SULA MAR PUONJRUOK 28
WER 123 Bolruok ne Chenro ma Nyasaye Oketo
Be Inyalo Fwenyo Adiera?
“Chung’uru motegno ka utueyo adiera e nungou kaka msip.”—EFE. 6:14.
GIMA SULANI WUOYE
Sulani biro konyowa ng’eyo kaka wanyalo fwenyo adiera ma wasepuonjore e wi Jehova kod miriambo ma wuok kuom Satan kaachiel gi joma kwedowa.
1. Iwinjo nade e wi adiera misepuonjori?
JOTICH Jehova ohero adiera ma yudore e Muma. Adierago osetego yiewa. (Rumi 10:17) Wan gadier ni Jehova oketo kanyakla mar Jokristo mondo obed “siro kod mise mar adiera.” (1 Tim. 3:15) Bende, wabolorega sama ‘joma tayowa’ puonjowa ka gileronwa adiera mag Muma kendo chikowa ka luwore gi dwach Nyasaye.—Hib. 13:17.
2. Ka luwore gi Jakobo 5:19, en ang’o ma nyalo timorenwa bang’ puonjore adiera?
2 Kata mana bang’ puonjore adiera kendo yie ni riwruok mar oganda Jehova e monego otawa, pod inyalo wuondwa. (Som Jakobo 5:19.) Gima Satan dwaro en ni wawe geno Muma kendo kik wagen yo ma Jehova tayowago.—Efe. 4:14.
3. Ang’o momiyo onego wadhi nyime makore gi adiera? (Jo-Efeso 6:13, 14)
3 Som Jo-Efeso 6:13, 14. Machiegnini, Jachien biro tiyo gi miriambo madongo mondo owuondgo ogendni ong’any ne Jehova. (Fwe. 16:13, 14) Onge kiawa ni Satan biro medo kinda mondo owuond jotich Jehova bende. (Fwe. 12:9) Kuom mano, dwarore ni wang’e pogo adiera gi miriambo, kendo wamakre gi adiera. (Rumi 6:17; 1 Pet. 1:22) Mano e ma biro konyowa tony e kinde masira maduong’!
4. Ang’o ma wabiro nono e sulani?
4 E sulani, wabiro puonjore e wi kido moko ariyo ma nyalo konyowa fwenyo adiera manie Muma, kendo yie gi yo ma riwruok mar oganda Jehova tayowago. Kae to, wabiro nono paro moko adek ma nyalo konyowa dhi nyime makore gi adiera.
KIDO MA DWARORE MONDO OKONYWA FWENYO ADIERA
5. Ere kaka luoro Jehova biro konyowa fwenyo adiera?
5 Luoro Jehova. Nikech waluoro Jehova, ok dwaher timo gimoro amora ma nyalo chwanye. Dwaher ni wang’e pogruok mantie e kind adiera gi miriambo mondo e ka Jehova oyie kodwa. (Nge. 2:3-6; Hib. 5:14) Ok onego waluor dhano moloyo kaka waluoro Jehova, nikech dhano oheroga timo gik ma chwanyo Jehova.
6. Ere kaka luoro dhano nomiyo jotelo apar mag Israel ogwenyo adiera?
6 Ka waluoro dhano kar luoro Jehova, mano nyalo miyo wawe adiera. Ne ane ranyisi mar jotelo 12 ma nodhi nono piny ma Jehova nosingo ni nodhi miyo Jo-Israel. Jotelo apar kuomgi noluoro Jo-Kanaan kar luoro Jehova. Ne ginyiso Jo-Israel kama: “Ooyo, ok wanyal monjo jogo, nikech gitek moloyowa.” (Kwan 13:27-31) En adier ni e wang’ dhano, Jo-Kanaan ne tek moloyo Jo-Israel. Kata kamano, wacho ni Jo-Israel ne ok dhi loyo jowasikgi, ne nyiso ni ok gigeno kuom Jehova mondo oresgi. Jotelo apargo nonego oket pachgi kuom gima Jehova ne dwaro ni Jo-Israel otim. Nonego gipar matut e wi gik ma Jehova nosetimonegi chon. Mano dine okonyogi fwenyo ni teko ma Jo-Kanaan ne nigo, ne ok nyal pim gi ma Jehova nigo. Mopogore gi jotelo ma ne onge gi yiego, Joshua gi Kaleb to ne dwaro ni Jehova oyie kodgi. Ne ginyiso Jo-Israel kama: “Ka Jehova mor kodwa, to obiro terowa e pinyno ma omiwago.”—Kwan 14:6-9.
7. Ere kaka wanyalo tego luor ma waluorogo Jehova? (Ne picha bende.)
7 Mondo wanyis ni waluoro Jehova, onego watem matek mondo yiero moro amora ma watimo obed ma more. (Zab. 16:8) Sama isomo ranyisi moko e Muma, penjri kama: ‘Dine bed ni an e ma wachni oyuda, dine atimo yiero mane?’ Kuom ranyisi, tem ane paro ni in achiel kuom joma winjo ka jotelo apar mag Jo-Israel chiwo ripot ma ok owinjore. Be dine iyie gi ripot ma gichiwo, kendo weyo mondo luoro dhano omoni luoro Jehova. Koso hera miherogo Jehova dine ochwali mondo ilo luoro mar dhano? Jo-Israel duto ne ok ofwenyo adiera ma Joshua gi Kaleb ne wacho. Mano nomiyo Jehova ok oyienegi donjo e Piny Manosingi.—Kwan 14:10, 22, 23.
