1. Gin pek mage ma Jokristo mokwongo noromogo?

E KIND higni mag 62 gi 64, jaote Petro nondiko barua ne ‘jodak ma kadho, ma nokere kuonde mopogore opogore e Ponto gi Galatia gi Kapadokia gi Asia kod Bithinia.’ (1 Pet. 1:1) Nikech kanyaklago ne nigi ji ma wuok e ogendni mopogore opogore, ne dwarore ni ojiwgi kendo otagi. Ne ikwedogi kendo ne iwacho weche ma richo kuomgi. Ne giyudo “tembe mager.” E wi mano, ne gidak e kinde matek. Petro nondiko niya: “Giko mar weche duto osekayo machiegni.” Kuom adier, higni apar ne ok dhi kadho kapok oketh Jerusalem. Ang’o ma ne nyalo konyo Jokristo duto mondo okal kinde matekgo kamora amora ma ne gintie?​—1 Pet. 4:4, 7, 12.

2, 3. Ang’o momiyo Petro nojiwo Jokristo wetene mondo obed jorwak welo? (Ne picha man malo.)

² Petro nojiwo owetene kama: “Beduru joma rwako joweteu.” (1 Pet. 4:9) Tiend rwako welo e dho Grik en hero ng’at ma ikiya kata bedo mang’won kode. Kata kamano, Petro nojiwo owete gi nyimine mondo obed joma rwako jowetegi, ma gin joma ne giseng’eyo  kendo ma ne gin-go e kanyakla. Ere kaka rwako welo ne dhi konyogi?

³ Mano ne dhi miyo gibed gi winjruok maber e kindgi. To nade in iwuon? Be inyalo paro kaka ne imor ka ne ng’ato ogweli e ode? Donge nitie gik ma beyo ma pod inyalo paro e wi limbeno? Donge osiep manie kindu nomedore bang’ gwelo jo kanyaklau moko? Sama warwako owete gi nyimine, mano miyowa thuolo mar ng’eyogi e yo maber moloyo kinde moro amora machielo. E kinde Petro, ne dwarore ni Jokristo obed osiepe kaka kinde ne medo bedo marach. Jokristo ma kindegi bende onego otim kamano e ‘ndalo mag gikogi.’​—2 Tim. 3:1.

4. Gin penjo mage ma wadwaro nono e sulani?

⁴ Gin thuolo mage ma beyo ma wan-go mag rwako jowetewa? Ere kaka wanyalo loyo gik ma nyalo monowa rwako welo? Ang’o ma wanyalo timo mondo wabed welo ma beyo?

5. Ere kaka wanyalo rwako welo e chokruogewa mag Jokristo?

⁵ E chokruoge: Warwakoga ji duto mobiro e chokruogewa mag kanyakla mondo olem kodwa. Jehova kod riwruok mare e ma ikonwa chokruogego. (Rumi 15:7) Sama joma welo obiro, warwakogi mana kaka wan bende Jehova oserwakowa. Donge inyalo kawo okang’ mokwongo mar moso joma welo mobiro e chokruogewa ma ok idewo kaka girwakore? (Jak. 2:1-4) Ka ineno wendo moro, donge inyalo gwele mondo obed buti? Onyalo bedo ma mor ka ikonye mondo oluwre gi ng’at ma tayo kendo somo kode Muma. Mano biro bedo kinde maber mar nyiso ni wan gi “tim mar rwako welo.”​—Rumi 12:13.

6. Gin jomage monego wagwel e utewa?

⁶ Gwelogi e gago: E kinde jotich Nyasaye machon, rwako welo noriwo gwelogi e gago. (Cha. 18:1-8; Bura 13:15; Luka 24:28-30) Ka ne ng’ato ogwelo nyawadgi e gago, mano ne nyiso ni gin osiepe kendo gin gi kuwe e kindgi. Gin jomage ma wanyalo gwelo e utewa? Gin owete gi nyimine ma wan-go e kanyakla. Donge gin e ma gibiro konyowa e kinde ma weche tek? Onego wabed osiepegi kendo wabed gi kuwe e kindwa kodgi. E higa mar 2011, Bura Matayo ne oloko sa ma jo Bethel ma Amerka timoe puonjruok mar Ohinga mar Jarito mondo obed sa 12 gi dakika 15 odhiambo to ok sa 12 gi dakika 45 kaka ne itimega chon. Ang’o momiyo ne gitimo kamano? Lokruogno notim nikech mano ne dhi miyo jo Bethel thuolo mar gwelo jowetegi bang’ puonjruok. Ofise mamoko bende notimo lokruok ma kamano. Timo kamano osemiyo owete gi nyimine ma tiyo e Bethel otego osiep manie kindgi.

