1. Ang’o ma nonyis oganda moro maduong’ ma nochokore Jerusalem ni gitim?

OGANDA moro maduong’ ma noting’o chwo kod mon ma ne a e pinje mopogore opogore kendo ma ne wacho dhok mopogore opogore nochokore Jerusalem. Gimoro makende notimore e odiechieng’no. Moko kuom Jo-Yahudi ma ne ni e chokruogno, nochako wacho dho ogendni mopogore opogore ma ne ni e chokruogno. Gima notimoreno nomako dhogi. Kata kamano, gima ne duong’ moloyo ne gin weche ma Jo-Yahudigo nowacho kaachiel gi gima jaote Petro nowacho. Achiel kuom weche ma ne giwinjo ne en ni mondo ne giyud resruok, ne nyaka giket yiegi kuom Yesu Kristo. Wachno nomulo chunygi ahinya. Wechego nomiyo gipenjo ni: “Ang’o monego watim?” Petro nodwokogi kama: “Ng’ato ka ng’ato kuomu [mondo] obatis.”​—Tich 2:37, 38.

2. En ang’o ma wabiro nono e sulani? (Ne picha manie nyim gaset.)

² Gimoro machielo makende notimore bang’ mano. Ji ma kwan-gi dirom 3,000 kama nobatis odiechieng’no mi gibedo jopuonjre mag Kristo. Mano ne en mana chakruok mar tich maduong’ ma Yesu nochiko jolupne mondo otim, tiende ni, konyo ji mondo obed jopuonjrene. Tijno pod dhi nyime nyaka e kindewagi. Kindegi, ok wanyal konyo ng’ato ma ochop e batiso mana bang’ puonje kuom seche machuok. Nyalo kawo dweche, higa, kata higni mang’eny ka pod wakonyo japuonjre mondo ochop e batiso. Ka po ni sani ipuonjo ng’ato Muma, onge kiawa ni ing’eyo ni dwarore ni itim kinda mang’eny e ka ikony ng’atno mochop e batiso. E sulani, wadwaro nono gima inyalo timo mondo ikony japuonjreni mar Muma otim dongruok mochop e batiso.

3. Ka luwore gi Mathayo 28:19, 20, ang’o ma dwarore ni japuonjre otim mondo e ka ochop e batiso?

³ Japuonjre mar Muma nyaka ti gi gik mopuonjore e ka onyalo chopo e batiso. (Som Mathayo 28:19, 20.) Sama japuonjre otiyo gi gik ma opuonjore, inyalo pime gi “ng’at mariek” ma nogedo e wi lwanda e ngero ma Yesu nogoyo. (Mat. 7:24, 25; Luka 6:47, 48) Ere kaka wanyalo konyo japuonjre mondo oti gi gik mopuonjore? We wane ane paro moko adek ma nyalo konyowa.

4. Ere kaka wanyalo konyo japuonjre mondo otim dongruok mochop e batiso? (Ne sanduk ma wiye wacho ni, “ Kony Japuonjreni Mondo Obed gi Okenge ma Doher Kawo.”)

⁴ Kony japuonjreni mar Muma mondo obed gi okenge ma doher kawo. Ang’o momiyo onego itim kamano? Par ane ranyisini: Wawach ni ichano dhi e wuoth moro ma rabora gi mtoka. Sama ichano wuodhno, inyalo ndiko piny kuonde ma diher chung’ie. Sama itimo kamano, wuodhno ok bi nenore ka wuoth ma rabora ahinya. Kamano bende, sama japuonjre mar Muma ondiko piny okenge ma doher kawo, kendo otimo kinda mondo okaw okengego, biro bedone mayot timo dongruok mochop e batiso. Ti gi kare mondik ni, “Gima inyalo timo” e bug Inyalo Dak gi Mor Nyaka Chieng’! mondo ikony japuonjreni otim dongruok. E giko sula ka sula, unyalo wuoyo e wi gima japuonjre nyalo timo motudore gi sula ma ua puonjoruno. Ka po ni in gi wach machielo miparo ni japuonjreni nyalo chopo mopogore gi manie buk, inyalo nyise ondik wachno kama ondik ni “Gik mamoko ma inyalo timo.” Kinde ka kinde, nonuru kare mar “Gima inyalo timo” mondo japuonjreni one gik monyalo timo sani kod monyalo timo e kinde mabiro.

