1. Gin ang’o ma nyalo miyo jotich Jehova seche moko owinj ka gin kendgi?

NITIE seche ma thothwa jawinjo ka gin kendgi ahinya. Jomoko winjoga kamano kuom kinde machuok. Moko to winjo kamano kuom kinde malach. Wanyalo winjo ka wan kendwa kata mana sa ma ji mang’eny olworowa koni gi koni. Jomoko yudo ka ok yotnegi ng’iyo gi ji e kanyakla manyien. Jomoko bende ong’iyo ahinya gi joodgi, ma kochopo kama koro nyaka gidar gidhi mabor kodgi, to giwinjo ka gin kendgi ahinya. Jomoko bende winjo ka piny ochamogi ahinya sama giparo watgi moro machiegni ma notho. Bende, Jokristo moko ma yande e ka opuonjore adiera nyaloga winjo ka gin kendgi nikech wedegi gi osiepegi kwedogi kata sandogi.

2. Gin penjo mage mwadwaro dwoko?

² Jehova ong’eyowa maber ahinya. Ong’eyo seche mwawinjo ka wan kendwa, kendo oikore konyowa mondo wanyagre. Gin yore mage ma Jehova konyowago? Ang’o ma wan wawegi wanyalo timo mondo wanyagre maber sama wawinjo ka wan kendwa? To ang’o mwanyalo timo mondo wakony jomamoko e kanyaklawa ma nyalo bedo ni winjo ka gin kendgi? We wane ane dwoko mag penjogo.

3. Jehova nonyiso nade ni nodewo Elija?

³ Jehova dewo jotichne duto kendo doher ni gibed mamor. Ochiegni gi ng’ato ka ng’ato kuomwa, kendo onyaloga fwenyo sama chunywa onyosore. (Zab. 145:18, 19) Ne ane kaka Jehova nodewo janabi Elija kod kaka nokonye. Elija nodak e  kinde matek ahinya e piny Israel machon. Ne isando jotich Jehova malit ahinya, kendo jowasik Nyasaye ne dwaro nego Elija. (1 Ru. 19:1, 2) Gima chielo ma be ne kelo ne Elija parruok en ni nogalo ni en kende e janabi ma nodong’ ka pod tiyo ne Jehova. (1 Ru. 19:10) Nyasaye nokawo okang’ mapiyo mar konyo Elija. Nooro malaikane mondo odhi onyis Elija ni ne ok en kende. Pod ne nitie Jo-Israel mang’eny ma noluoro Nyasaye!​—1 Ru. 19:5, 18.

4. Weche manie Mariko 10:29, 30 nyiso nade ni Jehova dewo jotichne ma onge joma dikonygi?

⁴ Jehova ong’eyo maber ni jomoko kuomwa otuonore gik mang’eny ahinya mana ni mondo gitine. Kuom ranyisi, wedegi ma ok Joneno kata osiepegi machon koro ok konygi. Samoro parruok ma kamano e ma nomiyo Petro kinde moro openjo Yesu niya: “Waseweyo gik moko duto mi waluwi; kare wan to en ang’o ma wanayudi?” (Mat. 19:27) Yesu nonyiso jopuonjrene ni kik giluor nikech kanyakla ne dhi chalo kaka joodgi. (Som Mariko 10:29, 30.) Jehova Wuonwa bende osingo ni ok obi jwang’o jatichne moro amora. (Zab. 9:10) Ne ane moko kuom gik minyalo timo mondo Jehova okonyi nyagori maber sama iwinjo ka in kendi.

5. Sama iketo pachi kuom yore ma Jehova konyigo, mano biro jiwi nade?

⁵ Ket pachi kuom yore ma Jehova konyigo. (Zab. 55:22) Mano biro konyi fwenyo ni kare ok in kendi. Nyaminwa Carol * ma pok okendi, kendo ma en kende e Janeno e odgi, wacho kama: “Sa asaya ma aparo kaka Jehova osebedo ka konya nano e tembe mopogore opogore, mano konya bedo gadier ni ok an kenda. Bende, mano miyo abedo gadier ni Jehova biro siko komakore koda kata e kinde mabiro.”

