SULA MAR PUONJRUOK 19
WER 22 Pinyruoth Osechako Locho—Wakwayo ni Mondo Obi!
Ang’o ma Wang’eyo e Wi Yo ma Jehova Biro Ng’adogo Bura e Kinde Mabiro?
“Jehova . . . ok [dwar] ni oketh ng’ato ang’ata.”—2 PET. 3:9.
GIMA SULANI WUOYE
Wanyalo bedo gadier ni e kinde mabiro, Jehova biro ng’ado bura e yo makare.
1. Ang’o momiyo wanyalo wacho ni wadak e kinde makende ahinya?
WADAK e kinde makende ahinya! Odiechieng’ kodiechieng’, wanenoga ka weche ma Muma nokoro chopo kare. Kuom ranyisi, waneno kaka “ruoth ma nyandwat” gi “ruoth ma milambo” piem e kindgi ka gidwaro nyiso ni ng’ama nigi teko moloyo nyawadgi. (Dan. 11:40) Waneno kaka wach maber mar Pinyruodh Nyasaye ilando e okang’ malach, kendo ji mang’eny rwako adiera. (Isa. 60:22; Mat. 24:14) Bende, wayudo chiemb chuny modhuro “e kinde mowinjore.”—Mat. 24:45-47.
2. En ang’o ma wanyalo bedogo gadier, to ang’o ma nyaka wayie?
2 Jehova pod dhi nyime konyowa winjo tiend weche madongo ma biro timore machiegnini. (Nge. 4:18; Dan. 2:28) Wan gadier ni chop kinde ma masira maduong’ biro chakore, biro yudo ka waseng’eyo gik moko duto ma dwarore ni wang’e mondo wanan kendo wasik ka wamakore gi Jehova e kinde matekgo. Kata kamano, nyaka wayie ni nitie gik ma ok wang’eyo e wi kinde mabiro. E sulani, wadwaro nono gimomiyo watimo lokruok e wi yo ma nilerogo moko kuom gik ma biro timore kinde mabiro. Kae to wabiro nono gik ma wang’eyo e wi kinde mabiro, kod yo ma Wuonwa manie polo biro ng’adonego ji bura.
GIK MA OK WANG’EYO
3. Ang’o momiyo ne wawachoga ni Jehova ne dhi geng’o ne joma ne ok tine mondo kik gitony sama oketho piny marachni, to ang’o momiyo ne wawacho kamano?
3 E kinde mokalo, ne wawachoga ni bang’ ka masira maduong’ osechakore, onge ng’ato ang’ata ma notamore tiyo ne Jehova, ma ne dhi yudo thuolo mar bedo jatichne kendo tony e Har–Magedon. Ne wawacho kamano nikech ne waparo ni Ataro ma notimore e ndalo Noa nochung’ ne gik ma ne dhi timore e kinde mabiro. Kuom ranyisi, ne wawachoga ni mana kaka Jehova noloro dhood yie ka pok Ataro ochakore, e kaka nodhi ‘loro dhoot’ mar kwo sama iketho piny marachni mondo ogeng’ ne ng’ato ang’ata ma ok tine ka masira maduong’ pok ochakore.—Mat. 24:37-39.
4. Be sani waneno Ataro ma notimore e ndalo mag Noa kaka gima nochung’ ne gik ma ne dhi timore e kinde mabiro? Ler ane.
4 Be onego wane Ataro ma notimore e ndalo Noa kaka gima nochung’ ne gik ma ne dhi timore e kinde mabiro? Ooyo. Nikech ang’o? En nikech onge Ndiko moro amora ma siro wachno achiel kachiel. a Yesu nopimo “ndalo Noa” gi ndalo mag giko. Kata kamano, ne ok owacho ni Ataro ma notimore e ndalo Noa nochung’ ne gik ma ne dhi timore e kinde mabiro, kendo ni moro ka moro kuom gik ma notimore e kindeno ne dhi chung’ne gimoro sie. Bende, ne ok owacho ni loro dhood yie nochung’ ne yo moro machielo ma nidhi lorgo dhoot moro e kinde mabiro. Kata kamano, mano ok nyis ni koro onge gik ma wanyalo puonjore e wi Ataro ma notimore e ndalo Noa.
