1-2. En ang’o ma ng’ato nyaka tim ka pok obatise?

 KUOM higni abich mokalo, osebatis ji mohingo milion achiel mobedo Joneno mag Jehova. Mana kaka Timotheo, nitie joma nopuonj adiera chakre ka ne gin ‘nyithindo matindo ahinya.’ (2 Tim. 3:14, 15) Jomoko nopuonjore e wi Jehova ka gin joma dongo, to moko nopuonjore bang’e ka koro giseti. Kinde matin mokalo, miyo moro ma ne puonjore gi Joneno mag Jehova nobatis ka en jahigni 97!

² Ka in japuonjre Muma kata jonyuolni gin Joneno mag Jehova, be iseparo ka be inyalo batisi? Mano en chenro maber ahinya bedogo! Kata kamano, ka pok obatisi, dwarore ni ichiwri ne Jehova. Sulani biro lero tiend chiwruok ne Jehova. Obiro konyi bende neno gimomiyo ok onego idikri kawo okang’ mar chiwori ne Jehova kendo obatisi ka iseikori timo kamano.

CHIWRUOK EN ANG’O?

3. Chiw ane ranyisi mar jomoko ma iwuoyo kuomgi e Muma ma nochiwore ne Jehova.

³ E Muma, chiwruok en keto gimoro tenge ne tich maler. Jo-Israel ne gin oganda ma nochiwore ne Jehova. Kata kamano, ne nitie joma ne ochiwore ne Jehova e yore moko makende. Kuom ranyisi, Harun ne rwakoga osimbo maler, mopamore, ma nyilni, kendo molos gi dhahabu, to  mano ne nyiso ni nowale ne tij Nyasaye. Osimbo mar dhahabu mopamoreno ne nyiso ni nokete tenge mondo otim migawo makende mar bedo jadolo maduong’ e Israel. (Lawi 8:9) Jo-Nazir bende nochiwore ne Jehova e yo moro makende. Wach molok ni Ja-Nazir e dho Hibrania en nazirʹ, ma tiende en “Ng’at Mowal,” kata “Ng’at Mochiwore.” Ja-Nazir nonego oluw chike moko mag Musa ma gin e ma noketnegi.—Kwan 6:2-8.

4. (a) En yo mane ma joma ochiwore ne Jehova iketo tenge ne tich maler? (b) Tiend ‘kwerori iwuon’ en ang’o? (Ne picha bende.)

⁴ Sama ichiwori ne Jehova, mano nyiso ni iyiero bedo japuonjre Yesu Kristo, kendo dwach Jehova e ma biro bedo gima duong’ e ngimani. Chiwruok ne Jehova oriwo timo ang’o? Yesu nowacho kama: “Ka ng’ato dwaro luwa, to mondo okwerre owuon.” (Mat. 16:24) E dho Grik, weche molok ni “okwerre owuon,” bende inyalo lok ni “owach ni, ‘Ooyo’ ne dwache owuon.” Kaka jatich Jehova mochiworene, biro dwarore ni itamri gimoro amora ma ok luwre gi dwache. (2 Kor. 5:14, 15) Mano oriwo “timbe mag ringruok,” kuom ranyisi, timbe mochido mag nindruok. (Gal. 5:19-21; 1 Kor. 6:18) Be ibiro neno ni chikego oridoni ngima? Ka ihero Jehova, ok ibi neno ni chikego oridoni ngima, kendo ibiro neno ni gin chike ma konyi iwuon. (Zab. 119:97; Isa. 48:17, 18) Owadwa moro miluongo ni Nicholas wacho kama: “Inyalo yiero neno chike mag Jehova kaka chumbe mag jela ma moni timo gik midwaro, kata kaka chumbe mogeng’nego sibuor mondo kik iyud hinyruok.”

5. (a) Ere kaka ng’ato chiwore ne Jehova? (b) En pogruok mane ma nitie e kind chiwruok kod batiso? (Ne picha bende.)

 ⁵ Ere kaka ng’ato chiwore ne Jehova? Ng’ato chiwore ne Jehova sama owuoyo kode e lamo kosingorene ni en kende e ma obiro tiyone, kendo ni dwache e ma obiro keto mokwongo e ngimane. Mano tiende ni isingori ne Jehova ni ibiro dhi nyime here “gi chunyi duto, gi ngimani duto, gi pachi duto, kendo gi tekoni duto.” (Mar. 12:30) Chiwruok en gima itimo sama in kendi gi Jehova. Mopogore gi mano, batiso en gima itimo e lela kendo okonyo ji duto ng’eyo ni koro isechiwori ne Jehova. Chiwruok ne Jehova en singo maler, kendo Jehova dwaro ni idag ka luwore gi singono. To kuom adier, mano e gima onego itim.—Ekl. 5:4, 5.

ANG’O MOMIYO ONEGO ICHIWRI NE JEHOVA?