7, 8. Ere kaka wanyalo rwako owete mobiro golonwa twege?

⁷ Wayudoga thuolo mar rwako welo sama owete mowuok e kanyakla mamoko obiro golo twak e kanyaklawa, sama jarit-alwora olimo kanyaklawa, kod sama jogol-twak ma ofis ooro obiro e chokruogewa madongo. (Som 3 Johana 5-8.) Losonegi gima gimadho kata chiemo moro en yo maber mar rwakogi. Donge inyalo chiwori timo kamano?

⁸ Nyaminwa moro modak e piny Amerka wacho kama: “Kuom higni mang’eny, an gi jaoda wasebedo gi kinde maber mar rwako owete mobiro golo twak e kanyaklawa kaachiel gi mondegi. Timo kamano osekelonwa ber mogundho kendo osejiwo yiewa ahinya. Ok waywag ang’e.”

9, 10. (a) Gin jomage ma nyalo dwarore ni warwak kuom kinde? (b) Be joma nyalogi ni piny nyalo rwako welo? Chiw ane ranyisi.

⁹ Welo ma dak kuom ndalo moko: E kinde machon, ka ne ng’ato orwako welo,  noikonegi kar nindo. (Ayub 31:32; File. 22) E ndalowagi bende, mano en gima dwarore. Sama jorit-alwora olimo kanyakla moro, gidwaroga kama ginyalo nindee. Owete gi nyimine ma odhi e skunde mag Pinyruoth kod mochiwore e tij gedo nyalo dwaro kama gidakie. Masiche ma timore apoya nyalo ketho ute owete gi nyimine moko kendo ginyalo dwaro kar dak kapok olosnegi utegi. Ok onego wapar ni joma nigi udi ma beyo kendo ma dongo e ma nyalo rwako welo nikech samoro nyalo bedo ni gisetimo kamano nyading’eny. Donge inyalo rwako welo mondo onind e odi kata kapo ni nyaloni ni piny?

¹⁰ Owadwa moro modak South Korea paro kaka ne gidakga gi owete gi nyimine ma ne dhi e skunde mag Pinyruoth. Nondiko kama: “Mokwongo, naluor rwako owete nikech e ka ne akendo to ot ma ne wadake bende ne tin. Kata kamano, rwakogi mondo gidag kodwa nomiyowa mor mar adier. Nikech e ka ne akendo, an gi jaoda ne waneno kaka joma okendore nyalo bedo ma mor ka gitiyo ne Jehova kanyachiel.”

11. Ang’o momiyo gwelo joma nyien mobiro e kanyaklau en gima dwarore?

¹¹ Joma nyien mobiro e kanyakla: Owete kata nyimine moko nyalo biro dak e alworau. Moko nyalo biro lendo kama jolendo mag Pinyruoth dwaroree moloyo. Nyalo bedo ni oor jopainia mondo okony kanyaklau. Giduto giromo gi gik ma nyien e ngimagi. Kuom ranyisi, alwora manyien, kanyakla manyien, samoro dhok manyien, to kata mana kido kod timbe joma odak e alworano bende samoro nyien kuomgi. Gwelogi e gago kata dhi kodgi bayo biro konyogi mondo giyud osiepe manyien kendo ng’iyo gi alwora manyien ma gidhiye.

12. En ranyisi mane ma nyiso ni ok ochuno ni ng’ato nyaka ted chiemo mang’eny sama orwako welo?

¹² Ok ochuno ni ited chiemo mang’eny sama irwako welo. (Som Luka 10:41, 42.) Owadwa moro paro kaka weche nobedo e kinde ma ne ochako tiyo ne Jehova ka en jamisonari. Owacho niya: “Ne pod watindo, ne ok wang’eyo gik mang’eny, kendo ne wagombo thurwa ahinya. Chieng’ moro godhiambo, jaoda ne gombo dala ahinya kendo kinda ma natimo mondo ahoye ne ok okonyo. Kae to ka sa achiel gi nus mar odhiambo ne chiegni, ng’ato ne odwong’o dhoodwa. Japuonjre moro mar Muma nokelonwa machunga adek. Nobiro mosowa nikech ne wan jomisonari manyien e alworagi. Ne warwake mi wamiye pi modho. Kae to ne waloso chai gi chokolet maliet. Gie kindego, ne pok wang’eyo Kiswahili, to en bende ne okiya dho Kisungu. Limbeno ne omiyo wachako mako osiep motegno gi owetewa.”

