1. Ka ne ichako puonjori Muma, gin adiera mage ma nomori?

 BE INYALO paro kinde ma ne ichako puonjori Muma? Samoro nokawi gi wuoro ahinya ka nifwenyo ni Nyasaye nigi nyinge. Kata, samoro nimor ahinya ng’eyo ni Nyasaye ok sand ji e mach. Bende, nyalo bedo ni geno mar neno ka ichiero wedeni kata osiepeni ma nosetho kendo dak kodgi e paradiso e piny, nomori ahinya.

2. Mopogore gi puonjruok adiera mag Muma, gin dongruok mage ma nitimo? (Jo-Efeso 5:1, 2)

² Kaka nimedo puonjori Wach Nyasaye, e kaka herani kuom Jehova ne medo dongo. Hera ma ne iherogo Jehova e ma nochwali mondo iti gi gik ma ne ipuonjori. Niloko pachi ma ibedo gi timbe mabeyo mondo imor Nyasaye. Mana kaka nyathi luwo ranyisi mar janyuolne mohero, e kaka in bende ne iluwo ranyisi mar Wuonu manie polo.​—Som Jo-Efeso 5:1, 2.

3. Gin penjo mage ma wanyalo penjore?

³ Wanyalo penjore kama: ‘Be hera ma aherogo Jehova sani otegno moloyo kinde ma nachako bedoe Jakristo? Chakre kinde ma ne obatisa, be aneno gik moko kaka Jehova nenogi, to moloyo e wach hero Jokristo wetena?’ Ka po ni “hera ma ne in-go kar chakruok” osedok chien, kik chunyi nyosre. Mano be e gima notimore ne moko kuom Jokristo mokwongo. Yesu ne ok ojok kodgi, to wan bende ok obi jok kodwa. (Fwe. 2:4, 7) Ong’eyo ni wanyalo chiero hera ma ne wan-go ka ne wachako puonjore adiera.

4. Ang’o ma wabiro nono e sulani?

⁴ E sulani wabiro nono kaka wanyalo dhi nyime tego hera  ma waherogo Jehova kod jowetewa. Kae to wabiro nono moko kuom gueth ma wanyalo yudo sama wadhi nyime hero Jehova kod Jokristo wetewa.

5-6. Gin pek mage ma jaote Paulo noromogo e migawo ma nomiye, to ang’o ma nochwale mondo odhi nyime tiyo ne Jehova?

⁵ Jaote Paulo ne mor ahinya tiyo ne Jehova, kata kamano, noromo gi pek moko. Thothne, Paulo ne dhiga kuonde maboyo, to e kindego dhi e wuoth ne ok yotga. Nitie kinde moko ma noromoga gi ‘masiche e aoche,’ to kinde moko noromoga gi “jomecho.” Bende, nitie kinde ma ne jo akwede ogoye. (2 Kor. 11:23-27) Kendo moko kuom Jokristo wetene ne ok morga gi kinda ma notimo mondo okonygi.​—2 Kor. 10:10; Fil. 4:15.

⁶ Ang’o ma nokonyo Paulo dhi nyime tiyo ne Jehova ma ok ojok? Paulo nopuonjore weche mathoth e wi kido mag Jehova ka nosomo Ndiko, kod ka noneno gik ma notimore e ngimane. Nobedo gadier ni Jehova ohere. (Rumi 8:38, 39; Efe. 2:4, 5) En bende, nohero Jehova ahinya. Nonyiso ni nohero Jehova kuom konyo “jo maler kendo dhi nyime tiyonegi.”​—Hib. 6:10.

7. Achiel kuom yore ma wanyalo medo tegogo hera ma waherogo Jehova en mane?

⁷ Wanyalo medo tego hera ma waherogo Jehova kuom puonjruok Wachne gi kinda. Sama isomo Muma, tem ane nono gima weche misomo puonji e wi Jehova. Penjri kama: ‘Ere kaka weche ma asomogi nyiso ni Jehova ohera? Gin gik mage ma asomo ma chwala mondo amed hero Jehova?’

8. Ere kaka lamo nyalo konyowa dhi nyime tego hera ma waherogo Jehova?

⁸ Gimachielo ma nyalo konyowa dhi nyime tego hera ma waherogo Jehova en wuoyo kode pile e lamo koa e chunywa. (Zab. 25:4, 5) Ka watimo kamano, Jehova biro dwoko lamo magwa. (1 Joh. 3:21, 22) Nyaminwa Khanh ma a Asia wacho kama: “Mokwongo kwongo, nahero Jehova nikech gik ma ne apuonjora kuome. Kata kamano, namedo here ahinya bang’ neno kaka nodwoko lamoga. Wachno nomedo chwala mondo atim gik ma more.” b

