1-2. Ka po ni gie sani pok iikori ne batiso, ang’o momiyo chunyi ok onego onyosre? (Ne picha manie nyim gaset.)

 BE IGOMBO ni obatisi? Mano en wach maber ahinya. To be iseikori maber ne batiso? Ka en kamano, kendo jodongo bende oseyie gi wachno, tem matek mondo kik thuolo ma luwo mar batiso obayi. Kitimo kamano, to Jehova biro guedhi ahinya.

² To komachielo, dibed ni osenyisi ni itim dongruok e weche moko e ka ichop e batiso? Koso in iwuon e ma isefwenyo ni nitie lokruok moko ma dwarore ni itim komondi? Ka en kamano, kik chunyi nyosre. Inyalo timo dongruok michop e batiso, bed ni pod itin kata isebedo ng’ama duong’.

3. Ang’o ma jatelo moro ma Ja-Ethiopia nopenjo Filipo, to mano miyo wapenjore penjo mane? (Tich Joote 8:36, 38)

³ Som Tich Joote 8:36, 38. Jatelo moro ma Ja-Ethiopia nopenjo Filipo jayal-injili kama: “Be nitie gima dimi kik batisa? ” Ja-Ethiopiano ne gombo ahinya mondo obatise, kata kamano, be noikore kawo okang’ maduong’no?

4. Ere kaka Ja-Ethiopia nonyiso ni nodwaro puonjore gik matut?

⁴ Ja-Ethiopiano “ne odhi Jerusalem mondo olem.” (Tich 8:27) Mano nyiso ni nyaka bed ni nosedonjo e din mar Jo-Yahudi. Onge kiawa ni nosepuonjore weche moko e wi Jehova kokalo kuom Ndiko mag Dho-Hibrania. To pod nogombo puonjore weche momedore. Kuom adier, Filipo noyudo Ja-Ethiopiano ka timo ang’o sama nodhi ire? Nosomo bug janabi Isaya. (Tich 8:28) Mano ne en chiemb chuny motegno. Ja-Ethiopiano ne ok dwar mana ng’eyo puonj mag mise kende, kar mano, nodwaro ni odhi nyime puonjore gik matut.

5. Ang’o ma Ja-Ethiopia notimo gi adiera ma nopuonjore?

⁵ Ja-Ethiopiano ne en jatelo maduong’ e bwo Kandes ruoth ma dhako mar Ethiopia, kendo “ne ochung’ ne mwandu duto mag ruodhno.” (Tich 8:27) Omiyo, nyaka bed ni ne en ng’at modich ahinya. To e ma pod nokawoga thuolo mondo olam Jehova. Puonjruok adiera kende ne ok orome; nodwaro ni oti gi gik ma nopuonjorego. Mano e momiyo nomako wuoth mabor koa Ethiopia mondo odhi olam Jehova e hekalu ma ne ni Jerusalem. Wuoth ma kamano ne dwaro thuolo malach kod pesa mang’eny. Kata kamano, Ja-Ethiopiano ne ok oyie mondo gik ma kamago omone lamo Jehova.

6-7. Ere kaka hera ma Ja-Ethiopiano noherogo Jehova nomedo bedo motegno?

⁶ Filipo nopuonjo Ja-Ethiopiano adiera moko manyien, kendo nokonye bende fwenyo ni Yesu e ma ne en Mesia. (Tich 8:34, 35) Ka nofwenyo gima Yesu nosetimone, wachno nomulo chunye ahinya. Nodhi kawo okang’ mane? Nonyalo yiero dhi adhiya nyime gi ngimane kaka ng’at ma nosedonjo e din mar Jo-Yahudi. Kata kamano, hera ma noherogo Jehova kod Wuode nomedo bedo motegno. Hera ma kamano nochwale mondo okaw okang’ maduong’ mar batiso mondo obed jalup Yesu Kristo. Filipo nofwenyo wachno, omiyo, nobatise.

⁷ Ranyisi mar Ja-Ethiopiano nyalo konyi ikori ne batiso. In bende inyalo penjori gi chir niya: “Be nitie gima dimi kik batisa? ” We wanon ane kaka inyalo kawo okenge moko adek ma Ja-Ethiopiano nokawo, ma gin: Nodhi nyime puonjore, notiyo gi gik ma nopuonjore, kendo nomedo hero Nyasaye.

