Ang’o momiyo ng’at ma Muma luongo ni “Ng’ane” nowacho ni ka po ni okendo Ruth to nodhi ‘ketho mwandune owuon’? (Ruth 4:1, 6)

E kinde ma ne indikoe Muma, ka po ni dichwo moro mosekendo ne nyalo tho ka onge nyathi, nitie penjo moko ma ne nyaka dwoki: Ang’o ma ne idhi tim gi puothe? Be nying joode ne dhi lal nono nyaka chieng’? Chike mag Musa ne chiwo dwoko mag penjo kaka mago.

Ang’o ma ne idhi tim gi puoth ng’at motho kata ng’at ma dhier nomiyo ouso puothe? Owadgi ng’at ma kamano kata watne machiegni ne nyalo waro puodhono. Mano ne dhi miyo puodhono odong’ e anyuolagi.—Lawi 25:23-28; Kwan 27:8-11.

Ere kaka anyuola mar ng’atno ne dhi rito nyinge mondo kik lal? Ne gidhi timo mano kuom kawo chiege kendo miyego owadgi jal ma nothono mondo okende, mana kaka notimore ne Ruth. Ng’atno ne dhi kendo chi owadgi kendo ne gidhi nyuolo nyathi ma ne dhi dong’ gi mwandu owadgi ma nosethocha. Chenro ma kamano ne dhi miyo chi liel bende orit maber.—Rap. 25:5-7; Mat. 22:23-28.

Kuom ranyisi, parie gima notimore ne Naomi, ma ne en chi Elimelek. Kata kamano, ka ne Elimelek kod yawuote ariyo otho, koro ne onge ng’at ma ne dhi rite. (Ruth 1:1-5) Ka ne Naomi odok Juda, nonyiso Ruth ma ne en chi wuode mondo okwa Boaz owar puoth Elimelek. Boaz ne en wat Elimelek. (Ruth 2:1, 19, 20; 3:1-4) Kata kamano, Boaz nong’eyo ni nitie ng’at moro ma Muma luongo ni “Ng’ane,” ma ne en wat Elimelek machiegni ahinya. Omiyo, nomi ng’atno thuolo mokwongo mar warogi.—Ruth 3:9, 12, 13.

Mokwongo okwongo, ng’atno noikore timo kamano. (Ruth 4:1-4) Nong’eyo ni nodhi tiyo gi pesa moko e ng’iewo puodhono. Kata kamano, nong’eyo bende ni Naomi ne ok nyal nyuolo nyathi ma ne dhi dong’ gi puoth Elimelek. Omiyo, ne en gadier ni kowaro puodhono, to puodhono ne dhi bedo mare kendo nonyalo timoe gimoro amora modwaro.

Kata kamano, ng’atno noloko paro ka nofwe- nyo ni kowaro puodhono, to ne dhi chuno ni okend Ruth bende. Nowacho kama: “Ok anyal ware nimar di po ka aketho mwanduna awuon.” (Ruth 4:5, 6) Ang’o momiyo noloko pache?

Ka po ni ng’atno kata ng’at machielo ne nyalo kendo Ruth mi Ruth nyuol nyathi ma wuoyi, nyathino e ma ne dhi dong’ gi puoth Elimelek. Ere kaka mano ne dhi ketho mwandu ng’at ma Muma luongo ni “Ng’ane”? Muma ok miwa dwoko mar penjono, kata kamano, nitie weche moko ma ne nyalo timore.

• Mokwongo, pesa ma nodhi tiyogo e waro puodhono ne nyalo lal, nikech gikone wuod Ruth ma nodhi nyuolo e ma ne dhi dong’ gi puodhono.

• Mar ariyo, waro puodhono ne dhi miyo obed gi ting’ mar rito Naomi kod Ruth.

• Mar adek, ka Ruth ne nyalo nyuolo nyithindo mamoko gi ng’ano, nyithindogo bende ne idhi pognegi puodhono.

• Mar ang’wen, ka po ni ng’atno ne onge nyithindo mamoko, wuoyi ma Ruth ne dhi nyuolo kode e ma ne dhi dong’ gi puoth Elimelek kod puothe. Mano ne dhi miyo puothe odong’ ne nyathi Elimelek to ok mare. Ng’atno ne ok oikore konyo Naomi nikech mano ne nyalo miyo olal mwandune. Nochiwo thuolo mondo Boaz ma ne ok en wat machiegni ahinya gi Elimelek e ma okaw ting’no. Boaz noyie nikech nodwaro ni ‘ochung nying jal ma nothono e wi mwandune.’—Ruth 4:10.

Nenore maler ni gima ne duong’ ne ng’atno, ne en rito nyinge kod mwandune. Ne en ng’at ma ngudi kendo ma iye lach. Kata obedo ni notemo matek mondo orit nyinge, gima lit en ni kata mana e kindegi pod ok wang’eyo nyinge. Ng’atno nolalo migawo makende ma Boaz noyudo mar bedo e anyuola ma Yesu Kristo ma ne en Mesia nowuokie. To mano kaka ng’atno nolalo thuolo makende mana nikech notamore konyo ng’at ma nochando!—Mat. 1:5; Luka 3:23, 32.