5. (a) Ang’o ma Noa notimo ka pok Ataro ochakore? (Jo-Hibrania 11:7; 1 Petro 3:20) (b) Ere kaka tij lendo ma watimo sani inyalo pim gi tij lando wach maber ma Noa notimo ka ne pok Ataro ochakore?
5 Noa nonyiso ni nowinjo siem ma Jehova nochiwo kuom gero yie. (Som Jo-Hibrania 11:7; 1 Petro 3:20.) E yo ma kamano bende, joma winjo wach maber mar Pinyruodh Nyasaye, nyaka kaw okang’ ma nyiso ni giyie gi wachno. (Tich 3:17-20) Petro noluongo Noa ni ‘jayal wach makare.’ (2 Pet. 2:5) Kata kamano, mana kaka ne wapuonjore e sula mokalo, ok wang’eyo ka be Noa notimo kampen mar lendo mondo ochop ne ji duto ma nodak e piny ka Ataro pok nochakore. E kindewagi, walando wach maber e piny ngima kendo watime gi kinda duto. To kata watim kinda machal nade, pod ok wabi lando ne ji duto wach maber ka giko pok ochopo. Nikech ang’o?
6-7. Ang’o momiyo wanyalo wacho ni ok wabi nyalo lando ne ji duto wach maber ka giko pok ochopo? Ler ane.
6 Ne ane gima Yesu nowacho e wi okang’ ma nidhi landgo wach maber. Nowacho ni wach maber nidhi “yal e piny mangima mondo obed ranyisi ne ogendni duto.” (Mat. 24:14) Wach ma nokorno chopo e kindewagi moloyo kinde moro amora. Bugewa ma wuoyo e wi wach maber mar Pinyruoth igoyo e dhok mokalo 1,000 kendo iketogi bende e websaitwa mar jw.org kama ji duto manie piny ngima nyalo yudogie.
7 Yesu nowacho ne jopuonjrene ni ne ok gidhi tieko lendo e “mier manie Israel duto” kata lendo ne ji duto ka pok dwoke ochopo. (Mat. 10:23; 25:31-33) Weche ma Yesu nowachogo ne dhi timore e kindewagi bende. Ji mang’eny odak kuonde ma ogoye tijwa marfuk kata ma nigi chike moko ma monowa lendo ka wan thuolo. E wi mano, nitie nyithindo mathoth minyuolo pile ka pile. Watimo duto ma wanyalo mondo waland wach maber ne ji moa e “ogendni duto, gi dhoudi duto, gi dhok duto, kod pinje duto.” (Fwe. 14:6) Kata kamano, adiera en ni ok wabi nyalo lando ne ji duto wach maber ka giko pok ochopo.
8. En penjo mane ma wanyalo penjore e wi yo ma Jehova biro ng’adogo bura e kinde mabiro? (Ne pichni bende.)
8 Wechego miyo wapenjore penjogi: Nade joma ok bi yudo thuolo mar winjo wach maber ka masira maduong’ pok ochakore? Ere kaka Jehova kod Yesu Wuode biro ng’adonegi bura? (Joh. 5:19, 22, 27; Tich 17:31) Ndiko ma tayo sulani wacho ni Jehova “ok odwar ni oketh ng’ato ang’ata.” Kar mano, “odwaro ni ji duto ochop kama gilokoe chunygi gia e richo.” (2 Pet. 3:9; 1 Tim. 2:4) Kata obedo ni wang’eyo weche kaka mago e wi Jehova, pok onyisowa kaka obiro ng’ado bura ne joma kamago. En adier ni ok ochuno ni Jehova onyiswa gimoro amora mosetimo kata mochano timo.
Jehova biro timo ang’o ne joma ok noyudo thuolo mar winjo wach maber ka pok masira maduong’ ochakore? (Ne paragraf mar 8) c
9. En ang’o ma Jehova osenyisowa kokalo kuom Muma?
9 Jehova fwenyonwa moko kuom gik mobiro timo kokalo kuom Wachne, ma en Muma. Kuom ranyisi, Muma nyisowa ni Jehova biro chiero “jo ma ok kare” ma ne ok oyudo thuolo mar winjo wach maber mondo gin bende gilok chunygi kendo tiyone. (Tich 24:15; Luka 23:42, 43) Wachno miyo wabedo gi penjo moro machielo maduong’.
