1-2. Gin chandruoge mage ma Joneno mang’eny nyagorego?

JAOTE PAULO nojiwo Timotheo ni otim tich ma nosemiye e yo maber chuth. Kata obedo ni Paulo nondiko ne Timotheo wechego, wan bende gimulowa achiel kachiel. (2 Tim. 4:5) Waduto wakawo mapek weche ma Paulo nondikogo, omiyo, watimoga duto ma wanyalo mondo waland wach maber. Kata kamano, nitie chandruoge mang’eny ma waromogo ma nyalo nyoso chunywa. Thoth owetewa gi nyiminewa chokoga chir mang’eny mondo gidhi e tij lendo. (2 Tim. 4:2) Kuom ranyisi, tem ane paro kuom owetewa modak e pinje mogoye tijwa marfuk kata moketie chike moko ma monogi tiyo ne Nyasaye ka gin thuolo. Gitimoga tij lendo kata obedo ni ging’eyo ni komakgi, to inyalo tuegi e jela!

² Jotich Jehova nyagorega gi chandruoge mopogore opogore ma nyalo nyoso chunygi. Kuom ranyisi, moko kuomwa tiyo kuom seche mang’eny mondo gimi joodgi gik mochuno e ngima. Joma kamago bende diher tiyo tij lendo kuom thuolo malach, kata kamano, e giko juma giyudoga ka giol ahinya. Jomoko to nyagore gi midekre kata chandruoge ma biro nikech bedo moti, kendo mano miyo ok ginyal timo mathoth e tij Jehova. Nyalo kata bedo matek ne joma kamago wuok e utegi. Nitie bende joma paro ni gin joma nono ahinya e wang’ Jehova. Nyaminwa moro miluongo ni Mary * modak Middle East wacho kama: “Akedoga matek mondo anyagra gi paro moro amora marach ma anyalo bedogo, kendo mano olaga ahinya. Bang’ nyagruok gi paro kaka mago, chunya chandaga ahinya nikech aneno ni natiyo gi teko mang’eny e parruok, kar mondo nati gi tekogo e tiyo ne Jehova.”

3. En ang’o ma wabiro nono e sulani?

³ Kata bed ni wakalo e chandruoge machalo nade, Jehova  nyalo miyowa teko mondo wanyagre gi chandruogego kendo wadhi nyime tiyone e okang’ ma wanyalo. Ka pok wanono kaka Jehova nyalo konyowa, wakwong wane ane kaka Jehova notego Paulo gi Timotheo mondo gitim tich ma nosemigi e yo maber chuth, kata obedo ni ne giromo gi chandruoge moko.

4. Gin chandruoge mage ma Paulo noromogo?

⁴ Paulo noromo gi chandruoge mang’eny. Ka ne jowasike ogoye, ochiele gi kite, kendo otueye e jela, ne dwarore ni Jehova okonye moloyo kinde moro amora. (2 Kor. 11:23-25) Nitie kinde ma Paulo nowacho ayanga ni en bende ne okedo gi paro moko ma ne nyoso chunye. (Rumi 7:18, 19, 24) Bende, nonyagore gi ‘kudho moro ma ne chuoyo ringrene’ ma nosayo Nyasaye ahinya mondo ogolne.​—2 Kor. 12:7, 8.

5. Gin gik mage ma pod Paulo notimo kata obedo ni noromo gi chandruoge mang’eny?

⁵ Jehova nomiyo Paulo teko mondo odhi nyime tiyone kata obedo ni noromo gi chandruoge mang’eny. Tem ane paro moko kuom gik ma Paulo notimo. Ka ne otueye e ode e piny Rumi, nolando wach maber gi chir kata mana e nyim joloch. Bende, nolendo ne askeche mang’eny mag Ruoth, kendo nolendo bende ne joma nodhi lime. (Tich 28:30, 31; Fil. 1:13) Mago e kinde ma Nyasaye notayo Paulo mondo ondik barupe ne Jokristo wetene, kendo barupego pod konyowa nyaka e kindegi. Ranyisi ma Paulo noketo nojiwo kanyakla ma ne ni Rumi. Owete ma ne ni e kanyaklano nonyiso “chir ahinya mar yalo wach Nyasaye ka gionge luoro.” (Fil. 1:14) Kata obedo ni nitie kinde ma Paulo ne ok nyal timo mathoth kaka nodwaro, pod notimo kinda ahinya, kendo mano ‘nomiyo wach maber omedo landore.’​—Fil. 1:12.

