1. Ang’o momiyo Jokristo wetewa moko yudoga ka puonjruok Muma ok yot?

E KINDEGI, ji mang’eny nyaka ti matek e ka giyud gik ma gikonyorego. Thoth owetewa tiyo kuom seche mang’eny mondo joodgi oyud chiemo, lewni, ot, kod gik mamoko mochuno. Bende, thothgi wuotho kuom seche mang’eny ka gidhi tich kendo ka gia tich. Moko kuomgi bende tiyo tij lwedo ma dwaro teko mang’eny. Odiechieng’ rumoga ka owetewa gi nyiminewa ma tiyo matekgo ojony ahinya, ma kata mana puonjruok Muma ok bednegi mayot.

2. In ipuonjoriga sa adi?

² Adiera en ni nyaka wamany thuolo mar puonjore Wach Nyasaye kod bugewa ma lero Muma e yo matut. Mondo wabed gi winjruok maber gi Jehova kendo wayud ngima mochwere, nyaka wapuonjre Muma. (1 Tim. 4:15) Jomoko chiewoga okinyi mang’ich mondo gipuonjre sama piny pod okue kendo pachgi pod liw. Jomoko to timoga kinda mondo gipuonjre kuom dakika matin gotieno sama onge gik mathoth ma chando pachgi.

3-4. Gin lokruoge mage mosetim motudore gi chiemb chuny ma wasomo, to nikech ang’o?

³ Nyaka bed ni in bende ineno ni manyo thuolo mar puonjruok en gima dwarore. Gin gik mage monego wapuonjre? Samoro inyalo wacho ni, ‘Gik monego asom thoth ma akia ka be abiro tieko somogi te.’ Jomoko nyaloga chamo chiemb chuny duto e sama gibireeno, kata kamano, thoth owete gi nyimine to ok yud thuolo mag chamo chiemogo duto. Bura Matayo ong’eyo mano maber. Mano e momiyo, machiegnini Bura Matayo noyiero mar chiwo mana weche matin misomo, bed ni igoyogi e otas kata isomogi e intanet.

⁴ Kuom ranyisi, tinde ok wago bug Kitabu cha Mwaka cha Mashahidi wa Yehova nikech tinde weche mathoth ma owete gi nyimine romogago iketonwa e jw.org^® kod e JW Broadcasting^®.  Gaset mar Ohinga mar Jarito milendogo kod Amkeni! tinde igoyo mana didek kende e higa. Lokruogego ok otim mondo wayud thuolo momedore mar timo gigewa wawegi. Otim lokruogego mondo wayud thuolo mar keto pachwa kuom “gik ma dwarore moloyo.” (Fil. 1:10) We wane ane kaka inyalo yiero gik monego iket motelo kod gima inyalo timo mondo puonjruokni iwuon omed keloni ber mathoth.

5-6. Gin buge mage monego wapuonjre adimba?

⁵ Sama wapuonjore, ang’o monego obed motelo? Onego wamany thuolo odiechieng’ kodiechieng’ mondo wapuonjre Wach Nyasaye. Sula mag Muma miketonwaga mondo wasom e somo mar Muma ma juma ka juma osedwok piny mondo wayud thuolo malach mar paro matut kuom gik ma wasomo kod timo nonro momedore. Dwachwa maduong’ en ni weche ma ni e Muma omul chunywa kendo gikonywa sudo machiegni gi Jehova, to ok somogi asoma mana nikech onyiswa ni wasomgi.​—Zab. 19:14.

⁶ En ang’o machielo monego wapuonjre adimba? Onego waikrega maber ne Puonjruok mar Ohinga mar Jarito kod Puonjruok Muma e Kanyakla, kaachiel gi weche mamoko monego wapuonjre e chokruok ma kor juma. Bende, onego wasomga gasede duto mag Ohinga mar Jarito kod Amkeni! sa asaya ma wayudo manyien.

7. Be chunywa onego onyosre ka po ni ok wanyal somo weche duto kata neno vidio duto miketonwaga e websaitwa kod e JW Broadcasting?

⁷ Samoro inyalo wacho ni, ‘Gik mosekwan-go gin agina kare, to nade gik miketonwaga e jw.org kod JW Broadcasting? Gigo ng’enyna ma!’ Ne ane ranyisini: Wawach ni oket chiemo mathoth kendo mamit e mesa moro maduong’ e otel. Kastembe duto mobiro ok bi nyalo chamo gik moko te man kanyo. Omiyo, giyiero mana chiemo matin ma ginyalo chamo. E yo ma chalo kamano, ka po ni ok inyal somo weche duto kata neno gik moko duto ma iketonwaga e websaitwa, kik chunyi nyosre. Tim mana kar minyalo. Koro, we wane gima puonjruok en kod gima wanyalo timo mondo puonjruokwa omed konyowa moloyo.

