1. Ang’o momiyo Yesu nokwayo Jehova mondo orit jolupne?

E OTIENO mogik ka ne pok Yesu otho, noparore ahinya e wi pek ma jolupne ne dhi romogo. Nikech Yesu noherogi ahinya, nokwayo Wuon-gi mondo ‘oritgi nikech ng’at marach.’ (Joh. 17:14, 15) Yesu nong’eyo ni bang’ dokne e polo, Satan Jachien ne dhi dhi nyime kedo gi ng’ato ang’ata ma dwaro tiyo ne Jehova. Mano nyiso maler ni ne dhi dwarore ni jo Jehova oyud rit makende.

2. Ang’o ma nyalo miyo wabed gadier ni Jehova biro dwoko lamowa?

² Jehova nodwoko lamb Yesu nikech ohero Yesu. Ka watimo duto ma wanyalo mondo watim gik ma moro Jehova, wan bende obiro herowa, kendo obiro winjo lamowa ma wakwayego mondo okonywa kendo oritwa. Nikech Jehova en Wuoro ma dewo nyithinde, obiro dhi nyime ritogi. Ka ok otimo kamano, nyinge biro kethore.

3. Ang’o momiyo dwarore ni Jehova oritwa e kindegi?

³ Ndalogi e ma wadwaroe ahinya ni Jehova oritwa moloyo kinde moro amora mosekalo. Mano en nikech osewit Satan e piny kae “ka en gi mirima mager.” (Fwe. 12:12) Osewuondo jomoko ma sandowa mondo gipar ni sama gitimo kamano, ‘gitiyo ne Nyasaye.’ (Joh. 16:2) Jomoko ma bende ok ti ne Nyasaye sandowa nikech wapogore kodgi. Bed ni ji sandowa nikech wach mane, ok wabed maluor. Nikech ang’o? En nikech Wach Nyasaye wacho kama: “Ruoth en ng’at migeno,  kendo obiro tegou koritou kuom ng’at marach.” (2 The. 3:3) Gin yore mage ma Jehova ritowago? Wane ane yore moko ariyo motimogo kamano.

4. Ka luwore gi Jo-Efeso 6:13-17, ang’o ma Jehova omiyowa mondo oritwa?

⁴ Jehova osemiyowa gige lweny ma nyalo ritowa sama Satan monjowa. (Som Jo-Efeso 6:13-17.) Gige lwenygo otegno kendo gitiyo maber! Kata kamano, mondo giritwa maber, nyaka warwakgi giduto, kendo kik walonygi. Gige lwenygo ochung’ ne ang’o? We wang’i ane moro ka moro kuomgi.

5. Msip mar adiera ochung’ ne ang’o, to ang’o momiyo onego watueye e nungowa kinde duto?

⁵ Msip ochung’ ne adiera ma yudore e Muma, ma en Wach Nyasaye. Ang’o momiyo nyaka wasik ka watueyo msibno e nungowa? En nikech Satan e “wuon miriambo.” (Joh. 8:44) Osebedo ja miriambo kuom higni mang’eny, kendo osewuondo “piny mangima”! (Fwe. 12:9) Kata kamano, adiera ma ni e Muma ritowa mondo kik owuondwa. Ere kaka wanyalo tueyo msip mar adiera e nungowa? Watimo mano kuom puonjore adiera e wi Jehova, lame kuom “roho kod adiera,” kendo bedo joratiro e weche duto.​—Joh. 4:24; Efe. 4:25; Hib. 13:18.

6. Rageng’ mar akor ochung’ ne ang’o, to ang’o momiyo dwarore ni warwake?

⁶ Rageng’ mar akor ochung’ ne chike makare mag Jehova. Ang’o momiyo dwarore ni warwak rageng’ mar akorno? Mana kaka rageng’ mar akor ne rito chuny jalweny mondo jowasigu kik chuoye, e kaka chike makare mag Nyasaye rito chunywa mondo timbe maricho mag pinyni kik hinywa. (Nge. 4:23) Jehova dwaro ni wahere kendo watine gi chunywa duto. (Mat. 22:36, 37) Omiyo, Satan temo ahinya mondo opog chunywa kuom ketowa e obadho mar hero gige pinyni, ma gin gik ma Jehova osin-go. (Jak. 4:4; 1 Joh. 2:15, 16) To ka obadhoneno otamore tiyo, obiro temo mondo obwogwa kata sandowa mondo waketh chike Jehova.

7. Ere kaka wanyalo rwako rageng’ mar akor?

⁷ Warwako rageng’ mar akor kuom yie luwo chike mag Jehova ma tayo weche makare kod ma ok kare, kendo dak ka luwore gi chikego. (Zab. 97:10) Nitie jomoko ma nyalo neno ni chike Jehova oridore ahinya. Ka waweyo tiyo gi puonj mag Muma e ngimawa, wabiro chalo gi jalweny molonyo rageng’ mar akor sama lweny dhi nyime, koneno ni rageng’no pek ahinya. To mano doko fuwo maduong’! Jo mohero Jehova ok ne ni chike Jehova “tek luwo,” kar mano, ginenogi kaka chike ma rito ngimagi.​—1 Joh. 5:3.