8. Ka luwore gi Johana 17:3, en ang’o monego idhi nyime timo?

⁸ Som Johana 17:3. Dibed ni weche ma Yesu nowachogo e ma nojiwi mondo iyie puonjori Muma? Mano e gima notimore ne thothwa. To be wechego jiwowa ni wadhi nyime puonjore? En kamano. Onge chieng’ ma wanachop kama koro ‘wang’eyo Nyasaye madier’ e okang’ malong’o chuth. (Ekl. 3:11) Kar mano, wabiro dhi nyime puonjore tijene nyaka chieng’. Kaka wamedo puonjore e wi Jehova, e kaka wamedo sudo machiegni kode.—Zab. 73:28.

9. Ang’o monego watim ka waseng’eyo puonj mag mise mag adiera?

⁹ En adier ni sama wadwaro ng’eyo Jehova, nyaka wachakga gi puonj mag  mise. E barua ma jaote Paulo nondiko ne Jo-Hibrania, noluongo puonj michako ng’ego Jehova ni “puonj mag mise.” Mano ok nyis ni nojaro puonjgo. Kar mano, nopimogi gi chak ma miyo nyathi matin dongo maber. (Hib. 5:12; 6:1) Kata kamano, nojiwo Jokristo ni kik gisik mana e puonj mag misego, to kar mano, gidhi nyime puonjore adiera matut mag Wach Nyasaye. Be in gi riyo mar ng’eyo puonj matut mag Muma? Be iikori puonjori weche momedore mondo imed ng’eyo Jehova kod dwache?

10. Ang’o momiyo ji mang’eny ok oheroga puonjruok?

¹⁰ Ji mang’eny ok oheroga puonjruok. To nade in? E kinde ma ne idhi skul, be nokonyi ng’eyo somo kendo timo puonjruok? Be somo kod puonjruok ne moriga ahinya? Koso ning’ado ni in ok iber e puonjruok mitimo kitiyo gi buge? Ka en kamano, ng’e ni nitie ji mang’eny ma bende chal kodi. Kata kamano, Jehova oikore konyi. En e Japuonj maberie mogik minyalo bedogo.

11. Jehova osenyiso nade ni en e “Japuonjni Maduong’ ”?

¹¹ Jehova owuon wacho ni en “Japuonjni Maduong’.” (Isa. 30:20, 21) En Japuonj mang’won, ma hore, kendo mong’eyo jopuonjrene e yo maber. Odich ahinya-ahinya gi gik mabeyo ma jopuonjrene timo. (Zab. 130:3) Ok odwar ni watim gik mohingo tekrewa. Ng’e ni en e ma nochueyo obwongoni, ma en mich malich miwuoro. (Zab. 139:14) Nochueyowa gi gombo mar puonjore. Jachuechwa diher ni wadhi nyime puonjore nyaka chieng’ kendo wayud mor e timo kamano. Omiyo, ‘bedo gi gombo’ mar puonjruok adiera mag Muma en gima nyiso rieko. (1 Pet. 2:2) Ket chenro mag gik moko sie ma diher timo e tij Nyasaye. Tem matek mondo isom Muma kendo timo puonjruok ma ok ibari. (Jos. 1:8) Jehova biro guedho kinda mitimo ma chop kama koro somo kod puonjruok wechene biro medo bedoni mamit.

12. Ang’o momiyo onego wapar matut kuom ngima Yesu kod tije mar yalo sama wapuonjore?

¹² Kinde ka kinde, kaw thuolo mar paro matut e wi ngima Yesu kod tije mar yalo. Luwo ondamo mage machiegni biro konyowa dhi nyime tiyo ne Jehova, to ahinya-ahinya e kinde matekgi. (1 Pet. 2:21) Yesu nowacho ayanga ni jolupne ne dhi romo gi pek moko. (Luka 14:27, 28) Kata kamano, nonyiso ni en gadier ni jolupne madier ne dhi loyo pekgo mana kaka en bende noloyogi. (Joh. 16:33) Puonjri weche mathoth e wi ngima Yesu kendo ibed gi gik ma diher timo kiluwo ranyisi mare e ngimani mapile.