6. Ang’o ma chwaloga ng’ato mondo ochiwre ne Jehova?

⁶ Gima duong’ momiyo ichiwori ne Jehova en nikech ihere. Hera miherogo Jehova ok otenore mana kuom kaka iwinjo e chunyi. Kar mano, ihero Jehova nikech ‘ing’eye malong’o,’ kendo ing’eyo dwache. (Kol. 1:9) Puonjruok Muma osemiyo iyie ni (1) Jehova en Nyasaye mantie adier, (2) Muma en Wachne mokudh gi muche, kendo (3) Nyasaye tiyo gi riwruok mar ogandane mondo ochop dwache.

7. Ang’o monego watim ka pok wachiwore ne Jehova?

⁷ Joma chiwore ne Jehova onego ong’e puonj mag mise ma yudore e Muma kendo gidag ka luwore gi puonjgo. Gilero yiegi  ne jomamoko kendo gitimo kamano kar nyalogi. (Mat. 28:19, 20) Hera ma giherogo Jehova osemedore kendo gigombo ni gilam Jehova kende. Be mano e gomboni? Ka ihero Jehova e yo ma kamano, ok ibi chiworine kendo obatisi mana ni mondo imor japuonjni mar Muma kata jonyuolni, kata nikech osiepeni timo kamano.

8. Ere kaka chuny mar goyo erokamano nyalo chwali mondo ichiwri ne Jehova? (Zaburi 116:12-14)

⁸ Ka iparo matut kuom gik ma Jehova osetimoni, ibiro chiworine koa e chunyi. (Som Zaburi 116:12-14.) Muma luongo Jehova Nyasaye ni Jachiw “mich mabeyo duto gi chiwo malong’o duto.” (Jak. 1:17) Mich maduong’ie moloyo ma Jehova osemiyowa en misango mar Wuode, Yesu Kristo. Parie wachno! Nikech misango mar rawar, inyalo bedo gi winjruok maber gi Jehova. Bende, kokalo kuom misangono, Jehova osemiyi thuolo mar dak nyaka chieng’. (1 Joh. 4:9, 10, 19) Chiwruok ne Jehova en achiel kuom yore madongo ma wanyisogo erokamano ne okang’ ma Jehova oherowago kaachiel gi gueth mosemiyowa. (Rap. 16:17; 2 Kor. 5:15) Wachno ojiw ahinya e bug Inyalo Dak gi Mor Nyaka Chieng’! sula mar 46, point mar 4, moriwo nyaka vidio ma wiye wacho ni Chiwo ne Nyasaye Mich.

BE IIKORI NE CHIWRUOK KOD BATISO?

9. Ang’o momiyo ng’ato onego onon dongruok mare owuon kodwaro chiwore ne Jehova?

⁹ Inyalo neno ni pok iikori ne chiwruok kod batiso. Samoro dwarore ni itim lokruoge moko mondo inyis ni idwaro dak ka luwore gi chike mag Jehova, kata dwarore ni imed tego yieni. (Kol. 2:6, 7) Jopuonjre mag Muma ok timga dongruok e yo machal, to rowere bende ok bedga moikore ne chiwruok kod batiso e sa machal. Omiyo, tem nono dongruok mari iwuon ka luwore gi nyaloni, to ok kipimori gi jomamoko.—Gal. 6:4, 5.

10. Ang’o minyalo timo kifwenyo ni pok iikori ne chiwruok kod batiso? (Ne bende sanduk ma wiye wacho ni, “ Ne Rowere ma Pon e Adiera.”)

¹⁰ Kata ka ifwenyo ni pok iikori chiwori ne Jehova, pod ber bedo gi gombono. Kwa Jehova e lamo mondo oguedh kinda miketo e timo lokruoge moko ma dwarore. (Fil. 2:13; 3:16) Inyalo bedo gadier ni obiro winjo lamoni kendo konyi.—1 Joh. 5:14.

GIMOMIYO JOMOKO POD DIKORE

11. Ere kaka Jehova konyowa mondo wasik ka wamakore kode?

¹¹ Nitie joma oseikore ne chiwruok kod batiso, kata kamano, pod gidikore kawo okang’ ma kamano. Samoro jomoko nyalo wacho e chunygi kama: ‘Anyalo timo richo moro maduong’ ma gola e kanyakla.’ Ka po ni in gi luoro ma kamano, bed gadier ni Jehova biro miyi gimoro amora midwaro mondo ‘iwuoth e yo mowinjore e wang’e kendo ibed malong’one chuth.’ (Kol. 1:10) Bende, obiro miyi teko mar timo gik makare. Osenyiso ni onyalo timo kamano nikech nitie ji mathoth mosekonyo. (1 Kor. 10:13) Mano e momiyo ji matin e ma igologa e kanyakla mar Jokristo. Jehova konyoga joge mondo gisik ka gimakore kode.