10. Gin penjo mage mamoko ma wanyalo penjore?
10 Be ji duto ma biro tho e kinde masira maduong’ ibiro keth chuth ma onge geno moro amora mar chier? Ndiko wacho maler ni joma ne ok ti ne Jehova, mobiro ketho e Har–Magedon ok bi chier. (2 The. 1:6-10) To nade jomamoko, kuom ranyisi, joma biro tho e masiche moko ma timore apoya, kata ma jowetegi biro nego? (Ekl. 9:11; Zek. 14:13) Dibed ni moko kuom jogo biro bedo e kind “jo ma ok kare” mibiro chier e piny manyien? Ok wang’eyo.
GIK MA WANG’EYO
11. Ere kaka Jehova biro ng’ado ne ji bura e Har–Magedon?
11 Nitie gik mang’eny ma wang’eyo ma biro timore e kinde mabiro. Kuom ranyisi, wang’eyo ni e Har–Magedon, Jehova biro ng’ado ne ji bura ka luwore gi kaka ne gitimo ne owete Kristo. (Mat. 25:40) Joma ibiro ng’adnegi bura ni gin rombe, biro bedo ni osenyiso ni giriwo Kristo kod owetene mowal lwedo. Wang’eyo bende ni nitie owete Kristo mowal ma pod biro dong’ e piny bang’ ka masira maduong’ osechakore, kendo gibiro dhi e polo mana kodong’ matin to Har–Magedon chakore. Nenore ni ka pod owete Kristo mowal nie piny ka, joma chunygi ni kare pod biro yudo thuolo mar riwogi lwedo e tich maduong’ ma gitimo. (Mat. 25:31, 32; Fwe. 12:17) Ang’o momiyo mago gin weche monego wang’e?
12-13. Ang’o ma jomoko nyalo timo bang’ neno kiketho “Babulon Maduong’”? (Ne pichni bende.)
12 Nenore ni kata mana bang’ ka masira maduong’ osechakore, nitie joma biro neno kiketho “Babulon Maduong’” kendo gibiro paro ni Joneno mag Jehova nosewuoyoga e wi wachno. Dibed ni moko kuomgi biro loko chunygi bang’ neno kiketho Babulon Maduong’?—Fwe. 17:5; Eze. 33:33.
13 Gima biro timore inyalo pim gi gima notimore Misri e kinde Musa. Par ni “oganda maduong’ ma [ne] ok gin Jo-Israel” noriwore gi Jo-Israel ka ne giwuok Misri. Samoro moko kuom joma noriwogi lwedogo nochako nyiso yie bang’ neno masiche apar ma noyudo piny Misri. (Wuok 12:38) Ka gima kamano nyalo timore bang’ ka oseketh Babulon Maduong’, be wabiro winjo marach ka jomoko oriwowa lwedo mana machuok ka pok giko ochopo? Ooyo! Wabiro luwo ranyisi mar Wuonwa manie polo ma en “Nyasaye mang’won kendo ma kecho ji, ma iye ok wang’ piyo, kendo mogundho gi hera mosiko kod adiera.” b—Wuok 34:6.
Nitie joma biro neno ka iketho “Babulon Maduong’” kendo gibiro paro ni Joneno mag Jehova nosewuoyoga e wi wachno (Ne paragraf mar 12-13) d
14-15. Be ng’ato biro yudo ngima mochwere mana nikech kinde ma nothoe kata kama nodakie? Ler ane. (Zaburi 33:4, 5)
14 Jomoko nyaloga wacho kama: ‘Nyalo bedo maber ka watna ma ok Janeno otho ka pok masira maduong’ ochakore mondo obed gi geno mar chier.’ En adier ni joma wachoga kamano dewo wedegi. Kata kamano, ng’ato ok bi yudo ngima mochwere mana nikech kinde ma nothoe. Jehova en Jang’ad Bura makare chuth kendo obiro ng’ado bura e yo maber. (Som Zaburi 33:4, 5.) Wanyalo bedo gadier chuth ni “Jang’ad Bura mar piny ngima” biro timo gima kare.—Cha. 18:25.
