SULA MAR PUONJRUOK 14
“Ma e ma Nomi Ji Duto Ong’e ni Un Jopuonjrena”
“Ma e ma nomi ji duto ong’e ni un jopuonjrena ka un gi hera e kindu uwegi.”—JOH. 13:35.
WER 106 Wanyag Kido mar Hera
GIMA SULANI WUOYE a
Ere kaka hera manie kind jotich Jehova osemulo chuny ji mang’eny? (Ne paragraf 1)
1. En ang’o ma thoth ji fwenyoga sama gihango biro e chokruogewa? (Ne picha bende.)
TEMIE paro dichwo moro gi jaode ma e ka ohango biro e chokruok mitimo e Od Romo mar Joneno mag Jehova. Giwinjo maber ahinya sama owete gi nyimine mopogore opogore rwakogi gi mor kendo gineno kaka gin gi hera madier e kindgi. Sama gin e yo ka giwuok e chokruogno, dhakono nyiso jaode niya: ‘Joneno mag Jehova opogore ahinya gi dinde mamoko, kendo awinjo ka amor bedo kodgi.’
2. En ang’o mosechwanyo jomamoko mi giweyo tiyo ne Jehova?
2 Hera manie kanyakla mar Jokristo en hera makende. En adier ni Joneno mag Jehova bende gin joma orem. (1 Joh. 1:8) Omiyo, kaka wamedo ng’eyo owete gi nyimine ma wan-go e kanyakla, e kaka wabiro medo neno nyawogi. (Rumi 3:23) Gima lit en ni nitie joma oseyie mondo nyawo mag jomamoko omi giwe tiyo ne Jehova.
3. En kido mane mifwenyogo Jokristo madier? (Johana 13:34, 35)
3 Ne ane kendo ndiko ma tayo sulani. (Som Johana 13:34, 35.) En kido mane mifwenyogago jolup Yesu madier? En hera, to ok bedo joma kare chuth. Ne ni Yesu ne ok owacho ni, ‘Ma e ma nomi ung’e ni un jopuonjrena.’ To nowacho ni, “Ma e ma nomi ji duto ong’e ni un jopuonjrena.” Omiyo, Yesu nonyiso ni jolupne kende ok e ma ne dhi fwenyo ni gin e Jokristo madier, to kata mana joma ok gin jolupne bende ne dhi fwenyo mano kokalo kuom hera ma Jokristo madiergo nyiso e kindgi.
4. Ang’o ma jomamoko nyalo dwaro ng’eyo e wi Jokristo madier?
4 Jomoko ma ok gin Joneno mag Jehova nyalo penjore niya: ‘Ere kaka hera fwenyoga jolup Yesu madier? Ere kaka Yesu nonyiso jootene hera? Ere kaka wanyalo luwo ranyisi mar Yesu e kindegi? ’ Joneno mag Jehova bende onego opar matut kuom dwoko mag penjogo. Timo kamano nyalo konyowa medo nyiso hera, to moloyo sama Jakristo wadwa moro ochwanyowa.—Efe. 5:2.
ANG’O MOMIYO HERA E KIDO MAKENDE MIFWENYOGO JOLUP YESU MADIER?
5. Ler ane tiend weche ma Yesu nowacho e Johana 15:12, 13.
5 Yesu nonyiso maler ni nitie kit hera moro makende ma nidhi fwenygo jolupne madier. (Som Johana 15:12, 13.) Nonyiso jolupne niya: “Uherru ng’ato gi ng’ato mana kaka aseherou.” Mano tiende ang’o? Yesu nodhi nyime leronegi tiend hera mar tuonruok, tiende ni hera ma nyalo chwalo Jakristo moro mondo otho ne Jakristo wadgi. b
6. Ere kaka Muma jiwoga ahinya kido mar hera?
6 Wach Nyasaye jiwo ahinya kido mar hera. Ji mang’eny oheroga ndiko ma wuoyo e wi hera kaka ma luwogi: “Nyasaye en hera.” (1 Joh. 4:8) “Nyaka iher wadu kaka iherori iwuon.” (Mat. 22:39) “Hera umo richo mogundho.” (1 Pet. 4:8) “Hera ok rem ngang’.” (1 Kor. 13:8) Ndikogo kaachiel gi ndiko mamoko nyiso maler gimomiyo ng’ato ka ng’ato onego otem nyiso kido ma jaberno.
