1-2. Zadok ne en ng’a? (1 Weche mag Ndalo 12:22, 26-28)

 Tem ane go pichani e pachi. Chwo mohingo 340,000 ochokore mondo giket Daudi obed ruodh Israel. Kuom ndalo adek, dwond joma wuoyo, ma wer, kod ma nyiero okwako gode man machiegni gi Hebron. (1 We. 12:39) Rawera moro miluongo ni Zadok nie kindgi, en mana ni ji mang’eny ok nyal fwenyo nie entie. Kata kamano, Jehova to ong’eyo ni en kanyo. (Som 1 Weche mag Ndalo 12:22, 26-28.) Zadok ne en ng’a?

² Zadok ne en jadolo ma ne tiyo machiegni gi Jadolo Maduong’ ma niluongo ni Abiathar. Zadok ne en bende janen ma ne nigi rieko kod nyalo mar ng’eyo weche matut mag Nyasaye. (2 Sa. 15:27) Ji ne dhiga ir Zadok mondo ong’adnegi rieko. Bende, ne en jachir. E sulani, wadwaro nono kaka Zadok nonyiso chir.

3. (a) Ang’o momiyo jotich Jehova onego onyis chir? (b) Ang’o ma wabiro nono e sulani?

³ E ndalo mag gikogi, Satan osemedo kinda ahinya mondo oketh yie mar jotich Jehova. (1 Pet. 5:8) Dwarore ni wabed gi chir sama warito mondo Jehova otiek Satan kod lange. (Zab. 31:24) Wanon ane yore adek ma wanyalo luwogo ranyisi mar Zadok mar bedo jachir.

RIW LWEDO PINYRUODH NYASAYE

4. Mondo wariw Pinyruodh Nyasaye lwedo, ang’o momiyo dwarore ni jotich Jehova obed gi chir? (Ne picha bende.)

⁴ Kaka jotich Jehova, wariwoga lwedo Pinyruodhe gi chunywa duto. Kata kamano, timo mano dwaro chir. (Mat. 6:33) Kuom ranyisi, e piny marachni, dwarore ni wabed gi chir mondo wadag ka luwore gi chike mag Jehova kendo lando wach maber mar Pinyruoth. (1 The. 2:2) Bende,  piny ma wadakieni opong’ gi ywaruok e weche mag siasa kendo dwarore ni wabed gi chir mondo kik wariw lwedo wechego. (Joh. 18:36) Ng’eny jotich Jehova osebedo gi pek e weche mag yuto, to moko bende osesandi kata osetue e jela nikech gitamore riwo lwedo weche mag siasa kata donjo e lweny.

5. Ang’o momiyo ne dwarore ni Zadok onyis chir sama noriwo Daudi lwedo?

⁵ Zadok ne ok odhi Hebron mana ni mondo obed e nyasi ma ne iketoe Daudi ruoth. Nodhi kanyo ka omanore gi gige lweny kendo noikore kedo. (1 We. 12:38) Noikore dhi gi Daudi e lweny kendo kedo ne Jo-Israel mondo wasikgi kik hinygi. Zadok ne ok olony ahinya e lweny, kata kamano, pod noikore kedo gi chir.

6. Ere kaka Daudi noketo ne Zadok ranyisi maber e nyiso chir? (Zaburi 138:3)

⁶ Ang’o ma nokonyo Zadok bedo gi chir? Chwo ma roteke kendo ma jochir nolwore. Onge kiawa ni nopuonjore kuom ranyisigi. Kuom ranyisi, noneno chir ma Daudi nonyiso sama ‘notayo Jo-Israel,’ kendo kaka mano nomiyo Jo-Israel oriwe lwedo gi chunygi duto. (1 We. 11:1, 2) Kinde duto Daudi nogeno Jehova mondo okonye loyo wasike. (Zab. 28:7; som Zaburi 138:3.) Nitie jomoko bende ma noketone Zadok ranyisi maber, kuom ranyisi, Jehoyada kod wuode ma niluongo ni Benaya kaachiel gi chwo 22 ma ne wuotho gi Daudi. (1 We. 11:22-25; 12:26-28) Chwogo duto nong’ado ni ne gidhi riwo loch mar Daudi lwedo.

