1. Ka luwore gi Mathayo 24:9, ang’o momiyo ok onego okawwa gi wuoro sama piny osin kodwa?

JEHOVA nochueyowa mondo waher jomamoko to gin bende giherwa. Omiyo sama ng’ato osin kodwa, wachno chwanyowaga kendo nyalo miyo wabed gi luoro. Kuom ranyisi, nyaminwa moro miluongo ni Georgina modak Europe, wacho kama: “Ka ne ajahigni 14, minwa nosin koda nikech natiyo ne Jehova. Wachno nomiyo akuyo, kendo nachako parora ka be ne an ng’at maber adier.” * Owadwa miluongo ni Danylo nondiko kama: “Ka ne jolweny moko ogoya, oyanya, kendo obwogona ngima nikech ne an Janeno mar Jehova, wachno nomiya luoro kod wichkuot.” Kuom adier, chunywa nyosorega sama ji osin kodwa. Kata kamano, mano ok kawwa gi wuoro nikech Yesu nowacho ni ji ne dhi sin kodwa.​—Som Mathayo 24:9.

2-3. Ang’o momiyo ji osin gi jolup Yesu?

² Piny osin gi jolup Yesu. Nikech ang’o? Mana kaka Yesu, gin bende ‘ok gin mag piny.’ (Joh. 15:17-19) Nikech mano, kata obedo ni wachiwo luor ne sirkende mag dhano, ok walamgi, kendo ok walam kata kido ma gitiyogo. Jehova kende e ma walamo. Wariwo lwedo ratiro ma Nyasaye nigo mar locho e wi dhano, ma en ratiro ma Satan kod kothe osebedo ka kedogo matek. (Cha. 3:1-5, 15) Walando ni Pinyruodh Nyasaye kende e ma nyalo golo ne dhano chandruok, kendo ni machiegnini, Pinyruodhno biro ketho ji duto ma kwede. (Dan. 2:44; Fwe. 19:19-21) Mano en wach maber ne joma muol, kata kamano, en wach marach ne joricho.​—Zab. 37:10, 11.

 ³ Ji osin kodwa bende nikech waluwo chike makare mag Nyasaye. Chikego ok modhre pi gi chike mag pinyni. Kuom ranyisi, ji mang’eny tinde oyie gi timbe mag terruok machal gi ma ne omiyo Nyasaye oketho Sodom gi Gomora e ndalo machon. (Juda 7) Nikech waluwo gima Muma wacho e wi timbe kaka mago, ji mang’eny jarowaga kendo giwachoga ni ok wadew pach jomamoko!​—1 Pet. 4:3, 4.

4. Gin kido mage ma tegowa sama ji osin kodwa?

⁴ Ang’o ma nyalo konyowa nano sama ji osin kodwa kendo giyanyowa? Onego wabed gi yie motegno ni Jehova biro konyowa. Mana kaka okumba, yiewa nyalo “nego aserni duto ma kakni gi mach moa kuom ng’at marach.” (Efe. 6:16) Kata kamano, yie kende ok oromo. Dwarore bende ni wabed gi hera. Nikech ang’o? Nikech hera “iye ok wang’ piyo.” Hera odhil kendo onano e weche duto maricho. (1 Kor. 13:4-7, 13) Koro wane ane kaka hera ma waherogo Jehova, Jokristo wetewa, kaachiel gi jowasikwa, nyalo konyowa nano sama ji osin kodwa.

5. Ere kaka hera ma Yesu noherogo Wuon mare notege?

⁵ E otieno mogik ka ne pok jowasik Yesu onege, ne onyiso jolupne ma nomakore kode niya: “Ahero Wuora, [omiyo] atimo mana kaka Wuora osechika ni atim.” (Joh. 14:31) Hera ma ne Yesu oherogo Jehova notege mondo onan e tembe madongo ma nodhi romogo. Hera ma waherogo Jehova nyalo konyowa mondo wan bende watim kamano.

6. Ka luwore gi Jo-Rumi 5:3-5, jotich Jehova nenoga nade thuolo ma gin-go mar nano e bwo sand?

⁶ Kinde duto hera ma jotich Jehova oherogo Nyasaye osekonyogi nano e bwo sand. Kuom ranyisi, e kinde ma kot maduong’ mar Jo-Yahudi nochiko joote ni kik giyal wach maber, hera ma ne giherogo Nyasaye nochwalogi mondo gidhi nyime ‘winje kaka jalochgi, kar winjo dhano.’ (Tich 5:29; 1 Joh. 5:3) Hera ma kamano bende e ma osetego owetewa e kindegi mondo gichung’ motegno kata sama sirkende man gi teko sandogi. Kar mondo weche ma kamago onyos chunywa, waneno ni en thuolo makende nano sama pinyni osin kodwa.​—Tich 5:41; Som Jo-Rumi 5:3-5.