7. Ang’o momiyo Satan ok nyal loso riwruok mar joma oherore gadier?
7 Thoth ji penjorega niya: ‘Ere kaka wanyalo ng’eyo din madier? Dinde duto wacho ni gipuonjo adiera, kata kamano, moro ka moro puonjo gik mopogore e wi Nyasaye.’ Satan osechocho pach ji mang’eny kuom kelo dinde mag miriambo. Kata kamano, Satan ok nyal loso riwruok mar owete e piny ngima moherore gadier. Jehova kende e ma nyalo loso riwruok ma kamano. Mano nyalore nikech hera madier wuok kuom Jehova, kendo mana joma nigi rohone maler kod guethge e ma nyalo herore gadier. (1 Joh. 4:7) Donge inyalo neno gimomiyo Yesu nowacho ni hera madier e ma ne idhi fwenygo jolupne?
8-9. Ere kaka hera man e kind Joneno mag Jehova osemulo chuny joma opogore opogore?
8 Mana kaka Yesu nokoro, ji mang’eny osefwenyo din madier nikech hera ma joma nie dinno nyiso. Kuom ranyisi, owadwa moro miluongo ni Ian pod paro maber kaka weche ne chalo e chokruok maduong’ ma nohango dhiye e stadiam moro ma ne ni but odgi. Dweche moko matin ka pok ne Ian odhi e chokruogno, noyudo odhi e stadiamno mondo one tugo moro ma nitugo kanyo. Owacho kama: “Ne nitie pogruok maduong’ ahinya. Joneno mag Jehova ne ng’won, ne girwakore maber, kendo nyithindgi bende ne nigi timbe mabeyo.” Omedo wacho niya: “E wi mago duto, ne nenore maber ni Joneno ne nigi mor madier kod kuwe, kendo mago e kido ma nasegombo ahinya bedogo. Ok anyal paro twege ma nogol chieng’no, kata kamano, pod anyalo paro kido mabeyo ma Jonenogo ne nigo.” c Wan gi kido mabeyogo nikech hera madier ma wan-go e kindwa. Nikech wahero owetewa gi nyiminewa, wanyisogiga ng’wono kod luor.
9 Owadwa moro miluongo ni John bende pod nyalo paro kaka weche ne chalo e chokruok mokwongo mar kanyakla ma nohango dhiye. Owacho kama: “Osiep ma ne nitie e kind jogo nomako dhoga . . . mi achako paro ni jogo onge gi richo kendo ne gichalo mana malaike. Hera ma naneno nomiyo abedo gadier ni mano e din madier.” d Weche kaka mago nyiso maler ni Joneno mag Jehova e jolup Yesu madier.
10. Gin kinde mage ma wayudoega thuolo mar nyiso hera madier? (Ne bende weche moler piny.)
10 Mana kaka ne waseneno motelo, Jokristo wetewa bende gin joma orem. Nitie sama ginyalo wacho kata timo gimoro ma nyalo chwanyowa. e (Jak. 3:2) Sama gima kamano otimore, wayudoga thuolo mar nyiso hera ka luwore gi okang’ ma wakawo. Ere kaka wanyalo luwo ranyisi mar Yesu sama Jakristo wadwa moro ochwanyowa?—Joh. 13:15.
ERE KAKA YESU NONYISO JOOTENE HERA?
Yesu nodhi nyime hero jootene kata sama ne ginyiso kido moko maricho (Ne paragraf mar 11-13)
11. Gin kido mage maricho ma Jakobo gi Johana nonyiso? (Ne picha bende.)
11 Yesu ne ok gen ni jolupne ne dhi timo gik moko e yo makare chuth. Nokonyogi golo kido maricho ma ne gin-go mondo Jehova oyie kodgi. Nitie chieng’ moro ma Jakobo kod Johana ma ne gin joote Yesu nooro min-gi ir Yesu mondo okwanegi migepe madongo e Pinyruodhe. (Mat. 20:20, 21) Wachno nonyiso maler ni Jakobo gi Johana ne nigi kido mar sunga kendo ne gimanyo duong’.—Nge. 16:18.