7. (a) Gin ranyisi mage mag joma nonyiso chir e kindegi ma wanyalo puonjore kuomgi? (b) Ang’o mipuonjori e wi owadwa Nsilu miwuoye e vidio?

⁷ Nono ranyisi mag joma noriwo lwedo loch Jehova gi chir, nyalo konyowa mondo wan bende wabed gi chir. Yesu  Kristo Ruodhwa nochung’ motegno kendo notamore riwo lwedo loch Satan e kinde ma ne en e piny ka. (Mat. 4:8-11; Joh. 6:14, 15) Kinde duto, nogeno kuom Jehova mondo omiye teko mar timo gik mabeyo. E kindewagi bende, nitie owete mathoth mosenyiso chir kendo gisetamore donjo e lweny kata riwo lwedo weche mag siasa. Donge inyalo nono moko kuom ranyisigigo e jw.org? a

KONY JOKRISTO WETENI

8. Gin kinde mage ma dwarore ni jodong-kanyakla onyisie chir sama gikonyo owete gi nyimine?

⁸ Jotich Jehova ohero konyo jowetegi. (2 Kor. 8:4) Kata kamano, seche moko nyalo dwarore ni wabed gi chir e ka watim kamano. Kuom ranyisi, sama lweny omuoch, jodong-kanyakla jiwoga owete gi nyimine kendo gikonyogiga e yor chuny kod e yor ringruok. Hera e ma chwaloga jodong-kanyakla mondo gine ni owete gi nyimine oyudo gige ringruok ma gichando kata obedo ni samoro timo kamano nyalo keto ngimagi kama tek. (Joh. 15:12, 13) Sama gitimo kamano, giluwo ranyisi mar Zadok mar bedo jochir.

9. Ka luwore gi 2 Samuel 15:27-29, en ang’o ma Daudi nonyiso Zadok mondo otim? (Ne picha bende.)

⁹ Ngima Daudi ne ni kama tek. Absalom wuode noramo ni nyaka onege mondo en e mobed ruoth. (2 Sa. 15:12, 13) Ne dwarore ni Daudi owuog Jerusalem mapiyo! Nonyiso jotichne kama: “Wuoguru piyo wadhi, nono to Absalom biro negowa waduto.” (2 Sa. 15:14) Ka ne giwuok, Daudi nofwenyo ni ne dwarore ni ng’ato odong’ Jerusalem mondo okonye ng’eyo gima Absalom ne chano timo. Omiyo, nonyiso Zadok kaachiel gi jodolo  moko mondo gidog Jerusalem mondo gikonye ng’eyo gik ma ne timore kuno. (Som 2 Samuel 15:27-29.) Zadok gi jodolo mamokogo ne nyaka tim kamano ka gitang’. Gima Daudi nonyisogi ni gitim ne ok yot, kendo mano ne nyalo miyo oneggi. Tem ane paro gima Absalom ng’at ma nohero lweny, ma noketo dwache motelo, kendo ma nondhogo nyaka wuon-gi, ne nyalo timo ne Zadok kaachiel gi jodolo mamokogo ka dine ofwenyo ni gin kanyo mondo ging’e gik ma ne gichano, kae to ginyis Daudi!

10. Ere kaka Zadok kaachiel gi joma ne ni kode norito ngima Daudi?

¹⁰ Nitie gimoro machielo ma Daudi ne dwaro ni Zadok kod Hushai, osiepne moro ma bende nomakore kode otim. (2 Sa. 15:32-37) Hushai ne dhi wuondore ni oriwo Absalom lwedo kendo ng’adone paro kaka nonyalo monjo Daudi, to mano ne dhi miyo Daudi thuolo mar ikore ne monj ma kamano. Bang’e, Hushai nonyiso Zadok kod Abiathar ni Absalom noyie gi paro ma nong’adoneno. (2 Sa. 17:8-16) Chwo ariyogo notemo matek mondo Daudi ong’e gima Absalom ne chano timo. (2 Sa. 17:17) Jehova notiyo gi Zadok kaachiel gi jodolo wetene e reso ngima Daudi.—2 Sa. 17:21, 22.