6. Ere kaka ndiko mar 1 Petro 5:9, 10 nyalo jiwo joma winjo ka gin kendgi?

⁶ Par kaka Jehova osebedo ka konyo Jokristo weteni ma bende winjo ka gin kendgi. (Som 1 Petro 5:9, 10.) Owadwa Hiroshi, mosebedo Janeno kende e odgi kuom higni mang’eny wacho kama: “E kanyakla, yot  fwenyo ni ng’ato ka ng’ato nigi pek mokale. Ng’eyo ni waduto watemo kar nyalowa mondo wati ne Jehova nyalo jiwo Jokristo wetewa ma onge gi wedegi e adiera.”

7. Ere kaka lamo konyi?

⁷ Bed gi chenro maber mar timo gik motudore gi lamo. Mano oriwo lamo ka wanyiso Jehova ayanga kaka wawinjo e chunywa. (1 Pet. 5:7) Nyaminwa Massiel ma ne neno ni joodgi nojwang’e bang’ ka nopuonjore adiera wacho kama: “Achiel kuom gik ma nokonya ahinya e kinde ma ne awinjo ka an kenda ne en wuoyo gi Jehova e lamo gi chunya duto. Nanene kaka Wuonwa madier kendo nalemo pile ka pile sa asaya ka anyise gimoro amora ma ne chanda.”

8. Ere kaka somo Wach Nyasaye kendo paro matut kuome konyi?

⁸ Som Wach Nyasaye pile ka pile, kendo ipar matut kuom weche misomo, to ahinya-ahinya mago ma nyiso kaka Jehova oheri. Nyaminwa Bianca, ma joodgi ohero wachonega weche ma nyoso chunye ahinya lero kama: “Gima osebedo ka konya en somo sigendni mag joma iwuoyo kuomgi e Muma kod sigendni mag Joneno mag Jehova ma ndalowagi mosekalo e weche ma chal gi ma akale, kendo paro matut kuomgi.” Jokristo moko oseyudo ni mako ndiko moko e wigi ma nyalo hoyogi konyogi ahinya, kuom ranyisi, Zaburi 27:10 kod Isaya 41:10. Jomoko bende oseyudo ni ka giwinjo dwol momaki mag sula moro sama giikore ne chokruok kata sama gisomo Muma, mano miyo ok giwinj ni gin kendgi ahinya.

9. Ere kaka dhi e chokruok konyi?

⁹ Tem kik ibariga ne chokruok. Puonj michiwo e chokruok biro jiwi ahinya, kendo ibiro yudo thuolo mar ng’eri maber gi oweteni gi nyimineni. (Hib. 10:24, 25) Massiel ma ne wasewuoyo kuome motelo wacho kama: “Kata obedo ni ne anyuolora ng’at ma luor-luor, nang’ado e chunya ni ne ok adhi bara ne chokruok moro amora kendo atem ahinya mondo a chiw paro. Mano nokonya ma achako winjo ni an bende an jakanyo.”

10. Ang’o momiyo dwarore ni wamak osiep gi Jokristo motegno?

¹⁰ Mak osiep gi Jokristo motegno. Tem loso osiep gi ji mopogore opogore e kanyakla minyalo puonjori kuomgi, gibed joma tindo kata joma dongo. Muma paronwa ni “rieko yudore kuom jo ma hikgi ng’eny.” (Ayub 12:12) Joma hikgi ng’eny bende nyalo puonjore weche mathoth kuom joma tindo. Kata obedo ni Jonathan ne duong’ ne Daudi mabor, mano ne ok omonogi bedo osiepe mati mata. (1 Sa. 18:1) Daudi gi Jonathan nojiwore mondo gidhi nyime tiyo ne Jehova  kata obedo ni ne gikalo e weche moko mapek. (1 Sa. 23:16-18) Nyaminwa Irina ma sani e Janeno kende e odgi, wacho kama: “Jokristo wetewa ma wan-go e kanyakla nyalo bedonwa kaka jonyuolwa, owetewa, kendo nyiminewa. Jehova nyalo tiyo kodgi e pong’onwa kama wanie girem.”