7. Sama joodwa kwedowa, onego wane wachno nade?

⁷ Achiel kuom gik ma nyaloga temo yiewa ahinya en sama akwede wuok e odwa. Sama wachako puonjore adiera e wi Jehova, moko kuom joodwa nyalo paro ni iwuondowa. Moko kuomgi nyalo paro ni wiwa okethore. (Pim gi Mariko 3:21.) Ginyalo kata timonwa gik moko ma nyalo hinyowa. Akwede kaka mago ok onego obwogwa. Yesu nowacho kama: “Wasik ng’ato nobed joode owuon.” (Mat. 10:36) Bed ni wedewa biro timonwa ang’o, wabiro temo kar nyalowa mondo kik wanegi kaka jowasikwa. Kar mano, kaka wamedo hero Jehova, e kaka wamedo hero dhano wetewa. (Mat. 22:37-39) Kata kamano, ok wabi weyo luwo chike kod puonj ma ni e Muma mana ni mondo wamor dhano.

8-9. Ang’o ma nokonyo nyaminwa moro mondo ochung’ motegno kata obedo ni nokalo e akwede mager?

⁸ Georgina ma a wasewuoyo kuome motelo, nodhi nyime chung’ motegno kata obedo ni min-gi ne kwede matek. Georgina wacho kama: “An kachiel gi minwa ne wachako puonjore Muma gi Joneno mag Jehova. Kata kamano, bang’ dweche auchiel ka koro nadwaro chako dhi e chokruoge mag kanyakla, minwa nochako kweda. Nafwenyo ni kara notudorega gi joma nong’anyo moweyo adiera, kendo paro ma jogo ne miye e ma notiyogo sama  nowuoyo koda. Bende, noyanyaga, noywayoga yie wiya, nodeyaga, kendo nowitoga nyaka bugena mag puonjruok. Ka nachopo higni 15, nobatisa. Minwa notemo kata mana geng’a mondo kik ati ne Jehova koketa kamoro ma ne ilorone nyiri mong’anyo, ma ne timo timbe maricho kendo ma ne tiyo gi yedhe ma mero ji. Akwede bedoga malit ka po ni ng’at monego odewi kendo oheri e ma kwedi.”

⁹ Ang’o ma nokonyo Georgina? Owacho kama: “Chieng’ ma ne minwa ochako kwedaeno, noyudo mana ka a atieko somo Muma duto. Ne an gadiera chuth ni naseyudo adiera, kendo nawinjo ka nachiegni ahinya gi Jehova. Najalamoga Jehova kinde duto, kendo nowinjaga. Ka pod nadak gi nyirigo, nyaminwa moro ne jagwelaga e ode mondo wapuonjre Muma. Gie kindego bende, owete gi nyimine ne jiwaga ahinya e Od Romo, kendo ne gikawa kaka achiel kuom joutegi. Naneno gi wang’a awuon ni Jehova nigi teko moloyo joma kwedowa kata bed ni gin jomage.”

10. En adiera mane ma wanyalo bedogo kuom Jehova Nyasachwa?

¹⁰ Jaote Paulo nondiko ni onge gima nyalo “pogowa gi hera mar Nyasaye manie Kristo Yesu Ruodhwa.” (Rumi 8:38, 39) Kata obedo ni wanyalo sandore kuom ndalo moko, kinde duto Jehova biro bedo jakorwa kohoyowa kendo kotegowa. Kendo mana kaka ranyisi mar Georgina nyiso, Jehova bende biro konyowa kotiyo gi owetewa gi nyiminewa ma wageno ahinya.