6. Ka luwore gi 2 Jo-Korintho 12:9, 10, en ang’o ma nokonyo Paulo timo tich ma nosemiye e yo maber chuth?

⁶ Paulo nong’eyo ni Jehova e ma ne miye teko mar timo gimoro amora, to ok notim gigo gi tekone owuon. Nowacho ni teko mar Nyasaye ne “nyisore e yo malong’o chuth e nyawo.” (Som 2 Jo-Korintho 12:9, 10.) Kokalo kuom rohone maler, Jehova nomiyo Paulo teko mar timo tich ma nosemiye e yo maber chuth kata obedo ni nosande, notueye e jela, kendo noromo gi chandruoge moko madongo.

7. Gin chandruoge mage ma ne dwarore ni Timotheo onyagrego mondo otim tich ma nosemiye e yo maber chuth?

 ⁷ Timotheo ma ne pod hike tin kendo ma ne konyo Paulo e tij yalo, bende ne nyaka gen chuth kuom teko mar Nyasaye mondo oyal wach maber. Timotheo nodhi gi Paulo e wuodhe moko maboyo ahinya ka ne en jamisonari. E wi mano, Paulo noore mondo odhi olim kanyakla mopogore opogore kojiwogi. (1 Kor. 4:17) Nyalo bedo ni Timotheo ne paro ni ne ok owinjore gi migawono. Samoro mano e momiyo Paulo nojiwe niya: “Kik iwe ng’ato ochayi nikech pod itin.” (1 Tim. 4:12) Bende, e kindego Timotheo ne nigi kudho moro ma ne chuoyo ringrene, tiende ni ‘tuoche ma nohero goye.’ (1 Tim. 5:23) Kata kamano, Timotheo nong’eyo ni Jehova ne dhi miye roho maler ma ne dhi miye teko mondo odhi nyime yalo wach maber kendo jiwo Jokristo wetene.​—2 Tim. 1:7.

8. Gin gik mage ma Jehova tegogo joge e kindegi?

⁸ E kindegi, Jehova miyoga joge “teko mokalo ma pile” mondo gidhi nyime tiyone ma ok giweyo. (2 Kor. 4:7) Wanon ane gik moko ang’wen ma Jehova tegowago mondo wasik ka wamakore kode. Gigo gin: Lamo, Muma, Jokristo wetewa, kod tijwa mar lendo.

9. Ere kaka lamo nyalo konyowa?

⁹ Lamo tegowa. Paulo nojiwowa e Jo-Efeso 6:18 ni wadhi nyime lamo “kinde duto.” Ka watimo kamano, to Nyasaye biro miyowa teko. Owadwa Jonnie modak e piny Bolivia noneno wachno gi wang’e e kinde moro ka ne tembe olwore koni gi koni. Jaod Jonnie kaachiel gi jonyuol Jonnie nobedo matuo ahinya riat. Jonnie notemo ahinya mondo orit jotuo adekgo duto. Min-gi notho, kendo kinde malach nokalo ka ne pok jaode kod wuon-gi ochango. Jonnie wacho kama koparo kindego: “Gima ne konyaga sa asaya ma nawinjo ka chunya onyosore ahinya, ne en nyiso Jehova e lamo achiel kachiel gima nadwaro ni otimna.” Jehova nomiyo Jonnie teko ma ne dwarore mondo odhi nyime nano. Jaduong’-kanyakla moro miluongo ni Ronald ma a e piny Bolivia nofwenyo ni min-gi ne nigi kansa. Min-gi notho mana bang’ dwe achiel. Ang’o ma nokonyo Ronald nyagore gi kuyo e kindego? Owacho kama: “Sama alamo, anyisoga Jehova gimoro amora manie chunya. Ang’eyo ni Jehova ong’eya maber moloyo ng’ato ang’ata, kata moloyo kaka an awuon ang’era.” Nitie seche ma chunywa nyalo nyosore ahinya, kata nyalo bedo ni wakia gima wadwaro kwayo Jehova e lamo. Jehova dwaro ni wawuo kode kata sama ok wang’eyo kaka wanyalo nyise chandruoge ma wan-go e chunywa.​—Rumi 8:26, 27.