12. Be Jakobo gi Johana kende e ma nonyiso kido maricho? Ler ane.
12 Mopogore gi Jakobo gi Johana, joote mamoko bende nonyiso kido moko maricho chieng’no. Ne ane gima ne gitimo: “Ka jopuonjre apar mamokogo nowinjo wachno, mirima nomakogi gi owete ariyogo.” (Mat. 20:24) Wanyalo temo paro kaka ywaruok ne ger e kind Jakobo gi Johana kod joote mamokogo. Samoro ne gipenjogi gi mirima niya: ‘Uparo ni uloyowa gang’o ma dimi ukwa migepe makende e Pinyruoth? Kik upar ni un kendu e joma osetiyo ne Yesu gi kinda ahinya. Uneno, migepe mukwayogo, wan bende waromo yudogi! ’ Bed mana ni weche ne chalo nade chieng’no, gima rach en ni jootego noyie mondo gima notimoreno ochoch hera kod kuwe ma ne nie kindgi.
13. Ere kaka Yesu ne nenoga nyawo mag jootene? (Mathayo 20:25-28)
13 Yesu notimo ang’o e kinde ma weche ne tekiego? Ne ok oyie mondo mirima omake. Ne ok owacho ni nodhi riembo jootego kendo manyo chwo ma bolore, kendo moherore mondo okaw kar jootenego. Kar mano, Yesu nowuoyo kodgi e yor muolo kod horuok. (Som Mathayo 20:25-28.) Pod nodhi nyime nyisogi hera kata obedo ni jootene to pod ne ywarega e wach manyo duong’.—Mar. 9:34; Luka 22:24.
14. Alwora ma joote Yesu noponie ne chalo nade?
14 Onge kiawa ni Yesu ne ketoga e paro kit ngima ma jootene noponie. (Joh. 2:24, 25) Ne gipon e alwora ma jotend dinde ne jiwo ahinya wach manyo duong’ kod telo. (Mat. 23:6; Pim gi vidio mar The Front Seats in the Synagogue moket e Mathayo 23:6 e study Bible.) Jotend din ma Jo-Yahudi bende ne kawore ka joma kare moloyo jomamoko. f (Luka 18:9-12) Yesu nong’eyo ni pon e alwora kaka mano ne nyalo mulo yo ma jootene ne nenorego kod kaka ne gineno jomamoko. (Nge. 19:11) Nong’eyo gik ma jootene ne nyalo timo kendo iye ne ok owang’ kodgi sama ne giboth. Nong’eyo ni chuny jootene ne ler, omiyo, nohore mokonyogi golo kido kaka sunga kod manyo duong’, mi gibedo joote ma johera.
ERE KAKA WANYALO LUWO RANYISI MAR YESU?
15. Puonj mane ma wayudo kuom gima notimore ne Jakobo gi Johana?
15 Wanyalo puonjore weche mathoth kuom gima notimore ne Jakobo gi Johana. Adier, ne ok gitimo maber ka ne gikwayo mondo omigi migepe madongo e Pinyruoth. Joote mamokogo bende ne ok otimo maber kuom yie mondo wachno oketh winjruok ma ne nitie e kindgi. Kata kamano, Yesu to nonyiso jootenego duto hera kod ng’wono. En puonj mane ma wayudo? Wach maduong’ ok en gima ng’ato otimonwa kata mowacho, to en okang’ ma wakawo sama ng’ato ochwanyowa kata wafwenyo nyawone. Ang’o ma nyalo konyowa kawo okang’ mowinjore? Sama Jakristo wadwa moro ochwanyowa, wanyalo penjore penjogi: ‘Ang’o momiyo gima otimono chanda ahinya? Dibed ni nitie kido moro marach ma an-go ma dwarore ni agol kuoma? Dibed ni ng’at mochwanyano kalo e chandruok moro? Kata ka po ni adier ochwanya, donge anyalo nyise hera madier kuom umo wachno? ’ Kaka wamedo nyiso jomamoko hera, e kaka wamedo nyiso ni wan jolup Yesu madier.