8. Gin okenge mage monego waluw sama waikore ne Puonjruok mar Ohinga mar Jarito, to timo kamano biro konyi nade?

⁸ Puonjruok en somo gimoro gi kinda ka waketo pachwa duto e gima wasomo mondo wawuog gi gimoro. Ok en somo asoma weche awiye awiye ka ikiewo dwoko ma dwarore. Kuom ranyisi, sama iikori ne Puonjruok mar Ohinga mar Jarito, kwong isom kama ondik ni, “Gima Sulani Wuoye” ma iketoga e chak sula ka sula mar puonjruok. Bang’ mano, non wich maduong’ ma sulano wuoyoe kod wiye matindo tindo kaachiel gi penjo mag nwoyo puonj. Kae to som sulano adimba ma ok irikni. Non sentens ka sentens ma ichakogo paragraf nikech sentensgo e ma biro konyi ng’eyo gima paragraf ka paragraf wuoye. Sama isomo sula mar puonjruok, tem neno kaka paragraf ka paragraf jiwo wiye matindo kod kaka gitudore gi wich maduong’ ma sulano wuoye. Ndik weche moko ma ok ing’eyo tiendgi kata ma ok donjni maber mondo itim nonro bang’e.

9. (a) Ang’o momiyo onego wanon ndiko moket e Ohinga mar Jarito mar puonjruok, to onego watim mano e yo mane? (b) Ka luwore gi Joshua 1:8, ang’o monego watim mopogore mana gi somo ndiko?

⁹ Ohinga mar Jarito mar puonjruok konyowa winjo tiend weche ma ni e Muma. Omiyo, non ndiko moket e sula mar puonjruok, to ahinya-ahinya ndiko mowach ni  onego osom sama kanyakla puonjore sulano. Tem ane neno kaka weche madongo ma ni e ndikogo jiwo wach miwuoye e paragraf. E wi mano, kaw thuolo mondo ipar matut e wi ndiko ma ni e sulano kendo item paro kaka inyalo tiyo kodgi e ngimani.​—Som Joshua 1:8.

10. Ka luwore gi Jo-Hibrania 5:14, ang’o momiyo jonyuol onego oti gi thuolo moko e lamo mar joot e konyo nyithindgi ong’e kaka ginyalo puonjore Muma e yo matut kod timo nonro?

¹⁰ En adier ni jonyuol dwaroga ni Lamo mar Joot ma gitimoga juma ka juma omor nyithindgi. Kata obedo ni jonyuol onego ochan-ga chon gima gibiro puonjore e lamo mar joot, ok ochuno ni nyaka gitim gimoro makende e lamogino juma ka juma. Kata obedo ni joot nyalo neno JW Broadcasting kata timo gimoro makende kaka loso yie Noa, dwarore ni okony nyithindo mondo ging’e kaka ginyalo puonjore Muma e yo matut. Kuom ranyisi, onego gipuonjre ng’eyo kaka ginyalo iko chokruok kod kaka ginyalo timo nonro e wi weche ma giromogo e skul. (Som Jo-Hibrania 5:14.) Ka gikawoga thuolo mondo gipuonjre e yo matut weche moko ma ni e Muma ka gin ot, biro bedonegi mayot mondo giket pachgi e gik mipuonjo sama gidhi e chokruoge mag kanyakla, mag alwora, kod mag ndalo adek, ma seche moko ok bedga gi vidio. En adier ni thuolo ma ubiro tiyogo e puonjruok biro luwore gi hik nyithindo ma un-go kod kitgi.

11. Ang’o momiyo onego wakony joma wapuonjo Muma mondo ging’e kaka ginyalo puonjore Muma e yo matut ka gin kendgi?

¹¹ Joma wapuonjo Muma bende onego ong’e kaka ginyalo puonjore Muma e yo matut sama gin kendgi. Sama e ka gichako puonjore, wabedoga ma mor sama gikiewo dwoko mag penjo ka giikore ne puonjruok kata ne chokruok. Kata kamano, onego wapuonjgi kaka ginyalo timo nonro kod kaka ginyalo puonjore Muma e yo matut. Ka watimo kamano, sama giromo gi chandruok moro, gibiro ng’eyo kaka ginyalo timo nonro e wi chandruogno e bugewa kar ringo dhi manyo kony mapiyo piyo kuom jomamoko e kanyakla.

12. Sama wapuonjorega, watimoga kamano nikech ang’o?

¹² Ka po ni in ng’at ma ok oheroga somo, samoro inyalo wacho ni puonjruok ok nyal bedo ma mit. Kata kamano, puonjruok pod nyalo bedo ma mit. Inyalo chako tiyo gi thuolo matin-matin e puonjruok kae to inyalo medo thuolo kaka kinde medo kalo. Puonjri gi gimomiyo. Dwachwa maduong’ en medo sudo machiegni gi Jehova. E wi  mano, seche ma wapuonjore, samoro watimo kamano nikech nitie penjo moro ma ng’ato nopenjowa monego wadwoke, kata wadwaro timo nonro e wi chandruok moro ma wan-go.

