1. En penjo mane ma jotich Jehova moko nyalo penjore e chunygi?

 WANG’EYO ni Jehova mor gi joge kaka oganda, to mano wach ma jiwowa ahinya! Muma wacho kama: “Jehova ohero joge.” (Zab. 149:4) Kata kamano, jomoko nyalo penjore e chunygi niya: ‘Be Jehova mor koda?’ Nitie jotich Jehova mang’eny e kinde machon ma ne penjorega kamano e chunygi.—1 Sa. 1:6-10; Ayub 29:2, 4; Zab. 51:11.

2. Jehova morga gi jomage?

² Muma nyiso maler ni Jehova nyalo bedo mamor gi dhano morem. Ang’o ma wanyalo timo mondo Jehova obed mamor kodwa? Nyaka waket yie kuom Yesu Kristo kendo obatiswa. (Joh. 3:16) Kuom timo kamano, wanyiso e lela ni waseloko chunywa waa e richo kendo ni wadwaro timo dwache. (Tich 2:38; 3:19) Jehova bedoga mamor ahinya sama wakawo okengego mondo wabed osiepene. Ka watimo duto ma wanyalo mondo wadag ka luwore gi chiwruokwa ne Jehova, obedo mamor kodwa kendo okwanowa kaka osiepene.—Zab. 25:14.

3. Ang’o ma wadwaro nono e sulani?

³ Ang’o momiyo jomoko nyalo paro ni Jehova ok mor kodgi? Gin yore mage ma Jehova nyisogago ni omor kodwa? To ang’o ma Jakristo nyalo timo mondo obed gadier ni Nyasaye mor kode?

GIMOMIYO JOMOKO PARO NI JEHOVA OK MOR KODGI

4-5. Ka po ni wawinjo e chunywa ni wan joma nono, en wach mane monego wabedgo gadier?

⁴ Nitie joma nopon ka giparo ni gin joma nono. (Zab. 88:15) Owadwa moro miluongo ni Adrián wacho kama: “Kinde duto asebedo ka awinjo e chunya ni an ng’at manono. Ka ne pod  atin, najalemoga ka akwayo Jehova mondo obi oyie ne joodwa odonj e Paradiso, kata kamano, an to ne ok an gadier ka be anyalo chopo e Paradiso.” Tony, ma nopon e ot ma ji ok gin Joneno mag Jehova wacho kama: “Jonyuolna ne ok onyisa kata mana dichiel ni gihera kata ni gimor koda. Mano ne miyo aneno ni ne ok atim maber.”

⁵ Ka po ni wawinjoga e chunywa ni wan joma nono, onego wapar ni Jehova owuon e ma noywayowa e adiera. (Joh. 6:44) Oneno gik mabeyo mang’eny kuomwa ma kata wan wawegi samoro ok wanyal neno, kendo ong’eyo nyaka weche manie chunywa. (1 Sa. 16:7; 2 We. 6:30) Omiyo, sama onyisowa ni oherowa, onego wabed gadier gi wachno.—1 Joh. 3:19, 20.

6. Ere kaka Paulo nowinjo e chunye e wi richo ma notimo chon?

⁶ Jomoko kuomwa notimo gik maricho ka ne pok gipuonjore adiera, to mano nyalo chando chunygi nyaka sani. (1 Pet. 4:3) To kata mana Jokristo moko motegno bende kedoga matek gi gombo maricho. Dibed ni iwinjo ka chunyi ng’adoni bura? Ka en kamano, ng’e ni ok in kendi. Jotich Jehova mang’eny bende osewinjo kamano. Kuom ranyisi, jaote Paulo nokwanore kaka ng’at ma chandore ka noparo e wi nyawo ma ne en-go. (Rumi 7:24) To ng’e ni e sechego, Paulo nosegaloko chunye kendo nosebatise. To e ma pod nowacho ni en e ma ‘notinie mogik kuom joote’ kendo ni en e ma ne en “jaricho ma rachie moloyo.”—1 Kor. 15:9; 1 Tim. 1:15.