5. Ka luwore gi Mariko 10:17-22, en ang’o ma Yesu nonyiso jamwandu moro mondo otim, to nikech ang’o?

 ⁵ Kony japuonjreni mar Muma mondo otim lokruok e ngimane. (Som Mariko 10:17-22.) Yesu nong’eyo ni ne ok dhi bedo mayot ne jamwandu moro uso mwanduge duto. (Mar. 10:23) To e ma pod Yesu nonyise ni odhi otim lokruok maduong’no. Nikech ang’o? En nikech Yesu nohere ahinya. Nitie seche ma wanyalo luor nyiso japuonjre Muma lokruoge monego otim ka luwore gi gik ma wapuonjore nikech wanyalo paro ni ok oikore timo lokruogego. Nyalo kawo kinde ka pok jopuonjre Muma olonyo kido mag dhano machon kendo rwako kit dhano manyien. (Kol. 3:9, 10) Kata kamano, kinyise mapiyo lokruoge monego otim, mano nyalo miyo en bende otim lokruok mapiyo. Sama iwuoyo kode e wi lokruoge monego otim, inyiso ni idewe gadier.​—Zab. 141:5; Nge. 27:17.

6. Ang’o momiyo dwarore ni wati gi penjo ma biro miyo japuonjre ochiw pache?

⁶ Ti gi penjo ma biro miyo japuonjre ochiw pache e wi wach moro kata e wi sula ma upuonjoru. Tiyo gi penjo kaka mago biro konyi ng’eyo gik ma japuonjre oyiego. Kitiyo gi penjo kaka mago kinde ka kinde, biro bedoni mayot wuoyo kode e wi weche ma samoro nyalo bedo ma tekne yiego. Bug Inyalo Dak gi Mor Nyaka Chieng’! nigi penjo kaka mago mang’eny. Kuom ranyisi, sula mar 04 nigi penjoni: “Iparo ni Jehova winjoga nade sama itiyo gi nyinge?” Sula mar 09 penjo ni: “Gin gik mage ma inyalo wuoye sama ilemo?” Mokwongo okwongo, nyalo bedo matek ne japuonjreni chiwo dwoko mag penjo kaka mago. Inyalo konye kuom wuoyo e wi ndiko kaachiel gi pichni motudore gima uwuoye.

7. Ere kaka wanyalo tiyo gi ranyisi mag jomamoko e konyo jopuonjrewa mag Muma?

⁷ Ka japuonjreni oseng’eyo okang’ monego okaw, wachne gik ma jomamoko ma ne ni e chal kaka mareno notimo, kendo mano biro jiwe mondo okaw okang’ ma dwaroreno. Kuom ranyisi, ka po ni japuonjreni barega ne chokruoge, inyalo nyise vidio ma wacho ni Jehova Norita Maber ma yudore e bwo kare mar “Med Timo Nonro” e sula mar 14. E thoth sula manie bug Inyalo Dak gi Mor Nyaka Chieng’!, ibiro yudo weche mopogore opogore ma jomoko osetimo e bwo kama wacho ni “Tim Nonro” kata “Med Timo Nonro.” * Tang’ ahinya mondo kik ipim japuonjreni gi ng’at machielo kitiyo gi weche kaka, “Ka ng’ane nyale, to kare in bende inyalo.” We mondo japuonjre e mochop e paro kaka mano owuon. Kar pimo japuonjreni gi ng’at ma vidio wuoyoe, konye mondo one kaka ng’atno notiyo gi puonj mag Muma e ngimane. Inyalo nyise ndiko moro maduong’ kata wach moro makende miwuoyoe e vidiono. To ka nyalore, jiwne kaka Jehova nokonyo ng’atno.

8. Ere kaka wanyalo konyo japuonjrewa hero Jehova?

⁸ Kony japuonjreni mondo oher Jehova. Ere kaka inyalo timo mano? Many thuolo mar wuoyo e wi kido mabeyo mag Jehova. Kony japuonjreni mondo one Jehova kaka Nyasaye mamor kendo ma konyoga joma ohere. (1 Tim. 1:11; Hib. 11:6) Kony japuonjreni mondo one ni en e ma obiro yudo ber kotiyo gi gik mopuonjore, kendo ilerne ni sama oluwo gik mopuonjorego, to mano nyiso ni ohero Jehova. (Isa. 48:17, 18) Kaka japuonjreni medo hero Jehova e kaka obiro medo timo lokruok moro amora ma dwarore.​—1 Joh. 5:3.