In dine iyie gi ng’a? (Ne paragraf mar 7)
8. En kido mane ma nyaka watem matek mondo wabedgo, to ang’o momiyo dwarore ni wabed gi kidono?
8 Bolruok. Jehova eloga adiera ne joma obolore. (Mat. 11:25) Ne wapuonjore adiera nikech ne wabolore. (Tich 8:30, 31) Kata kamano, onego wabed motang’ mondo kik wachak bedo gi sunga. Sunga nyalo miyo wachak neno ni pachwa ni kare mana kaka paro ma wuok e ndiko kata ma riwruok mar oganda Jehova miyowa.
9. Ere kaka wanyalo siko ka wan joma obolore?
9 Mondo wadhi nyime bedo gi horuok, onego wang’e ni wan joma tindo ahinya kopimwa gi Jehova. (Zab. 8:3, 4) Bende, wanyalo kwayo Jehova mondo okonywa dhi nyime nyago kido mar bolruok kendo rwako puonj mimiyowa. Kar tiyo mana gi pachwa, dwarore ni wayie mondo Jehova okonywa rwako paro mochiwo kotiyo gi Wachne kod riwruok mar ogandane. E somo mari mar Muma, tem ane ng’iyo gik ma nyiso ni Jehova ohero joma obolore, to osin gi josunga, jo ng’ayi, kod joma tokgi tek. Bende, tem matek mondo isik kibolori sama iyudo migepe moko makende.
KAKA WANYALO DHI NYIME SIKO KA WAMAKORE GI ADIERA
10. En ng’a ma Jehova tiyogo e tayo jotichne?
10 Dhi nyime luwo kaka riwruok mar oganda Jehova tayowa. E kinde Jo-Isreal machon, Jehova notiyo gi Musa e tayo joge, kae to notiyo gi Joshua. (Jos. 1:16, 17) Ka ne Jo-Israel oyie gi joma ne Jehova tiyogo mondo otagi, Jehova ne guedhogi. Higni moko mang’eny bang’e, joote 12 e ma ne itiyogo e tayo kanyakla mar Jokristo. (Tich 8:14, 15) Kae to grubno nobedo maduong’ moriwo nyaka jodongo ma ne ni Jerusalem. Kuom luwo kaka chwo ma nogen-go ne tayogi, “kanyakla man kuondego nomedo gurore e yie kendo kwan-gi ne medore pile ka pile.” (Tich 16:4, 5) E kindewagi bende, Jehova biro guedhowa ka waluwo kaka riwruok mar ogandane tayowa. Kata kamano, Jehova biro winjo nade ka ok wayie gi joma oyiero mondo otawa? Mondo wayud dwoko mar penjono, wanon ane gima notimore ne Jo-Israel sama ne gin e yo ka gidhi e Piny Manosingi.
11. En ang’o ma notimore ne Jo-Israel ma nokwedo Musa, ng’at ma Jehova noyiero mondo otagi? (Ne picha bende.)
11 Sama Jo-Israel ne nie yo ka gidhi e Piny Manosingi, nitie chwo moko ma ne nigi huma ma nochako keto kiawa kuom Musa kod migawo ma Jehova nomiye. Ne giwacho kama: “Oganda Jo-Israel duto ler, giduto te, kendo Jehova ni e kindgi.” (Kwan 16:1-3) En adier ni e wang’ Jehova, “oganda Jo-Israel duto” ne ler, kata kamano, Musa e ma Jehova noyiero mondo ota joge. (Kwan 16:28) Joma nong’anyogo nonyiso ni ne gikwedo Jehova kuom kwedo Musa. Ne ok giketo pachgi kuom dwach Jehova, kar mano, ne giketo pachgi kuom dwachgi giwegi, ma ne en bedo gi teko kod huma. Jehova notieko joma nong’anyogo kaachiel gi ji alufe ma noriwogi lwedo. (Kwan 16:30-35, 41, 49). E kindegi, wanyalo bedo gadier ni Jehova kwedo joma ok luw paro mochiwo.
En ng’a ma dine iriwo lwedo? (Ne paragraf mar 11)
12. Ere kaka wanyalo medo geno riwruok mar oganda Jehova?
12 Wanyalo dhi nyime geno riwruok mar oganda Jehova. Sama dwarore ni otim lokruok moro e yo ma wawinjogo puonj moro mar Muma kata yo mitayogo tijwa mar Pinyruoth, joma tayowa ok dikrega kawo okenge ma dwarore mondo gitim lokruogego. (Kwan 4:18) Gima duong’ momiyo gitimo kamano en nikech gidwaro moro Jehova. Bende, gitemo matek mondo gita jotich Nyasaye ka gitiyo gi puonj mag Muma, ma gin puonj ma jotich Jehova duto nyaka luw.