15 Bende, bedo ni ng’ato biro dak nyaka chieng’ kata ooyo, ok otenore kuom kama nodakie. Jehova ok nyal ng’ado ne ji tara gi tara modak e pinje ma pok olandie wach Pinyruoth ni giduto gin “diek.” (Mat. 25:46) Jehova ma en Jang’ad Bura makare dewo joma kamago moloyo kaka wadewogi. Ok wang’eyo kaka Jehova biro tayo weche e kinde masira maduong’. Samoro moko kuom jogo biro yudo thuolo mar puonjore e wi Jehova, keto yie kuome, kendo kawo okang’ mar tiyone sama obiro keto nyinge obed maler e nyim ogendni duto.—Eze. 38:16.
Bang’ ka masira maduong’ osechakore, nitie joma biro neno kiketho “Babulon Maduong’.” . . . Dibed ni moko kuomgi biro loko chunygi?
16. En ang’o ma waseng’eyo kuom Jehova? (Ne picha bende.)
16 Puonjruok Muma osekonyowa ng’eyo ni Jehova dewo ngima dhano ahinya. Nochiwo ngima Wuode mondo waduto wabed gi geno mar dak nyaka chieng’. (Joh. 3:16) Waduto waseneno kaka Jehova oherowa. (Isa. 49:15) Ong’eyo ng’ato ka ng’ato kuomwa gi nyingwa. Kuom adier, ong’eyowa e okang’ ma kata ka watho, onyalo chierowa ka wachal kaka ne wan chon, ok mana e dendwa kende, to nyaka e pachwa! (Mat. 10:29-31) Mano miyo wabedo gadier chuth ni Wuonwa ma jahera manie polo, biro ng’ado ne ng’ato ka ng’ato bura makare kendo e yo mang’won.—Jak. 2:13.
Wan gadier chuth ni Jehova biro ng’ado ne ng’ato ka ng’ato bura makare kendo e yo mang’won (Ne paragraf mar 16)
17. Ang’o ma wabiro nono e sula ma luwo?
17 Weche molernwa e yo manyien-gi miyowa mijing’o mar lando wach maber e okang’ mapiyo moloyo kinde moro amora mosekalo. Ang’o momiyo wawacho kamano? To en ang’o ma chwalowa mondo wadhi nyime lando wach maber ma ok waol? Wabiro nono dwoko mag penjogo e yo matut e sula ma luwo.
WER 76 Tij Lendo Miyo Iwinjo Nade e Chunyi?
a Mondo ine gimomiyo notim lokruogno, ne sula ma wiye wacho ni “Ma e Yo Miyiego” e Ohinga mar Jarito ma Mach 15, 2015, ite mar 7-11.
b Bang’ koseketh Babulon Maduong’, ibiro tem jotich Jehova duto e kinde monj mar Gog mar Magog. Ng’ato ang’ata ma biro riwore gi jo Nyasaye bang’ koseketh Babulon Maduong’ ibiro tem.
c WECHE MA LERO PICHA: Pichni adek ma nyiso gimomiyo nitie joma samoro ok wabi choponegi gi wach maber: (1) Miyo moro modak e piny ma ka ng’ato obedo Jakristo to inyalo kata nege, (2) dichwo moro gi jaode modak e piny ma weche siasa omiyo ogo weche din marfuk (3) dichwo moro modak kuonde mosokore ahinya kendo ma chopoe tek.
d WECHE MA LERO PICHA: Miyo moro ma noweyo adiera paro gik ma nopuonjore e wi kethruok mar “Babulon Maduong’.” Oloko chunye kendo odok ir jonyuolne ma gin Jokristo. Ka gima kamano otimore e kinde mabiro, biro dwarore ni waluw ranyisi mar Wuonwa manie polo ma en Nyasaye mang’won kendo ma morga ka jaricho oloko chunye.
