1, 2. (a) Weche ma Yesu nowacho e Mathayo 24:12 nokwongo otudore gi jomage? (b) Bug Tich Joote nyiso nade ni Jokristo mokwongo nodhi nyime nyiso hera? (Ne picha man malo.)

ACHIEL kuom gik ma Yesu nowacho ma ne dhi nyiso ni “giko mar ndalo okayo machiegni” en ni “hera mar ji mang’eny [ne dhi bedo] mang’ich.” (Mat. 24:3, 12) E kinde Jokristo mokwongo, Jo-Yahudi ma ne wacho ni gin jo Nyasaye noweyo hera ma ne giherogo Nyasaye odok chien.

² To komachielo, thoth Jokristo e kindego ne odich ahinya gi tij “lando wach maber e wi Kristo” kendo ne ginyiso ni gihero Nyasaye, ni gihero Jokristo wetegi, kendo ni gihero jomamoko ma ne ok gin Jokristo. (Tich 2:44-47; 5:42) Kata kamano, moko kuom jolup Yesu e kindego noweyo heragi obedo mang’ich.

3. Ang’o mane nyalo miyo hera mar Jokristo moko odog chien?

³ Ka ne Yesu Kristo wuoyo gi Jokristo ma ne odak Efeso, nonyisogi niya: ‘An gi wach kodi, ni iseweyo hera ma ne in-go kar chakruok.’ (Fwe. 2:4) Ang’o ma ne nyalo miyo Jokristogo owe  hera ma ne gin-go mokwongo? Nyalo bedo ni Jokristogo nosechako luwo kit timbe mag jopiny ma ne dwaro mana timo gik ma morogi giwegi. (Efe. 2:2, 3) Efeso ne opong’ gi timbe mag anjawo mana kaka taonde mang’eny e kindegi. Nikech ne en taon mopong’ gi mwandu, ji mang’eny nodich gi dak e ngima mayom kod manyo mor. Ne giherore gin giwegi kar hero Nyasaye kod jomamoko. E wi mano timbe modwanyore mag wang’ teko kod terruok nonya.

4. (a) Hera osedok chien e yore mage e kindewagi? (b) Gin weche mage adek ma nyaka wanyisie herawa?

⁴ Weche ma Yesu nokoro ni hera ne dhi bedo mang’ich en gima timore e ndalowagi bende. E kindegi, ji mang’eny ok ohero Nyasaye. Ji mang’eny oseweyo Nyasaye kendo giketo genogi kuom riwruoge mag dhano mondo otieknegi chandruoge. Omiyo, hera mar joma ok lam Jehova medo mana dok chien. Mana kaka hera mar Jokristo moko e kanyakla mar Efeso nodok chien, wan bende gima kamano nyalo timorenwa ka ok watang’. Koro wadwaro nono weche moko adek ma nyaka wanyisie herawa: (1) Hera ma waherogo Jehova, (2) hera ma waherogo adiera mag Muma, (3) kod hera ma waherogo owetewa.

5. Ang’o momiyo nyaka waher Nyasaye?

⁵ E odiechieng’ ma Yesu nowache ni hera mar ji mang’eny ne dhi dok chien, nowuoyo e wi ng’at monego waher moloyo. Nowacho niya: “‘Nyaka iher Jehova Nyasachi gi chunyi duto, kendo gi ngimani duto, kendo gi pachi duto.’ Mani e chik maduong’ie moloyo kendo mokwongo.” (Mat. 22:37, 38) Kuom adier, hero Jehova gi chunywa duto biro konyowa mondo waluw chikene, wadhi nyime nano, kendo wasin gi gik maricho. (Som Zaburi 97:10.) Kata kamano, Satan kaachiel gi pinye marachni temo ahinya duoko chien hera ma waherogo Nyasaye.

