Jack kod Marie-Line osebedo ka tiyo ne Nyasaye kuom thuologi duto chakre higa mar 1988. Ging’ere kaka joma oikorega timo lokruok sa asaya. Mano osemiyo giyie timo migepe mopogore opogore e Guadeloupe kod French Guiana. Pinje ariyogo duto sani ni e bwo ofiswa ma France. We wapenj ane Jack kod Marie-Line penjo moko.

Ang’o ma nojiwou mondo uti ne Jehova kuom thuolou duto?

Marie-Line: Chakre ka ne pod atin ka wan Guadeloupe, kinde mang’eny nalendoga gi minwa ma ne en jakinda e tij lendo. Ahero ji, omiyo, mapiyo bang’ tieko skul e higa mar 1985, nabedo painia.

Jack: Chakre tinna, ne an gi osiepe mang’eny ma ne tiyo ne Nyasaye kuom thuologi duto. Najabedo painia makonyo ka ne olor skul. E giko juma, seche moko ne wajadhi e alwora gi bas mondo wadhi walend gi jopainia. Ne walendoga odiechieng’ mangima, kae to e giko odiechieng’ ne wajadhi e dho wath. Lendo ne mit sidang’!

Mapiyo bang’ kendo Marie-Line e higa mar 1988, nawacho e chunya ni, ‘Ma sani pod waonge gi ting’ mang’enyni, donge wanyalo timo mathoth e tij Jehova?’ An bende nabedo painia mana kaka Marie-Line. Higa achiel bang’e ne wadhi e Skul mar Jopainia, kendo bang’ skundno nomiwa migawo mar bedo jopainia makende. Ne wayudo thuolo mar timo migepe mopogore opogore e piny Guadeloupe ka ne pok oorwa e piny French Guiana.

Kuom higni musetiyogo ne Nyasaye kuom thuolou duto, osewilnuga migepe nyading’eny. Ang’o ma konyouga ng’iyo gi lokruok ma kamago?

Marie-Line: Owete ma ne tiyo e Bethel ma French Guiana nong’eyo ni wahero ndiko mar Isaya 6:8. Omiyo, seche moko ne gigoyonwaga simu ka gichako ni, “Be uparo ndikoucha?” Sa asaya ma ne wawinjo mano, ne wang’eyo ni idwa loknwa migawo, kendo ne wadwokogiga niya: “Wan ka! Orwa!”

Ok wahero pimo migepe ma ne wasetimo chon gi ma watimo sani, nikech wang’eyo ni mano  nyalo monowa yudo mor e migawo ma watimo sani. Watemoga ahinya mondo wang’i gi owete gi nyimine e migawo manyien ma wadhiye.

Jack: Nitie kinde ma owete gi nyimine moko ne otemo nyoso chunywa ka ginyisowa ni kik wadar. Kata kamano, ka ne wawuok Guadeloupe, owadwa moro noparonwa weche ma Yesu nowacho e Mathayo 13:38 niya: “Puodho en piny.” Omiyo, sa asaya ma oloknwa migawo, wajawachoga ni, ‘Donge pod watiyo e puodho achiel kendo ji e ma wamanyo?’

Sama wachopo e alwora manyien, wafwenyoga mapiyo ni ji odak adaka kanyo maber. Omiyo, watemoga mondo wadag adaga kaka gidak. Kata ka wayudo ka kit chiemo ma gichamo opogore, pod wachamogi achama kendo wamodho mana pi ma gimodho, tek mana ni oler ma ok onyal hinyowa. Watemoga ahinya mondo wawuo maber kuom migapwa manyien.

Marie-Line: Wapuonjrega gik mang’eny kuom owete modak e alwora ma wadhiye. Anyalo paro kinde ma ne wahango dhi French Guiana. Koth ne ng’eny ahinya, omiyo, ne waparo ni ne wanyalo rito nyaka koth chogi e ka wadhi walendi. Kae to nyaminwa moro nopenja niya: “In ok idhi lendo kawuono?” Nomako dhoga ma apenje ni, “Adhi nade to koth pod chue?” Nodwoka ni, “Kaw mabul gi ndiga mondo wadhi.” Mano e kaka napuonjora riembo ndiga ka ating’o mabul. Di ne ok apuonjora timo kamano, di ne ok alendo e kinde koth!

Usedarga chiegni nyadi 15. Gin paro mage ma unyalo miyo jomoko e wi dar?

Marie-Line: Dar niga gi pekge. Wamanyoga ot ma wanyalo winjoe maber bang’ tiyo matek e tij lendo.

