1-2. Ang’o ma timorega sama ibatiso ji, to en ang’o monego iket e paro?

 BE ISAGANENO joma ochung’ kidwaro dhi batisgi? Niwinjo kaka ne gidwoko penjo ariyo ma nopenjgi ka gin gi chir. Nineno kaka joodgi gi osiepegi ne mor ahinya. Sama ne giwuok e pi kosebatisgi, niwinjo kaka ji nopamo gi mor. Juma ka juma, ibatisoga ji alufe modhuro mondo gibed Joneno mag Jehova.

² To nade in? Ka po ni isechako paro ka be inyalo batisi, ng’e ni in ng’at makende ahinya e piny marachni nikech mano nyiso ni ‘imanyo Jehova.’ (Zab. 14:1, 2) In e ma olosni sulani bed ni pod itin, kata ka in ng’at maduong’. To kata mana wan mosebatiswa, dwarore ni wamed tego yiewa kod yiero ma wasetimo mar tiyo ne Jehova nyaka chieng’. Omiyo, wanonuru ane weche moko adek madongo momiyo watiyoga ne Jehova.

3. Ang’o momiyo jotich Jehova ohero adiera kod gik makare? (Zaburi 119:128, 163)

³ Jehova nochiko jotichne ni ‘giher adiera.’ (Zek. 8:19) Yesu nojiwo jolupne ni gimany gik makare. (Mat. 5:6) Mano nyiso ni ng’ato onego obed gi gombo mar timo gik makare, mabeyo, kendo maler e wang’ Nyasaye. Be ihero adiera kod gik makare? Wan gadier ni en kamano. Isin gi miriambo kod gik maricho duto. (Som Zaburi 119:128, 163.) Jomiriambo luwo ranyisi mar Satan ma e jaloch mar pinyni. (Joh. 8:44; 12:31) Achiel kuom gik ma Satan dwaroga ahinya, en ketho nying maler mar Jehova Nyasaye. Chakre ne ng’anyo timre e puodho mar Eden, Satan osebedo ka lando miriambo maricho e wi  Jehova Nyasachwa. Nowacho ni Jehova en Nyasaye ma tuono dhano gik mabeyo, kendo ni en Jaloch ma jamiriambo. (Cha. 3:1, 4, 5) Miriambo ma Satan wacho e wi Jehova osemiyo ji mang’eny opar ni Jehova en ng’at marach. Sama ji otamore ‘hero adiera,’ Satan nyalo miyo gitim gik ma ok kare kendo maricho ahinya.—Rumi 1:25-31.

4. Ere kaka Jehova osenyiso ni en “Nyasach adiera”? (Ne picha bende.)

⁴ Jehova en “Nyasach adiera,” kendo opuonjo ng’ato ang’ata mohere adierago. (Zab. 31:5) Kuom timo kamano, okonyogi mondo Satan kik wuondgi. Bende, Jehova puonjo jotichne mondo gibed joratiro kendo joma kare. Mano miyo gibedo joma igeno kendo joma chunygi okuwe. (Nge. 13:5, 6) Be iseneno kaka Jehova timoni kamano sama idhi nyime puonjori Muma? Puonjruok Muma osemiyo ifwenyo ni yore mag Jehova beyo, kendo e ma dhano duto onego oluw, moriwo nyaka in. (Zab. 77:13) Mano e momiyo iseng’ado ni idwaro luwo chike makare mag Jehova. (Mat. 6:33) Diher siro adiera mondo ikony e nyiso ni weche ma Satan osebedo ka wacho e wi Jehova Nyasachwa gin miriambo. Ere kaka inyalo timo mano?

5. Ere kaka inyalo nyiso ni isiro adiera kod gik makare?

⁵ Inyalo yiero dak e kit ngima ma nyiso maler ni ikwedo miriambo mag Satan, ni imakori motegno gi adiera, ni diher mondo Jehova e ma obed Jalochni, kendo ni idwaro siko kitimo gik makare. Ere kaka inyalo timo mano? En kuom lamo kisingori ne Jehova ni ibiro tiyone nyaka chieng’, kae to inyis singruokni e lela kokalo kuom batiso. Hero adiera kod gik makare biro chwali mondo obatisi.

