1-3. Nyalo bedo ni ywaruok ma ne nitie e kind Yudia gi Sintike nochakore nade, to inyalo geng’ ywaruok ma kamago e yo mane? (Ne picha man malo.)

JOTICH Jehova ogeno Muma ahinya nikech en bug Jehova owuon. Nikech wan dhano morem, kinde ka kinde imiyowaga siem mowuok e Ndiko. Be wabiro rwako siem ma imiyowago? Na ane gima notimore e kind Yudia gi Sintike e kinde Jokristo mokwongo. Nyimine ariyogo ne nigi ywaruok moro e kindgi. Ne en ywaruok mane? Muma ok wachnwa. Kata kamano, mondo wawinj maber gima ne nyalo kelo ywaruok e kindgi, we wakaw ane ni gima luwoni e ma notimore.

² Wakaw ni Yudia ogwelo owete gi nyimine moko mondo obi olime e ode, to ok ogwelo Sintike. Bang’e, Sintike winjo ni Yudia nogwelo welo kendo ne gimor ahinya. Sintike samoro nowacho kama e chunye: ‘Awuoro awuora kaka Yudia nyalo gwelo jomoko to an to oweya! Donge ne aparoga ni wan osiepe?’ Nikech Sintike ne ok mor gi gima Yudia ne otimoneno, nochako bedo mabor kode. Sintike bende nogwelo mana owete gi nyimine ma ne Yudia ogweloka, to ne ok ogwelo Yudia.  Ywaruok ma ne ni e kind Yudia gi Sintike ne nyalo ketho kuwe ma ne ni e kanyakla. Kata obedo ni Muma ok nyiswa kaka weche nodhi, wan gadier ni nyimine ariyogo norwako siem ma jaote Paulo nomiyogi.—Fil. 4:2, 3.

³ Gik ma kamago pod nyalo kelo pek moko e kanyakla mag jotich Jehova e kindewagi. Kata kamano, wanyalo tieko kata geng’o pek ma kamago ka waluwo puonj ma yudore e Wach Nyasaye. Kendo ka wageno Muma, ma en bug Jehova owuon, wabiro tiyo gi puonj manie iye.​—Zab. 27:11.

4, 5. En puonj mane ma Wach Nyasaye miyowa e wi geng’o ich wang’ sama wachwanyore?

⁴ Ok en gima yot pando kaka wawinjo e chunywa sama waneno ni ng’ato otimonwa marach. Wanyalo winjo malit ahinya ka jomoko timonwa marach mana nikech oganda ma wawuokie, pien dendwa, kata nikech gik mamoko ma miyo wabedo mopogore kodgi. To nyalo bedo malit moloyo kapo ni Jakristo wadwa e ma timonwa gigo. Be Wach Nyasaye nigi puonj ma nyalo konyowa sama jomoko timonwa gik ma kamago mana nikech gin dhano morem?

⁵ Jehova ong’eyowa maber nikech en e ma nochweyowa. Ong’eyo timbewa kod kaka wawinjoga e chunywa. Seche ma iwa owang’, wanyalo po ka wawacho weche moko kata timo gik ma nyalo miyo waywag ang’e bang’e. Omiyo, en gima ber ka waluwo puonj manie Muma mondo wageng’ mirima kendo kik wabed joma chwanyore piyo. (Som Ngeche 16:32; Eklesiastes 7:9.) Kar bedo joma chwanyore mayot, onego wabed joma oikore weyo ne jomoko kethogi. Jehova gi Yesu dwaro ni wang’won ne jowetewa. (Mat. 6:14, 15) Be ineno ni onego imed timo kinda e weyo ne jomoko kethogi kata medo kweyo mirimbi?

6. Ang’o momiyo ok onego wabed gi mirima?

⁶ Kinde mang’eny joma ok geng’ga ich wang’ bedoga gi mirima mang’eny. Mano miyoga jomoko ok dwar bedo machiegni kodgi. Ng’at ma jamirima nyalo miyo jomoko e kanyakla obed gi kidono. Onyalo temo pando mirimano kata sigu ma en-go, kata kamano, paro maricho manie chunye biro nenore bang’e. (Nge. 26:24-26) Jodongo onego okony joma kamago mondo ong’e ni mirima, sigu, kata mako sadha gin kido ma ng’ato ok onego obedgo e riwruok mar oganda Nyasaye. Muma oketo wachno maler ahinya. (Lawi 19:17, 18; Rumi 3:11-18) Be iyie gi wachno?

7, 8. (a) Jehova tayo nade joge manie riwruok mar ogandane manie piny? (b) Moko kuom gik ma Muma chikowa ni watim gin mage, to ang’o momiyo onego watimgi?

⁷ Jehova tayo kendo pidho joge manie riwruok mar ogandane manie piny kotiyo gi “jatich mogen kendo mariek” ma itayo gi Kristo ma en “wi kanyakla.” (Mat. 24:45-47; Efe. 5:23) Bura matayo e kindegi ogeno Muma ahinya nikech en Wach Nyasaye, mana kaka bura ma ne tayo e kinde Jokristo mokwongo nogeno Wach Nyasaye. (Som 1 Jo-Thesalonika 2:13.) Gin gik mage ma konyowa ma Muma chikowa ni watim?