7. Ang’o monego wang’e e wi richo ma ne watimo chon?

⁷ Wuonwa manie polo singo ni obiro weyonwa richowa ka waloko chunywa gadier. (Zab. 86:5) Omiyo, ka kuom adier waseloko chunywa ma waweyo richo moro ma ne watimo, wanyalo bedo gadier chuth ni Jehova oseng’wononwa.—Kol. 2:13.

8-9. Ka po ni waparo ni ok wanyal timo gik moko duto ma dwarore mondo wamor Jehova, ang’o ma nyalo konyowa?

⁸ Dwaher tiyo ne Jehova gi chunywa duto. Kata kamano, jomoko nyalo chako winjo e chunygi ni ok ginyal timo duto ma dwarore mondo gimor Jehova. Nyaminwa moro miluongo ni Amanda wacho kama: “Aparoga ni tiyo ne Jehova gi chunywa duto tiende en timo mathoth e tije pile. Seche moko atemoga timo nyaka gik mohingo tekrena. To sama weche ok odhi kaka daher, ang’adoga e chunya ni Jehova koro ok mor koda mana kaka an bende ok amor.”

⁹ Ka po ni waparo ni ok wanyal timo gik moko duto ma dwarore mondo wamor Jehova, ang’o ma nyalo konyowa? Par kinde duto ni Jehova en Nyasaye ma ok ridnwa ngima. Ok odwar ni watim gik mohingowa. Omor gi gimoro amora ma watimo e tije, tek mana ni watime gi chunywa duto. Par bende jotich Jehova miwuoyo kuomgi e Muma ma notiyone gi chunygi duto. Kuom ranyisi, par ane ranyisi mar Paulo. Notimo kinda ahinya kuom higni mang’eny kodhi kuonde ma boyo kendo chako kanyakla manyien mopogore opogore. To ka nochopo kinde ma koro chalne ne ok oyiene timo mathoth e tij Jehova, be Jehova noweyo bedo mamor kode? Ooyo. Nodhi nyime timo duto monyalo ka luwore gi chal ma ne entie, kendo Jehova noguedhe. (Tich 28:30, 31) E yo ma kamano, wan bende gik ma wanyalo timo e tij Jehova nyalo bedo mopogore opogore ka luwore gi chal ma wantie. Kata kamano, gima duong’ ma Jehova ng’iyo en gima chwalowa mondo watim tije. Koro, we wanon ane yore moko ma Jehova nyisogo ni omor kodwa.

 YORE MA JEHOVA NYISOGO NI OMOR KODWA

10. Ere kaka wanyalo winjo dwond Jehova kowacho ni omor kodwa? (Johana 16:27)

¹⁰ Kokalo kuom Muma. Sama Jehova mor gi ng’ato, onyisoga mano ayanga. E Muma, nitie kuonde ariyo ma nonyisoe Yesu ni ohere kendo omor kode. (Mat. 3:17; 17:5) Be diher winjo ka Jehova nyisi ni omor kodi? Jehova ok wuo kodwa kotiyo gi dwonde achiel kachiel, to kar mano, otiyo gi Wachne ma en Muma. Wanyalo winjo ka Jehova nyisowa ni omor kodwa sama wasomo weche ma Yesu nowacho e buge mag Injili. (Som Johana 16:27.) Yesu nonyiso kido mag Wuon-gi e yo makare chuth. Omiyo, sama wasomo ni Yesu ne mor gi jolupne ma ne gin dhano morem, wanyalo bedo gadier ni Jehova bende mor kodwa.—Joh. 15:9, 15.

11. Ang’o momiyo tembe ma waromogo ok nyis ni Jehova ok mor kodwa? (Jakobo 1:12)

¹¹ Kokalo kuom gik motimo. Jehova oikore konyowa, kuom ranyisi, omiyowa gige ringruok. Nitie kinde ma Jehova nyalo yie mondo wakal e chandruok mana kaka notimo ne Ayub. (Ayub 1:8-11) Tembe ma waromogo ok nyis ni koro Jehova ok mor kodwa. Kar mano, tembego miyowa thuolo mar nyiso okang’ ma waherogo Jehova kod kaka wageno kuome. (Som Jakobo 1:12.) Sama okonyowa nano e tembe, wabiro fwenyo kaka oherowa kendo oikore sirowa.