13. (a) Ler ane okenge ma nyalo konyo rawera ma pod somo mondo osir puonj mag Muma kama osomee. (b) Ere kaka inyalo luwo puonj ma yudore e Jo-Kolosai 4:6?

¹³ Kuom ranyisi, dibed ni pod in rawera ma somo? Nyalo bedo ni joklasu duto oyie gi puonj ma wachoga ni gik moko nosieko kendgi ma ok ochuegi. Samoro diher nyisogi ni Muma e ma puonjo adier, en mana ni samoro ineno ni ok inyal timo kamano e yo maber. Mano koro biro dwaro ni ipuonjri e yo matut. Sama itimo kamano, onego iket pachi kuom weche ariyo: (1) med tego yie ma in-go ni Nyasaye e ma nochueyo gik moko duto, kod (2) med lony ma in-go e lero adiera mag Muma. (Rumi 1:20; 1 Pet. 3:15) Mokwongo onego ipenjri ni, ‘Gin weche mage ma joklaswa tiyogo ka gisiro puonj ma wacho ni gik moko nosieko kendgi?’ Kae to itim nonro matut kitiyo gi bugewa. Ibiro yudo ka siro puonj mag Muma bedo mayot moloyo kaka niparo. Ji mang’eny oyie gi puonjno mana nikech ng’at moro ma gimiyo luor nonyisogi ni puonjno en adier. Kiyudo wach achiel kata weche ariyo bang’ timo nonro, inyalo konyo ng’at ma dwaro ng’eyo wachno gadier.​—Som Jo-Kolosai 4:6.

14-16. (a) Inyalo timo nang’o mondo ing’e weche mathoth e wi buk moro ma ni e Muma ma ok ing’eyo ahinya? (b) Kitiyo gi ndiko moket e paragraf, ler ane kaka inyalo ng’eyo weche mathoth e wi bug Amos. (Ne bende sanduk ma wiye wacho ni, “ Tem Neno Joma Iwuoyo Kuomgi e Muma Kaka Joma ne Nitie Gadier!”)

¹⁴ Wawach ni nitie migawo moro e chokruok ma biro wuoyo e wi achiel kuom buge machieko chieko moting’o weche ma ne okor, to samoro ok ing’eyo weche mathoth e wi janabi ma nondike. Gima onego ikwong itim en bedo gi siso mar ng’eyo weche ma janabino nondiko. Ere kaka inyalo timo mano?

¹⁵ Mokwongo, penjri kama: ‘En ang’o ma ang’eyo e wi janabi ma nondiko bugno? Ne en ng’at ma chal nade, nodak kanye, to notiyo tich mane?’ Kit ngima ma nodakie nyalo konyi ng’eyo gimomiyo noyiero tiyo gi weche kod ranyisi moko ma samoro jonabi mamoko ne ok otiyogo ka ne gindiko weche mokor. Sama isomo kamoro e Muma, tem nono weche moko ma nyalo konyi ng’eyo kit janabino.

¹⁶ Bang’ mano, inyalo temo ng’eyo kinde ma janabino nondikee bugno. Inyalo timo kamano kuom rango kama ochanie buge ma ni e Muma ma yudore e tok Muma mar New World Translation of the Holy Scriptures. E wi mano, inyalo nono chat mochanie ruodhi kod jonabi e Apendiks A6. Ka po ni inono achiel kuom buge ma jonabi nondiko, nyalo bedo maber ka inono gik ma ne timore e kinde ma ne janabino ndiko. Gin gik mage maricho ma ne timore ma janabino ne dwaro rieyo? Gin jomage ma bende ne odak e kindego? Mondo ing’e wachno maber, nyalo dwarore ni itim nonro kuonde mopogore opogore. Kuom ranyisi, mondo iwinj maber gik ma ne timore e kinde janabi Amos, gima nyalo konyi en somo weche moko e bug 2 Ruodhi kod 2 Weche mag Ndalo mana kaka onyis e nyukta ma teri e ndiko mamoko motudore gi Amos 1:1 (marginal references). E wi mano, inyalo nono weche ma Hosea nondiko nikech en bende nenore ni nodak e kinde Amos. Nono wechego duto biro konyi ng’eyo ni Amos nodak e kinde mage.​—2 Ru. 14:25-28; 2 We. 26:1-15; Hos. 1:1-11; Amos 1:1.