6. Gin weche mage ma yudore e Zaburi 45:4 ma miyo ihero Yesu Kristo?

⁶ Ang’o momiyo ihero Yesu Kristo? Ne ane weche moko minyisowa e Zaburi 45:4. (Som.) Yesu kedo ne adiera, bolruok, kod tim makare. Ka ihero adiera kod tim makare, ibiro hero Yesu Kristo bende. Par ane kaka Yesu nonyiso chir e kedo ne adiera kod gik makare. (Joh. 18:37) Kata kamano, ere kaka Yesu kedo ne kido mar bolruok?

7. Ang’o ma mori kuom yo ma Yesu bolorego?

⁷ Yesu jiwo kido mar bolruok kuom ketonwa ranyisi maber. Par ane kaka wechege ne miyoga Wuon-gi duong’, to ok en. (Mar. 10:17, 18; Joh. 5:19) Iwinjoga nade e chunyi sama ineno kaka Yesu nyiso ni obolore? Donge mano jiwi mondo iher Wuod Nyasaye kendo iluwe? Ee, en kamano. Ang’o momiyo Yesu obolore? En nikech ohero Wuon-gi kendo oluwo ranyisine. (Zab. 18:35; Hib. 1:3) Donge iwinjo kihero Yesu ma e jal ma nyiso kido mag Jehova e yo makare chuth?

8. Ang’o momiyo wahero Yesu ma en Ruodhwa?

⁸ Wahero Yesu ma en Ruodhwa nikech en e Ruoth maberie mogik. Jehova owuon e ma notiego Wuode kendo kete mondo obed Ruoth. (Isa. 50:4, 5) Par ane bende kaka Yesu osenyiso hera e okang’ malach. (Joh. 13:1) Dwarore ahinya ni iher Yesu ma en Ruodhi. Nowacho ni osiepene madier nyiso ni gihere kuom luwo chikene. (Joh. 14:15; 15:14, 15) Parie ni inyalo bedo osiep Wuod Nyasaye. To mano doko wach maber!

9. Batiso mar jolup Yesu chalre e yo mane gi batiso mare?

⁹ Achiel kuom chike Yesu en ni jolupne nyaka batisi. (Mat. 28:19, 20) En bende noketo ranyisi e wachno. Nitie yore moko ma batiso mare opogoree gi batiso mar jolupne. (Ne sanduk ma wacho ni, “ Pogruok Mantie e Kind Batiso mar Yesu kod mar Jolupne.”) Kata kamano, nitie gik ma gichalree. Ka nobatis Yesu, nonyiso ni noikore timo dwach Jehova. (Hib. 10:7) Kamano bende, sama obatis jolup Kristo ginyiso e lela ni gisechiwore mondo giti ne Jehova Nyasaye. Dwach Jehova e ma koro giketo motelo to ok dwachgi giwegi. Kuom timo kamano giluwo ranyisi mar Yesu ma en Ruodhgi.

10. Ang’o momiyo hera ma iherogo Yesu onego ochwali mondo obatisi?

¹⁰ Iseyie ni Yesu e Wuod Nyasaye ma miderma kendo ni en e Ruoth ma Nyasaye oseketo mondo obed jaloch. Ineno Yesu kaka jaloch mobolore mana ka Wuon mare. Isepuonjori ni nopidho joma ne nigi kech, nohoyo joma chunygi nonyosore, kendo nochango jotuo. (Mat. 14:14-21) Iseneno kaka otayo kanyakla mar Jokristo e kindewagi. (Mat. 23:10) Bende, ing’eyo ni obiro timo gik mabeyo ahinya e kinde mabiro kaka Ruoth e Pinyruodh Nyasaye. Ere kaka inyalo nyiso ni ihere? En kuom luwo ranyisine. (Joh. 14:21) Inyalo chako timo mano kuom chiwo ngimani ne Jehova kendo nyiso chiwruokni e batiso.