12. Gin ang’o minyalo timo mondo kik idonj e richo maduong’?

¹² Ng’ato ka ng’ato itemoga gi gombo maricho. (Jak. 1:14) Kata kamano, in e ma  ibiro yiero gima ibiro timo sama iromo gi tem. Kata obedo ni jomoko wacho ni ng’ato ok nyal kedo gi gombo maricho, mano ok en adier. Inyalo puonjori timo gik mabeyo. Omiyo, kata ka iromo gi tem moro, pod inyalo kwedo temno kendo timo gima kare. Bende, nitie gik ma kitimo to nyalo konyi kwedo gik maricho. Kuom ranyisi, wuo gi Jehova e lamo pile ka pile. Bed gi chenro maber mar puonjruok Wach Nyasaye pile ka pile. Dhi e chokruoge mag kanyakla ma ok ibari. Ler yieni ne jomamoko. Timo gik mokwan-go biro konyi dak ka luwore gi chiwruok mari. Bende, wiyi kik wil ni Jehova biro konyi timo kamano.—Gal. 5:16.

13. En ranyisi mane maber ma Josef noketonwa?

¹³ Biro bedoni mayot dak ka luwore gi chiwruok mari ka ing’ado chon gima ibiro timo ka dipo ni iromo gi temo moro. Muma nyisowa ni nitie ji mang’eny ma notimo kamano kata obedo ni ne gin joma orem. Kuom ranyisi, chi Potifar nosayo Josef nyading’eny mondo onind kode. Kata kamano, Josef noseng’ado chon okang’ ma nodhi kawo ka dipo ni oromo gi tem ma kamano. Muma nyisowa ni “Josef ne odagi wachno,” kendo nowacho kama: “Ere kaka datim richo maduong’ kamano kendo ketho e nyim Nyasaye?” (Cha. 39:8-10) Nenore maler ni Josef noseng’ado chon gima nodhi timo ka po ni oromo gi tem ma kamano. To mano nomiyo obedone mayot timo gima kare ka koro tem ne ochome.

14. Ere kaka wanyalo kwedo tembe ma wanyalo romogo?

¹⁴ Ere kaka inyalo luwo ranyisi mar Josef? Ng’ad chon gima ibiro timo ka dipo ni iromo gi tem moro. Puonjri kwedo gik ma Jehova osin-go kendo kik ipar kata matin e wi gik ma kamago. (Zab. 97:10; 119:165) Mano biro miyo kik idigni kawo okang’ ma dwarore sama tem moro ochomi, nikech biro yudo kiseng’eyo gima onego itim.

15. Ere kaka ng’ato nyalo nyiso ni ‘omanyo Jehova gi kinda’? (Jo-Hibrania 11:6)

¹⁵ Samoro nyalo bedo ni iseng’eyo adiera kendo idwaro tiyo ne Jehova gi chunyi duto, to pod nitie gimoro ma moni chiwori ne Jehova kendo obatisi. Ka en kamano,  tem ane paro matut e wi ranyisi mar Ruoth Daudi. Inyalo kwayo Jehova kama: “A Nyasaye, nona mondo ing’e chunya. Tema mondo ine gik ma pacha paro. Tim kamano mondo ine ka be nitie gimoro amora marach kuoma, kendo telna e yor ngima ma nyaka chieng’.” (Zab. 139:23, 24) Jehova guedhoga “jo ma manye gi kinda.” Sama itimo matek mondo ichiwri ne Jehova kendo obatisi, inyiso ni imanye gi kinda.—Som Jo-Hibrania 11:6.

DHI NYIME SUDO MACHIEGNI GI JEHOVA

16-17. Ere kaka Jehova nyalo ywayo rowere ma jonyuolgi nie adiera? (Johana 6:44)

¹⁶ Yesu nowacho ni Jehova e ma ywayo jopuonjrene ire. (Som Johana 6:44.) Temie paro wachno kendo ne ane kaka wachno muli in iwuon. Nitie gima ber ma Jehova nenoga kuom ng’ato ang’ata ma oywayo ire. Oneno joma kamago kaka “mwandune makende” kata “mwandune mogen.” (Rap. 7:6; weche moler piny) To mano e kaka in bende oneni.

¹⁷ Kata kamano, samoro nyalo bedo ni in rawera ma jonyuolne ni e adiera kendo gitemo matek mondo gipuonji adierano. Inyalo neno ni itiyo ne Jehova nikech jonyuolni, to ok nikech oywayi ire. Kata kamano, par ni Muma wacho niya: “[Sud] machiegni gi Nyasaye to en bende nosud [iri].” (Jak. 4:8; 1 We. 28:9) Ka ikawo okang’ mar sudo machiegni gi Jehova, to en bende obiro sudo iri. Jehova ok neni mana gie rumbi, to oneno ng’ato ka ng’ato kuomwa, moriwo nyaka jogo mipuonjo adiera gi jonyuolgi. Sama ng’at ma kamano okawo okang’ mar sudo machiegni gi Jehova, Jehova bende biro sudo machiegni kode mana kaka owachonwa e Jakobo 4:8.—Pim gi 2 Jo-Thesalonika 2:13.

18. Ang’o ma wabiro nono e sula ma luwo? (Zaburi 40:8)

¹⁸ Sama ichiwori ne Jehova mobatisi, iluwo ranyisi mar Yesu. Noyie chiwore timo gimoro amora ma Wuon-gi ne dwaro. (Som Zaburi 40:8; Hib. 10:7) E sula ma luwo, wabiro nono gima nyalo konyi dhi nyime makori gi Jehova bang’ kosebatisi.