6. Nikech ji mang’eny oseweyo hero Nyasaye, mano osemiyo ngimagi obedo nade?

⁶ Ji mang’eny e piny sani nigi paro ma ok owinjore e wi hera. Kar mondo giher Jachuech, gin ‘giherore giwegi.’ (2 Tim. 3:2) Piny ma Satan lochoeni jiwo “gombo mag ringruok, gi gombo mag wang’, kod nyisruok nikech gik ma ng’ato nigo e ngima.” (1 Joh. 2:16) Jaote Paulo nosiemo Jokristo ni kik gitim gombo mag ringruok ka nowacho niya: “Keto paro kuom ringruok kelo tho . . . nimar keto paro kuom ringruok kelo sigu gi Nyasaye.” (Rumi 8:6, 7) Adier, joma osebedo ka tiyo gi thuologi duto e manyo mwandu kata chopo gombo maricho mag nindruok osebedo gi lit mang’eny ahinya e ngimagi.—1 Kor. 6:18; 1 Tim. 6:9, 10.

7. En wach mane matek ma jolup Kristo romogo e kindegi?

⁷ E pinje moko, joma ok oyie kuom Nyasaye kod joma wacho ni gik moko nosieko kendgi, jiwo paro moko ma miyo ji ok her Nyasaye kendo ok bed gi yie kuome. Jogo wacho ni joma ofuwo kende e ma oyie ni Nyasaye nitie. Josayans bende omi luor mokalo ma miyo wi ji wil gi Jachuechwa. (Rumi 1:25) Ka wachiko itwa ne puonj ma kamago, mano nyalo miyo wabed mabor gi Jehova kendo herawa nyalo dok chien.—Hib. 3:12.

8. (a) Jotich Jehova mathoth romo gi gik mage ma nyoso chuny? (b) Ndiko mar Zaburi 136 jiwowa nade?

⁸ Seche ma chunywa onyosore, mano nyalo miyo yiewa obed ma yom yom kendo hera ma waherogo Nyasaye nyalo dok chien. E piny marach ma Satan locheni,  waduto waromoga gi gik ma nyoso chunywa. (1 Joh. 5:19) Samoro gie sani waromo gi chandruoge moko nikech bedo moti, tuoche, kod weche matek mag yuto. Kata chunywa nyalo nyosore nikech waneno ni wan joma nono, samoro weche ne ok odhinwa kaka ne waparo, kata samoro nitie gik ma ne ok watimo kaka dwarore. Kata kamano, ok onego wawe gik ma kamago omi wachak neno ni Jehova ojwang’owa. Kar mano, onego wapar matut weche ma nyiso kaka Jehova oherowa kinde duto. Weche kaka mago yudore e Zaburi 136:23 (Luo New Testament, 2003). Zaburino wacho niya: ‘Noparowa ka piny ochamowa, herane osiko nyaka chieng’.’ Kuom adier, hera ma Jehova oherogo jotichne osiko nyaka chieng’. Omiyo, wanyalo bedo gadier ni owinjo ‘wechewa ma wasayego’ kendo odwokowa.—Zab. 116:1; 136:24-26.

9. Ang’o ma nokonyo Paulo mondo osik kohero Jehova?

⁹ Mana kaka jandik zaburi, Paulo bende noyudo teko kuom paro kaka Jehova konyowa kinde duto. Nondiko niya: “Jehova e jakonyna; ok analuor gimoro. En ang’o ma dhano ditimna?” (Hib. 13:6) Bedo gadier ni Jehova oikore konyowa nomiyo Paulo onyagore gi chandruoge ma ne oromogo e ngimane. Ne ok oweyo mondo chandruoge onyos chunye. Nondiko barupe mathoth ma jiwo Jokristo wetene ka ne en e jela. (Efe. 4:1; Fil. 1:7; File. 1) Ee, kata mana e bwo tembe mager, Paulo nodhi nyime hero Nyasaye. Noyudo teko kanye mar timo kamano? Nodhi nyime keto geno kuom “Nyasach hoch duto, ma hoyowa e masichewa.” (2 Kor. 1:3, 4) Ranyisi mar Paulo nyalo konyowa nade mondo wasik ka wahero Jehova?