9. Ere kaka Timotheo nodhi nyime tego hera ma noherogo Jokristo wetene?

⁹ Higni moko matin bang’ ka Paulo nosebedo Jakristo, noromo gi rawera moro miluongo ni Timotheo. Timotheo nohero Jehova kod dhano wetene. Paulo nonyiso Jo-Filipi kama: “Aonge gi ng’at machielo ma nigi chuny kaka ma [Timotheo nigo] kendo ma biro dewou gadier.” (Fil. 2:20) Paulo ne ok wuo e wi lony ma Timotheo ne nigo kaka chano weche kata golo twak, kar mano, nowuoyo e wi hera ma Timotheo noherogo owetene gi nyiminene. Onge kiawa ni kanyakla ma ne Timotheo limoga ne mor ahinya gi limbege.​—1 Kor. 4:17.

10. Ere kaka Anna gi jaode nonyiso ni gihero Jokristo wetegi?

¹⁰ Wan bende wamanyoga yore ma wanyalo konyogo Jokristo wetewa. (Hib. 13:16) Ne ane ranyisi mar Anna, ma ne wawuoye e sula mokalo. Bang’ ka yamo moro mager noseketho alwora moro, Anna gi jaode nodhi limo joot moro ma Joneno e alworano, kendo ne giyudo ka tat odgi ogore piny. Mano nochido lep joodno duto. Anna wacho kama: “Ne wakawo lepgigo mi waluokogi, wagoyogi pas,  wabanogi, kae to wadwokonegi. Ne waneno ni gima ne watimono ne en mana gima tin, kata kamano, mano nomedo tego osiep manie kindwa gi joodno nyaka kawuono.” Hera ma ne Anna gi jaode oherogo Jokristo wetegi nochwalogi mondo gichiw kony ma ne dwarore.​—1 Joh. 3:17, 18.

11. (a) Ere kaka kinda ma watimo mondo wanyis Jokristo wetewa hera nyalo jiwogi? (b) Ka luwore gi Ngeche 19:17, Jehova neno nade sama wanyiso Jokristo wetewa hera?

¹¹ Sama wabedo mang’won gi jomamoko kendo waherogi, ginyalo neno kaka waluwo ranyisi mar Jehova. Ginyalo bedo mamor gi kinda ma watimo mondo wanyisgi ng’wono moloyo kaka ne waparo. Nyaminwa Khanh ma ne wasewuoye motelo paro kaka nyimine nokonye. Owacho kama: “Amor ahinya gi kaka nyimine ne dhiga koda e tij lendo. Ne girawonaga, ne gipogonaga chiembgi, kae to ne gidwokaga e ot bang’ lendo. Sani aneno kaka ne gitiyoga matek mondo gikonya. Kendo ne gitimo kamano nikech ne gihera.” En adier ni ok ji duto ma biro goyonwa erokamano kuom gik mabeyo ma watimonegi. Nyaminwa Khanh wacho kama e wi joma nokonyego: “Agombo ni achulgi kuom gik mabeyo duto ma ne gitimona, kata kamano, ok ang’eyo kuonde ma gidakie. Jehova to ong’eyo kendo akwaye ni ochulnagi.” Khanh ni kare. Jehova nenoga gik mabeyo ma watimo ne jomamoko kata ka gin gik matindo. Oneno ng’wono ma wanyiso jomamoko kaka misango makende, kendo kaka gowi ma en owuon obiro chulo.​—Som Ngeche 19:17.

12. Ere kaka owete nyalo nyiso ni gihero jowetegi manie kanyakla? (Ne picha bende.)

¹² Ka in owadwa mosebatisi, ere kaka inyalo  nyiso ni ihero Jokristo weteni kendo ni itimo momedore mondo ikonygi? Owadwa moro ma rawera miluongo ni Jordan nopenjo jaduong’-kanyakla moro gik ma nonyalo timo mondo omed konyo owete gi nyimine e kanyakla. Jaduong’no nopwoye kuom dongruok ma nosebedo kotimo, kendo nomiye paro moko ma ne nyalo konye timo momedore. Moko kuom paro ma nomiyego ne gin kaka chopo chon e chokruoge mondo omos jomamoko, chiwo paro e chokruoge, lendo gi grube mar tij lendo ma ok obare, kendo manyo yore moko ma nonyalo konyogo owete gi nyimine. Ka ne Jordan ochako tiyo gi parogo, nopuonjore lony moko momedore. E wi mano, hera ma noherogo owetene gi nyiminene nomedo bedo motegno. Jordan nopuonjore ni sama owadwa moro obedo jakony-tich, mano ok e sa ma ochako konyoe jomamoko, kar mano, odhi nyime konyogi kaka osebedo kotimo.​—1 Tim. 3:8-10, 13.

