1-2. Gin gueth mage ma ng’ato yudo bang’ batiso?

 SAMA obatiswa ma wabedo jotich Jehova, wabedoga mamor ahinya. Joma osebatisi moyudo thuolo mar bedo jood Jehova nyalo yie gi weche ma Daudi jandik-zaburi nowacho kowuoyo kuom Jehova niya: “Ng’at mamor en ng’at miyiero kendo mikelo machiegni mondo odag e laru mari.”—Zab. 65:4.

² Jehova ok oyawo thuolo mar bedo e laru mare ne ng’ato ang’ata. Mana kaka ne waneno e sula mokalo, Jehova yiero sudo machiegni mana gi jogo ma bende dwaro sudo machiegni kode. (Jak. 4:8) Sama ichiwori ne Jehova mobatisi, isudo machiegni kode e yo makende ahinya. Inyalo bedo gadier chuth ni bang’ batiso, Jehova biro ‘oloni gueth mang’eny ma tamre gi nono.’—Mal. 3:10; Jer. 17:7, 8.

3. Jokristo mosechiwore ne Jehova mobatisi nigi ting’ mane? (Eklesiastes 5:4, 5)

³ Batiso en mana chakruok mar wuoth kaka Jakristo. Bang’ batiso, ibiro dwaro dhi nyime timo duto minyalo mondo idag ka luwore gi chiwruokni ne Jehova, kata bed ni iromo gi tembe ma chalo nade. (Som Eklesiastes 5:4, 5.) Nikech koro in japuonjre Yesu, biro dwarore ni iluw machiegni ranyisi mar Yesu kod chikene. (Mat. 28:19, 20; 1 Pet. 2:21) Sulani olos mondo okonyi timo mano.

 ‘DHI NYIME LUWO’ YESU SAMA IROMO GI TEMBE

4. Jopuonjre Yesu ting’o ‘yadh-sandgi’ e yo mane? (Luka 9:23)

⁴ Batiso ok nyis ni ngimani koro biro bedo ma onge chandruok. Yesu nowacho ni jolupne biro ting’o ‘yadh-sandgi pile ka pile.’ (Som Luka 9:23.) Be Yesu ne temo wacho ni jolupne ne dhi sandore kinde duto? Ooyo. Gima nowacho en ni kata obedo ni jolupne ne dhi yudo gueth mang’eny, nitie pek moko ma bende ne gidhi romogo. Moko kuom pekgo ne dhi kelonegi lit mang’eny.—2 Tim. 3:12.

5. Gin gueth mage ma Yesu nosingo ne joma oyie tuonore gik ma gihero mondo giket weche Pinyruoth obed mokwongo e ngimagi?

⁵ Nyalo bedo ni joodu osebedo ka kwedi, kata isetuonori gik moko mihero mondo iket weche Pinyruoth obed mokwongo e ngimani. (Mat. 6:33) Ka en kamano, bed gadier ni Jehova wiye ok bi wil gi gik mitimo e tije. (Hib. 6:10) Onge kiawa ni iseneno weche ma Yesu nowachogi e ngimani: “Onge ng’at moweyo ode, kata owetene, kata nyiminene, kata min-gi, kata wuon-gi, kata nyithinde, kata puothene, nikech an kendo nikech wach maber, ma ok bi yudo nyadi 100 momedore gie ndalogi—ute gi owete gi nyimine gi mine gi nyithindo kod puothe kaachiel gi sand—kendo e ndalo ma biro, ngima mochwere.” (Mar. 10:29, 30) Gueth miseyudo ng’eny ma ok dipim gi gik misetuonori.—Zab. 37:4.