Jack: Aheroga wiro rangi e ot ma wadonjoe. Nikech owete ma ni e ofis nong’eyo ni samoro ok wabi budho e alwora moro, seche moko ne ginyisaga ni, “Jack, wang’ni kik iwir rangi!”

Marie-Line ong’eyo fundo osikewa e yo maber ahinya. Koseketogi e katonde-katonde, ondikoga tok katondego ni, “Mae mar baf, mae mar kor nindo, mae mar jikon,” kamano-kamano. Mano konyowaga sama wachopo e ot manyien, nikech watero katon ka katon kama owinjore. E wi mano, olosoga list ma nyiso gik ma katon ka katon oting’o mondo kik wamany gimoro ahinya sama wadware.

 Marie-Line: Nikech wasepuonjore bedo joma ochanore, mano miyo ka wachopo achopa e alwora ni i, to wachako lendo.

Uchanoga secheu nade mondo okonyu ‘timo tich mosemiu e yo maber chuth’?​—2 Tim. 4:5.

Marie-Line: Chieng’ Wuok Tich, en-ga odiechiengwa mar yueyo kod iko chokruoge. Tich Ariyo ka dhi nyime, to gin odiechengewa mag lendo.

Jack: Kata obedo ni nitie seche sie midwaro kuomwa giko dwe ka dwe, mano ok e gima duong’ sama wadhi e tij lendo. Tij lendo e tich maduong’ ahinya e ngimawa. Sama wawuok awuoka e ot ni i, wachakoga lendo ne ng’ato ang’ata ma waromogo nyaka sama ang’ nwadog ot.

Marie-Line: Kata sama wadhi e tafrija, ajating’oga trakt moko. Nitie joma biroga kwayowa bugewa kata ka pok wanyisogi ni wan Joneno mag Jehova. Mano miyo watemoga bedo gi timbe mabeyo kendo rwakore e yo mowinjore. Ji ng’iyoga ahinya gik ma kamago.

Jack: Bende, watemoga dak maber gi jirendewa. Akwanyoga kalatese e laru marwa, achokoga yugi, kendo ayweyoga oboke molwar. Jirendewa fwenyoga mano kendo seche moko gipenja ni, “Dibedie gi Muma imiyae?”

Nitie kinde ma udhiga lendo e gwenge mosokore ahinya. Be nitie gimoro makende ma duher pimonwa ma useneno e wuodhego?

Jack: E piny Guiana, nitie alwora moko ma chopoe tek. Seche moko wadhi kuonde maboyo ma koriw to en kilomita 600 e juma, to nderni bende richo. Pod waparo ahinya kinde ma ne wadhi St. Élie, ma ni e bunge mag Amazon. Ne wakawo seche mang’eny ahinya e yo ka watiyo gi mtoka molos ne yore maricho kod yie ma nigi injin. Thoth joma odak kuno ne gin jokuny dhahabu. Jomoko kuomgi ne miyowaga dhahabu kaka chiwo sama wamiyogi bugewa. Odhiambo kodhiambo ne wanyisogiga achiel kuom vidio mag sosaiti. Ji mang’eny ne biroga neno vidio.

Marie-Line: Machiegnini, ne okwa Jack mondo odhi ogol twag Rapar Camopi. Chopo kuno nokawowa seche ang’wen ka watiyo gi yie ma nigi injin e Aora Oyapock. Weche nodhi maber ahinya.

Jack: Nitie kuonde ma pi ne ridoree matek ma ne nyalo kelo masira. To neno kaka pi ringo matek kamano ne morowa ahinya. Jakwang’ yie nyaka ng’e gima otimo. Kata kamano, ne en wuoth mamit. Kata obedo ni ne wan mana Joneno auchiel kende e Rapar, ji ma dirom 50 nobiro, moriwo nyaka joma wuok e dhoot mong’ere kaka Amerindians!

Marie-Line: Rowere ma gombo tiyo ne Jehova e yo momedore bende nyalo yudo mor ma chalo kamano. Mondo ng’ato obed gi yie motegno e kuonde kaka magi, gima konye en geno kuom Jehova. Waseneno lwet Jehova nyading’eny.

Usepuonjoru dhok mang’eny ahinya. Nenore ni wiu yot e puonjruok dhok manyien, koso?