13. Ang’o monego isik kikwayo Jehova, to nikech ang’o?

¹³ Ng’eyo adiera kende ok oromo. Dwarore ni adierago okonyi ng’eyo weche momedore e wi Jehova, ihere, kendo ibed gi yie kuome. (1 Kor. 8:1-3) Sama idhi nyime puonjori, sik kikwayo Jehova mondo okonyi bedo gi yie momedore. (Luka 17:5) Odwokoga lamo ma kamago. Yie madier motenore kuom ng’eyo Nyasaye e yo makare biro konyi mondo itim dongruok.—Jak. 2:26.

14. Jaote Petro nojiwo nade gimomiyo dwarore ni wati gi gik ma wapuonjore? (Ne picha bende.)

¹⁴ Jaote Petro nonyiso gimomiyo dwarore ahinya ni jolup Kristo oti gi gik ma  gipuonjore. Notiyo gi ranyisi mar gik ma notimore e ndalo Noa. Jehova nonyiso Noa ni nodhi ketho piny marach e kindeno kotiyo gi ataro. Ng’eyo ang’eyo ni ataro ne biro ne ok oromo reso Noa gi joode. Ne ni Petro nowuoyo kuom gik ma notimore ka ne pok Ataro obiro, tiende ni, “sa ma ne igero yie.” (1 Pet. 3:20) Ee, Noa gi joode notiyo gi gik ma Nyasaye nopuonjogi mi gigero yie maduong’. (Hib. 11:7) Kae to Petro nopimo gima Noa notimo gi batiso ka nondiko niya: “Batiso, ma en gima chalo gi mano bende resou gie sani.” (1 Pet. 3:21) Wanyalo pimo kinda mitimo sani mondo ichop e batiso gi kinda ma Noa gi joode notimo kuom higni mang’eny e gero yie. Ang’o ma dwarore ni itim mondo iikri ne batiso?

15. Loko chuny gadier oriwo timo ang’o?

¹⁵ Achiel kuom gik ma nyaka watim en loko chunywa mondo owenwa richowa. (Tich 2:37, 38) Loko chunywa gadier biro miyo watim lokruoge ma dwarore e ngimawa e yo makare. Be iseweyo timbe maricho ma ok mor Jehova kaka terruok, madho ndawa, kata ayany? (1 Kor. 6:9, 10; 2 Kor. 7:1; Efe. 4:29) Ka po ni pok itimo lokruoge ma dwarore, dhi nyime kedo matek. Wuo gi japuonjni mar Muma kata jodong-kanyakla mondo gikonyi sama itemo matek mondo ilok kit ngimani. Ka po ni in rawera kendo idak gi jonyuolni, sik kikwayogi mondo gikonyi weyo timbe maricho ma nyalo moni chopo e batiso.

16. Bedo gi chenro maber mar timo gik motudore gi lamo oriwo ang’o?

¹⁶ Dwarore bende ni ibed gi chenro maber mar timo gik motudore gi lamo. Mano oriwo dhi e chokruoge kendo chiwo paro e chokruogego. (Hib. 10:24, 25) Bende, dwarore ni idhi e tij lendo ka po ni osepwodhi mondo ilend gi kanyakla. Kaka imedo timo kinda e tij lendo, e kaka ibiro yudo ka lendo mitni ahinya. (2 Tim. 4:5) Ka po ni in rawera kendo idak gi jonyuolni, penjri kama: ‘Be jonyuolna e ma paronaga ni onego adhi e chokruok kod e tij lendo? Koso akawoga okengego an awuon? ’ Kuom kawo  okenge ma kamago in iwuon, inyiso ni in gi yie kuom Jehova, ihere, kendo imor gi gik mabeyo mosetimoni. Mago gin ‘timbe ma nyiso ni iluoro Nyasaye,’ ee, gin mich mimiyo Jehova. (2 Pet. 3:11; Hib. 13:15) Jehova mor gi mich ma wamiye ma onge ng’ama ochunowa. (Pim gi 2 Jo-Korintho 9:7.) Wakawoga okenge ma dwarore nikech wang’eyo ni timo duto ma wanyalo e tij Jehova kelonwaga mor.