6. Ang’o momiyo biro dwarore ni idhi nyime kedo gi “gombo mag ringruok” bang’ batiso?

⁶ Pod biro dwarore ni idhi nyime kedo gi “gombo mag ringruok” bang’ batiso. (1 Joh. 2:16) Nikech in nyakwar Adam, ng’e ni pod ibiro dhi nyime bedo jaricho. Seche moko inyalo winjo e chunyi kaka jaote Paulo nowinjo ka nondiko niya: “E chunya ma iye, amor ahinya gi chik Nyasaye, to e ringrena, nitiere chik moro ma kedo kod chik manie pacha, kendo otera mondo abed e tuech mar chik mar richo manie ringrena.” (Rumi 7:22, 23) Inyalo winjo marach e chunyi nikech nyaka idhi nyime kedo gi richo. Kata kamano, kidhi nyime paro matut kuom singruok ma nitimo gi Jehova ka nichiworine, mano biro miyi teko mar kedo gi tembe. Adiera makende en ni chiwruokni ne Jehova biro miyo ngimani obed mayot sama iromo gi tembe. E yo mane?

7. Ere kaka chiwruokni ne Jehova biro konyi mondo idhi nyime makori kode?

⁷ Sama ichiwori ne Jehova, ikwerori iwuon. Mano tiende ni iweyo gombo moro amora ma nyalo chwanyo Jehova. (Mat. 16:24) Omiyo, sama iromo gi tem moro, ok ibi chako paro ni idonj e temno koso kik idonjie. Temno biro yudo kiseng’ado e chunyi ni ok ibi timo gimoro amora ma nyalo chwanyo Jehova. Ibiro dwaro mana moro Jehova kende. Ibiro chalo gi Ayub ma nokalo e tembe mager, to e ma pod nowacho gi chir niya: “Abiro siko ka an ng’at matir!”—Ayub 27:5.

8. Ere kaka chiwruokni ne Jehova nyalo konyi kwedo tembe?

⁸ Kiparo matut kuom chiwruokni ne Jehova, mano biro miyi teko mar kwedo tem moro amora. Kuom ranyisi, be inyalo chako mila mag kisera gi chwor ng’ato kata chi ng’ato? Ooyo! Temno biro yudo kiseng’ado e chunyi ni ok inyal timo gima kamano. Mano biro konyi mondo kik ichak bedo gi gombo ma biro hinyi bang’e. Ibiro ‘weri gi yor joricho.’—Nge. 4:14, 15.

9. Ere kaka paro e wi chiwruokni ne Jehova nyalo konyi keto motelo chenrogi mag dhi e chokruoge?

 ⁹ Nade ka omiyi tich moro ma biro chocho chenrogi mag dhi e chokruoge? Ing’eyo maber yiero mibiro timo. Kata ka ne pok omiyi tich ma kamano, niseng’ado e chunyi chon ni ok inyal yie tich ma biro moni dhi e chokruoge. Omiyo, ok ibi chako paro e chunyi ni samoro inyalo yie ayiea gi tijno e ka bang’e inon gik mibiro timo mondo kik omoni dhi e chokruoge. Kiparo kaka Yesu nong’ado e chunye ni ne nyaka omor mana Wuon-gi, in bende ibiro kwedo mapiyo gimoro amora ma nyalo chwanyo Nyasaye.—Mat. 4:10; Joh. 8:29.

10. Ere kaka Jehova biro konyi ‘dhi nyime luwo’ Yesu bang’ batiso?

¹⁰ Tembe miyi thuolo mar nyiso okang’ miseng’adogo e chunyi ni ibiro ‘dhi nyime luwo’ Yesu. Sama itimo kamano, inyalo bedo gadier ni Jehova biro konyi. Muma wacho kama: “Nyasaye en ja adiera, kendo ok obi weyo mondo otemu mokalo ma unyalo nanoe, to kaachiel gi temno obiro losonu yo mar wuok mondo ubed gi nyalo mar nano.”—1 Kor. 10:13.