12. Ranyisi mar Dmitrii puonjowa ang’o?

¹² Ne ane ranyisi mar Owadwa Dmitrii modak Asia. Nolalo tich, kendo ne ok oyudo tich machielo kuom dweche mang’eny. Omiyo, nong’ado ni nodhi medo thuolo motiyogo e tij lendo, to e yo ma kamano nonyiso ni ogeno kuom Jehova. Dweche mang’eny nomedo kalo, to pod ne ok oyudo tich. Kae to tuo moro nogoye matek ma ne ok onyal kata wuok e otanda. Nochako bedo gi kiawa ka be en dichwo maber kendo wuoro maber, kendo nochako paro ni Jehova koro ne ok mor kode. Kae to chieng’ moro godhiambo, nyare nondikone weche moko ma nogolo e bug Isaya 30:15 ma wacho niya: “Kugeno kuoma kendo kuhoru mos, to unuyud teko.” Sama nomiyo wuon-gi otas ma noting’o wechego, nonyise kama: “Baba, sa asaya miwinjo marach, to par ndikoni.” Dmitrii nofwenyo ni Jehova ne konyo joode, to mano e  momiyo pod ne gin gi chiemo, lewni, kod kar dak. Dmitrii wacho kama: “Gima ne dwarore ni atim ne en mana hora mos kendo geno kuom Jehova.” Ka po ni in bende ikalo e tembe kaka mago, bed gadier chuth ni Jehova dewi kendo oikore konyi nano.

13. Gin jomage ma Jehova nyaloga tiyogo e nyiso ni omor kodwa, to onyalo timo kamano e yo mane?

¹³ Kokalo kuom Jokristo wetewa. Jehova tiyoga gi owetewa gi nyiminewa e nyiso ni omor kodwa. Kuom ranyisi, onyalo tiyo gi owadwa kata nyaminwa moro mondo onyiswa weche ma jiwowa e sa mowinjore. Mano e gima notimore ne nyaminwa moro ma wuok Asia e kinde ma ne en gi parruok ahinya. Nolalo tich kendo tuo nogoye. Kae to jaode notimo richo maduong’ mogole e migawo mar jaduong’-kanyakla. Nyaminwano wacho kama: “Nawuoro awuora gik ma ne timore. Nachako paro ni samoro nitie gima rach ma natimo, kendo ni Jehova koro ne ok mor koda.” Nyaminwano nolamo Jehova kosaye mondo okonye bedo gadier ni pod nomor kode. Ere kaka Jehova nokonye? Owacho kama: “Jodong-kanyakla nowuoyo koda ma gikonya bedo gadier ni Jehova pod nohera.” Bang’e, nokwayo Jehova kendo mondo okonye bedo gadier ni pod nomor kode. Owacho kama: “Chieng’no nayudo barua mowuok kuom owete gi nyimine moko manie kanyaklawa. Sama nasomo weche ma ne gijiwago e baruano, nabedo gadier ni Jehova nowinjo kwayona.” Kuom adier, Jehova nyaloga nyisowa ni omor kodwa kokalo kuom weche mang’won ma jomoko nyisowa.—Zab. 10:17.

14. Yo machielo ma Jehova nyisogo ni omor kodwa en mane?

¹⁴ Yo machielo ma Jehova nyisogo ni omor kodwa kokalo kuom Jokristo wetewa, en tiyo  kodgi e miyowa siem sama mano dwarore. Kuom ranyisi, e kinde Jokristo mokwongo, Jehova notiyo gi jaote Paulo e ndiko barupe 14 ne Jokristo wetene. Barupego noting’o nyaka siem michiwo e yor hera. Ang’o momiyo Jehova notayo Paulo mondo ondik siem e barupenego? Jehova en Wuoro maber kendo okumo nyithinde kata osiemogi nikech ‘oherogi.’ (Nge. 3:11, 12) Omiyo, sa asaya ma Jakristo wadwa omiyowa siem kotiyo gi Muma, onego wane mano kaka yo ma Jehova nyisowago ni omor kodwa, to ok ni osejwang’owa. (Hib. 12:6) Gin weche mage mamoko ma nyiso ni Jehova mor kodwa?