10. Mana kaka onyiswa e Jo-Hibrania 4:12, ang’o momiyo dwarore ni wasom Muma kendo wapar matut kuom gik ma wasomo?

¹⁰ Muma tegowa. Jaote Paulo nong’eyo ni weche manie Ndiko ne nyalo miye teko kod hoch. Wan be dwarore ni wagen wechego mondo gihowa kendo gimiwa teko. (Rumi 15:4) Sama wasomo Wach Nyasaye kendo paro matut kuom gik ma wasomo, Jehova nyalo miyowa rohone maler mondo okonywa neno kaka wanyalo tiyo gi weche ma wasomogo e ngimawa. (Som Jo-Hibrania 4:12.) Ronald ma ne wasewuoyo kuome motelo wacho kama: “Amor ahinya ni naloso chenro maber mar somo Muma pile ka pile gotieno. Akawoga thuolo mang’eny e paro matut kuom kido mag Jehova kod kaka osebedo kokonyo joge. Timo kamano tegaga ahinya.”

11. Ere kaka weche manie Muma notego nyaminwa moro ma nokuyo?

 ¹¹ Ka waparo matut kuom weche ma wasomo e Muma, mano biro konyowa siko ka wamor kata obedo ni wakalo e chandruoge. Ne ane kaka weche manie Muma nokonyo nyaminwa moro ma noyudo jaode oa tho. Jaduong’-kanyakla moro nonyise ni nonyalo yudo puonj mabeyo ahinya kosomo bug Ayub. Mokwongo okwongo, ka ne nyaminwano ochako somo bug Ayub, noketo pache mana kuom ketho mag Ayub. Sama nyaminwano ne somo, e chunye nojanyiso Ayub ni, “Ayub! We bedo gi paro maricho kamano!” Kata kamano, nofwenyo ni en bende ne ok en gi paro maber mana kaka Ayub. Mano nokonye loko paro ma ne en-go, kendo nojiwe mondo odhi nyime nyagore gi kuyo ma ne en-go bang’ ka jaode nosetho.

12. Ere kaka Jehova tegowaga kokalo kuom Jokristo wetewa?

¹² Jokristo wetewa tegowa. Yo machielo ma Jehova tegowagago en kokalo kuom Jokristo wetewa. Jaote Paulo nondiko ni ne en gi siso mar neno owetene gi nyiminene mondo gijiwre. (Rumi 1:11, 12) Nyaminwa Mary ma ne wasewuoyo kuome bedoga mamor ahinya sama en gi owete gi nyimine. Owacho kama: “Jehova osekonya kotiyo gi owete gi nyimine ma ne kia kata gik ma ne chanda. Moko kuomgi nonyisa wach moro kata orona ote ma nojiwa, kendo mano e gima ne adwaro e sechego. Wuoyo gi nyimine ma bende osekaloe chandruoge ma chal gi meka bende osekonya ahinya. Kendo jodong-kanyakla osekonya neno ni an bende amako kama duong’ ahinya e kanyakla.

13. Ere kaka wanyalo jiwore ng’ato ka ng’ato sama wan e chokruok mar kanyakla?

¹³ Achiel kuom kuonde mabeyo ahinya ma wanyalo jiworee en chokruoge mag kanyakla. Sama idhi e chokruoge, donge inyalo kawo thuoloni mondo ijiw jomamoko kuom nyisogi kaka igenogi kendo kaka imor gi gik ma gitimo. Kuom ranyisi, jaduong’-kanyakla moro miluongo ni Peter nonyiso nyaminwa moro ma ne pidho nyithindo ka en kende niya: “Ok ing’e ang’eya kaka ijiwaga ka aneni kibiro e chokruok. In kod nyithindi auchielgi uikoruga maber kendo uchiwoga paro mabeyo ahinya e chokruok.” Pi wang’ nyaminwano ne rengni sama nonyiso jaduong’-kanyaklano ni: “Ma di ne ing’eye kaka mano e wach ma nagombo ni ng’ato onyisae kawuono.”