KAKA INYALO DHI NYIME LUWO YESU

11. Achiel kuom yore mabeyo ma biro konyi dhi nyime luwo Yesu en mane? (Ne picha bende.)

¹¹ Yesu ne jakinda e tij Nyasaye, kendo nosiko kolamo pile. (Luka 6:12) Kuom adier, achiel kuom yore mabeyo ma biro konyi dhi nyime luwo Yesu bang’ batiso, en bedo gi chenro mar timo gik ma konyi medo sudo machiegni gi Jehova. Muma wacho kama: “Kata bed mana ni wasetimo dongruok e okang’ marom nade, wadhiuru nyime wuotho kaka dwarore e yo achielno.” (Fil. 3:16) Kinde ka kinde, ibiro winjo ripode  ma nyiso gueth ma owete gi nyimine oseyudo nikech tiyo ne Nyasaye kuom thuolo momedore. Samoro ne gidhi e Skul mar Joland-Injili mar Pinyruoth kata ne gidhi lendo e alwora ma jolendo dwaroree moloyo. Ka in bende inyalo bedo gi chenro ma kamago, mano nyalo bedo maber. Jotich Jehova gomboga ahinya timo mathoth e tije. (Tich 16:9) To nade ka gie sani ok inyal yudo thuolo mar tiyo ne Nyasaye e okang’ momedore? Kik ipar ni koro in ng’at manono. Gima duong’ e ng’wech ma waringo kaka Jokristo en sinani. (Mat. 10:22) Ng’e ni Jehova pod mor gi gik mitimo e tije ka luwore gi nyalo mari kod chalni. Mano en yo maduong’ mar dhi nyime luwo Yesu bang’ batiso.—Zab. 26:1.

12-13. Ang’o minyalo timo ka kindani ochako dok chien? (1 Jo-Korintho 9:16, 17) (Ne bende sanduk ma wiye wacho ni, “ Sik e Ng’wech.”)

¹² Nade kifwenyo ni tinde ok ilem kowuok e chunyi, kata tij lendo tinde ok mori? To nade ka somo Muma tinde ok mitni kaka chon? Kichako winjo kamano e chunyi bang’ batiso, kik ichak neno ni koro ionge roho mar Jehova. Nikech in dhano morem, paro ma in-go kata yo minenogo gik moko nyaloga lokore kinde ka kinde. Ka kindani ochako dok chien, par ranyisi mar jaote Paulo. Kata obedo ni notemo ahinya mondo oluw ranyisi mar Yesu, nong’eyo ni kinde ka kinde, kindane ne nyalo dok chien. (Som 1 Jo-Korintho 9:16, 17.) Nowacho kama: “Kata ka [ayalo] to chunya ok dwar, pod an gi tich mosemiya mar bedo jarit.” Mano nyiso ni Paulo nong’ado e chunye ni ne nyaka otim tich ma nosemiye, kata ka seche moko nonyalo yudo ka ok yotne timo kamano.

 ¹³ E yo ma kamano bende, kik iyie mondo paro ma in-go kaka dhano morem e mochik yiero mitimo. Ng’ad e chunyi ni ibiro dhi nyime timo gik makare, kata ka seche moko ok yotni timo kamano. Kidhi nyime timo gik makare, mosmos ibiro chako winjo maber e chunyi. Bed ni weche chalo nade, kidhi nyime bedo gi chenro maber mar timo gik motudore gi lamo, mano biro konyi dhi nyime luwo Yesu bang’ batiso. Bende, kinda mitimo biro jiwo Jokristo weteni.—1 The. 5:11.

‘SIK KINONORI KENDO INYIS GADIER GIMA IN’

14. Ang’o monego inon kinde ka kinde, to nikech ang’o? (2 Jo-Korintho 13:5)

¹⁴ Bang’ batiso, nyalo bedo maber kisiko inonori. (Som 2 Jo-Korintho 13:5.) Kinde ka kinde, tem nono kit ngimani kod timbeni mondo ine ka be pod ilemoga pile, isomo Muma pile kendo timo puonjruokni iwuon, idhi e chokruoge ma ok ibari, kendo ilendo gi kinda. Tem fwenyo yore minyalo berogo gigo. Kuom ranyisi, penjri penjo kaka: ‘Be anyalo lero ne jomamoko puonj mag Muma e yo maber? Be nitie gik ma anyalo timo mondo tij lendo omed mora? Be lamoga wuokga e chunya, to be ginyiso ni ageno kuom Jehova chuth? Be adhiga e chokruoge mag Jokristo ma ok abara? Ang’o ma anyalo timo mondo amed keto pacha gi chunya duto e chokruoge kendo achiw paro?’

