Be isesomo adimba gocho mosekalo mag Ohinga mar Jarito? Ka en kamano, ne ane ka be inyalo dwoko penjo ma luwogi:

Gin gik mage ang’wen ma wanyalo timo mondo wawer maber moloyo?

Onego wachung’ maber ka wating’o bugewa mag wer malo. Onego wagam muya moromo kendo wakune. Bende, onego wayaw dhowa gi dandwa malach, kendo wawer gi dwol motegno.—w17.11, ite mar 5.

En ang’o ma morowa gi kuonde ma taonde mag resruok ne yudoree kod nderni ma ne dhi e taondego?

Ne gin taonde auchiel kendo chopoe ne yot. Nderni ma ne dhi e taondego ne olos maber. Mano ne miyo ng’ama oneko kobothne yudo resruok mapiyo kendo e yo mayot.—w17.11, ite mar 14.

Ang’o momiyo rawar ma Jehova nomiyowa kokalo kuom tho Yesu e mich maberie moloyo?

Rawarno chopo gombowa mar dak nyaka chieng’ kod mar wuok e tuech mar richo kod tho. Nikech Nyasaye nochiwo rawar ka ne pod wan joricho, mano nyiso ni ohero nyikwa Adam.—wp17.6, ite mag 6-7.

Zaburi 118:22 wuoyo e wi wach mane motudore gi chier mar Yesu?

Ji mang’eny ne odagi Mesia kendo ne ginege. Mondo ne obed kidi ma riwo kor ot, ne nyaka chiere.—w17.12, ite mag 9-10.

Be ne ochuno ni Mesia nyaka wuog mana e anyuola mar nyithindo ma kayo kende?

En adier ni nitie jomoko e anyuola Yesu ma ne gin nyithindo ma kayo, kata kamano, ok giduto. Kuom ranyisi, Daudi wuod Jesse ne ok en wuoyi ma kayo. To e ma Mesia ne owuok e anyuola Daudi.—w17.12, ite mag 14-15.

Gin puonj mage ma Muma oting’o ma nyalo konyowa e weche thieth?

Nitie tuoche moko ma ka nomako ng’ato to Chike Musa ne wacho ni ng’at ma kamano onego ket kar kende. Ji ne nyaka luokre bang’ mulo ng’at motho. Oko mar dhano ne nyaka yik maber. Ne onego ter nyithindo ma chwo nyange e odiechieng’ mar aboro bang’ nyuolgi nikech remb nyithindo ma e ka oa nyuol nigi nyalo mar weyo chuer bang’ juma achiel kama ka gimoro ong’adogi.—wp18.1, ite mar 7.

Ang’o momiyo ok rach ka Jakristo oherore owuone okang’ mowinjore?

Onego waher jowetewa kaka waherore wawegi. (Mar. 12:31) Chwo onego “oher mondegi kaka gihero ringregi giwegi.” (Efe. 5:28) En mana ni ka ok watang’, to yot ahinya mondo waherre wawegi mokalo tong’.—w18.01, ite mar 23.

Gin okenge mage ma nyalo konyowa timo dongruok e weche Nyasaye?

Onego wapuonjre Wach Nyasaye e yo mong’ith, wapar matut kuom gik ma wapuonjore, kendo waluw gik ma wapuonjore. Bende, onego wayie mondo roho maler ota pachwa kod chunywa, kendo wayie mondo jomoko okonywa.—w18.02, ite mar 26.

Ang’o momiyo josom sulwe kod jokor wach ok nyal hulo gik ma biro timore?

Nitie gik mathoth momiyo ok ginyal timo kamano, kata kamano, gima duong’ moloyo en ni Muma odagi timbego.—wp18.2, ite mag 4-5.

Wanyalo nyiso nade ni wan joma igeno sama jowetewa ogwelowa e utegi?

Ka waseyie dhi, onego watim kamano. (Zab. 15:4) Kik wabare abaya ma onge gimomiyo. Nyalo bedo ni ng’at ma ogwelowa oseiko gik moko ma ka wabare to kinda duto motimo biro bedo kayiem.—w18.03, ite mar 18.

Ang’o ma jodong-kanyakla gi jokony-tich nyalo puonjore kuom Timotheo?

Timotheo ne dewo ji gadier kendo tij lendo e ma noketo mokwongo e ngimane. Notiyo matek e tij Nyasaye kendo notiyo gi gik ma nopuonjore e Wach Nyasaye. Nodhi nyime tiegore kendo ne oyie mondo roho mar Jehova otaye. Jodongo gi jokony-tich nyalo luwo ranyisine.—w18.04, ite mag 13-14.