GAYO kod Jokristo mamoko e kinde Jokristo mokwongo noromo gi pek mang’eny. Ne nitie jomoko ma ne puonjo miriambo ka gitemo nyoso yie mar Jokristo mamoko kendo kelo pogruok e kanyakla. (1 Joh. 2:18, 19; 2 Joh. 7) Jal moro miluongo ni Diotrefe ne keyo weche maricho mondo oketh nying jaote Johana kod Jokristo mamoko, ne otamore rwako jorit-alwora, kendo notemo ywayo Jokristo mamoko mondo oluw ranyisine marachno. (3 Joh. 9, 10) Mano e kaka weche ne chal e kinde ma Johana nondikonee Gayo. Barua ma jaoteno nondiko e higa mar 98 Bang’ Kristo iluongo ni “Barua mar Adek mar Johana” e Ndiko mag Dho Grik.

Kata obedo ni Gayo noromo gi pek mopogore opogore, nodhi nyime tiyo ne Jehova gi chunye duto. Notimo kamano nade? Ang’o momiyo onego waluw ranyisi mar Gayo e kindewagi? Barua ma Johana nondikono nyalo konyowa nade mondo watim kamano?

Jal mondiko barua mar Adek mar Johana luongore ni “jaduong’ ma hike ng’eny.” Mano kende noromo konyo Gayo mondo ofweny ni jaote Johana e ma nondikone baruano. Johana noluongo Gayo ni “jal ma ageno kendo ma ahero gadier.” Kae to Johana nowacho kaka nogeno ni ngima Gayo ne ber mana kaka winjruokne gi Nyasaye bende ne ber. To mano kaka nojiwo Gayo kopwoye!—3 Joh. 1, 2, 4.

Nyalo bedo ni Gayo ne en jaduong’-kanyakla, kata kamano, baruano ok nyiswa achiel kachiel. Johana nopwoyo Gayo kuom rwako jorit-alwora kata obedo ni ne ok ong’eyogi. Johana ne neno tim ma Gayo ne timono kaka gima nyiso ni ohero Jehova nikech rwako welo en gima ifwenyogo jotich Nyasaye madier.—Cha. 18:1-8; 1 Tim. 3:2; 3 Joh. 5.

Weche ma Johana nowacho kopwoyogo chuny mar rwako welo ma Gayo ne nigo, ne nyiso ni owetego ne limoga kanyakla mopogore opogore kae to bang’ kinde ne gidok ir jaoteno kendo pimone weche ma ne gineno. Nenore ni owetego e ma ne nyiso Johana weche ma ne timore e kanyaklago.

Jorit-alworago ne ohero dak e ute Jokristo wetegi. Otende ma ji ne nyalo nindoe ne richo, joma ne tiyo e otendego bende ne ok rwak welo e yo maber, kendo ne gin kuonde mopong’ gi timbe mag anjawo. Kuom mano,  jorit-alwora ne dakga gi osiepegi ma Jokristo sama ne gidhi limo kanyakla.

Johana nojiwo Gayo mondo odhi nyime rwako welo ka ne okwaye ni mondo ‘okowgi e wuodhgi e yo mowinjore e wang’ Nyasaye.’ Tiend kowo jogo e wuodhgi ma Johana ne wuoye ne nyiso ni nonego omigi gik ma ne nyalo konyogi e wuodhgi nyaka gichop kama ne gidhiye. Nenore maler ni Gayo nosebedo ka timo kamano ne welo nikech welogo notero ne Johana ripot maber e wi hera kod yie ma Gayo ne nigo.—3 Joh. 3, 6.

Nyalo bedo ni welogo ne gin jomisonari, joma Johana ne oro, kata jorit-alwora. Jogo duto ne wuotho ka lando wach maber. Johana nowacho niya: “Ne giwuok mondo gidhi nikech nyinge.” (3 Joh. 7) Noyudo Johana osewuoyo e wi Nyasaye e kwan matindo 6, mano e momiyo ka nowacho ni “nikech nyinge,” nenore ni nowuoyo e wi nying Jehova. Kuom mano, owetego bende ne gin jotich Jehova, omiyo nowinjore orwakgi e yo maber. Mano e momiyo Johana nondiko niya: “Onego warwak joma kamago e yo maber, mondo wabed jotich ma tiyo kanyachiel e adiera.”—3 Joh. 8.

Nitie gima chielo momiyo Johana nondiko ne Gayo, to ok mana goyone erokamano kende. Nodwaro konyo Gayo mondo onyagre gi chandruok moro matek. Ne nitiere Jakristo moro miluongo ni Diotrefe ma ne ok dwar rwako jorit-alwora. Ne otemo tamo Jokristo mamoko bende mondo kik orwak jorit-alwora.—3 Joh. 9, 10.