15-16. Ranyisi mar Robert opuonji ang’o e wi kwedo tembe?

¹⁵ Dwarore bende ni inonriga gi chuny moyangore e wi nyawo moko minyalo bedogo. Weche ma owadwa moro miluongo ni Robert nowacho konyowa neno ber mar timo kamano. Nowacho kama: “Ka ne an jahigni 20 kama, nayudo tich moro ma natimoga kuom odiechienge moko e juma. Chieng’ moro bang’ tich, nyako moro ma ne watiyogo nokwaya mondo adhi alime e ode. Nonyisa ni ne wadhi bedo kendwa ji ariyo kendo chamo ngima. Nakwongo arendora arenda, kata kamano bang’e nakwere, kendo nanyise gimomiyo ne ok anyal dhi kode.” En adier ni Robert nokwedo temno, kendo notimo maber. Kata kamano, bang’e ka noparo matut e wi wachno, nofwenyo ni di ne otimo maber moloyo. Owacho kama: “Ne ok akwedo temno mapiyo kendo motegno kaka Josef nokwedo  chi Potifar. (Cha. 39:7-9) Kuom adier, nahum ahinya ka nafwenyo ni chutho-chutho, ne ok yotna kwedo temno. Wachno nokonya fwenyo ni nonego amed tego winjruokna gi Jehova.”

¹⁶ In bende inyalo yudo ber mathoth kinonori kaka Robert notimo. Kata ka po ni nikwedo tem moro, pod ber penjori niya: ‘Nokawa kinde ma romo nade ka pok atamora?’ Kifwenyo kuonde moko monego itimie lokruok, kik chunyi ol. Bed mamor ni koro ing’eyo nyawo ma in-go. Ket wachno e lamo, kendo ikaw okenge ma biro miyo idhi nyime makori gi chike makare mag Jehova.—Zab. 139:23, 24.

17. Ere kaka ranyisi mar Robert nomiyo nying Jehova duong’?

¹⁷ Nitie gimachielo ma wanyalo puonjore e ranyisi mar Robert. Odhi nyime wacho kama: “Ka nasetamora dhi e od nyakono, nonyisa ni, ‘Ikalo penj!’ Ka napenje tiend wechego, nonyisa ni osiepne moro ma chon ne en Janeno nonyise ni rowere duto ma Joneno odakga e ngima mar wuondruok, kendo ni ka thuolo oneno mar timo richo, gilwarga mapiyo ahinya. Omiyo, nonyiso osiepneno ni nobiro tema ane. Ka nawinjo mano, namor ahinya ni namiyo nying Jehova duong’.”

18. Ang’o ming’ado e chunyi ni ibiro timo bang’ batiso? (Ne bende sanduk ma wiye wacho ni, “ Sula Moko Ariyo ma Nyalo Konyi.”)

¹⁸ Sama ichiwori ne Jehova mi obatisi, inyiso ni iikori miyo nyinge obed maler, ma kata weche tek manade. Inyalo bedo gadier ni Jehova ong’eyo tembe miromogo kod kaka ikedo matek mondo ikwed tembego. Obiro guedho kinda mitimo mondo idhi nyime makori kode. Gen ni obiro miyi teko mar timo kamano kokalo kuom rohone maler. (Luka 11:11-13) Kiyie mondo Jehova okonyi, ibiro dhi nyime bedo jalup Yesu bang’ kosebatisi.