14. Ere kaka tij lendo konyowaga?

¹⁴ Tij lendo tegowa. Sama wanyiso jomamoko adiera manie Muma, wawinjoga maber bed ni jogo owinjo wach ma walando kata ooyo. (Nge. 11:25) Nyaminwa moro miluongo ni Stacy noneno kaka tij lendo nyalo miyo ng’ato teko. Ka ne achiel kuom joodgi ogol oko mar kanyakla, mano nomiyo okuyo ahinya. Nosiko kopenjore ni, ‘En ang’o ma ne anyalo timo mondo akonye kik owe Jehova?’ Nosiko koparo mana wachno kinde duto. Ang’o ma nokonye nyagore gi chal ma ne entiereno? En tij lendo! Sama ne en e tij lendo, noketo pache kuom joma nonego olendnegi e alworagi. Owacho kama: “E kindeno, Jehova nokonya ma ayudo japuonjre Muma ma notimo dongruok mapiyo. Wachno nojiwa ahinya. Gima osekonya ahinya e ngimana en dhi e tij lendo.”

15. Weche ma ne Mary owacho puonji ang’o?

¹⁵ Nitie jomoko ma nyalo paro ni ok ginyal lendo kuom thuolo malach nikech ting’ ma gin-go kata weche mamoko. Ka po ni in bende iparoga kamano, kik wiyi wil ni Jehova morga ahinya sama itimo duto minyalo e tije. Ne ane ranyisi mar Mary ma ne wasewuoyo kuome. Ka ne odar modhi e alwora miwachoe dhok machielo, chunye nonyosore ni ne ok onyal lendo ahinya. Owacho kama: “Kuom kinde, gima nanyalo timo e tij lendo ne en mana wacho  weche machuok, kata somo wes moro e Muma, kata chiwo mana trakt.” Mano nomiyo ochako chare ni en ng’at manono ka nopimore gi weg dhokno. Kata kamano, noloko paro ma ne en-gono. Nofwenyo ni Jehova nyalo tiyo kode kata obedo ni nokia dhokno maber. Owacho kama: “Adiera manie Muma yot winjo, kendo adierago lokoga kit ngima ji.”

16. En ang’o ma nyalo tego joma tuore kod ma hikgi oniang’ ma koro ok nyal dhi lendo ne jomamoko oko?

¹⁶ Jehova ong’eyo maber kaka jomoko kuomwa diher dhi e tij lendo, kata kamano, ok ginyal nikech samoro gituore kata hikgi koro oniang’ ma ok ginyal wuok e utegi. Jehova nyalo yawo ne joma kamago yo mondo gilend ne joma ritogi, bed ni gin e utegi kata e osiptal. Ka po ni wachako pimo gik ma watimo sani gi gik ma ne watimo chon, mano biro mana nyoso chunywa. To ka waketo pachwa kuom yore ma Jehova konyowago gie sani, wabiro yudo teko, kendo wabiro dhi nyime nano ka wamor e bwo tem moro amora.

17. Ka luwore gi Eklesiastes 11:6, ang’o momiyo onego wadhi nyime gi lendo kata obedo ni samoro ok wane nyak mapiyo?

¹⁷ En adier ni ok wang’eyo ni kodhi mane mar adiera ma wapidho ma biro twi. (Som Eklesiastes 11:6.) Kuom ranyisi, Nyaminwa moro ma nyinge Barbara ma jahigni 80 gi wiye lendoga pile kotiyo gi simu kod barua. E achiel kuom barupe ma nondiko, noketo Ohinga mar Jarito ma Mach 1, 2014 ma wiye ne wacho ni, “Be Ing’eyo Gima Duong’ ma Nyasaye Osetimoni?” Ne ok ong’eyo ni kara nooro baruano mana ne dichwo moro gi jaode ma koro ne ok gin Joneno mag Jehova. Jogo nosomo gasedno nyadinwoya. Dichwono nowinjo ka gima Jehova e ma ne wuoyo kode achiel kachiel. Dichwono gi jaode nochako biro e chokruoge mag kanyakla, kendo bang’e ne oduokgi mi gichako lendo gi kanyakla. Ne giseweyo lendo kod biro e chokruoge kuom higni mokalo 27. Ng’eyo ni barua achielno nokelo nyak maber kamano nojiwo Barbara ahinya kendo tego yiene!

18. Ang’o ma wanyalo timo mondo wayud teko ma Nyasaye chiwonwa?

¹⁸ Jehova miyowa teko kokalo kuom yore mopogore opogore. Ka watiyo gi gik momiyowa kaka lamo, Muma, Jokristo wetewa, kod tij lendo, wanyiso ni wageno yorenego kendo ni wagombo ni okonywa. Weuru kinde duto wagen Wuonwa manie polo ma gombo ahinya ‘nyiso tekone ne jogo ma lame gi chunygi duto.’​—2 We. 16:9.