NIKECH wadak e piny mopong’ gi chandruok, nyaka watim kinda mondo wabed gi kuwe. To e ma podi kata sama wan gi kuwe moro matin, bedonwaga matek mondo wasik ka wan gi kuweno. Ang’o ma Muma wacho ma nyalo konyowa mondo wayud kuwe madier kendo mosiko? To ere kaka wanyalo konyo jomoko mondo obed gi kuwe ma kamano?

Mondo wabed gi kuwe madier, nyaka wakwong wane ni wan gi arita maber kendo wan gi chuny mokuwe. Bende nyaka watim matek mondo wabed gi winjruok maber gi jomoko. To maduong’ie moloyo, nyaka wamak osiep motegno gi Nyasaye mondo wabed gi kuwe mosiko. Ere kaka wanyalo timo mano?

Sama waluwo chike makare mag Jehova kod puonjne, wanyiso ni wagene kendo ni wagombo ahinya bedo gi kuwe e kindwa kode. (Yer. 17:7, 8; Jak. 2:22, 23) Mano miyo osudo machiegni kodwa kendo oguedhowa kuom miyowa kuwe. Isaiah 32:17 wacho niya: “Tich tim makare nokel kuwe, kendo tim makare nomi chuny ji bedo gi kuwe kod geno ndalo duto.” Wanyalo yudo kuwe madier kuom luwo puonj mag Jehova gi chunywa duto.​—Isa. 48:18, 19.

Gima chielo ma nyalo konyowa mondo wabed gi kuwe mosiko en mich makende ma Wuonwa manie polo omiyowa ma en roho maler.​—Tich 9:31.

Jaote Paulo kwano kuwe kaka olemo mar adek ma roho maler nyago. (Gal. 5:22, 23) To nikech roho mar Nyasaye e ma miyo ng’ato bedo gi kuwe, nyaka waluw kaka rohono tayowa mondo wabed gi kuwe.

 Mokwongo, somo Wach Nyasaye pile ka pile konyowa mondo wabed joma ohero kuwe. (Zab. 1:2, 3) Sama waparo matut weche manie Wach Nyasaye, roho maler mar Nyasaye biro konyowa mondo wane gik moko kaka Jehova nenogi. Kuom ranyisi, wabiro neno kaka ohero kuwe kod gimomiyo oneno kuwe kaka gima duong’ ahinya. Seche ma watiyo gi puonj ma yudore e Wach Nyasaye, wabedo gi kuwe mathoth.​—Nge. 3:1, 2.

Mar ariyo, nyaka walem mondo Nyasaye omiwa rohone maler. (Luka 11:13) Jehova singonwa ni ka wakwaye mondo okonywa, “kuwe mar Nyasaye ma loyo ng’eyo duto biro rito [chunywa kod pachwa] kokalo kuom Kristo Yesu.” (Fil. 4:6, 7) Sama walemo mondo Jehova omiwa rohone, omiyowa kuwe makende ma joma nigi osiep maber kode kende e ma nyalo yudo.​—Rumi 15:13.

Ere kaka joma osetiyo gi puonj mowuok e Ndikono osetimo lokruoge ma dwarore ma gibedo gi kuwe e kindgi gi Jehova, gin giwegi, kod dhano wetegi?

Nitie Jokristo moko e kanyakla ma chon ne ‘igi wang’’matek to tinde gin joma nigi ritruok, joma ng’won, joma hore, kod joma nigi kuwe e kindgi gi jomoko. * (Nge. 29:22) Ne ane gima notimore ne jolendo moko ariyo ma ne igi wang’ga matek to ne okonygi ma giweyo timno ma gibedo gi kuwe gi jomamoko.

Achaya ma David ne nigo ne miyo owuoyo gi ji marach. Ka ne pok ong’eyo adiera, ne osiko ojaro ji kendo nowuoyoga mager gi joodgi. Bang’ kinde, noneno gimomiyo ne dwarore ni otim lokruok mondo obed gi kuwe. Ang’o ma nokonye mondo obed gi kuwe? Owacho niya, “Ne achako tiyo gi puonj mag Muma e ngimana to mano nomiyo achako miyo joodwa luor.”

Yo ma Rachel nopon-go nomiyo obedo ng’at ma iye wang’. Owacho niya, “Nikech ne adongo e ot ma ji te ger, pod akedo matek nyaka sani mondo iya kik wang’ mokalo  tong’.” Ang’o ma ne okonye mondo obed ng’at ma ohero kuwe? Owacho niya, “Nalemoga kinde duto mondo Jehova okonya.”