10. Ang’o ma nyalo konyowa mondo hera ma waherogo Jehova osik kotegno?

¹⁰ Jaote Paulo nyisowa achiel kuom gik ma nyalo konyowa mondo wadhi nyime hero Jehova. Nondiko ne Jokristo wetene niya: “Lamuru kinde duto.” Bang’e nondiko kama: “Lamuru ma ok uwe.” (1 The. 5:17; Rumi 12:12) Lamo e gima duong’ ma nyalo konyowa mondo wabed gi winjruok maber gi Nyasaye. (Zab. 86:3) Ka wakawo kinde moromo mar nyiso Jehova gik moko duto manie chunywa ma iye, mano miyo wawinjo ka wan machiegni ahinya gi Wuonwa manie polo ma en ‘Jawinj kwayo mag ji.’ (Zab. 65:2) E wi mano, sama waneno kaka Jehova dwoko lamowa, mano miyo wamedo here, kendo wamedo fwenyo ni ‘Jehova chiegni gi ji duto ma luongo nyinge.’ (Zab. 145:18) Bedo gadier ni Jehova oherowa kinde duto biro konyowa dhi nyime nyagore gi tembe ma wanyalo romogo.

11, 12. Ang’o ma nyalo konyowa mondo waher adiera mag Muma gi chunywa duto?

¹¹ Wan kaka Jokristo, wahero adiera manie Muma kendo wageno adierago ahinya. Wach Nyasaye kende e ma nyalo puonjowa adiera. Ka ne Yesu lemo, nonyiso Wuon-gi niya: “Wachni en adiera.” (Joh. 17:17) Kuom mano, mondo wanyis ni wahero adiera, nyaka wakwong wang’e Wach Nyasaye e yo malong’o. (Kol. 1:10) Kata kamano, mako ndiko mang’eny e wiwa kende ok oromo. Weche ma jandik Zaburi sula mar 119 nowacho konyowa ng’eyo tiend hero adiera manie Muma. (Som Zaburi 119:97-100.) Onego wapenjre kama, Be akawoga thuolo mar paro matut weche manie Ndiko odiechieng’ kodiechieng’? Neno kaka adiera  manie Muma konyo e ngimawa biro miyo wamed herogi.

¹² Jandik zaburi nomedo wacho kama: “Wecheni mit nadi e dhoga! Ee, mit moloyo mor kich e dhoga!” (Zab. 119:103) Wan bende onego wabed gi siso mar chamo chiemb chuny ma riwruok mar oganda Jehova miyowa. Timo mano biro miyo wang’e “weche ma ji morgo” mag adiera, kendo biro bedo mayot mondo wapargi e ka wakonygo jomoko.—Ekl. 12:10.

13. Ang’o ma nokonyo Jeremia mondo oher adiera manie Muma, to mano nojiwe nade?

¹³ Janabi Jeremia nohero adiera manie Ndiko. Nee kaka wach Nyasaye nomulo chunye. Nowacho kama: “Wecheni noyudore, mi napidhora kodgi; kendo wecheni nomiya mor, chunya nomor kodgi: ni mar oluonga gi nyingi, A Jehova Nyasaye mar ogendini mag lueny.” (Yer. 15:16) Jeremia noparo matut weche Nyasaye kendo noherogi gadier. Timo kamano nomiyo okaw mapek thuolo ma jaber ma ne en-go mar bedo ng’at miluongo gi nying Nyasaye. Be hera ma waherogo adiera mag Muma konyowa fwenyo ni wan-gi thuolo ma jaber mar bedo joma iluongo gi nying Nyasaye, kendo ma lando Pinyruodhe e ndalo mag gikogi?