11. Ere kaka hera ma Yesu nowuoyoe e Johana 15:12, 13 nokonyo jopuonjrene? Chiw ane ranyisi.

¹¹ E otieno mogik ka ne pok Yesu otho, ne oparo ne jopuonjrene ni mondo giherre. (Som Johana 15:12, 13.) Nong’eyo ni hera madier ne dhi konyogi siko kamoro achiel kendo nano sama piny ne dhi sin kodgi. Ne ane ranyisi mar kanyakla mar Thesalonika. Chakre kinde ma ne ochakie kanyaklano, ne osand jo kanyaklano ahinya. Kata kamano, owete gi nyimine ma kanyaklano noketo ranyisi maber kuom nano kendo nyiso hera. (1 The. 1:3, 6, 7) Paulo nojiwogi ni gidhi nyime nyiso hera kendo gidhi nyime “timo kamano moloyo.” (1 The. 4:9, 10) Hera ne dhi konyogi hoyo joma chunygi onyosore kendo tego joma yom-yom. (1 The. 5:14) Ne giluwo gima jaote Paulo nonyisogino nikech e barua  mar ariyo ma Paulo nondikonegi bang’ higa achiel kama, Paulo nowachonegi niya: “Hera ma ng’ato ka ng’ato oherogo wadgi medore.” (2 The. 1:3-5) Hera ma ne gin-go e kindgi nokonyogi nano e bwo tembe kod sand.

12. Ka ne lweny omuoch e piny moro, ere kaka owete gi nyimine ma ni e pinyno nonyiso hera madier?

¹² Ne ane ranyisi mar Danylo ma ne wasewuoyo kuome motelo, kachiel gi jaode. Ka ne lweny omuoch e alwora ma ne gidakie, ne gidhi nyime dhi e chokruoge, lendo kar nyalogi, kendo pogo chiemo ma ne gin-go ne owete gi nyiminegi. Kae to chieng’ moro, jolweny ma ne omanore gi gige lweny ne odhi e od Danylo. Danylo wacho kama: “Ne gitemo chuna mondo awe bedo Janeno mar Jehova. Ka ne atamora ne gigoya kendo ne giwuondore ka joma dwaro nega kuom muojo bunde but wiya. Ka ne pok giwuok, ne ginyisa ni gibiro duogo nindo gi jaoda gi thuon. Kata kamano, owetewa notimo chenro mapiyo mi waidho gach reru mi wadhi e taon machielo. Wiya ok bi wil ngang’ gi hera ma owetewago nonyisowa. Ka ne wachopo e taon machielono, owetewa ma kono nomiyowa chiemo, kendo ne gikonya yudo tich kod ot ma ne wanyalo dakie. Mano nomiyo wan bende ne warwako Joneno mamoko ma ne oa e alwora ma ne lwenyno timore.” Ranyisi kaka mago konyowa neno ni hera ma Jokristo oherorego nyalo konyowa nano sama piny osin kodwa.

13. Ere kaka roho maler konyowa dhi nyime nano ka watiyo ne Jehova kata sama ji osin kodwa?

¹³ Yesu nonyiso jolupne ni giher jowasikgi. (Mat. 5:44, 45) To be timo kamano yotga? Ooyo! Kata kamano, roho mar Nyasaye nyalo konyowa timo kamano. Olembe ma rohono nyago oriwo hera, horruok, ng’wono, muolo, kod ritruok. (Gal. 5:22, 23) Kidogo konyowaga nano sama ji osin kodwa. Thoth joma chon ne kwedoga Joneno noloko paro ma ne gin-go nikech samoro jaodgi, nyathigi, kata jirandgi, nochako nyiso kido mabeyogo. Moko kuom joma ne kwedowago sani gin owetewa gi nyiminewa. Omiyo, kifwenyo ni ok yotni hero joma kwedi nikech ilamo Jehova, kwa Jehova mondo omiyi rohone maler. (Luka 11:13) Kendo bed gadier chuth ni yore mag Nyasaye kinde duto e ma beyoga.​—Nge. 3:5-7.

14-15. Ere kaka Jo-Rumi 12:17-21 nokonyo Yasmeen hero chwore kata obedo ni chwore ne sande malit?

 ¹⁴ Ne ane ranyisi mar Yasmeen modak Middle East. Ka nobedo achiel kuom Joneno mag Jehova, chwore ne paro ni iwuonde, kendo notemo tame mondo owe tiyo ne Jehova. Nojayanyega, kendo nonyiso nyaka wedene, jatend din moro, kod ajuoga moro mondo obwoge ni nodhi ketho kend margi Chieng’ moro jaodeno noyanye matek e nyim owete ka ne gin e chokruok mar kanyakla. Yasmeen nosiko ka ywak aywaka nikech ne itimone gik ma ok kare.