8. Rwako ikruok mar yalo wach maber mar kuwe e tiendewa, tiende en ang’o?

⁸ Paulo nowacho bende ni warwak ikruok mar yalo wach maber mar kuwe e tiendewa. Tiende ni, kinde duto onego waikre yalo wach maber mar Pinyruoth. Sama walando ne jomamoko wach ma ni e Muma yiewa medo bedo motegno. Wamorga ahinya sama waneno ka jotich Jehova e piny ngima manyo yore mag yalo wach maber bed ni gin e tich, e skul, kuonde ohala, e ot ka ot, sama gidhi ng’iepo, sama gilimo wede, sama gigoyo mbaka gi joma ging’iyogo, to kata mana sama ngima omiyo ok ginyal wuok e utegi. Ka luoro oloyowa mi waweyo yalo wach maber, wabiro chalo gi jalweny molonyo wuoche sama lweny dhi nyime. Yot ahinya mondo gimoro ohiny tiendene. Mano biro miyo jowasigu omonje mayot, kendo biro bedone matek luwo kaka jatende chike.

9. Ang’o momiyo dwarore ni wating’ okumbawa malach mar yie?

 ⁹ Okumba malach mar yie ochung’ ne yie ma wan-go kuom Jehova. Wan gi yie ni obiro timo gik moko duto mosesingo. Yie ma kamano biro konyowa “nego aserni duto ma kakni gi mach moa kuom ng’at marach.” Ang’o momiyo dwarore ni wating’ okumba malachno? En nikech oritowa mondo joma ong’anjo moweyo adiera, kata joma jarowa kik wuondwa kata miyowa luoro mi kindawa dog piny. Ka waonge gi yie ok bi bedonwa mayot mondo wakwed joma temo thung’owa mondo waketh chike Jehova. To sa asaya ma wachung’ motegno ka wasiro yiewa bed ni wan ka tich kata e skul, wanyiso ni wating’o okumbawa malach. (1 Pet. 3:15) Sa asaya ma watamore tich moro ma osache bup nikech onyalo chocho chenrowa mag lamo, wanyiso ni wating’o okumbawa malach. (Hib. 13:5, 6) Kendo seche duto ma watiyo ne Jehova kata bed ni ikwedowa, okumbawa malach ritowa.​—1 The. 2:2.

10. Ogudu mar warruok ochung’ ne ang’o, to ang’o momiyo onego warwake?

¹⁰ Ogudu mar warruok en geno majaber ma Jehova omiyowa, ma en ni, obiro tiekonwa tho kendo guedho jogo duto ma timo  dwache. (1 The. 5:8; 1 Tim. 4:10; Tito 1:1, 2) Mana kaka ogudu ma jalweny rwako rito wiye, e kaka geno ma wan-go bende rito pachwa. E yo mane? Genono miyo waketo pachwa kuom gik moko duto ma Nyasaye osingonwa, kendo okonyowa bedo gi paro mowinjore e wi chandruoge ma waromogo. Ere kaka warwako oguduno? Watimo mano kuom siko ka waparo mana gik motudore gi pach Nyasaye. Kuom ranyisi, ok wagen kuom mwandu mag pinyni, kar mano, wageno kuom Nyasaye.​—Zab. 26:2; 104:34; 1 Tim. 6:17.

11. Ligangla mar roho maler en ang’o, to ang’o momiyo dwarore ni wati kode?

¹¹ Ligangla mar roho maler en Muma ma en Wach Nyasaye. Liganglano nigi teko mar chwoyo chuny dhano nyaka iye mogol miriambo duto kendo gonyo ng’ato e tuech mag dinde mag miriambo kod timbe maricho. (2 Kor. 10:4, 5; 2 Tim. 3:16, 17; Hib. 4:12) Wapuonjore tiyo gi liganglano e yo maber kokalo kuom puonjruok Muma kod tiegruok ma riwruok mar oganda Jehova miyowa. (2 Tim. 2:15) Mopogore gi gige lweny, nitie yo machielo ma Jehova ritowago. En yo maneno?

12. Mondo waked gi Satan, ang’o kendo ma dwarore, to nikech ang’o?

¹² Jalweny molony ong’eyo ni ok onyal kedo gi jowasigu ka en kende; dwarore ni jolweny wetene okonye. E yo ma kamano, ok wanyal kedo gi Satan gi lange ka wan kendwa, dwarore ni owetewa gi nyiminewa okonywa. Jehova omiyowa “riwruok duto mar owete” e piny ngima moikore konyowa.​—1 Pet. 2:17.