14. Ere kaka wanyalo medo hero adiera manie Muma?

¹⁴ Mopogore gi somo Muma kod bugewa malero Muma, en ang’o machielo ma nyalo konyowa dhi nyime hero adiera mag Muma? En dhi e chokruoge mag kanyakla ma ok wabare. Puonjruok Muma juma ka juma ka watiyo gi Ohinga mar Jarito en achiel kuom yore madongo ma ipuonjowago. Mondo weche ma ipuonjo odonjnwa, nyaka waik Ohinga mar Jarito adimba. Yo achiel ma wanyalo timogo kamano en nono ndiko duto moket e paragraf. E kindegi, ng’ato nyalo golo Ohinga mar Jarito e jw.org kata onyalo some e JW Library e dhok mowinjo. Nitiere simbe kata tablet moko ma konyowa yudo ndiko mag Muma e yo ma yot seche ma wapuonjore Ohinga mar Jarito. Kata bed ni watiyo gi yo mane, gima duong’ en  ni somo ndikogo duto adimba kendo paro kuomgi matut biro miyo wamed hero adiera manie Muma.—Som Zaburi 1:2.

15, 16. (a) En ting’ mane ma wan-go kaluwore gi Johana 13:34, 35? (b) Hera ma waherogo owetewa otudore nade gi hera ma waherogo Nyasaye kod Muma?

¹⁵ E otieno mogik ka ne Yesu ni e piny ka, nonyiso jopuonjrene kama: “Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena—ka un gi hera e kindu uwegi.”—Joh. 13:34, 35.

¹⁶ Ka wahero Jehova gadier, to nyaka waher owete gi nyiminewa. Onge kaka wanyalo hero Jehova to ok wahero owetewa, to bende onge kaka wanyalo hero owetewa to ok wahero Jehova. Jaote Johana nondiko kama: “Ng’at ma ok ohero owadgi moseneno gi wang’e ok nyal hero Nyasaye ma pok oneno.” (1 Joh. 4:20) E wi mano, hera ma waherogo Jehova gi owetewa bende otudore gi hera ma waherogo adiera manie Muma. Nikech ang’o? En nikech hero adiera manie Muma chwalowa mondo waluw chike duto manie Ndiko, kendo chwalowa mondo waher Nyasaye kod owetewa.—1 Pet. 1:22; 1 Joh. 4:21.

17. Gin yore mage ma wanyalo nyisogo ni wahero owetewa?

¹⁷ Som 1 Jo-Thesalonika 4:9, 10. Gin yore mage ma wanyalo nyisogo ni wahero owete gi nyimine e kanyaklawa? Owadwa kata nyaminwa moro moseti nyalo dwaro ni wakonye mondo ochop e chokruoge. Nyaminwa ma en chi liel nyalo dwaro ni walosne kamoro ma okethore e ode. (Jak. 1:27) Owete gi nyimine duto, bed ni gin joma tindo kata joma dongo, romo gi gik ma nyalo nyoso chunygi, kata tembe moko ma nyalo dwaro ni wakonygi, wajiwgi, kendo, wahogi. (Nge. 12:25; Kol. 4:11) Wanyiso ayanga ni wahero “joma wan-go e yie” kokalo kuom wechewa kod timbewa.—Gal. 6:10.

18. Ang’o ma biro konyowa mondo watiek chwanyruok moko matindo tindo e kindwa gi owetewa?

¹⁸ Muma nokoro ni e “ndalo mag giko,” ji ne dhi bedo joma oherore giwegi kendo joma ngudi. (2 Tim. 3:1, 2) Omiyo, wan kaka Jokristo nyaka watem matek mondo hera ma waherogo Nyasaye, Muma, kod owetewa omedre. En adier ni wanyalo bedo gi chwanyruok moko matindo tindo e kindwa gi owetewa. Kata kamano, en gima ber ahinya neno kaka hera ma waherorego konyowa mondo walos gik ma chwanyowago e yo maber! (Efe. 4:32; Kol. 3:14) Omiyo, watimuru duto ma wanyalo mondo herawa kik bed mang’ich! Kar mano, wadhiuru nyime hero Jehova, hero Wachne, kendo hero owetewa.