11. Ang’o ma nyaka watim ka wadwaro bedo gi osiepe mabeyo?

¹¹ Loso osiepe manyien ok yotga ahinya, to moloyo ka in ng’at ma luor-luor. Nyaminwa Ratna, ma ne luor-luor kendo ma nopuonjore adiera kata obedo ni joodgi ne kwede, wacho kama: “Ne nyaka ayie ni ne dwarore ni Jokristo wetena okonya.” Seche moko wanyalo yudo ka ok yotnwa nyiso ng’ama chielo gik mwawinjo e chunywa, kata kamano, timo kamano e ma biro miyo wabed osiepe kodgi. Osiepeni oikore jiwi kendo konyi, kata kamano, de giher ng’eyo kaka ginyalo timo mano.

12. Ere kaka tij lendo nyalo miyo wayud osiepe mabeyo?

¹² Achiel kuom gik manyalo konyi yudo osiepe manyien en lendo gi Jokristo weteni. Carol ma ne wasewuoyo kuome motelo wacho kama: “Aseloso osiepe mang’eny kokalo kuom lendo gi nyimine mopogore opogore kendo bedo modich e gik mamoko motudore gi lamo. Kuom higni mang’eny, Jehova osebedo ka sira ahinya kokalo kuom osiepenago.” Kinda mwatimo mondo wabed gi osiepe ma gin Jokristo motegno ok dhiga nono. Jehova tiyo gi osiepewago e hoyowa seche mwawinjo ka wan kendwa.​—Nge. 17:17.

13. En ting’ mane ma ji duto e kanyakla nigo?

¹³ Ji duto e kanyakla nigi ting’ mar neno ni kanyakla obedo kama ji oheroree kendo mopong’ gi kuwe ma onge ng’ato ang’ata ma winjo ni en onge ng’ama dewe. (Joh. 13:35) Gik mwatimo kendo mwawacho konyo kama duong’ ahinya! Nyaminwa moro nowacho kama: “Ka ne apuonjora adiera, jo kanyakla nobedona kaka joodwa. Kony ma ne gikonyago e ma nomiyo abedo Janeno mar Jehova.” Ang’o minyalo timo mondo joma onge wedegi e adiera owinj ni gin bende gin jo kanyakla kendo ohergi?

14. Ang’o minyalo timo mondo imak osiep gi joma nyien e kanyakla?

¹⁴ Kaw okang’ mokwongo mar mako osiep gi joma nyien e kanyakla. Dwarore ni warwakgi gi mor sama gibiro e chokruok. (Rumi 15:7) Kata kamano, mosogi amosa kende ok oromo. Dwaher ni kaka kinde medo kalo e kaka wamed bedo osiepegi motegno. Kuom mano, tem ahinya mondo ibed mamor gi joma nyien e kanyakla kendo inyis ni idewogi gadier. Tem ng’eyo gik ma gikale, to kik ipenj penjo moko ma nyalo kuodo wigi. Nikech moko kuomgi samoro ok bi nyisi piyo-piyo gik ma chandogi, bed motang’ ahinya mondo kik ithung’gi gi wach. Kar mano, ti atiya gi penjo e yo mariek kendo ichiknegi iti kihori. Kuom ranyisi, inyalo penjogi mondo gilernie kaka ne gichako ng’eyo adiera.

15. Ere kaka Jokristo motegno nyalo konyo jomamoko e kanyakla?

¹⁵ Ji duto e kanyakla biro timo dongruok maber e weche Nyasaye ka gineno ni idewogi, to ahinya-ahinya ka jodong-kanyakla kod Jokristo motegno timo kamano. Melissa ma ne min-gi opuonjo adiera are tinne wacho kama: “Kuom higni duto ma asebedogo e adiera, nitie owete moko mosebedo kaka wuonena. Amor kodgi ma akia kata kaka dawachi. Sa asaya ma an gi wach moro ma  chando chunya, an gadier ni nitie ng’a moikore chikona ite.” Owadwa moro ma rawera, ma japuonjne noweyo adiera, nowinjo malit ahinya kendo noneno ni odong’ kende. Owacho kama: “Yo ma jodong-kanyakla nodewago nokonya ahinya. Ne giwuoyoga koda kinde ka kinde. Ne gidhiga koda e tij lendo, ne gipimonaga weche moko ma ne gipuonjre e Muma, kendo ne wadhiga kata tugo kanyachiel kodgi.” Melissa gi Mauricio nochako tiyo ne Nyasaye kuom thuologi duto.