11. Ere kaka wanyalo luwo ranyisi mar Zadok mar nyiso chir sama wakonyo owetewa?

¹¹ Ka okwawa ni wakony owetewa e kinde ma weche tek, ere kaka wanyalo nyiso chir kaka Zadok? (1) Luw kaka itayowa. E kinde kaka mago, dwarore ahinya ni wabed gi winjruok kod paro achiel. Ti gi paro mochiw kowuok e bad ofisu. (Hib. 13:17) Kinde ka kinde, jodong-kanyakla onego onon paro ma omigi kowuok e ofis, ma nyiso kaka ginyalo ikore kod okenge ma onego gikaw sama masira oneno. (1 Kor. 14:33, 40) (2) Bed gi chir kendo ibed motang’. (Nge. 22:3)  Par matut ka pok ikawo okang’ mar timo gimoro. Tem matek mondo kik iket ngimani kama rach ka ok ochuno. (3) Gen kuom Jehova. Ket e paro ni Jehova dwaro ni ngimani kaachiel gi ngima oweteni kik bed kama rach. Onyalo miyo ikony oweteni ma ok uyudo hinyruok moro amora.

12-13. Ranyisi mar Viktor kod Vitalii puonji ang’o? (Ne picha bende.)

¹² Ne ane ranyisi mar Viktor kod Vitalii, owete moko ariyo ma nomi migawo mar kowo chiemo kod pi ne owete man Ukraine. Viktor wacho kama: “Ne wamanyoga chiemo kamoro amora. Ne wawinjoga ka bunde muoch machiegni gi kama ne wantie nyading’eny. Owadwa moro nochiwo chiemo moko ma nokano. Chiemogo ne dhi konyo jolendo mang’eny kuom kinde moko. Sama ne waketo chiemogo e lori, mbom nomuoch mita 20 kowuok kama ne wantie. E odiechieng’no duto, nasiko ka akwayo Jehova e lamo mondo omiya chir mar dhi nyime konyo jolendo wetena.”

¹³ Vitalii wacho kama: “Ne dwarore ni abed gi chir momedore. Wuoth ma nakwongo dhiye nokawo seche 12. Nasiko ka alemo sama ne an e yo.” Vitalii ne nigi chir kendo notang’. Omedo wacho kama: “Nakwayo Jehova mondo omiya rieko kendo okonya bedo gi bolruok. Nariembo mtoka mana e nderni ma sirkal nopwodho kende. Neno kaka owete gi nyimine ne tiyo kanyachiel nomedo tego yiena. Ne gitemo matek mondo gigol gik ma ne nie ndara kendo ne gichoko chiemo, lewni, kod gik mamoko mochuno, kae to ne giketogi e lori. Ne gimiyowa bende chiemo kod kuonde ma ne wanyalo buoroe.”

DHI NYIME MAKORI GI JEHOVA

14. Sama ng’at ma wahero oweyo Jehova, mano nyalo miyo wawinj nade?

¹⁴ Achiel kuom gik ma nyalo temo yiewa kendo nyoso chunywa en sama achiel kuom joodwa kata osiepwa ma wang’iyogo ahinya oweyo Jehova. (Zab. 78:40; Nge. 24:10) Ka en ng’at ma wahero ahinya kata ng’at machiegni kodwa, nyalo bedonwa matek nyagore gi pekno. Ka chal ma kamano osegayudi, ranyisi mar Zadok nyalo jiwi ahinya.