¹⁵ Ka ne Yasmeen ni e Od Romo, owete gi nyimine ne jiwega kendo hoye. Jodong-kanyakla nojiwe ni oti gi weche ma yudore e Jo-Rumi 12:17-21. (Som.) Yasmeen wacho kama. “Ne ok yot luwo weche ma ndikono wacho. Kata kamano, ne akwayo Jehova kendo natimo kar nyalona mondo aluw gima Muma wachono. Omiyo, ka ne jaoda olilo jokon goyiem najatimoga ler, ka ne oyanya nadwokoga gi muolo. Kendo ka ne obedo ma tuo, naritega maber.”

16-17. En ang’o mipuonjori kuom ranyisi mar Yasmeen?

¹⁶ Hera ma ne Yasmeen oherogo chworeno nobedo gi nyak maber. Owacho kama: “Jaoda nochako gena ahinya nikech nong’eyo ni kinde duto nawachoga adiera. Nochikonaga ite adimba sama ne wawuoyo e weche mag din, kendo noyie mondo walos kuwe e odwa. Tinde en e monyisaga ni adhi e chokruoge mag kanyakla. Sani an gi winjruok maber gi jaoda kendo wadak gi kuwe. An gi geno ni chieng’ moro jaoda biro rwako adiera, kendo obiro riwore koda e tiyo ne Jehova.”

¹⁷ Ranyisi mar Yasmeen nyiso ni hera “odhil e weche duto, . . . obedo gi geno kuom weche duto, onano e weche duto.” (1 Kor. 13:4, 7) Sigu nigi teko kendo nyalo kelo ne ng’ato lit ahinya. Kata kamano, hera nigi teko moloyo sigu. Hera nyalo miyo ji olok chunygi. Kendo hera miyo Jehova bedo mamor. Kata ka joma kwedowa odhi nyime gi sin kodwa pod wanyalo bedo mamor. Ere kaka mano nyalore?

18. Ang’o momiyo wanyalo bedo mamor sama ji osin kodwa?

¹⁸ Yesu nowacho niya: “Un jo mamor ka ji mon kodu.” (Luka 6:22) Ok wawinjga maber sama ji osin kodwa, kendo sama gisandowa nikech watiyo ne Jehova. Kata kamano, ang’o momiyo wanyalo bedo mamor kata sama ji  osin kodwa? Ne ane weche adekgi. Mokwongo, sama wanano Jehova bedo mamor kodwa. (1 Pet. 4:13, 14) Wach mar ariyo, yiewa mosetem bedoga motegno. (1 Pet. 1:7) Kendo wach mar adek, wabiro yudo mich maduong’ ahinya ma en ngima ma nyaka chieng’.​—Rumi 2:6, 7.

19. Ang’o momiyo joote ne mor bang’ ka nosechwadgi?

¹⁹ Mapiyo bang’ ka nosechier Yesu, joote nochako neno kit mor ma ne Yesu owuoyoe. Bang’ ka nosechwadgi kendo ochikgi ni giwe yalo, ne gi mor. Nikech ang’o? “Nikech ne osekwan-gi kaka jo ma ichayo nikech nying Yesu.” (Tich 5:40-42) Hera ma ne giherogo Ruodhgi ne duong’ moloyo luoro ma jowasikgi ne nyalo miyogi. Kendo ne ginyiso herano kuom lando wach maber ‘ma ok giweyo.’ Thoth owetewa gi nyiminewa e kindegi dhi nyime tiyo ne Jehova kata obedo ni giromo gi pek moko. Ging’eyo ni wi Jehova ok bi wil gi tijgi kod hera ma gisenyiso ne nyinge.​—Hib. 6:10.

20. En ang’o ma wabiro nono e sula ma luwo?

²⁰ Kaka piny marachni pod biro dhi nyime, e kaka jopiny bende pod biro dhi nyime sin kodwa. (Joh. 15:19) Kata kamano, ok onego wabed maluor. Mana kaka wabiro neno e sula ma luwo, Jehova biro dhi nyime ‘tego kendo rito’ jotichne momakore kode. (2 The. 3:3) Omiyo, wadhiuru nyime hero Jehova, hero Jokristo wetewa, kendo hero jowasikwa bende. Ka waluwo puonjno, wabiro siko ka wamakore kendo ka wan gi winjruok motegno gi Nyasaye. Wabiro miyo nying Jehova duong’, kendo wabiro nyiso ni kuom adier, hera nigi teko moloyo sigu.