1. En yiero mane maduong’ ma dwarore ni dhano duto otim?

 NITIE yiero moro maduong’ ma dwarore ni dhano duto otim e kindegi. Be gibiro riwo lwedo ratiro ma Jehova Nyasaye nigo mar locho e wi piny gi polo, koso gibiro riwo lwedo Satan Jachien, ma en jasik Nyasaye maduong’? Onge chung’ diere. Yiero ma gitimo e ma biro nyiso ka be gibiro dak nyaka chieng’, kata ooyo. (Mat. 25:31-33, 46) E kinde “masira maduong’,” ibiro ket ne ji alama mar tony, kata alama mar kethruok.​—Fwe. 7:14; 14:9-11; Eze. 9:4, 6.

2. (a) Bug Jo-Hibrania 10:35-39 jiwowa ni watim ang’o? (b) Ere kaka bug Fweny nyalo konyowa?

² Som Jo-Hibrania 10:35-39. Ka po ni iseyiero riwo lwedo loch mar Jehova, mano nyiso ni isetimo yiero makare. Koro in gi thuolo mar konyo jomamoko bende mondo gitim yiero makare. Inyalo tiyo gi weche ma yudore e bug Fweny mondo ikony joma kamago. Buk makendeno nyiso gima biro timore ne joma kwedo Jehova, kod gueth ma joma riwo lochne lwedo biro yudo. Kuom mano, dwarore ahinya ni wanon wechego. Timo kamano biro konyowa medo kindawa e tij Jehova. Bende, wanyalo tiyo gi weche mwasepuonjore e konyo jomamoko mondo gitim yiero makare, kendo gimakre gi yierogino.

3. Ang’o ma wabiro nono e sulani?

³ E sulani, wabiro nono penjogi: Ang’o ma joma riwo lwedo loch mar Jehova biro yudo? Ang’o ma biro timore ne joma oyiero riwo lwedo ondiek makwar miwuoyoe e bug Fweny?

4. En grup mane ma jaote Johana noneno kochung’ gi Yesu e polo?

⁴ Jaote Johana noneno e fweny moro ka grube ariyo ma riwo lwedo loch mar Jehova yudo gueth mar dak nyaka chieng’. Grup mokwongo nigi ji 144,000. (Fwe. 7:4) Joma ni e grubno ogol e piny mondo gidhi gilos Pinyruoth gi Yesu e polo. Gibiro locho gi Yesu e wi piny duto. (Fwe. 5:9, 10; 14:3, 4) E fwenyno, Johana noneno jogo kochung’ gi Yesu e polo, kata e Got Sayun.​—Fwe. 14:1.

5. En ang’o ma biro timore machiegnini ne joma pod ni e piny kae monego odhi e polo?

⁵ Kochakore gi kinde mag joote, oseyier ji tara gi tara mondo obed e kwan mar ji 144,000. (Luka 12:32; Rumi 8:17) Kata kamano, nonyis Johana ni ji manok manie grubno e ma ne dhi bedo e piny e ndalo mag gikogi. “Jo modong’” e piny ma pok odhi e polo, biro yudo “alama” mogik ma nyiso ni Jehova oyie kodgi ka pok masira maduong’ omuoch. (Fwe. 7:2, 3; 12:17) Kae to sama masira maduong’ dhi nyime, jo modong’go ibiro ter e polo mondo gidhi giriwre gi jowetegi ma nosetho komakore gi Jehova. Gibiro locho gi Yesu e Pinyruodh Nyasaye.​—Mat. 24:31; Fwe. 5:9, 10.

6-7. (a) En grup mane machielo ma Johana noneno, to ang’o ma inyisowa e wi grubno? (b) Ang’o momiyo weche manie Fweny sula mar 7 onego omor chuny joma nigi geno mar dhi e polo kaachiel gi ‘oganda mang’ongo’?