17-18. Kitiyo gi ranyisi ma ni e paragraf kata ranyisi mamoko ma in iwuon ing’eyo, ler ane kaka keto paro kuom weche ma nyalo nenore ni tindo tindo nyalo miyo puonjruok Muma obed ma mit.

¹⁷ Sama wapuonjore Muma, ber bedo gi siso mar ng’eyo weche mathoth. Wawach ni isomo weche ma ne okor e bug Zekaria sula mar 12 ma wuoyo e wi tho mar Mesia. (Zek. 12:10) Sama ichopo e kwan matindo 12, iyudo ka wesno wacho ni “jo dhood Nathan” ne dhi ywak malit ka Mesia otho. Kar kalo akala wachno piyo, inyalo ling’ matin kae to ipenjri niya: ‘Jo dhood Nathan nigi tudruok mane gi Mesia? Be nitie kaka anyalo ng’eyo weche mathoth e wi wachni?’ Mano miyi thuolo mar timo nonro momedore. Ka ing’iyo nyukta ma nyiso ndiko mamoko motud gi wesno, obiro teri e 2 Samuel 5:13, 14 ma wacho ni Nathan ne en achiel kuom yawuot Ruoth Daudi. Ndiko machielo en Luka 3:23, 31 ma wacho ni Yesu noa e anyuola mar Nathan kokalo kuom Maria. (Som wp16.03 9 ¶1-3.) Bang’ fwenyo mano, gino mori matek! Ing’eyoga ni ne okor ni Yesu ne dhi wuok e anyuola mar Daudi. (Mat. 22:42) To Daudi ne nigi yawuoyi mokalo 20. Donge koro ineno gimomiyo Zekaria ne owuoyo e wi jo dhood Nathan kende kowacho ni ne gidhi ywak malit ka Yesu otho?

¹⁸ Ne ane ranyisi machielo. E Luka sula mokwongo, wayudo ni malaika Gabriel nolimo Maria monyise gimoro miwuoro e wi nyathi ma nodhi nyuolo. Malaikano nonyiso Maria niya: “Jali nobed gi duong’ kendo enoluonge ni Wuod Ng’at Mamalo Chutho, kendo Jehova Nyasaye biro miye kom-loch mar Daudi wuon mare, kendo obiro locho kaka Ruoth e wi od Jakobo nyaka chieng’, kendo Pinyruodhe ok norum.” (Luka 1:32, 33) Sama wasomo ndikono,  samoro wanyalo mana keto pachwa e wi gima Gabriel nokwongo wacho ni ne idhi luong Yesu ni “Wuod Ng’at Mamalo Chutho.” Kata kamano, Gabriel nokoro bende ni Yesu ne dhi “locho kaka Ruoth.” Koro gima onego wapenjre en ni Maria nokawo wechego nade. Be nonyalo paro ni wechego ne nyiso ni Yesu ne dhi kawo kar Ruoth Herode kata achiel kuom joma ne dhi bedo ruoth bang’ Herode e piny Israel? Ka di ne bed ni Yesu ne dhi bedo Ruoth bang’ Herode kata ng’at machielo, Maria ne dhi bedo min ruoth kendo mano ne dhi miye thuolo mar dak gi joode te e od ruoth. Kata kamano, onge kamoro amora e Muma ma nyiso ni Maria nopenjo Gabriel ka be mano e gima ne dhi timore. E wi mano, onge kamoro amora minyisowae ni nokwayo migawo ma ne dhi miyo oyud duong’ e Pinyruoth kaka jopuonjre Yesu moko ariyo notimo. (Mat. 20:20-23) Nono weche ma nyalo nenore ni tindo tindogo medo konyowa ng’eyo ni kare adier Maria nobolore e okang’ malach.

19-20. Ka luwore gi kaka ilero e Jakobo 1:22-25 kod 4:8, gima duong’ momiyo wapuonjore Wach Nyasaye e yo matut en mane?

¹⁹ Par kinde duto ni gima duong’ momiyo wapuonjore Wach Nyasaye e yo matut kendo somo bugewa en ni mondo wamed sudo machiegni gi Jehova. Bende, sama wapuonjore, wadwaro nonore mondo wang’e ni wan joma chalo nade kod lokruok monego watim mondo wamor Nyasaye. (Som Jakobo 1:22-25; 4:8.) Mano e momiyo sa asaya ma wadwaro puonjore, onego wachak gi lamo ka wakwayo Jehova rohone maler. Onego wakwaye mondo weche ma wapuonjorego okonywa, kendo wadhi nyime timo lokruok ma dwarore.

²⁰ Ber ka waduto wabedo kaka ng’at Nyasaye ma iwuoyo kuome e bug Zaburi niya: ‘Morne maduong’ en kuom chik Jehova, to oparo aming’a kuom chikne odiechieng’ gi otieno. . . . Gik motimo duto nobed gi hawi.’​—Zab. 1:2, 3.