11. Wach maduong’ mogik momiyo ibatiso Jokristo en mane, to ang’o momiyo en kamano?

¹¹ Wach maduong’ mogik momiyo ibatiso Jokristo en mane? Yesu nofwenyonwa chik maduong’ mogik kuom chike Nyasaye, ka nowacho kama: “Nyaka iher Jehova Nyasachi gi chunyi duto, gi ngimani duto, gi pachi duto, kendo gi tekoni duto.” (Mar. 12:30) Be mano e kaka ihero Nyasaye?

12. Ang’o momiyo ihero Jehova? (Ne picha bende.)

¹² Nitie gik mang’eny momiyo ihero Jehova. Kuom ranyisi, isepuonjori ming’eyo ni en e “soko mar ngima” kendo Jachiw “mich mabeyo duto gi chiwo malong’o.” (Zab. 36:9; Jak. 1:17) Mich mabeyo duto a kuom Nyasachwa ma jahera kendo ma jachiwo.

13. Ang’o momiyo misango mar rawar en mich maduong’ ahinya?

¹³ Rawar en mich maduong’ ahinya ma Nyasaye osemiyowa. Ang’o momiyo wanyalo wacho kamano? Par ane osiep manie kind Jehova gi Wuode. Yesu nowacho kama: “Wuora ohera” kendo ni “ahero Wuora.” (Joh. 10:17; 14:31) Kaka ne gimedo dak kuom higni bilionde modhuro, e kaka osiep ma ne nie kindgi nomedo bedo motegno. (Nge. 8:22, 23, 30) Koro parie kaka Jehova nowinjo, ka noyie mondo Wuode osand kendo otho malit. Jehova ohero dhano moriwo nyaka in e okang’ malach ahinya. Mano nomiyo ochiwo Wuode ma miderma kaka misango mondo in kaachiel gi jomamoko uyud ngima ma nyaka chieng’. (Joh. 3:16; Gal. 2:20) Mano e wach maduong’ mogik momiyo ihero Nyasaye.

14. En yiero mane maberie mogik minyalo timo e ngimani?

¹⁴ Hera miherogo Jehova osebedo ka medore kaka imedo puonjori weche mathoth kuome. Kuom adier, idwaro medo sudo machiegni kode sani kendo nyaka chieng’. To mano en gima nyalore. Jehova dwaro ni itim yiero ma biro moro chunye. (Nge. 23:15, 16) Inyalo timo mano kokalo kuom wecheni kod  timbeni. Kit ngimani e ma biro nyiso ka be ihero Jehova gadier. (1 Joh. 5:3) Mano e yiero maberie mogik minyalo timo e ngimani.

15. Ere kaka inyalo nyiso ni ihero Jehova?

¹⁵ Ere kaka inyalo nyiso ni ihero Jehova? Mokwongo, onego iwuo gi Jehova e lamo kisingori ni diher chiwori tiyone nyaka chieng’. (Zab. 40:8) Kae to, onego inyis chiwruokni e lela kokalo kuom batiso. Mana kaka ne wasewacho motelo e sulani, mano en okang’ maduong’ ahinya e ngimani, kendo ma kelo mor mogundho. Sama obatisi, ichako ngima manyien, kendo koro dwach Jehova e ma iketo motelo ne dwachi. (Rumi 14:8; 1 Pet. 4:1, 2) Mano nyalo nenore ka okang’ maduong’ ahinya, to adier, en kamano. Kata kamano, oyawoni yor ngima maberie mogik. E yo mane?

