ang’o momiyo in gadier ni Yesu tiyo gi “jatich mogen kendo mariek” e kindewagi? (Joh. 6:68)

¹³ Kokalo kuom kuom “jatich mogen kendo mariek,” Yesu oseloso riwruok moro e piny kae ma jiwo lamo madier. Iwinjoga nade bedo e riwruogno? Samoro in bende iwinjoga mana kaka jaote Petro ma nonyiso Yesu ni, “En ng’a ma dwadhi ire? In gi weche mag ngima ma nyaka chieng’.” (Joh. 6:68) To kuom adier, di koro wan kanye ka di ne ok waromo gi Joneno mag Jehova? Kokalo kuom riwruogno, Yesu nenoga ni wayudo chiemb chuny e kinde mowinjore. Bende, Yesu tiegowaga mondo wati tij lendo e yo maber. E wi mago, okonyowaga rwako “kit dhano manyien” mondo wadag e ngima ma moro chuny Jehova.​—Efe. 4:24.

14. Gin ber mage miseyudo nikech bedo e riwruok mar oganda Jehova e kinde tuo mar korona?

¹⁴ Yesu chikowaga e yo mariek e kinde ma weche tek. Mano nonenore maler ka ne tuo mar korona omuoch. Ji mang’eny e piny ne ok ong’eyo gima ne ginyalo timo, kata kamano, Yesu noneno ni omiwa chike mowinjore mondo okonywa rito ngimawa. Donge nijiwowaga sa ka sa mondo warwak mask, kendo ni kik wabed machiegni ahinya gi jomamoko sama wan e kind ji? Jodong-kanyakla ne ijiwoga kinde ka kinde ni gitudre gi jo kanyaklagi mondo gine  kaka gidhi e weche mag ringruok kod mag chuny. (Isa. 32:1, 2) Ripode mag Bura Matayo bende nomiyowa weche momedore kendo jiwowa ahinya.

15. Gin yore mage ma nonyiswa ni watimgo chokruogewa kaachiel gi tijwa mar lendo e kinde tuo mar korona, to yorego nokelonwa ber mage?

¹⁵ E kinde tuo mar korona, nonyiswa bende yo manyien mar timo chokruoge mag kanyakla kod tijwa mar lendo. Mana mapiyo ka ne tuono omuoch, ne wachako timo chokruogewa mag kanyakla, chokruogewa mag alwora, kaachiel gi chokruoge madongo mag ndalo adek e yor vidio. Bende, ne wachako lendo mapiyo ka watiyo gi barupe kod simu. Jehova osebedo ka guedho kindawa. Ofisewa mang’eny osewacho ni ne giyudo kwan manyien ma malo mar jolendo. Thothwa noromo gi weche ma jiwowa ahinya e kinde mag tuono.​—Ne sanduk ma wacho ni, “ Jehova Guedho Tijwa mar Lendo.”

16. En wach mane ma wanyalo bedogo gadier?

¹⁶ Nitie joma samoro ne paro ni riwruokwa odwa rido chik ahinya e kinde tuo mar korona. Kata kamano, kaka kinde ne medo kalo, e kaka nomedo nenore maler ni gik ma ninyisowa ni watim ne gin gik ma nyiso rieko. (Mat. 11:19) Kaka wamedo paro matut kuom yore ma Yesu osebedo ka tayogo joge e kindewagi, e kaka wamedo bedo gadier ni kata warom gi pek mage e kinde mabiro, Jehova kod Yesu ok bi wewa.​—Som Jo-Hibrania 13:5, 6.

17. Iwinjoga nade e chunyi sama itiyo e bwo Yesu Kristo?

¹⁷ To mano kaka wamor bedo e riwruok ma tiyo e bwo Yesu! Wan e riwruok ma ok oyie mondo gik moko kaka oganda ma ng’ato wuokie, pien dend ng’ato, kata dhok ma ng’ato wacho opogwa. Wayudo chiemb chuny moromo kendo itiegowa maber ne tijwa mar lendo. Ikonyoga ng’ato ka ng’ato kuomwa mondo odhi nyime rwako kit dhano manyien. Bende, osepuonjwa kaka wanyalo nyiso ni wahero jowetewa. Wan gi gik mang’eny ma miyo wamor bedo e bwo Yesu kaka Jaritwa!