15. Ang’o momiyo ne dwarore ni Zadok obed gi chir mondo osik komakre gi Jehova? (1 Ruodhi 1:5-8)

¹⁵ Zadok nodhi nyime makore gi Jehova ka osiepne machiegni miluongo ni Abiathar nong’anyo. Mano notimore e giko loch mar Daudi. Kinde ma Daudi ne nie kitanda mar midekre, wuode miluongoni Adonija notemo kawo loch githwon, to Jehova nosesingo ni Solomon e ma ne dhi bedo ruoth. (1 We. 22:9, 10) Abiathar noyiero riwo Adonija lwedo. (Som 1 Ruodhi 1:5-8.) Kuom timo kamano, Abiathar nonyiso ni ne ok omakore gi Daudi kod Jehova bende. Temie paro kaka timno nonyoso chuny Zadok! Kuom higni 40 kama, Zadok kod Abiathar ne tiyoga kanyachiel kaka jodolo. (2 Sa. 8:17) Ne gisebedo ka gitiyo tij rito “Sandug Singruok mar Nyasaye” kanyachiel. (2 Sa. 15:29) Mokwongo kwongo, giduto ne giriwo loch mar Daudi lwedo kendo timo mathoth e tij Jehova.—2 Sa. 19:11-14.

16. Ang’o ma nyalo bedo ni nokonyo Zadok mondo odhi nyime makore gi Jehova kod Daudi?

¹⁶ Zadok nodhi nyime makore gi Jehova kata obedo ni Abiathar to noweyo timo kamano. Daudi nodhi nyime geno  Zadok osiepne. Ka nofweny paro marach ma Adonija ne nigo, Daudi nonyiso Zadok, Nathan, kod Benaya mondo owal Solomon obed ruoth. (1 Ru. 1:32-34) Bedo machiegni gi joma ne lamo Jehova kaka Nathan kaachiel gi joma noriwo Daudi lwedo nojiwo Zadok kendo tege. (1 Ru. 1:38, 39) Ka ne Solomon obedo ruoth, noketo Zadok obedo jadolo kar Abiathar.—1 Ru. 2:35.

17. Ere kaka inyalo luwo ranyisi mar Zadok sama ng’at man machiegni kodi oweyo Jehova?

¹⁷ Ere kaka inyalo luwo ranyisi mar Zadok? Ka ng’at man machiegni kodi oweyo Jehova, tim gik ma nyiso ni in to imakori gi Jehova. (Jos. 24:15) Jehova biro miyi teko kod chir mar nano. Nyis ni igene kokalo kuom lamo kendo ibed machiegni gi jotichne momakore kode. Jehova mor ahinya sama imakori kode kendo obiro guedhi.—2 Sa. 22:26.

18. Ang’o ma wanyalo puonjore kuom ranyisi mar Marco gi Sidse?

¹⁸ Ne ane ranyisi mar Marco kod jaode miluongo ni Sidse, ma nyigi moko ariyo noweyo adiera. Marco wacho kama: “Janyuol chakoga hero nyathi chieng’ monyuole. Otimoga duto monyalo mondo orite maber. Omiyo, chuny janyuol nyalo nyosore ahinya sama nyathine oweyo Jehova.” Odhi nyime wacho kama: “Kata kamano, Jehova osekonyowa nano. Osekonyowa mondo wajiwre e kindwa wawegi. Sama awinjoga ka chunya onyosore, jaoda jiwaga, to sama en bende owinjo ka chunye onyosore, ajiwega.” Sidse medo wacho kama: “Dine ok obednwa mayot nano, ka dine Jehova ok omiyowa teko. Nakuyoga ahinya nikech naparo ni an e ma namiyo nyigago oweyo adiera. Omiyo, nanyiso Jehova kaka awinjo. Bang’ kinde moko, nyaminwa moro ma nasebudhone nobiro ira, moketo lwete e goka kong’iyo wang’a tir, kae to onyisa niya: ‘Par wachni, Sidse, ok in e ma imiyo nyigigo oweyo adiera!’ Jehova osekonya mondo adhi nyime tiyone ka amor.”

19. Ang’o ming’ado ni ibiro timo?

¹⁹ Jehova dwaro ni jotichne duto obed gi chir kaka Zadok. (2 Tim. 1:7) Kata kamano, ok odwar ni wagen tekowa wawegi, to odwaro ni wagene. Omiyo, kiromo gi tem moro ma dwarore ni inyisie chir, kwa Jehova mondo okonyi. Bed gadier ni obiro miyo ibed gi chir mana kaka Zadok!—1 Pet. 5:10.