⁶ Bang’ ka Johana noseneno grup mar joma biro dhi e pologo, noneno bende “oganda moro mang’ongo.” Mopogore gi grup mokwongo ma nigi kwan sie, grup mar ariyoni onge gi kwan sie. (Fwe. 7:9, 10) Ang’o ma inyisowa kuomgi? Ne onyis Johana niya: “Jogi e jo ma owuok e masira maduong’ kendo giselwoko kandhogi gi remb Nyarombo mi gibedo ma rochere.” (Fwe. 7:14) Bang’ tony e masira maduong’, ‘oganda mang’ongo’ biro dak e piny kae, kendo gibiro yudo gueth mogundho.​—Zab. 37:9-11, 27-29; Nge. 2:21, 22; Fwe. 7:16, 17.

⁷ Bed ni wan e grup mar joma biro dhi e polo kata mar joma biro dak e piny, be wanenore e weche miwacho e Fweny sula mar 7? Dwarore ni wanenre e wechego. To mano kaka kindego nobed maber ne grube ariyogo! Wabiro mor sidang’ nikech ne wayiero riwo lwedo loch mar Jehova. Ang’o machielo ma bug Fweny nyisowa e wi masira maduong’?​—Mat. 24:21.

8. Masira maduong’ biro chakore nade, to ji mang’eny biro timo ang’o?

⁸ Mana kaka ne waseneno e sula mokalo, machiegnini sirkende mag pinyni biro lokore gi Babulon Maduong’ ma en dinde mag miriambo koriwgi kanyachiel. (Fwe. 17:16, 17) Mano e ma nobed chakruok mar masira maduong’. Be mano biro chwalo ji mang’eny mondo gichak lamo Jehova? Ooyo. Mopogore gi mano, Fweny sula mar 6 wacho ni e kindego, joma ok ti ne Jehova biro manyo konyruok kuom josiasa kod jolok ohala mag pinyni, ma ipimo gi gode. Nikech ok gibi chung’ kor Pinyruodh Nyasaye, Jehova biro kwanogi kaka joma kwede.​—Luka 11:23; Fwe. 6:15-17.

9. Jotich Jehova biro pogore nade gi jomamoko e kinde masira maduong’, to mano biro kelonegi ang’o?

⁹ Jotich Jehova momakore kode biro bedo mopogore ahinya gi jomamoko e kinde masira maduong’no. Gin kendgi e ma  ginibed grup ma tiyo ne Jehova Nyasaye e piny kae, kendo ma ok riw “ondiek” lwedo. (Fwe. 13:14-17) Chung’gi motegno biro tugo mirimb joma kwedo Jehova. Nikech mano, pinje moriwore biro monjogi e piny mangima. Monj maduong’no e ma Muma luongo ni monj mar Gog mar Magog.​—Eze. 38:14-16.

10. Mana kaka onyis e Fweny 19:19-21, ang’o ma Jehova biro timo sama imonjo joge?

¹⁰ Ang’o ma Jehova biro timo sama imonjo joge? Jehova owuon nyisowa niya: “Mirima mager nomaka.” (Eze. 38:18, 21-23) Fweny sula mar 19 nyisowa gima biro timore bang’ mano. Jehova biro oro Wuode mondo oked ne joge, kendo loyo jowasikgi. “Oganda lweny mag polo,” tiende ni malaike makare kod jomamoko 144,000, biro riwore gi Yesu e kedo ne jo Nyasaye. (Fwe. 17:14; 19:11-15) Lwenyno biro tieko ang’o? Obiro tieko dhano ma kwedo Jehova kaachiel gi riwruoge duto ma gitiyogo!​—Som Fweny 19:19-21.

