LISA a wacho kama kowuoyo kuom gima nokwongo ochwale mohero adiera: “Ng’wono ma owete gi nyimine nonyisa e gima nomulo chunya moloyo.” Mano be e gima notimore ne Anne. Owacho kama: “Gima nokwongo omora ne en ng’wono ma Joneno mag Jehova nonyisa, to ok mana puonjgi kende.” Nyimine ariyogo sani mor ahinya somo Muma kendo paro matut kuom gik ma gisomo. Kata kamano, gima nomulo chunygi ahinya ma nomiyo gihero somo Muma, ne en ng’wono ma ne Joneno mag Jehova onyisogi.

Ere kaka wanyalo nyiso jomamoko ng’wono? We wanon ane yore moko ariyo ma wanyalo timogo kamano. Yorego gin: Wechewa kod timbewa. Kae to wabiro nono penjoni: Gin jomage monego wanyis ng’wono?

Dhako malong’o miwuoye e Ngeche 31 nigi “chik mar ng’wono” e lewe. (Nge. 31:26) ‘Chikno’ e ma tayo dwol mowuoyogo kod weche mowacho. Wuone bende ber ka obedo gi ‘chikno’ e lewgi. Jonyuol mang’eny ong’eyo ni wuoyo gi nyithindo e yo mager kata mang’ich-ng’ich ok bi konyo nyithindgi ahinya. Omiyo, mondo jonyuol okony nyithindgi kendo gichop e chunygi, nyaka gitem matek mondo giwuo e yo mang’won.

Bed ni in janyuol kata ooyo, ang’o minyalo timo mondo iwuo e yo mang’won? Ngeche 31:26 nyisowa gima wanyalo timo. Owacho kama e wi dhako malong’o: “Owuoyo gi rieko.” Mano nyiso ni onego wati gi rieko sama wayiero weche ma wadwaro wacho kod dwol ma wabiro tiyogo. Omiyo, ka pok wawuoyo, wanyalo penjore penjoni: ‘Be weche ma adwaro wachogi dhi jimbo ich-wang’ koso gibiro kueyo mirima?’ (Nge. 15:1) Kuom adier, dwarore ni wapar ka pok wawuoyo.

Ngero moro machielo wacho kama: “Weche ma imuomruokgo chuoyo chuny ka ligangla.” (Nge. 12:18) Ka waparo matut kuom wechewa kod kaka ginyalo mulo jomamoko, biro bedonwa mayot ng’eyo gima onego wawachi. Ka “chik mar ng’wono” e motayowa, mano biro miyo kik wawach weche mager kendo ma nyalo chwanyo jomamoko. (Efe. 4:31, 32) Kar wacho weche maricho, wabiro wacho weche mabeyo kendo ma duogo chuny. Jehova noketonwa ranyisi maber e wachno kinde moro ka nowuoyo gi Elija jatichne ma luoro nomako. Malaika ma notiyogo mondo owuo kode nowuoyo gi “dwol mapiny mokuwe.” (1 Ru. 19:12) Kata kamano, bedo mang’won ok oriwo mana yo mwawuoyogo kod weche ma wawacho kende. Timbewa bende nyaka nyis ni wang’won. E yo mane?

Ka waluwo ranyisi mar Jehova, wechewa kod timbewa biro bedo mang’won. (Efe. 4:32; 5:1, 2) Lisa ma ne wasewuoye kuome motelo, wacho yo ma Joneno mag Jehova nonyisego ng’wono. Owacho kama: “Kinde moro ka nochuno ni nyaka wadar apoya,  owete moko ariyo gi mondegi nokwayo rusa e tich mondo gibi gikonywa fundo. Kindego ne pok achako puonjora Muma!” Gima owetego gi mondegi notimo nomulo chuny Lisa ahinya kendo nomiyo ochako puonjore adiera.

Anne ma bende nosewuo kuome e chak sulani, wacho kaka Joneno mag Jehova nonyise ng’wono: “Nikech gik maricho ma ji timonega jowetegi, nadongo ka atang’-tang’ ahinya. Ne ok yotna geno ng’ato ang’ata.” Odhi nyime wacho kama: “Ka naromo gi Joneno mag Jehova, ne ok ayie kodgi ahinya. Nawuoro gimomiyo ne gitemo ng’iyo koda. Kata kamano, ng’wono ma japuonjna mar Muma nonyisa nomiyo achako gene.” Mano nokelo ber mane? Anne wacho kama: “Bang’e nachako keto pacha kuom gik ma napuonjora.”