9. Ka luwore gi Mariko 10:29, 30, ang’o ma nyalo konyo ng’ato timo lokruok ma dwarore mondo ochop e batiso?

⁹ Nitie gik ma biro dwarore ni japuonjre owe mondo ochop e batiso. Mana kaka ranyisi mar jamwandu ma ne wasewuoyecha, nyalo dwarore ni jopuonjre moko owe gik ringruok moko ma gihero. Ka po ni tich ma gitiyo ok winjre gi puonj mag Muma, nyalo dwarore ni gimany tich machielo. Nyalo dwarore ni moko kuomgi ong’ad osiep gi joma ok ti ne Jehova. Moko to joodgi nyalo jwang’o kata kwedo. Yesu nowacho ni jomoko nyalo yudo ka teknegi timo lokruoge ma dwarore sama giromo gi weche kaka mago. Kata kamano, nosingo ni joma oluwe ok bi ywago ang’e. Gibiro yudo gueth mogundho moriwo nyaka bedo e kind joma ohero Jehova. (Som Mariko 10:29, 30.) Ere kaka inyalo konyo japuonjreni mondo oyud gueth makende?

10. Ang’o ma ipuonjori kuom weche Manuel?

¹⁰ Mak osiep gi japuonjreni. Japuonjreni onego one ni idewe gadier. Nikech ang’o? Ne ane gima Manuel modak e piny Mexico wacho koparo kinde ma ne opuonjore: “Ka ne pok wachakoga puonjruok ka puonjruok, japuonjna ne japenja kaka adhi. Nomiyo awinjoga ka an thuolo kode kendo nanyalo nyise gimoro amora ma ne chanda. Nanyalo neno ni nodewa gadier.”

11. Ere kaka jopuonjrewa nyalo yudo ber ka wakawo thuolo mar budho kodgi?

¹¹ Kaw thuolo mondo ibudhga gi japuonjreni mana kaka Yesu ne jatimo gi jolupne. (Joh. 3:22) Ka japuonjreni osechako timo lokruok e ngimane kendo ineno ni inyalo gwele e odi, inyalo rwake mondo umadhie chae, kata uchamie gimoro, kata une achiel kuom progrembe ma dwe ka dwe mag JW Broadcasting^®. Mano nyalo moro japuonjreni ahinya to moloyo ka igwele e kinde ma joodgi kata osiepene timo nyasi moko mag piny kata mag din. Owadwa Kazibwe modak e piny Uganda wacho kama: “Aparo ni napuonjora weche mang’eny ahinya e wi Jehova e kinde ma ne  wabudhoga gi japuonjna, mana kaka ne apuonjora weche mang’eny ka wan e puonjruok. Naneno kaka Jehova dewo joge gadier kendo kaka joge mor. To mano e gima an bende ne adwaro e ngimana.”

12. Ang’o momiyo dwarore ni wadhi gi jolendo mopogore opogore sama wadhi tayo japuonjre?

¹² Gwel jolendo mopogore opogore e puonjruok maru. Nitie sama wawinjoga ka yotnwa dhi kendwa tayo japuonjrewa mar Muma, kata dhi gi jalendo moro ma wang’iyogo. Kata obedo ni seche moko mano e gima yotnwaga timo, japuonjreni mar Muma biro yudo ber mang’eny ka po ni idhiga puonjori kode gi jolendo mopogore opogore. Dmitrii modak e piny Moldova wacho kama: “Jalendo ka jalendo ma ne biroga e puonjruokna ne leronaga wach moro e yo makende. Mano nokonya neno yore mamoko ma ne anyalo tiyoe gi gik ma ne apuonjora. Mano bende nokonya mondo kik aluor ahinya odiechieng’ ma ne ahango dhi e chokruok nikech naseromo gi owete gi nyimine mathoth.”

13. Ang’o momiyo dwarore ni wakony japuonjrewa mondo obi e chokruoge?

¹³ Kony japuonjreni mondo obi e chokruoge mag kanyakla. Ang’o momiyo dwarore ni watim kamano? En nikech Jehova dwaro ni joma lame ochokre kanyachiel. (Hib. 10:24, 25) Bende, owete gi nyimine ma wan-go e yie chalonwa mana kaka joodwa. Sama wan e chokruok, chalo mana ka gima wan e ot ka wachiemo kanyachiel. Sama ikonyo japuonjreni mar Muma mondo obi e chokruok, ikonye mondo okaw achiel kuom okenge madongo ma dwarore mondo ng’ato ochop e batiso. Kata kamano, seche moko biro e chokruok nyalo bedone matek. Ere kaka bug Inyalo Dak gi Mor Nyaka Chieng’! nyalo konyo japuonjreni loyo pek moro amora monyalo bedogo ma mone biro e chokruok?