Jack: Ok en kamano. Napuonjora dhokgi mana nikech dwaro ma ne nitie. Nachako tayo Puonjruok mar Ohinga mar Jarito e dho Sranantongo * kata ka ne pok atimo migawo mar somo mar Muma! Nakwayo owadwa moro mondo onyisa ka be natayo puonjruok maber. Nodwoka niya: “Chutho-chutho weche moko ne okalowa, kata kamano, nitayo maber.” Nyithindo ne konyaga ahinya sama napuonjora dhok manyien. Sa asaya ma ne awacho gimoro magalagala, ne girieyaga; jomadongo to thothne ne ok kwera. Napuonjora gik mathoth kuom nyithindo.

Marie-Line: E alwora moro, ne an gi jopuonjre Muma ma ne wacho dho French, Portuguese, kod Sranantongo. Nyaminwa moro nonyisa ni akwong apuonjra gi jopuonjre ma wacho dhok matekna, e ka apuonjra gi ma wacho dhok ma bet awinjo. Mapiyo nono, nafwenyo gimomiyo nonyisa kamano.

 Chieng’ moro ne adhi puonjo japuonjre ma ne wacho dho Sranantongo kae to adhi ir ma ne wacho dho Portuguese. Ka ne achako tayo puonjruok mar ariyo ma natimo gi miyo moro ma Nya-Brazil, nyaminwa ma ne wan-go nopenja ni, “Marie-Line, ang’o ma timore?” Nafwenyo ni kare nawacho gi miyono dho Sranantongo kar wacho dho Portuguese!

Owete gi nyimine ma ni e alwora musetiyoe oherou ahinya. Ang’o ma nokonyou mako osiep kodgi?

Jack: Ngeche 11:25 wacho ni, “Ng’at ma jachiwo nomew.” Omiyo, watemoga mondo wakony jomoko sama wanyalo. Sama wadhi loso kuonde mokethore e Od Romo, jolendo moko oseganyisa ni, “We tijno jolendo mamoko e ma otim.” Ajadwokogiga ni: “Donge an be an jalendo. Ka nitie tich ma dwarore ni otim, an be nyaka atim atima.” Kata obedo ni nitie seche ma dwaher ni wabed kar kendwa, ok wayiega mondo mano omonwa kawo thuolo mondo wakony jomamoko.

Marie-Line: Watemoga ahinya mondo wanyis ni wadewo owete gi nyimine. Dewogi kamano miyo wafwenyoga mayot sama achiel kuomgi diher ni oritne nyathi kata omnego e skul. Ka wasefwenyo mano, walokoga chenrowa mondo wakonygi. Mano osemiyo wabedo osiepegi ahinya.

Gin gueth mage museyudo niketh tiyo ne Jehova kuonde ma jolendo dwaroree moloyo?

Jack: Tiyo ne Jehova kuom thuolowa duto osekelonwa gueth mang’eny. Waseyudo nyaka thuolo mar neno gik mopogore opogore ma ne Jehova ochueyo. Kata obedo ni waseromo gi pek moko, wan gi chuny mokue nikech wang’eyo ni jotich Jehova oikore sirowa kamoro amora ma wadhiye.

Ka ne pod an rawera, notueya e jela e piny French Guiana nikech nadagi riwo weche mag piny lwedo. Ne ok ang’eyo ni chieng’ moro nadog e pinyno ka koro an jamisonari, ma yiena lendo nyaka ne joma otue e jela. Kuom adier, gueth mag Jehova ogundho!

Marie-Line: Gima kelona mor moloyo en konyo jomamoko. Wamor tiyo ne Jehova. Timo mano osetego kend marwa. Nitie seche ma Jack nyalo kwaya ka be wanyalo gwelo joot moro ma chunygi onyosore. Gima iwuoro en ni mano yudoga ka an be aparo mana gima kamano! Thothne waparoga machal.

Jack: Machiegnini, noyuda gi prostate cancer. Ajanyiso Marie-Line niya: “Jaoda, ka po ni atho kiny, ang’eyo ni ‘hika to pok oniang’ maber.’ (Cha. 25:8) Kata kamano, abiro tho ka amor nikech ang’eyo ni asetiyo ne Jehova gi ngimana duto.” Marie-Line ok dwarga winjo ka awuoyo kamano.

Marie-Line: Jehova osebedo ka yawonwa dhoudi malach mag tiyone, nyaka ma ne ok wapar kata. Waseneno gik mabeyo ahinya e ngimawa. Nikech wan gadier chuth ni Nyasaye ni kodwa, pod waikore dhi kamoro amora ma riwruok mar ogandane nyalo kwayowa ni wadhiyee!