1. Ere kaka Jehova chalo gi miyo ma dhodho nyathi?

E NDALO janabi Isaya, Jehova nopenjo kama: “Be nitie dhako ma wiye diwil gi nyathine ma pod dhoth?” Kae to nonyiso jotichne niya: “Kata obedo ni mon wigi nyalo wil gi nyithindgi, an to wiya ok nyal wil kodu.” (Isa. 49:15) Thothne, Nyasaye ok pimrega gi mine, kata kamano, e kindeno to notimo kamano. Jehova nopimo yo ma onenogo jotichne gi hera matut ma miyo oherogo nyathine, nikech nodwaro nyiso kaka ohero jotichne kendo ogenogi ahinya. Mine mang’eny oyie gi weche ma nyaminwa miluongo ni Jasmin nowachogi: “Sama idhodho nyathini, ubedo gi winjruok kod hera matut ma biro siko.”

2. Jehova winjoga nade sama jatichne moro odok chien e tij lendo?

² Sama achiel kuom jotich Jehova oweyo dhi e chokruoge kod tij lendo, Jehova ong’eyo wachno maler. Tem ane paro kaka owinjoga malit sama oneno ka jotichne mang’eny dok chien e tij lendo * higa ka higa.

3. Ang’o ma Jehova dwaro ni joma osedok chien otim?

³ Ng’eny owete gi nyimine ma osedok chien e tij lendo duogoga e kanyakla, kendo wabedoga ma mor ahinya sama gitimo kamano! Jehova dwaro ni giduogi, kendo wan be mano e gombowa. (1 Pet. 2:25) Ere kaka wanyalo konyogi? Ka pok wadwoko penjono, ber ng’eyo gimomiyo Jokristo moko weyoga biro e chokruok kod tij lendo.

4. Ere kaka tij andika osechocho jomoko?

⁴ Nitie joma oseweyo mondo tijegi mag andika obedo mokwongo e ngimagi. Owadwa moro miluongo ni Hung * modak Asia nowacho kama: “Natiyoga gi thuolo kod teko mang’eny ahinya e tij andika. Naparoga ni ka an gi pesa mang’eny to ne anyalo tiyo ne Jehova nyamonge. Omiyo, nachako tiyo kuom thuolo momedore. Mosmos nachako bara ne chokruoge, kendo gikone ne aweyo dhi e chokruok chuth-chuth. Satan oloso pinyeni e yo mariek mondo ochoch pachwa mosmos, kendo ogolwa ir Jehova.”

5. Ere kaka nyaminwa moro noyudo chandruoge moluwore oluwore?

⁵ Owete gi nyimine moko to chunygi nyosorega nikech chandruoge ma gikaloe. Mano e gima notimore ne Nyaminwa Anne modak Britain, kendo ma nigi nyithindo abich. Owacho niya: “Wuoda ma chogo ong’ol chakre nyuolne. Bende, achiel kuom nyiga nogol oko mar kanyakla, kae to tuo mar obwongo nogoyo wuoda machielo. Chunya nonyosore ahinya mi adok chien e tij lendo, kendo naweyo dhi e chokruoge.” Kuom adier, litnwaga ahinya ka waneno jowetewa ka kalo e chandruoge kaka ma Nyaminwa Anne gi joode nokaloe!

6. Ere kaka Jo-Kolosai 3:13 nyalo konyowa mondo kik wabed mabor gi Jokristo wetewa?

⁶ Som Jo-Kolosai 3:13. Jotich Jehova moko to oseweyo tiyone nikech Jokristo wetegi samoro nochwanyogi. Jaote Paulo nowacho ni nitie kinde ma “wach moro” nyalo makowa gi owadwa kata nyaminwa moro. Jakristo moro nyalo timonwa gimoro ma ok owinjore, kendo iwa nyalo wang’ ahinya kode. Ka ok watang’, wanyalo makone sadha, kendo mano nyalo miyo wachak bedo mabor gi Jokristo wetewa. Ne ane gima notimore ne Owadwa Pablo modak South America. Nohangne ni notimo richo moro, kendo mano nomiyo ogole e migawo ma notimo e kanyakla. Notimo nang’o? Pablo wacho niya: “Iya nowang’ matek, kendo mosmos naweyo dhi e chokruoge kod tij lendo.”