11. En wach mane maduong’ ahinya ma biro timore miwuoye e bug Fweny?

¹¹ Temie paro kaka jotich Nyasaye momakore kode biro winjo bang’ tony sama iketho jowasik Nyasaye! To mano kaka piny biro pong’ gi mor ma tamre gi nono! Kata obedo ni joma ni e polo biro kok gi mor bang’ ka oseketh Babulon Maduong’, nitie gima chielo ma bende biro miyogi mor maduong’. (Fwe. 19:1-3) Mano en wach maduong’ ahinya e bug Fweny. Wachno en “kend mar Nyarombo.”​—Fwe. 19:6-9.

12. Ka luwore gi Fweny 21:1, 2, kend mar Nyarombo biro timore karang’o?

¹² Kendno dhi timore karang’o? Ji duto manie kwan mar 144,000 biro yudo kosedhi e polo ka pok lweny mar Har–Magedon otugore. Kata kamano, mano ok e kinde ma Nyarombo nokendie. (Som Fweny 21:1, 2.) Kend mar Nyarombo biro timore bang’ ka lweny mar Har–Magedon oserumo, kendo ka osegol jowasik Nyasaye duto.​—Zab. 45:3, 4, 13-17.

13. Ere kaka kend mar Nyarombo mulo joma ni e kendno?

¹³ Ere kaka kend mar Nyarombo mulo joma ni e kendno? Mana kaka kend riwoga dichwo gi dhako mondo gibed gimoro achiel, e kaka kend mar ranyisino biro riwo Ruoth Yesu Kristo kod ‘miahane,’ tiende ni ji 144,000. Nyasi makendeno e ma nobed chakruok mar sirkal manyien ma biro locho e wi piny kuom higni 1,000.​—Fwe. 20:6.

14-15. En ang’o ma Fweny sula mar 21 pimo gi ji 144,000? (Ne picha manie nyim gaset.)

¹⁴ Fweny sula mar 21 pimo ji 144,000 gi dala moro ma jaber miluongo ni “Jerusalem Manyien.” (Fwe. 21:2, 9) Mise mag dalano nigi kite 12 mondikie ‘nyinge 12 mag joote 12 mag Nyarombo.’ Ang’o momiyo wachno nomako dho Johana? En nikech noneno nyinge kondik e achiel kuom kitego. To mano doko dhial maduong’!​—Fwe. 21:10-14; Efe. 2:20.

¹⁵ Onge dala moro amora minyalo pim gi dala mar ranyisino. Ndara maduong’ mar dalano nolos gi dhahabu lilo, rangeyene 12 nolos gi kite mag lulu, ohingni mage kod misene nolos gi kite ma nengogi tek, kendo nopim bethene gi gir pimo makare chuth. (Fwe. 21:15-21) Kata kamano, jaote Johana nofwenyo ni nitie gima ne onge e dalano.  Mano ne en ang’o? Johana nowacho niya: “Ne ok aneno hekalu e i dalano, nikech Jehova Nyasaye Manyalo Duto kod Nyarombo e hekalu mare. To dalano ok dwar ler mar wang’-chieng’ kata dwe mondo orienyne, nimar duong’ mar Nyasaye e ma rienyne, kendo taya mare en Nyarombo.” (Fwe. 21:22, 23) Joma ni e Jerusalem Manyienno biro wuoyo gi Jehova achiel kachiel. (Hib. 7:27; Fwe. 22:3, 4) Mano e momiyo Jehova gi Yesu e ma gin hekalu e dalano.

16. E kinde loch mar higni aluf achiel mar Pinyruodh Nyasaye, ang’o ma biro timore ne dhano?

¹⁶ Jokristo mowal bedoga mamor ahinya sama giparo matut kuom dalano. Joma nigi geno mar dak e piny kae bende nigi gima miyogi mor e wi dalano. E kinde loch mar higni aluf achiel mar Pinyruodh Nyasaye, gibiro yudo gueth mogundho. Johana noneno ka guethgo mol mana ka “aora moro mar pi ngima.” E bethe aorano koni gi koni, ‘ne nitiere yiende mag ngima ma nigi oboke ma ichangogo ogendni.’ (Fwe. 22:1, 2) Omiyo, ji duto ma nodag e kindego biro yudo gik mabeyo lilo. Kae to, ibiro gol ne jotich Jehova richo mosmos mondo gibed joma kare chuth. Tuoche, rem, kuyo, kod ywak, ok nobedie kendo.​—Fwe. 21:3-5.