13. Gin ber mage ma wayudo ka warwako welo?

¹³ Be isegagombo rwako welo to iweyo aweya ma thuolono okalo? Ka en kamano, to kare nilalo thuolo maber mar bedo gi mor kod osiepe masiko. Rwako welo en yo maber ma nyalo konyi mondo kik isik ka ikuyo. Kata kamano, samoro inyalo penjori niya, ‘En ang’o ma nyalo mono ng’ato rwako welo?’ Nitie gik mathoth ma nyalo miyo mano timre.

14. Ang’o ma wanyalo timo kapo ni waonge thuolo mar dhi kuonde ma ogwelwae kata gwelo jomoko?

¹⁴ Sechewa kod tekowa: Jotich Jehova odichga gi tije mathoth. Jomoko nyalo paro ni gionge gi thuolo kata nyalo mar rwako welo. Kapo ni mano e gima timoreni, nyalo bedo maber ka inono kaka itiyo gi thuoloni. Donge inyalo timo lokruoge moko mondo iyud thuolo mar limo joweteni kata mar rwakogi? Muma jiwo Jokristo  mondo gibed jorwak welo. (Hib. 13:2) Loso thuolo mar timo kamano en gima owinjore. Inyalo dwoko chien tije mamoko ma ok ochuno mondo iyud thuolono.

15. En paro mane ma jomoko nyalo bedogo ka giparo apara ni gidwa rwako welo?

¹⁵ Paro ma in-go kuomi iwuon: Be isegagombo rwako welo to ineno ni ok iwinjori? Jomoko nyalo luor ni gionge mbaka ma ginyalo goyo gi welo kata ni welo nyalo neno ni ok obudhgi maber. Jomoko to paro ni gionge pesa moromo ma ginyalo rwakogo welo kaka jomamoko timo e kanyakla. Par ni ok ochuno ni nyaka ibed gi ot maduong’ kendo molichore e ka irwak welo. Gima duong’ en ni odno ler, ochane maber, kendo welo nyalo winjo ka gin thuolo sama irwakogi.

16, 17. Ang’o ma nyalo dwokonwa parruok chien sama warwako welo?

¹⁶ Ji mang’eny bedoga gi parruok e wach rwako welo. Jaduong’-kanyakla moro e piny Britain wacho niya: “Ng’ato nyalo bedo gi luoro moko sama oikore rwako welo. Kata kamano, mana kaka gimoro amora ma watimo motudore gi lamo Jehova, rwako welo kelo ber kod mor mogundho moloyo parruok ma wanyalo bedogo. Abedoga ma mor ahinya sama agoyo mbaka gi welo ka wamadho chai.” Par ni dewo welo en gima ber. (Fil. 2:4) Ji duto morga wacho ne jomoko gik ma beyo mosetimore e ngimagi. Kinde mag mor kaka mago e ma jomoko nyalo penjowae gik ma beyo mosetimore e ngimawa. Jaduong’-kanyakla machielo wacho kama: “Rwako owete gi nyimine mondo obi olima miya thuolo mar ng’eyogi maber, to ahinya ahinya kaka ne giyudo adiera.” Dewo jomoko miyo budho bedo maber.

¹⁷ Nyaminwa moro ma en painia norwako owete gi nyimine moko ma nobiro e skul moro mar Pinyruoth. Owacho niya: “Mokwongo ne aluor luor nikech oda ne tin to bende kombe ma ne an-go ne ok nyien. Nyaminwa moro ma jaode ne puonjo e skundno nojiwa ndi. Nonyisa ni jumbe ma gibedoga ma mor ahinya sama gin e tij alwora en kinde ma gidak gi owete gi nyimine ma ok omewo ruok to nigi paro machal gi margi, ma en tiyo ne Jehova kendo keto ngimagi obed mayot. Mano noparona gima minwa ne nyisowaga ka ne wan nyithindo niya: ‘Ber chamo alot kama oherie.’” (Nge. 15:17, The Bible in Luo, 1976) Hera e ma mondo ojiwi irwak welo kendo kik iparri.

18, 19. Ere kaka rwako jomamoko nyalo konyowa golo paro maricho ma wan-go kuomgi?

¹⁸ Paro ma in-go kuom jomoko: Be nitie owadwa kata nyaminwa moro e kanyaklau ma chwanyiga? Inyalo bedo gi paro ma ok owinjore kuom jatich Nyasaye waduno kendo ka ok itimo gimoro amora mondo ulos weche, winjruok manie kindu nyalo mana medo kethore. Kido moko ma ng’ato nigo ma ok mori nyalo miyo kik irwake e odi. E wi mano, samoro ng’ato nochwanyi chon to pod imako wachno.