7. Richo ma ng’ato notimo chon nyalo miyo otim ang’o?

⁷ Richo ma ng’ato notimo chon bende nyalo chando chunye ahinya ma chop kama onenore ka ng’at manono e wang’ Jehova. Kata ka po ni ng’atno noloko chunye gadier mi owene richono, pod onyalo winjo e chunye ni ok owinjore bedo e kind jotich Jehova. Mano e gima notimore ne owadwa moro miluongo ni Francisco. Owacho niya: “Ka nomiya siem nikech timbe mag terruok, ne ok aweyo dhi e chokruoge. Kata kamano, chunya nochako nyosore mosmos mi achako neno ni ne ok awinjora bedo achiel kuom jotich Jehova. Chunya ne siko ka chanda, kendo ne an gadier ni Jehova pok noweyona richona. Gikone, ne aweyo dhi e chokruoge kod tij lendo.” Iwinjoga nade sama owete gi nyimine kalo e chandruoge kaka mowuoye e paragraf mar 4-7? Be ikechogiga? To maduong’ie moloyo, Jehova winjoga nade sama jotichne kalo e chandruoge kaka mago?

8. Be wi Jehova wilga gi jotichne ma osedok chien? Ler ane.

⁸ Wi Jehova ok wilga gi jotichne ma  osedok chien moweyo tudore gi joge. Bende, wiye ok wil gi gik mabeyo ma ne gitimone. (Hib. 6:10) Janabi Isaya notiyo gi ranyisi moro e nyiso kaka Jehova dewo jotichne. Nowacho niya: “Obiro rito rombene mana kaka jakwath. Obiro choko nyirombe gi bade, kendo obiro ting’ogi e kore.” (Isa. 40:11) Jehova Jakwadhwa Maduong’ winjoga nade sama rombone moro oweyo kueth? Yesu nonyiso kaka Jehova winjoga ka nopenjo jopuonjrene niya: “Uneno nade? Ka ng’ato nigi rombe 100 kae to achiel kuomgi olal, donge obiro weyo rombe 99 mamoko e got mondo odhi omany achiel molalno? To ka oyude, obedo mamor gi rombono moloyo 99 ma ne ok olal.”​—Mat. 18:12, 13.

9. E kinde ma ne indikoe Muma, ere kaka jokwath ne nyiso ni gidewo rombegi? (Ne picha manie nyim gaset.)

⁹ Ang’o momiyo en gima owinjore pimo Jehova gi jakwath? Nikech e kinde ma nindikoe Muma, jokwath ne dewoga rombegi ahinya. Kuom ranyisi, Daudi nokedo gi sibuor kod dubu ma nomonjo kuethne. (1 Sa. 17:34, 35) Jakwath ma dewo rombene ong’eyo kata sama achiel kuomgi olal. (Joh. 10:3, 14) Jakwath ma kamano nyalo weyo rombene 99 e kul kata e lwet jokwath mamoko, mondo odhi omany rombo achiel molalno. Yesu notiyo gi ranyisino e chiwo puonj moro maduong’ ka nowacho niya: “Ok en gima long’o ne Wuora manie polo mondo kata mana achiel kuom jo matindogi olal.”​—Mat. 18:14.

10. Ka luwore gi Ezekiel 34:11-16, Jehova nosingo ni nodhi timo ang’o ne rombene ma nolal?

¹⁰ Jehova ohero ng’ato ka ng’ato kuomwa moriwo nyaka ‘joma tindo’ ma oseweyo kueth. Kokalo kuom janabi Ezekiel, Nyasaye nosingo ni ne odhi manyo rombene ma nolal, kendo konyogi mondo gichak gibed gi winjruok maber kode. Bende, nonyiso okenge ma nodhi kawo mondo oresgi. Okengego e ma jakwath ma Ja-Israel ne kawoga sama nofwenyo ni  rombo moro olal. (Som Ezekiel 34:11-16.) Mokwongo, jakwath ne manyoga rombo molal kendo mano ne dwaro thuolo kod kinda mang’eny. Kae to koseyude, noduoko rombono e kueth. E wi mano, ka po ni jakwath nofwenyo ni rombono ohinyore kata odenyo, jakwadhno ne tueyo ne rombono kuonde mohinyorego, kae to oting’e, kendo opidhe. Jodong-kanyakla ma bende iluongo ni jokwath mag ‘kueth Nyasaye,’ onego okaw okenge ma chalo kamano sama gikonyo rombo moro amora moweyo kueth. (1 Pet. 5:2, 3) Jodongo manyoga joma kamago mondo giduokgi e kueth, kae to gikonyogiga loso winjruok gi Nyasaye kendo. *

11. Ang’o ma jakwath maber ong’eyo?

¹¹ Jakwath maber ong’eyo maler ni rombo nyaloga lal, kendo ka gima kamano otimore, jakwadhno ok bedga mager gi rombono. Ne ane ranyisi ma Jehova noketonwa sama nokonyo moko kuom jotichne ma noweye kuom kinde moro.

12. Ere kaka Jehova nokonyo Jona?

¹² Janabi Jona noringo migawo ma Jehova nomiye. Kata kamano, Jehova ne ok ojok kode mapiyo. Mana kaka jakwath maber timoga, Jehova nokonye, motege mondo otim migawono. (Jona 2:7; 3:1, 2) Bang’e, Jehova notiyo gi ranyisi mar otangwe mondo okony Jona neno kaka ngima dhano en gima duong’. (Jona 4:10, 11) Mano puonjowa ang’o? Jodongo ok onego ojog mapiyo gi joma odok chien moweyo tij lendo. Kar mano, onego gitem nono gimomiyo rombono noweyo kueth. Kendo sama rombono oduogo ir Jehova, jodongo onego odhi nyime nyiso ni gidewe.