13. Ere kaka hera nochwalo owadwa moro miluongo ni Christian mondo obed jaduong’-kanyakla kendo?

¹³ To nade ka po ni chon ne in jakony-tich kata jaduong’-kanyakla? Jehova pod paro tich ma nitimo e kinde machon kod hera ma nochwali mondo itim tijno. (1 Kor. 15:58) Bende, oneno hera ma idhi nyime nyiso. Owadwa moro miluongo ni Christian chunye nonyosore ka nogole bedo jaduong’-kanyakla. Kata kamano, owacho kama: “Nang’ado mar timo duto ma ne anyalo mondo adhi nyime tiyo ne Jehova nikech ahere, bed ni an-gi migepe kata ooyo.” Bang’ kinde, nokete jaduong’-kanyakla kendo. Christian wacho kama: “Naluor timo migawono kendo. Kata kamano, nang’ado ni ka Jehova  oyiena mondo atine kaka jaduong’-kanyakla kendo, abiro timo kamano nikech ahere kendo ahero owetena gi nyiminena.”

14. Weche ma nyaminwa moro ma a Georgia nowacho puonjowa ang’o?

¹⁴ Jotich Jehova bende ohero dhano wetegi. (Mat. 22:37-39) Kuom ranyisi, Nyaminwa Elena ma a e piny Georgia wacho kama: “Mokwongo kwongo, gima ne chwalaga mondo alendi ne en hera ma naherogo Jehova. Kata kamano, kaka namedo hero Wuonwa manie polo, e kaka namedo hero dhano wetena. Natemoga paro chandruoge ma dibed ni ne gikaloe kod gima nanyalo nyisogi ma hoyo chunygi. Kaka namedo dewogi, e kaka namedo manyo yore ma dakonygigo.”​—Rumi 10:13-15.

15-16. Mana kaka onyis e pichni, gin gueth mage ma wayudo sama wahero jowetewa?

¹⁵ Sama watimo gik ma nyiso ni wahero owetewa gi nyiminewa, ok gin kendgi e ma giyudo ber. Bang’ ka tuo mar korona nochakore, owadwa moro miluongo ni Paolo gi jaode nokonyo nyimine mang’eny ma hikgi oniang’ kaka ne ginyalo tiyo gi simbegi kod tabledegi e tij lendo. Ne gikonyo nyaminwa moro bedo molony e tiyo gi simbe. Koro nonyalo tiyo gi simbe e gwelo wedene e Rapar. Wedene 60 nobiro e Rapar e yor vidio! Nyaminwano kaachiel gi wedene noyudo ber nikech kinda ma ne Paolo gi jaode otimo. Bang’e, nyaminwano nondiko ne Paolo  kama: “Erokamano ahinya kuom puonjowa wan joma hikgi oseniang’. Wiya ok bi wil gi kaka Jehova dewowa kod kinda ma ne utimo mondo ukonywa.”

¹⁶ Ranyisi kaka mago nopuonjo Paolo wach moro maduong’. Nopuonjore ni hera duong’ moloyo lony ma ng’ato nyalo bedogo. Owacho kama: “Chon ne an jarit-alwora. Asefwenyo ni kata obedo ni jolendo samoro wigi osewil gi twege ma ne ajagolo, pod giparo kaka ne akonyogi.”

17. Gin jomage ma bende yudo ber sama watimo gik ma nyiso ni wahero jomamoko?

¹⁷ Sama watimo gik ma nyiso ni wahero jomamoko, wan bende wayudo ber e yo ma ne ok wapar. Owadwa Jonathan ma a New Zealand ni gadier gi wachno. Ngeso moro ka ne chieng’ rieny ahinya, noneno painia moro ka lendo e bath ndara. Jonathan nochano mondo olend gi painiano Ngeso mamoko ma noluwo. Gie kindeno ne ok ong’eyo kaka en owuon nodhi yudo ber kuom chiwore mondo olend gi painiano. Jonathan wacho kama: “Ne ok aheroga tij lendo. Kata kamano, ka nawinjo kaka painiano ne puonjo kendo neno nyak ma noyudo e tij lendo, mano nochwala mondo achak hero tij lendo. Bende, nayudo osiep maber ma nokonya timo dongruok e weche Nyasaye, hero tij lendo, kendo sudo machiegni gi Jehova.”

18. Ang’o ma Jehova dwaro ni watim?

¹⁸ Jehova dwaro ni wamed here kendo wamed hero jowetewa. Mana kaka wasepuonjore, wanyalo dhi nyime tego hera ma waherogo Jehova kuom somo Wachne, paro matut kuom gik ma wasomo, kendo wuoyo kode e lamo pile. Wanyalo dhi nyime tego hera ma waherogo owetewa gi nyiminewa kuom manyo yore ma wanyalo konyogigo. Kaka herawa medo bedo motegno, e kaka wabiro medo sudo machiegni gi Jehova kod Jokristo wetewa. Kendo wabiro mor bedo osiepegi nyaka chieng’!