14. Ere kaka wanyalo konyo japuonjrewa mondo obed gi siso mar biro e chokruoge?

¹⁴ Ti gi sula mar 10 e bug Inyalo Dak gi Mor Nyaka Chieng’! mondo ikony japuonjreni obed gi siso mar biro e chokruok. Jolendo molony ma ne okwa mondo oti gi bugni e konyo jopuonjregi biro e chokruok ka ne pok olande nowacho ni bugno ne nigi nyak ahinya. En adier ni ok wabi rito nyaka wachop e sula mar 10 e ka wachak gwelo japuonjrewa e chokruoge mag kanyakla. Gwele mapiyo kaka nyalore kendo idhi nyime timo kamano nyadinwoya. Japuonjre ka japuonjre nigi pek ma mage. Omiyo, tem nono gima nyalo mono japuonjreni biro e chokruok kae to item konye loyo wachno. Kik chunyi nyosre ka po ni kinde malach okalo ka pok ochako biro e chokruok. Hori, kendo iparne wachno kinde ka kinde.

15. Gin weche kaka mage ma nyalo miyo japuonjreni luoro?

¹⁵ Be inyalo paro kaka samoro in bende ne iluor bedo achiel kuom Joneno mag Jehova? Nyalo bedo ni gima ne miyi luoro en paro apara ni in bende chieng’ moro ibiro dhi chako lendo ot ka ot. Kata, samoro niluor ni joodu kata osiepeni ne nyalo kwedi. Ka en kamano, to kare inyalo ng’eyo kaka japuonjreni winjo. Yesu nowacho ni gik ma kamago nyalo miyo jomoko luoro. Kata kamano, nojiwo jolupne ni luoro ma kamano kik mon-gi tiyo ne Jehova. (Mat. 10:16, 17, 27, 28) Ere kaka Yesu nokonyo jolupne mondo gilo luoro ma ne ginyalo bedogo? Kendo, ere kaka inyalo luwo ranyisine?

16. Ere kaka wanyalo tiego japuonjrewa mondo ong’e kaka onyalo lero yiene ne jomamoko?

¹⁶ Kony japuonjreni mosmos mondo ochak lero ne jomamoko yiene. Nyalo bedo ni jopuonjre Yesu ne luor ka ne Yesu ohango nyisogi  ni gidhi gilendi. Kata kamano, Yesu nokonyogi ahinya ka nonyisogi alwora ma ne gidhi lendoe, kod ote ma ne gidhi lando. (Mat. 10:5-7) Ere kaka inyalo luwo ranyisi mar Yesu? Kony japuonjreni mondo ong’e kama onyalo chako lendoe. Kuom ranyisi, inyalo penje ka po ni ong’eyo ng’at moro amora ma nyalo yudo ber ka olerone adiera moro sie manie Muma. Kae to konye mondo otim ikruok kuom nyise yo mayot monyalo lerogo adierano. Ka nyalore, inyalo tiyo gi kare ma wacho ni, “Paro ma Jomoko Nigo” kod “Ng’ato Nyalo Penji Niya” ma yudore e bug Inyalo Dak gi Mor Nyaka Chieng’! Sama itimo kamano, kony japuonjreni mondo ong’e kaka onyalo tiyo gi Muma e chiwo dwoko mayot kendo e yo mariek.

17. Ere kaka wanyalo tiyo gi Mathayo 10:19, 20, 29-31 sama wakonyo japuonjrewa mondo ogen Jehova?

¹⁷ Kony japuonjreni mondo ogen Jehova. Yesu nonyiso jopuonjrene ni Jehova ne dhi konyogi nikech oherogi. (Som Mathayo 10:19, 20, 29-31.) Par ne japuonjreni ni en bende Jehova biro konye. Inyalo konye mondo oket genone kuom Jehova kuom lemo kode e wi gik ma doher timo. Owadwa Franciszek modak e piny Poland wacho kama: “Japuonjna ne jawachoga gik ma nagombo timo sama nolemo. Ka naneno kaka Jehova ne dwokoga lamo mag japuonjna, mapiyo an bende nachako lemo. Naneno kaka Jehova nodwoko lamona ka nakwaye mondo ayudie rusa e tija manyien mondo ayud thuolo mar dhi e chokruoge mag kanyakla kod chokruok maduong’.”

18. Jehova winjoga nade sama oneno ka jolendo timo kinda e puonjo ji Wachne?

¹⁸ Jehova dewo gadier jopuonjrewa mag Muma. Omorga ahinya sama oneno kaka jolendo timo kinda mondo gikony ji osud machiegni kode, kendo ohero jolendo ma kamago ahinya. (Isa. 52:7) Ka po ni sani ionge gi ng’at mipuonjo Muma, pod inyalo konyo jopuonjre mamoko mag Muma mondo gitim dongruok ma gichop e batiso kuom dhi gi jolendo weteni sama gidhi puonjo jopuonjregi.