WECHE MAMOKO MA NYISO NI JEHOVA MOR KODWA

15. Gin jomage ma Jehova miyo rohone maler, to ang’o momiyo mano jiwowa?

¹⁵ Jehova chiwo rohone maler mana ne joma omorgo. (Mat. 12:18) Wanyalo penjore kama: ‘Be asebedo ka anyiso olembe moko ma roho nyago e ngimana?’ Be isefwenyo ni tinde ihori gi joweteni moloyo kaka nitimo ka ne pok ing’eyo Jehova? Kuom adier, kaka imedo nyago olembe mag roho mar Nyasaye e ngimani, e kaka ibiro medo neno maler ni Jehova mor kodi!—Ne sanduk ma wiye wacho ni, “ Olembe ma Roho Nyago Gin . . .”

16. Gin jomage ma Jehova tiyogo e lando wach maber, to mano miyo iwinjo nade e chunyi? (1 Jo-Thesalonika 2:4)

¹⁶ Joma Jehova morgo kendo oyiego e ma omiyo thuolo mar lando wach maber. (Som 1 Jo-Thesalonika 2:4.) Ne ane kaka lando wach maber nokonyo nyaminwa moro miluongo ni Jocelyn. Chieng’ moro, Jocelyn nochiewo ka en gi parruok mang’eny ahinya. Owacho kama: “Nawinjo ka ajony ma kata teko ma nanyalo timogo tij Jehova ne onge. To nikech an painia, to odiechieng’no ne en odiechienga mar lendo, nalamo Jehova kae to awuok adhi lendo.” Chieng’no Jocelyn nolendo ne miyo moro mang’won ma nyinge Mary, kendo noyie puonjore Muma. Dweche moko bang’e, Mary nowacho ni chieng’ ma Jocelyn nodwong’o dhoode, noyudo osebedo kolemo mondo Nyasaye okonye. Jocelyn paro gima notimoreno kowacho kama: “Nawinjo e chunya ka gima Jehova ne wachona ni, ‘Amor kodi.’” En adier ni nitie joma ok bi rwako wach maber ma walando. Kata kamano, wanyalo bedo gadier ni Jehova mor kodwa  ahinya sama watimo kinda e lando ne jomamoko wach maber.

17. Weche ma Vicky wacho e wi rawar puonji ang’o? (Zaburi 5:12)

¹⁷ Misango mar rawar konyo mana joma Jehova morgo. (1 Tim. 2:5, 6) To nade ka chunywa nyisowa ni Jehova ok mor kodwa kata obedo ni wan gi yie kuom rawar kendo osebatiswa? Par ni chunywa nyaloga wuondowa, kata kamano, Jehova to wanyalo geno. Okwano joma oketo yie kuom misango mar rawar kaka joma kare, kendo osingo ni obiro guedhogi. (Som Zaburi 5:12; Rumi 3:26) Nyaminwa moro moluongo ni Vicky noyudo ber mathoth ka noparo matut kuom misango mar rawar. Owacho kama: “Nafwenyo ni Jehova nosebedo ka hore koda kuom kinde malach ahinya. . . . To e ma pod nachalo ng’ama nyise ni: ‘Hera mari ok nyal konya. Misango ma Wuodi nochiwo ok oromo lwoko richona.’” Paro matut kuom rawar nomiyo ochako winjo e chunye ni Jehova ohere. Wan bende ka waparo matut kuom rawar, wabiro fwenyo ni Jehova oherowa kendo omor kodwa.

18. En wach mane ma wanyalo bedogo gadier chuth ka wadhi nyime hero Wuonwa manie polo?

¹⁸ Kata obedo ni wanyalo temo ahinya mondo wati gi paro mochiw e sulani, pod nitie kinde ma weche moko nyalo goyo chunywa ahinya ma wachak bedo gi kiawa ka be Jehova mor kodwa. Ka gima kamano timoreni, par kinde duto ni Jehova mor gi “jo ma dhi nyime here.” (Jak. 1:12) Omiyo, dhi nyime sudo machiegni gi Jehova, kendo itemga fwenyo gik ma nyiso ni omor kodi. Sik ka in gadier chuth ni Jehova ‘ok ni mabor gi ng’ato ka ng’ato kuomwa.’—Tich 17:27.