16-17. Gin yore mage mwanyalo konyogo jomamoko achiel kachiel?

¹⁶ Tim ne jomamoko gik ma konyogi achiel kachiel. (Gal. 6:10) Leo ma en jamisonari e piny mabor gi dalagi wacho kama: “Kinde mang’eny, tim achiel mar ng’wono ma obiro e sa mowinjore nyalo konyo ahinya. Anyalo paro chieng’ moro ka ne ayudo aksident gi mtokana. Ne achopo ot chieng’no ka ajony kendo arumo. Kae to owadwa moro gi jaode nogwela ni mondo adhi achiem kodgi. Kata obedo ni sani ok anyal paro maber ni ne wachamo ang’o, gima wiya ok nyal wilgo en kaka ne ging’won koda kendo kaka ne gichikona itgi. Ne aa odgi kanyo ka awinjo maber!”

¹⁷ Achiel kuom gik ma miyo wabedoga mamor ahinya sama wadhi e chokruogewa mag alwora kod chokruoge madongo, en ni wayudo thuolo mar bedo kanyachiel gi Jokristo wetewa kendo goyo mbaka kodgi e wi program. Carol ma ne wasewuoyo kuome motelo wacho niya: “An to ka adhi e chokruoge madongo, awinjoga ka an kenda ahinya.” Nikwop ang’o? Olero kama: “Kata obedo ni owete gi nyimine miche gi miche kata alufe olwora koni gi koni, thothne aneno mana ka ng’ato ka ng’ato ni mana gi joodgi. Sama arangogi, awinjoga ka chunya ok mor ahinya.” Nitie jomoko ma winjoga malit ahinya e chokruok maduong’ ma gihango dhiye bang’ tho jaodgi. Be ing’eyo Jakristo moro amora makalo e pek kaka mago? Donge dibed maber ka e chokruok maduong’ maluwo igwele mondo obed kanyachiel gi joodu?

18. Ere kaka wanyalo tiyo gi puonj manie 2 Jo-Korintho 6:11-13 sama warwako jomamoko?

¹⁸ Los thuolo mag budho kanyachiel gi Jokristo weteni. E budho kaka mago, tem  gwelo owete gi nyimine mopogore opogore, to ahinya-ahinya mago ma winjo ni gin kendgi. Dwaher ‘yawonegi chunywa.’ (Som 2 Jo-Korintho 6:11-13.) Melissa ma ne wasewuoyo kuome motelo wacho kama: “Ne wabedoga mamor ahinya sama owetewa gi nyiminewa moko ogwelowa mondo wabudh gi joodgi kata mondo wadhi kodgi bayo.” Be ineno ng’ato e kanyaklau kanyo minyalo gwelo kata rwako e budho ma kamano?

19. Gin kinde mage sie ma nyalo dwarore ahinya ni wabed kanyaachiel gi Jokristo wetewa moko?

¹⁹ Nitie kinde moko sie ma nyalo dwarore ahinya ni wabed machiegni gi Jokristo wetewa moko. Kuom ranyisi, moko kuomgi nyalo yudo ka piny dinynegi ahinya sama gin but wedegi e kinde nyasi moko. Jomoko bende bedo gi lit ahinya e chunygi kochopo tarik ma watgi, jaodgi, kata osiepgi moro nothoe. Sama wakawo thuolowa mondo wabudh kanyachiel gi owete gi nyimine ma kamago, wanyiso ni ‘wadewogi gadier.’​—Fil. 2:20.

20. Ere kaka weche Yesu manie Mathayo 12:48-50 nyalo konyowa sama wawinjo ka wan kendwa?

²⁰ Nitie gik mang’eny ma nyalo miyo Jakristo owinj ka en kende. Kata kamano, gima wiwa ok onego owilgo kata matin en ni Jehova ong’eyo gik ma wakale. Kinde mang’eny okonyowa kokalo kuom Jokristo wetewa. (Som Mathayo 12:48-50.) Wan bende wanyiso Jehova ni wamor gi hera ma oherowago kuom timo duto mwanyalo mondo wakony Jokristo wetewa. Bed ni seche moko wawinjoga nade e chunywa, onego wang’e ni ok wan kendwa. Jehova ni kodwa kinde duto!