17-18. Ang’o ma biro konyi mondo itim dongruok michop e batiso, to nikech ang’o? (Ngeche 3:3-6)

¹⁷ Sama idhi nyime timo dongruok mondo ichop e batiso, ibiro romo gi pek moko. Nitie joma biro jari nikech yieni manyien; ginyalo kata mana kwedi kendo sandi. (2 Tim. 3:12) Sama itemo matek mondo iwe tim moro marach, dichiel ka dichiel pod inyaloga kier midog e timno. Kata, chunyi nyalo chako jok nikech ineno ni chopo e batiso pod otami. Ang’o ma biro konyi mondo idhi nyime nano? En hero Jehova.

¹⁸ Hero Jehova e gima ber mogik minyalo timo. (Som Ngeche 3:3-6.) Herano biro konyi nyagori maber sama iromo gi pek moko. Muma wacho ni Jehova ohero jotichne gi hera mosiko. Mano en hera motegno ma ok dog chien kendo ma ok jogi. (Zab. 100:5) Nochueyi e kido mar Nyasaye. (Cha. 1:26) Omiyo, ere kaka in bende inyalo bedo gi hera ma kamano?

19. Ere kaka inyalo medo nyiso ni igoyo erokamano kuom gik moko duto ma Jehova osetimoni? (Jo-Galatia 2:20)

¹⁹ Mokwongo, bed gi chuny mar goyo erokamano. (1 The. 5:18) Pile ka pile penjri kama: ‘Ere kaka Jehova osenyiso ni ohera? ’ Kae to lam Jehova kigoyone erokamano achiel kachiel kuom gik mosetimoni. Mana kaka jaote Paulo, tem mondo ine yore ma Jehova nyisogo herane kaka gik motimoni in iwuon. (Som Jo-Galatia 2:20.) Penjri kama: ‘Be agombo nyise ni an bende ahere? ’ Hera miherogo Jehova biro konyi mondo idhi nyime kwedo tembe, kendo nyagori maber gi pek miromogo. Hera ma kamano biro konyi mondo imakri gi chenro miseketo mar gik motudore gi lamo mondo isik kinyiso Wuonu manie polo pile ka pile ni ihere.

20. Chiwruok ne Jehova oriwo timo ang’o, to ang’o momiyo mano en yiero maduong’?

 ²⁰ Mosmos, hera miherogo Jehova biro chwali mondo iwuo kode e lamo kisingorine ni ibiro tiyone nyaka chieng’. Ng’e ni kisechiwori ne Jehova, to koro in gi thuolo mar bedo jatichne nyaka chieng’. Singruok mitimo sama ichiwori ne Jehova en gima biro siko ma kata weche tek manade. En gima itimo dichiel ma ok nwo kendo. En adier ni yiero mar chiwruok ne Jehova en yiero maduong’. Kata kamano, par ane wachni: Ibiroga timo yiero mang’eny e ngimani ma moko kuomgi beyo ndi. Kata kamano, onge yiero moro amora maber ma loyo yiero mar chiwruok ne Jehova. (Zab. 50:14) Satan biro temo dwoki chien mondo iwe hero Wuonu manie polo kogeno ni ibiro weyo bedo ng’at matir. Kik iyiene! (Ayub 27:5) Hera motegno miherogo Jehova biro konyi mondo idhi nyime dak ka luwore gi chiwruokni kendo imed sudo machiegni gi Wuonu manie polo.

21. Ang’o momiyo wanyalo wacho ni batiso ok en giko wuoth, to kar mano en mana chakruok?

²¹ Bang’ ka isechiwori ne Jehova e lamo, nyis jodong-kanyaklau gombo ma in-go mar batiso. Kata kamano, par kinde duto ni batiso ok en giko wuoth, to en mana chakruok. En chakruok mar ngima mar tiyo ne Jehova. Omiyo, med tego hera miherogo Jehova Wuonu sani. Bed gi chenro mar gik midwaro timo e tij Nyasaye mondo hera miherego omed dongo pile ka pile. Chenro ma kamago biro miyo ichop e batiso. To mano kaka odiechiengi mar batiso biro bedo odiechieng’ makende! Kata kamano, en mana chakruok. Mad hera miherogo Jehova kod Wuode odhi nyime dongo nyaka chieng’!