Gima nomulo chuny Anne gi Lisa mi gipuonjore adiera en ng’wono ma jo kanyakla nonyisogi. Mano nokonyogi mondo gigen Jehova kod jotichne.

Nitie joma tiyoga gi weche mang’won kendo ma muol seche te mana nikech alwora ma ne giponie. Mano en gima ber. Kata kamano, ka di po ni mano kende e gimomiyo wang’won, mano ok oromo nyiso ni waluwo ranyisi mar Nyasaye.​—Pim gi Tich Joote 28:2.

Ng’wono en achiel kuom olembe ma roho maler nyago. (Gal. 5:22, 23) Omiyo, ka wadwaro nyago kido mar ng’wono, nyaka wayie mondo roho maler okonywa. Timo kamano biro nyiso ni waluwo ranyisi mar Jehova gi Yesu. Bende, nikech wan Jokristo, dwaher dewo jowetewa. Gima duong’ ma jiwowa mondo wadewgi en hera ma waherogo Jehova Nyasaye kod dhano wetewa. Mano biro miyo ng’wono ma wanyiso jomamoko obed ng’wono mowuok e chunywa kendo ma Nyasaye oyiego.

Kinde mang’eny, yot ahinya bedo mang’won gi joma osenyisowaga ng’wono kod joma wang’eyo. (2 Sa. 2:6) Achiel kuom yore ma wanyalo nyisogo joma kamago ng’wono en goyonegi erokamano. (Kol. 3:15) To nade ka waneno ni nitie ng’at moro ma ok onego wanyis ng’wono?

Ng’e wachni: Jehova e Jal moseketo ranyisi maberie mogik e nyiso ng’wono, kendo Wachne miyowa puonj moro maduong’ e yo monego wanyisgo kidono. “Ng’wono mogundho” gin weche motigo nyading’eny e Ndiko mag Dho-Grik mag Jokristo (Mathayo–Fweny). Ere kaka Nyasaye nyisowaga ng’wono?

Temie paro ji tara gi tara ma Jehova osenyiso ng’wono kuom miyogi gik ma siro ngima. (Mat. 5:45) Kuom adier, Jehova nosechako nyiso dhano ng’wono kata ka ne pok ging’eye. (Efe. 2:4, 5, 8) Kuom ranyisi, nochiwo Wuode ma miderma mondo otho ne dhano duto. Jaote Paulo nondiko ni Jehova nochiwo rawar ‘nikech ng’wonone mogundho.’ (Efe. 1:7) E wi mano, kata obedo ni watimoga richo kendo wachwanyo Jehova, pod odhi nyime tayowa kendo puonjowa. Puonjge kod weche monyisowa chalo gi “koth ma nyidho.” (Rap. 32:2) Onge gima dwachul Jehova nikech ng’wono mogundho mosenyisowa. Adiera makende en ma: Ngimawa ma kinde mabiro otenore kuom ng’wono ma Jehova nyisowa.​—Pim gi 1 Petro 1:13.

Onge kiawa ni ng’wono mar Jehova ywayowa ire kendo jiwowa. Omiyo, kar yiero joma onego wanyis ng’wono, dwarore ni watem matek mondo waluw ranyisi mar Jehova ma nyisoga ji duto manie piny ngima ng’wono. (1 The. 5:15) Ka wadhi nyime nyiso ji ng’wono, wachalo gi mach ma miyo ji liet sama koyo ng’ich. Ka watimo kamano, wabiro hoyo joodwa, joma watiyogo, joskul wetewa, kod jirendewa.

Tem ane paro joodu kata jo kanyaklau ma biro winjo maber nikech wecheni mang’won kod timbeni mang’won. Samoro nitie ng’ato e kanyaklau ma nyalo dwaro ni okonye e tije moko mag dala kata ma didwar ni odhine e chiro. E wi mano, ka po ni in e tij lendo to iyudo ng’at ma dwaro kony, donge inyalo konye?

Mad waduto wadhiuru nyime luwo ranyisi mar Jehova kuom yie mondo “chik mar ng’wono” ota wechewa kod timbewa.