16. Ang’o machielo ma wanyalo puonjore kuom ranyisi ma Yesu noketo?
16 Ranyisi ma Yesu noketo nyiso bende gimomiyo onego watem matek mondo wang’e gik ma jowetewa kaloe. (Nge. 20:5) En adier ni Yesu ne nyalo somo chuny ji. Wan to waonge gi nyalono. Kata kamano, wanyalo hore kendo umo ketho mag owetewa gi nyiminewa. (Efe. 4:1, 2; 1 Pet. 3:8) Yot timo kamano ka wang’eyo kaka ne gipon. Ne ane ranyisi ma luwoni.
17. Ere kaka jarit-alwora moro noyudo mor bang’ temo matek mondo ong’e owadwa moro e yo maber?
17 Owadwa moro ma en jarit-alwora e pinje mag East Africa pod paro gima nokonye hero owadwa moro ma ne ja mirima ahinya. Ang’o ma jarit-alworano notimo? Owacho kama: “Kar temo bedo mabor gi owadwano, ne ang’ado e chunya ni atem ane ng’eye maber.” Mano nokonyo jarit-alworano ng’eyo kaka owadwano nopon kod gimomiyo ne en ja mirima kamano. Jarit-alworano dhi nyime wacho kama: “Bang’ ka naseng’eyo kinda ma owadwano nosetimo mondo obed gi kido mabeyo, kod okenge ma nosekawo e ngimane, namedo here ahinya. Ne obedo osiepna madier.” Adier, sama watemo matek ng’eyo owetewa gi nyiminewa e yo maber, wayudoga ka yotnwa herogi ahinya.
18. Gin penjo mage ma wanyalo penjore ka po ni Jakristo wadwa moro ochwanyowa? (Ngeche 26:20)
18 Nitie sama wanyalo gombo wuoyo gi Jakristo wadwa moro mochwanyowa. Kata kamano, ka pok watimo kamano, ber mondo wapenjre penjo ma luwogi: ‘Be aseng’eyo weche duto ma notimore? ’ (Nge. 18:13) ‘Be dibed ni nochwanya goyiem? ’ (Ekl. 7:20) ‘Dibed ni an bende asegachwanyo ng’ato kamano? ’ (Ekl. 7:21, 22) ‘Dibed wuoyo gi ng’atno biro medo miyo wachni obed wach maduong’ moloyo kaka en sani? ’ (Som Ngeche 26:20.) Sama waparo matut kuom penjo kaka mago, wanyalo ng’ado ni wabiro were gi wachno.
19. En ang’o ming’ado e chunyi?
19 Joneno mag Jehova osebedo ka nyiso ni gin e jolup Yesu madier. Ng’ato ka ng’ato kuomwa nyisoga ni en jalup Yesu madier kuom nyiso Jokristo wetene hera madier kata obedo ni girem. Sama watimo kamano, wanyalo konyo jomamoko fwenyo din madier kendo ginyalo riwore kodwa e lamo Jehova Nyasach hera. Omiyo, wang’aduru e chunywa ni wabiro dhi nyime nyiso hera madier, ma en kido ma ifwenyogo jolup Yesu madier.
WER 17 “Ee, Adwaro”
a Ji mang’eny rwakoga adiera nikech hera madier ma gineno e kindwa. Kata kamano, nikech warem, nitie sama wanyalo yudo ka ok yotnwa nyiso Jakristo wadwa moro hera. Wanonuru ane gimomiyo dwarore ni wanyis hera kod kaka wanyalo luwo ranyisi mar Yesu sama ng’ato ochwanyowa.
c Ne sula ma wacho ni “Hatimaye, Maisha Yangu Yana Kusudi,” e Mnara wa Mlinzi ma Novemba 1, 2012, ite mar 13-14.
d Ne sula ma wacho ni “Maisha Yangu Yalionekana Kuwa Mazuri,” e Mnara wa Mlinzi ma Mei 1, 2012, ite mar 18-19.
e Sulani ok wuo kuom richo madongo ma dwarore ni jodongo onon kaka richo miwuoyoe e 1 Jo-Korintho 6:9, 10.
f Wachore ni higni moko bang’e, rabi moro nowacho niya: “E piny nitie chwo ma kwan-gi ok kal 30 makare ka Ibrahim. Ka en kamano, to kare an gi wuoda wan e kind chwogo; ka gin apar, to an gi wuoda wan ariyo kuomgi; ka gin abich, an gi wuoda wan e kindgi; ka gin ariyo, to kara mano an gi wuoda; to ka en achiel, to mano en an.”