17. Fweny 20:11-13 nyiso ni jomage ma biro yudo gueth e kinde loch mar higni aluf achiel mar Pinyruodh Nyasaye?

¹⁷ Gin jomage ma biro yudo guethgo? Joma biro kwongo yudo guethgo gin oganda mang’ongo ma biro tony e Har–Magedon, kaachiel gi nyithindo ma ibiro nyuol e piny manyien. Kata kamano, Fweny sula mar 20 singo bende ni joma otho ibiro chier. (Som Fweny 20:11-13.) “Jo ma kare” ma gin jotich Jehova ma tho ka gin gi winjruok maber kode, kaachiel gi “jo ma ok kare” ma gin joma notho ka pok oyudo thuolo mar puonjore e wi Jehova, ibiro chier mondo gidag e piny kae. (Tich 24:15; Joh. 5:28, 29) Be mano nyiso ni ji duto ibiro chier mondo gidag e piny e kinde loch Yesu mar higni aluf achiel? Ooyo. Ok bi chier joma notamore tiyo ne Jehova ka ne pod gingima. Jogo ne nigi thuolo mar tiyo ne Jehova, to ne gitamore, omiyo, ok giwinjore yudo ngima e Paradiso e piny.​—Mat. 25:46; 2 The. 1:9; Fwe. 17:8; 20:15.

18. Ngima biro chalo nade e piny e giko higni 1,000?

¹⁸ E giko higni aluf achielgo, biro yudo ka osegol richo ne ji duto modak e piny. Richo mar Adam ok nobed gi teko kuom ng’ato ang’ata e kindego. (Rumi 5:12) Kuong’ ma nomiwa nikech richo mar Adam ibiro gol chuth. Mano e momiyo joma biro dak e piny biro ‘bedo mangima,’ nikech ginibed joma kare chuth e giko higni 1,000.​—Fwe. 20:5.

19. Ang’o momiyo tem mogik biro dwarore?

¹⁹ Wang’eyo ni Yesu nokwedo Satan ka ne Satan dwaro ni oketh winjruokne gi Jehova. Ne ok oketho timne matir ka ne iteme. Kata kamano, be dhano makare biro makore motegno gi Jehova kaka Yesu notimo e kinde mibiro mi Satan thuolo mar temogi? Ibiro mi ng’ato ka ng’ato kuomwa thuolo mar dwoko penjono e kinde ma ibiro gony Satan bang’ higni 1,000. (Fwe. 20:7) Ji duto ma biro chung’ motegno e temno biro yudo ngima mochwere, kendo ibiro migi thuolo ma nigi duong’ madier. (Rumi 8:21) Joma biro ng’anyo ibiro keth chuth kaachiel gi Satan kod jochiendene.​—Fwe. 20:8-10.

20. Iwinjo nade e chunyi bang’ nono e yo machuok weche ma nokor e bug Fweny?

²⁰ Iwinjo nade e chunyi bang’ nono e yo machuok weche manie bug Fweny? Donge ifwenyo ni in bende ikonyo e chopo weche moko ma nokor e bug Fweny? To donge wachno chwali mondo in bende igwel jomamoko mondo gibi giriwre kodwa e lamo Nyasachwa? (Fwe. 22:17) Koro, nikech waseneno gik ma biro timore e kinde mabiro, waritogi gi siso ahinya, kendo wan bende wadwaro riwore gi jaote Johana e wacho niya: “Amin! Bi, Ruoth Yesu.”​—Fwe. 22:20.