¹⁹ Muma jiwowa ni wabed joma rwako welo nikech mano nyalo konyowa mondo wabed gi winjruok maber gi jomoko moriwo nyaka jowasikwa. (Som Ngeche 25:21, 22.) Rwako jomoko e utewa nyalo konyowa tieko chwanyruok matindo tindo manie kindwa. Mano nyalo miyo wachak neno kido moko ma beyo ma gin-go, ma gin kido ma nomiyo Jehova oywayogi ka kelogi e adiera. (Joh. 6:44) Gwelo ng’ato mondo obi olimi ka ne ok ogen ni inyalo gwele nyalo miyo winjruok manie kindu obed maber to ahinya ahinya ka igwele nikech ihere. Ere kaka inyalo bedo gadier ni igwele nikech ihere? Yo achiel en luwo puonj ma wayudo e Jo-Filipi 2:3 ma wacho niya: “Bolreuru ka  ukwano ni jomamoko oloyou gi ber.” Fwenyo gik ma owete gi nyiminewa timo maber moloyowa biro miyo wamed herogi kendo rwakogi gi chuny maler. Kido mabeyo ma gin-go kaka yie motegno, sinani, chir, kata kido moro machielo nyalo jiwowa.

20. Wanyalo nyiso nade ni wan joma igeno sama jowetewa ogwelowa e utegi?

²⁰ Ruoth Daudi nopenjo niya: “Jehova, ng’ano ma nodag ka wendo e tabanakel mari?” (Zab. 15:1) Bang’ penjono, nowacho kido ma beyo ma Nyasaye dwaro ni wende obedgo. Achiel kuom gik ma nowacho en bedo ng’at ma ok lokre kuom gima osewacho. Nowacho ni ng’at ma kamano en “ng’a ma ramo gi wach ma biro chande, kendo ok olokore.” (Zab. 15:4) Ka waseyie limo ng’ato, kik wabare abaya ma onge gimomiyo. Nyalo bedo ni ng’at ma ogwelowa oseiko gik moko ma ka wabare to kinda duto motimo biro bedo kayiem. (Mat. 5:37) Jomoko oseweyo dhi kama ne ogwelgie mokwongo mana nikech gidwaro dhi kama chielo ma idhi rwakgie maber moloyo. Be mano en tim ma nyiso hera kod luor? Onego wayie dhi kama orwakwae gi chuny maler kata obedo ni ng’at ma orwakowano samoro onge gi gik mang’eny ahinya. (Luka 10:7) To ka nitie dich moro ma nyalo miyo wabare, nyalo bedo maber ahinya ka wanyiso ng’at mogwelowa chon ni ok wabi chopo.

21. Ere kaka chiwo luor ne kido kod timbe mag joma orwakowa nyalo miyo wabed welo ma beyo?

²¹ Onego wachiw luor ne kido kod timbe mag ogendini mopogore opogore. E ogendni moko, welo mopore irwako arwaka, to e ogendni mamoko, ng’ato nyaka wach motelo kapok odhi limbe. Nitie kuonde moko ma welo e ma kwongoga chiemo kae to jodala chiemo bang’e, kuonde mamoko to welo gi jodala chiemo kanyachiel. Kuonde moko, welo nyalo ting’o gimoro matin ma gidhigo kama ogwelgie, to kuonde mamoko joma orwako welo bedo ma mor ka gin e ma gipidho wendgi. E ogendini moko, igenoga ni ng’ato okwong otamre mondi sama ogwele e ka oyie bang’e, to e ogendini mamoko ka ng’ato otamore sama ogwele, inene kaka ng’at ma kite rach. Watim kar nyalowa mondo joma orwakowa obed ma mor.

22. Ang’o momiyo dwarore ni ‘wabed joma rwako jowetewa’?

²² Wadak e kinde ma “giko mar weche duto osekayo machiegni.” (1 Pet. 4:7) Wachomo masira maduong’ ma pok notimore nyaka nene. Kaka piny medo bedo marach, dwarore ni wamed herore kaka owete gi nyimine. Kindegi e monego waluwee wach ma Petro nojiwogo Jokristo ka nowacho niya: “Beduru joma rwako joweteu.” Mano en gima ber kendo ma dwarore nikech wabiro dhi nyime timo kamano nyaka chieng’.​—1 Pet. 4:9.