13. “Weche mangima” gin weche mage, to ang’o monego watim gi wechego?
13 “Sik ka imakori gi mise moseket mar weche mangima.” (2 Tim. 1:13) “Weche mangima” gin puonj mag Jo-Kristo ma yudore e Muma. (Joh. 17:17) Puonjgo e ma gik moko duto ma wayiego otenore. Riwruok mar oganda Jehova osekonyowa ng’eyo kaka wanyalo mako puonjgo motegno. Sama watimo kamano, wayudo gueth.
14. Ere kaka Jokristo moko ne ok omakore gi adiera mag “weche mangima”?
14 En ang’o ma biro timore ka ok wamakore gi “weche mangima”? Ne ane ranyisini. E higni mag 100, nitie wach moro ma nolandore ni odiechieng Jehova osechopo. Nyalo bedo ni ne nitie barua ma ne giparo ni Paulo ondiko ma nomiyo ji ochako paro kamano. Nikech Jokristo moko ma wuok Thesalonika ne ok okawo thuolo mar nono ka wechego ne gin adier, ne gichako yie kodgi kendo landogi ne jomamoko. Dine ok owuondgi ka dine giparo weche ma Paulo nopuonjogi e kinde ma ne pod en kodgi. (2 The. 2:1-5) Paulo noparo ne owetene ni kik giyie gi gimoro amora ma giwinjo. Mondo ne koro Paulo okonygi e weche mamoko ma ne ginyalo romogo e kinde ma biro, notieko barua mar ariyo ma nondiko ne Jo-Thesalonika kama: “An Paulo, kendo ma e mos mara ma andikonu gi lweta awuon, ma en ranyisi e barupena duto; mano e yo ma ajandikogo.”—2 The. 3:17.
15. Ere kaka wanyalo kwedo miriambo ma nyalo nenore ka gima gin adier? Chiw ane ranyisi. (Ne picha bende.)
15 Ang’o ma wanyalo puonjore e wi weche ma Paulo nondiko ne Jo-Thesalonika? Sama wawinjo wach moro ma ok luwre gi gik ma wasepuonjore e Muma kata ma wachichgo, onego wati gi rieko. E kinde loch mar Soviet Union, jowasikwa nokeyo barua moro ka giwacho ni nowuok e ofiswa maduong’. Baruano ne temo jiwo owete ni ne gin thuolo loso riwruok mopogore gi marwa. Ne nenore ka gima weche ma ne nie baruano ne gin adier. Kata kamano, Jokristo ma nomakore gi Jehova to ne ok owuond gi wachno. Ne gifwenyo ni weche ma ne nie baruano ne ok luwre gi adiera ma ne gisepuonjore. E kindewagi, jowasikwa temo matek ka gitiyo gi teknoloji ma nyasani mondo gichochwa kata gipogwa. Kar ‘yie mondo ochoch pachwa e yo mayot,’ wanyalo rito pachwa kuom nono gik ma wasomo kata ma wawinjo ka be giluwore gi adiera ma wasepuonjore.—2 The. 2:2; 1 Joh. 4:1.
Kik wuondi gi miriambo ma nenore ka gima gin adier (Ne paragraf mar 15) a
16. Ka luwore gi Jo-Rumi 16:17, 18, ang’o ma wanyalo timo ka jomoko osieko gi puonj ma ok luwre gi adiera?
16 Sik ka in e winjruok achiel gi joma omakore gi Jehova. Nyasaye dwaro ni wabed gi winjruok achiel e kindwa. Wabiro siko ka wan e winjruok achiel ka wamakore gi adiera. Ng’ato ang’ata ma sieko gi puonj ma ok wang’eyo, kelo pogruok ei kanyakla. To mano e momiyo Nyasaye nyisowa ni ‘wawere kodgi.’ Nono to ginyalo ywayowa ma wawe adiera.—Som Jo-Rumi 16:17, 18.
17. Gin ber mage ma wabiro yudo ka wafwenyo adiera kendo makore kode motegno?
17 Sama wafwenyo adiera kendo wamakore kode motegno, winjruokwa gi Jehova medo bedo motegno kendo wamedo gene. (Efe. 4:15, 16) Ok bi wuondwa gi miriambo mag Satan, kendo wabiro siko ka wan e arita maber mar Jehova e kinde masira maduong’. Makri motegno gi adiera misepuonjore to ‘Nyasach kuwe nobed kodi.’—Fil. 4:8, 9.
WER 122 Chung’uru Motegno ma Ok Uyiengni!
a WECHE MA LERO PICHNI: Ranyisi mitimo. Owete moko ma nodak e kinde loch mar Soviet Union yudo barua ma chalo ka gima owuok e ofiswa maduong’. Kata kamano, en barua mowuok kuom jowasikwa. E kindewagi, jowasikwa nyalo tiyo gi intanet e keyo miriambo moro e wi riwruok mar oganda Jehova.