Nyaka bed ni Jokristo mamoko ne ok ohero bedo machiegni gi Diotrefe. Ne ohero ketore jatelo e kanyakla, ne ok orwak wach moro amora moa kuom Johana gi luor, kendo ne okeyo weche ma ketho nying joote kod jomamoko. Kata obedo ni Johana ne ok owacho ni Diotrefe ne puonjo miriambo, gik ma notimo nonyiso maler ni nokwedo weche ma jaoteno ne chiko. Gombo mar bedo gi telo kod kido maricho ma Diotrefe nonyiso ne miyo ji bedo gi kiawa ka be pod nohero Jehova gadier. Ranyisi mar Diotrefe nyiso kaka bedo gi gombo maricho kod wich teko nyalo kelo pogruok e kanyakla. Mano e momiyo Johana nonyiso Gayo, kod Jokristo duto e kindewagi niya: “Kik iluw tim marach.”—3 Joh. 11.

Mopogore gi Diotrefe, Johana wuoyo kuom Jakristo machielo miluongo ni Demetrio ma ne oketo ranyisi maber. Johana nondiko niya: “Demetrio nigi nying maber . . . Kuom adier, wan bende wachiwo neno kuome, kendo ung’eyo ni neno ma wachiwono en adier.” (3 Joh. 12) Nyalo bedo ni Demetrio ne dwaro ni mondo Gayo okonye, kendo barua mar adek ma Johana nondiko nonyiso ni Demetrio ne en ng’a, kendo nowacho gimomiyo nowinjore okonye. Nenore ni Demetrio owuon e ma notero ne Gayo baruano. Samoro Demetrio ne en achiel kuom joma Johana ne oroga kata jarit-alwora, kuom mano, nyaka bed ni nojiwo wach ma Johana nondiko.

Ang’o momiyo Johana nojiwo Gayo mondo odhi nyime rwako welo kata obedo ni notimoga kamano? Dibed ni Johana ne dwaro jiwo Gayo mondo omed bedo jachir? Dibed ni jaoteno ne parore ni Gayo ne nyalo weyo rwako welo nikech Diotrefe ne riembo Jokristo ma ne rwako welo? Kata bed ni ang’o ma ne timore, Johana nojiwo Gayo ka nowachone niya: “Ng’at ma timo gik mabeyo en ng’at ma Nyasaye chiko.” (3 Joh. 11) Ng’eyo wachno onego ochwalwa mondo wadhi nyime timo maber kinde duto.

Be barua ma Johana nondiko ne Gayo nojiwe mondo odhi nyime rwako welo? Bedo ni  barua mar Adek mar Johana noket e Muma kendo noti kode e jiwo jomamoko mondo ‘oluw gima ber,’ nyiso ni baruano nojiwo Gayo.

Weche machuok ma Johana nowacho e wi Gayogo kende e ma wang’eyo. Kata kamano, weche machuok ma wanono e wi ngima Gayo nyalo puonjowa weche mathoth.

Mokwongo, nitie jomoko kuomwa ma ne opuonjore adiera nikech owete gi nyimine moko nochiwore wuok kuonde maboyo mondo obi opuonjgi. En adier ni e kindegi thoth Jokristo ok dhi kuonde maboyo mondo giland wach maber. Kata kamano, mana kaka Gayo, wan bende wanyalo konyo kendo jiwo owete kod nyimine ma dhi kuonde maboyo kaka jorit-alwora kaachiel gi mondegi. Kata wanyalo konyo owete gi nyimine modhi lendo kuonde ma jolendo dwaroree moloyo e pinjegi giwegi kata e pinje mamoko. Omiyo, wadhiuru nyime bedo gi “tim mar rwako welo.”—Rumi 12:13; 1 Tim. 5:9, 10.

Mar ariyo, ok onego wawuor sama jomoko temo kwedo yo ma jodongo tayogo kanyakla, ma bende ok en tim monya ahinya. Nitie joma nokwedo yo ma Johana kod Paulo ne tayogo weche e kanyakla. (2 Kor. 10:7-12; 12:11-13) Kuom mano, onego watim nang’o sama waromo gi pek ma kamano e kanyakla? Paulo nonyiso Timotheo niya: “Misumba Ruodhwa ok onego odhaw, to dwarore ni obed ng’at mamuol gi ji duto, ma nigi nyalo mar puonjo, ma nyiso ritruok sama okethne, ng’at ma puonjo jo akwede e yor muolo.” Ka wabedo mamuol kata sama jomoko okinyowa, joma kamago nyalo chako loko pachgi mos mos. Nikech mano, dipo ka Jehova “omiyo giloko chunygi gia e richo mi gibed gi ng’eyo malong’o kuom adiera.”—2 Tim. 2:24, 25.

Mar adek, onego wapwo Jokristo wetewa ma dhi nyime makore motegno gi Jehova kata obedo ni ikwedogi ahinya. Jaote Johana nopwoyo Gayo kendo nojiwe konyise ni notimo gima ber. Jodong-kanyakla bende onego oluw ranyisi mar Johana e jiwo owete gi nyimine mondo kik ginyosre.—Isa. 40:31; 1 The. 5:11.

Barua ma Johana nondiko ne Gayo ne nigi weche 219 e dho Grik, omiyo en e buk machiekie mogik e Muma. Kata kamano, bugno nigi weche ma konyo Jokristo ahinya e kindegi.