13. Ka luwore gi Jo-Hibrania 10:24, 25, gin ber mage ma wayudo ka wadhi e chokruogewa?

¹³ Ka wadwaro ni owetewa okonywa, achiel kuom gik ma nyaka watim en dhi e chokruogewa mag kanyakla. (Som Jo-Hibrania 10:24, 25.) Seche ma wawinjo ka chunywa onyosore, ma en gima jatimorega, chokruoge nyalo duogo chunywa. Paro maber ma owetewa gi nyiminewa golo e chokruok jiwowaga ahinya. Twege ma gigolo tegowaga mondo wamakre gi yiero ma wasetimo mar tiyo ne Jehova. Bende, mbekni ma wagoyo gi Jokristo wetewa ka pok chokruok ochakore kod bang’ chokruok, jiwowaga ahinya. (1 The. 5:14) E wi mago, chokruogewa miyowa thuolo mar konyo jowetewa, to mano miyo wabedo mamor. (Tich 20:35; Rumi 1:11, 12) Nitie ber mamoko ma bende wayudo e chokruogewa. E chokruogewa, itiegowa mondo wabed molony e yalo kod puonjo. Kuom ranyisi, ipuonjowa kaka wanyalo tiyo maber gi Gik ma Watiyogo e Puonjo Ji Muma. Kuom mano, ikriga maber ne chokruoge mag kanyakla. Sama chokruok dhi nyime, chik iti adimba. Bang’ chokruok, tem ahinya mondo iti gi gik mipuonjori kuno. Kitimo kamano, ibiro bedo “jalweny maber mar Kristo Yesu.”​—2 Tim. 2:3.

14. Gin jomage ma bende konyowa kedo?

¹⁴ Malaike tara gi tara ma nigi teko mang’eny bende konyowa. Par ane gik ma malaika achiel kende nyalo timo! (Isa. 37:36) Ka koro malaika achiel kende e ma ne nyalo nego jolweny 185,000 e otieno achiel, to nade malaike tara gi tara? Teko dhano kata teko ma jochiende nigo ok dipim gi teko ma Jehova nigo mar kedo kata matin. Jehova nigi teko mathoth. Omiyo, ka en kodwa, onge joma nyalo loyowa kata gibed mang’eny machalo nade. (Bura 6:16) Mano wach ma wan-go gadier! Par mano seche duto ma jatich wadu, jaskul wadu, kata watni moro ma ok Janeno,  temo bwogi kata jari. Par ni ok in kendi e lwenyni, iluwo kaka Jehova tayi. Omiyo obiro riti.

15. Ka luwore gi Isaya 54:15, 17, ang’o momiyo Satan ok bi nyalo mono jotich Jehova dhi nyime gi tij lando wach maber?

¹⁵ Nitie gik mang’eny ma nyalo miyo piny Satanni osin kodwa. Ok wadonjre e weche siasa, kendo ok wadhi e lweny ma gikedoega. Walando nying Nyasaye, walando Pinyruoth kaka yo kende mar kelo kuwe, kendo waluwo chike makare mag Nyasaye. Wakonyo ji ng’eyo ni Satan en jamiriambo kendo janek. (Joh. 8:44) Bende, walando ne ji ni piny Satanni ochiegni kethi. To e ma Satan gi joge ok bi monowa dhi nyime timo tijno. Kar mano, wabiro dhi nyime pako Jehova ka watiyo gi yore duto momiyowa. Kata obedo ni Satan nigi teko mang’eny, pok ochungo tij lando wach maber mar Pinyruoth e piny ngima. Rit ma Jehova miyowa e ma miyo mano nyalore.​—Som Isaya 54:15, 17.

16. Ere kaka Jehova biro reso joge e kinde masira maduong’?

¹⁶ Ang’o ma pod oritowa nyime ka? E kinde masira maduong’, Jehova biro resowa e yore moko ariyo madongo ahinya. Mokwongo, obiro reso jotichne momakore kode e kinde ma obiro chwalo ruodhi mag pinyni mondo oketh Babulon Maduong’, ma en, dinde duto mag miriambo. (Fwe. 17:16-18; 18:2, 4) Kae to mar ariyo, obiro reso jotichne e kinde ma obiro tieko Satan gi lange e Har–Magedon.​—Fwe. 7:9, 10; 16:14, 16.

17. En ber mane ma wayudo ka wasiko machiegni gi Jehova?

¹⁷ Ka wasiko ka wamakore gi Jehova, onge hinyruok moro amora mosiko ma Satan nyalo kelonwa. Kar mano, en e mobiro yudo hinyruok ma biro tieke chuth. (Rumi 16:20) Omiyo, sik kirwako gige lweny, kendo kik ilonygi. Kik item kedo kendi, kar mano, yie mondo oweteni gi nyimineni okonyi. Bende, luw kaka Jehova tayi. Kitimo kamano, inyalo siko ka in gadier ni Wuonu ma jahera ma ni e polo biro dhi nyime tegi kendo riti.​—Isa. 41:10.