13. Ang’o ma wapuonjore e yo ma Jehova nokonyogo jal ma nondiko Zaburi 73?

¹³ Chuny jal ma nondiko Zaburi 73 nonyosore ahinya ka noneno kaka ngima joricho ne dhi maber. Nochako neno ni onge ber moro amora ma ng’ato  yudo sama otiyo ne Jehova. (Zab. 73:12, 13, 16) Jehova nonene nade? Ne ok ojok kode, kar mano, Jehova notaye mondiko wechego e Muma. Gikone, jandik-zaburino nofwenyo ni winjruok maber gi Jehova ber moloyo gimoro amora ma ng’ato nyalo bedogo e ngima. (Zab. 73:23, 24, 26, 28) Mano puonjowa ang’o? Jodong-kanyakla ok onego orikni ng’ado ni Jakristo moro osebam mana nikech en gi kiawa ka be tiyo ne Jehova nigi ber moro amora. Kar mano, onego gitem nono gimomiyo rombono wuoyo kata timo gik moko e yo ma nyiso ni en gi kiawa. Bang’ ka jodongo osenono wachno, e ka koro ginyalo jiwe ka gitiyo gi ndiko mowinjore.

14. Ang’o momiyo Elija ne dwaro kony, to Jehova nokonye nade?

¹⁴ Janabi Elija noringo ka Jezebel ne dwaro nege. (1 Ru. 19:1-3) Noparo ni en kende e janabi ma nodong’ e kind jonabi mag Jehova, kendo ni tich ma nosetiyo ne Jehova ne en kayiem. Chuny Elija nonyosore mochopo kama nogombo tho. (1 Ru. 19:4, 10) Jehova ne ok odhawo ne Elija, kar mano, Jehova nokonye bedo gadier ni ne ok en kende, kendo ni nodhi miye teko mar timo migepe ma pod ne dwarore ni otim. Jehova nochiko ite sama Elija ne nyise gik ma ne chande, kae to nomiye migawo manyien. (1 Ru. 19:11-16, 18) Mano puonjowa ang’o? Waduto​—to ahinya-ahinya jodong-kanyakla​—onego wabed mang’won  gi rombe mag Jehova. Jodong-kanyakla onego ochik itgi ne Jakristo moro amora ma nyisogi gik ma chande, bed ni ng’atno iye owang’, kata oparo ni onge ng’wono moro amora ma Jehova osenyise. Kae to gibiro konye bedo gadier ni Jehova ohere ahinya.

15. Ka luwore gi Johana 6:39, Yesu ne neno nade rombe mag Wuon-gi?

¹⁵ Jehova dwaro ni wane nade rombene molal? Yesu noketonwa ranyisi kuom wachno. Nong’eyo ni Jehova ohero rombene ahinya, omiyo, notimo duto ma nonyalo mondo oduok ‘rombe ma nolal mag Israel’ e kueth. (Mat. 15:24; Luka 19:9, 10) Bende, kaka jakwath maber, Yesu notimo duto ma nonyalo mondo kik olal rombo moro amora ma Jehova nomiye.​—Som Johana 6:39.

16-17. Jodongo onego obed gi paro mane sama gikonyo rombe molal? (Ne sanduk ma wiye wacho ni, “ Kaka Rombo Molal Nyaloga Winjo e Chunye.”)

¹⁶ Jaote Paulo nojiwo jodong-kanyakla ma ne ni Efeso mondo giluw ranyisi mar Yesu. Nonyisogi niya: “Nyaka ukony jo ma yom yom, kendo nyaka usik ka uparo weche Ruoth Yesu owuon ma nowacho kama: ‘Chiwo kelo mor mang’eny moloyo kawo.’” (Tich 20:17, 35) Ndikono nyiso maler ni jodong-kanyakla nigi ting’ makende mar rito rombe Jehova. Jaduong’-kanyakla moro miluongo ni Salvador ma wuok e piny Spain wacho niya: “Paro apara kaka Jehova dewoga rombene molal chwalaga mondo atim duto ma anyalo e konyo rombe molal. An gadier ni Jehova dwaro ni arit rombene e yo maber.”

¹⁷ Ji duto ma ne oweyo Jehova ma owuo kuomgi e sulani noduogo e kueth. Kata mana sani, nitie ji mang’eny ma noweyo Jehova ma gombo duogo ire. Sula ma luwo biro nyisowa gik momedore ma wanyalo timo mondo wakonygi giduog ir Jehova.