Ranyisi mar David, Rachel kaachiel gi jomamoko mathoth nyiso kaka ng’ato nyalo bedo gi kuwe sama oyie tiyo gi puonj mag Muma kendo oyie mondo roho mar Nyasaye okonye. Nenore maler ni kata obedo ni wadak e piny ma onge kuwe, pod wanyalo bedo gi kuwe ma miyo wabedo gi winjruok maber gi joodwa kod Jokristo wetewa. Kata kamano, Jehova pod jiwowa ni ‘wadag gi kuwe gi ji duto.’ (Rumi 12:18) Be timo kamano nyalore? To gin ber mage ma wayudo sama watemo matek mondo wadag gi kuwe gi ji duto?

Sama wan e tij lendo, wagwelo ji mondo giwinj ote mar kuwe ma walando e wi Pinyruodh Nyasaye ma nyalo konyogi. (Isa. 9:6, 7; Mat. 24:14) Gima ber en ni ji mang’eny oserwako oteno. Nikech mano, tinde chunygi ok chandre kata igi ok wang’ mokalo tong’ sama gineno gik maricho ma timore e piny. Kar mano, sani gin gi geno madier e kinde mabiro kendo mano chwalogi mondo ‘gidwar kuwe kendo giluwe.’​—Zab. 34:14.

Kata kamano, nitie jomoko ma ok rwakga wach ma walando. (Joh. 3:19) To pod roho mar Nyasaye konyowa mondo walandnegi wach maber e yor kuwe kod luor. Sama watimo kamano waluwo gima Yesu nonyisowa e Mathayo 10:11-13 niya: “Sama udonjo e ot, mosuru joodno. Ka odno owinjore, to kuwe maru mondo obed kuome; to ka ok owinjore, to kuwe maru mondo oduognu.” Sama watimo kamano e kinde ma ji ok orwako wach, wanyalo dhi nyime bedo gi kuwe ma wan-go ka wan gi geno ni ng’atno biro winjo wach e kinde mabiro.

Bende wanyiso ni wan gi kuwe sama watudore gi jotelo manie sirkal e yor luor moriwo nyaka joma kwedo tijwa mar lendo. Kuom ranyisi, sirkal moro e pinje mag Afrika ma ne ok dwar tijwa mar lendo notamore miyo owete gi nyiminewa thuolo mar gero Ute Romo. Nikech ne wan gi geno ni ne inyalo los wachno e yor kuwe, ne oor owadwa moro ma chon ne en jamisonari e pinyno mondo odhi owuo gi jambetre mar piny Afrikano, ma ne ni London, England. Owadwano ne dhi nyiso jatelono tich ma Joneno mag Jehova timo gi kuwe e piny Afrikano. Weche ne obedo nade?

Owadwano wacho niya: “Kane achopo kama irwakoe welo, ne afwenyo ni nyako ma ne tiyo kanyo ne wuok e piny Afrikano kendo ne ang’eyo dhok ma ne owacho kaluwore gi yo ma ne orwakorego. Omiyo ne amose gi dhok ma ne giwacho thurgi. Nowuoro ahinya ma openja ni, ‘Ang’o ma okeli kae?’ Nanyise e yo mamuol ni daher wuoyo gi jambetre. Ne ogochone jatelono kae to obiro ma omosa gi dhoggi. Bang’ mano ne ochiko ite mos ka alerone tich ma Joneno timo gi kuwe.”

Luor ma owadwano nonyiso sama ne owuoyo gi jatelono nomiyo jatelono oweyo bedo gi paro maricho ma ne en-go e wi tijwa. Kinde moko bang’e, sirkal manie piny Afrikano nomiyo owetewa thuolo mar gero Ute Romo. Mano kaka owetego ne mor matek ni bedo gi kuwe gi ji duto ne okonyogi! En adier ni miyo jomoko luor kelo ber mathoth moriwo nyaka bedo gi kuwe.

E kindegi, jotich Jehova ni e paradiso mar ranyisi kendo gin gi kuwe e kindgi. Ibiro miyo kuwe ma kamano odhi nyime ka ibedo ng’at ma ohero kuwe ma en olemo ma roho mar Nyasaye konyowa nyago. To maduong’ie moloyo, ibiro bedo osiep Jehova kendo ibiro dak gi kuwe nyaka chieng’ e piny manyien.​—2 Pet. 3:13, 14.