16. Mana kaka onyis e Zaburi 41:12, ere kaka Jehova biro guedho joma ochiwore tiyone?

¹⁶ Jehova e Jachiwo moloyo ji duto. Kata imiye gik mang’eny ma romo nade, obiro miyi gik mang’eny moloyo mago. (Mar. 10:29, 30) Obiro miyi ngima mopong’ gi mor kod gueth, kata mana e piny marachni, to mano en mana chakruok. Wuoth michako gi Jehova bang’ batiso en wuoth ma onge giko. Inyalo tiyo ne Wuonu ma jahera nyaka chieng’. Hera manie kindi gi Wuonu biro dhi nyime bedo motegno, kendo ibiro dak kuom higni duto ma Jehova biro betie, tiende ni nyaka chieng’.—Som Zaburi 41:12.

17. En ang’o ma in iwuon e ma inyalo miyo Jehova?

¹⁷ Sama ichiwori ne Jehova mobatisi, iyudo thuolo mar miyo Wuonu gimoro ma jaber ahinya. Jehova osemiyi gik mabeyo duto ma nyalo miyo ibed ma mor. In bende sama isingori ni ibiro tiyone, ng’e ni imiye gima in iwuon e ma inyalo miye. (Ayub 1:8; 41:11; Nge. 27:11) To adier, be nitie yo machielo ma di tigo gi ngimani ma loyo mano? Onge kiawa ni hera miherogo Jehova e wach maduong’ ma biro chwali mondo obatisi.

18. Gin penjo mage minyalo penjori?

¹⁸ Koro, inyalo dwoko penjoni nade, Be ibiro batisi? In iwuon e ma inyalo dwoko penjono. Nyalo bedo maber kipenjori kama, ‘Ang’o ma pod arito?’ (Tich 8:36) Par weche adek ma wasewuoyoe monego ochwali mondo obatisi. Mokwongo, ihero adiera kod gik makare. Penjri kama, ‘Be agombo neno kinde ma ji duto e piny ngima biro wacho adiera kendo timo gik makare?’ Mar ariyo, ihero Yesu Kristo. Penjri kama, ‘Be adwaro ni Wuod Nyasaye e ma obed Ruodha kendo aluw ranyisine?’ Mar adek maduong’ie moloyo, en ni ihero Jehova. Penjri kama, ‘Be adwaro moro chuny Jehova kuom tiyone kaka Nyasacha?’ Ka po ni idwoko penjogo duto ni ee, kare ang’o momiyo pok obatisi? Ang’o ma pod irito?—Tich 16:33.

19. Ang’o momiyo ok onego iluor batiso? Chiw ane ranyisi. (Johana 4:34)

¹⁹ Ka po ni pod iluor kawo okang’ mar batiso, par ane ranyisi ma Yesu notiyogo. (Som Johana 4:34.) Yesu nopimo timo dwach Wuon-gi gi chiemo. Nikech ang’o? En nikech chiemo konyoga dendwa. Yesu nong’eyo ni gimoro amora ma Jehova nyisowa ni watim konyowa. Jehova ok diher ni watim gimoro amora ma nyalo hinyowa. Be Jehova dwaro ni obatisi? Ee. (Tich 2:38) Kuom mano, inyalo bedo gadier chuth ni kiluwo chikne ma dwaro ni mondo obatisi, ibiro yudo gueth mang’eny. Ka ok iluoroga chamo chiemo moro mamit, ang’o ma dimi iluor batiso?

20. Ang’o ma wabiro nono e sula ma luwo?

²⁰ Ang’o momiyo jomoko ritoga ahinya ka pok obatisgi? Ji mang’eny nyalo dwoko penjono ni, “Pok aikora.” Adiera en ni yiero mar chiwori ne Jehova ma batisi, e yiero maduong’ mogik minyalo timo. Omiyo, dwarore ni ng’ato okaw thuolo mondo opar matut kendo otim gik ma dwarore ka pok okawo okang’ ma kamano. To ka kuom adier idwaro kawo okang’ ma kamano, ang’o minyalo timo sani mondo iikri? Wabiro nono dwoko mar penjono e sula ma luwo.