⁸ Muma chikowa ni wadhi e chokruoge ma ok wabare. (Hib. 10:24, 25) Muma jiwowa waduto ni wayie gi puonj ma yudore e iye. (1 Kor. 1:10) Wach Nyasaye nyisowa ni waket Pinyruoth obed mokwongo e ngimawa. (Mat. 6:33)  Muma jiwowa bende ni watim kar mwanyalo e lendo ot ka ot, e lela, kod seche ma wan e tijewa. (Mat. 28:19, 20; Tich 5:42; 17:17; 20:20) Muma chiko jodong-kanyakla ni giket kanyakla osik ka ler. (1 Kor. 5:1-5, 13; 1 Tim. 5:19-21) E wi mano, Jehova dwaro ni jogo duto ma lame obed maler e dendgi kendo gitang’ gi paro kod timbe ma osin-go.​—2 Kor. 7:1.

9. Yo achiel kende ma Yesu tiyogo mondo okonywa winjo tiend Muma en mane?

⁹ Jomoko nenoga ni ginyalo somo Muma kendgi ma giwinj tiende. Kata kamano, “jatich mogen” kende e ma Yesu tiyogo e miyowa chiemb chuny. Chakre higa mar 1919, Yesu Kristo osebedo ka tiyo gi jatijno mondo okony jolupne owinj tiend weche manie Muma, kendo mondo giluw wechego. Ka watimo kaka Muma chikowa, mano miyo warito ler, kuwe, kod winjruok manie kanyakla. Ng’ato ka ng’ato kuomwa onego openjre niya, ‘Be amakora gi yo ma Yesu tiyogo e tayo jolupne e kindegi?’

10. Ere kaka bug Ezekiel lero riwruok mar oganda Jehova manie polo?

¹⁰ Muma konyowa ng’eyo kaka riwruok mar oganda Jehova manie polo tiyo. Kuom ranyisi, janabi Ezekiel noneno fweny ma nyiso tielo mag gari maduong’ miwuoro mochung’ ne riwruok mar oganda Jehova manie polo. (Eze. 1:4-28) Jehova e ma riembo garino kendo garino dhi kamoro amora ma roho ochike mondo odhiye. Kaka Jehova tayo garino e ma chiko kaka riwruok mar ogandane manie piny bende tiyo. Garino osebedo ka ni e ng’wech! Parie lokruoge moko ma Jehova osetimo e riwruok mar ogandane kuom higni apar ma osekalo. Nikech Kristo kaachiel gi malaike chiegni ketho piny marachni, gach Jehova ringo matek kochomo kama odhi ketoe nying Jehova obed maler kendo nyiso ni Jehova e ma nigi ratiro mar bedo jaloch e wi gik moko duto!

11, 12. Moko kuom gik ma riwruok mar oganda Jehova timo gin mage?

¹¹ Parie moko kuom gik ma riwruok mar oganda Jehova manie piny osebedo ka timo e ndalo gikogi. Tij gedo. Owete gi nyimine modhuro nochiwore mondo gikony e tij gero ofis maduong’ mar Joneno mag Jehova man Warwick, New York, e piny Amerka. Owete gi nyimine mathoth mowuok e piny mangima, chiwore mondo giger Ute mag Romo kendo medo yaro ofisewa manie pinje mopogore opogore ka itayogi gi Migawo Mochung’ ne Gedo e Piny Mangima. To mano kaka wamor gi owete gi nyimine ma tiyo matek e tije kaka mago! Jehova guedho jotichne duto ma riwo lwedo gedo ma kamago gi chuny ma obolore  kuom chiwo gimoro amora ma gin-go mondo gisirgo tijego.​—Luka 21:1-4.

¹² Skunde. Ne ane moko kuom skunde mopogore opogore ma Jehova tiyogo e puonjo joge. (Isa. 2:2, 3) Wan gi Skul mar Jopainia, Skul mar Joland-Injili mar Pinyruoth, Skul mar Gilead, Skul mar Joma Nyien e Bethel, Skul mar Jorit-Alwora kod Mondegi, Skul mar Jodong-Kanyakla, Skul mar Tij Pinyruoth, kod Skul mar Jokomiti Matayo Bad Ofis kod Mondegi. Kuom adier, Jehova tiego joge! Websait mar jw.org bende konyo ahinya e puonjo ji Muma nikech oting’o buge mang’eny e dhok modhuro. Websaitno nigi kuonde mopogore opogore ma nyalo konyo nyithindo, joot, kendo nitie kama iyudoe gik manyien momedi. Be isebedo ka itiyo gi jw.org e tij lendo kod e lamo mar joot?

13. Jotich Jehova nigi ting’ mane?

¹³ Mano kaka en gueth makende bedo e riwruok mar oganda Jehova! Ng’eyo chike mag Jehova kod gik ma odwaro ni watim miyo wabedo gi ting’ mar timo gik ma kare kendo riwo lwedo ratiro ma en-go mar bedo jaloch. Kaka pinyni medo sikore e gik ma richo moloyo, e kaka wan bende nyaka wasin gi gik ma richo mana kaka Jehova bende osin kodgi. (Zab. 97:10) Ok wariwre gi joma luongo “rach, ni ber kendo ber, ni rach.” (Isa. 5:20) Nikech wadwaro ni wamor Nyasaye, watemo matek mondo wasik ka waler e ringrewa kod timbewa kendo bedo gi winjruok maber gi Nyasaye. (1 Kor. 6:9-11) Nikech wahero Jehova kendo wagene, mano miyo wayiero mar nyiso ni wamakore kode kuom luwo chikene manie Muma. Kendo watemo matek mondo waluw chikego kamoro amora ma wantie, bed ni wan pacho, e kanyakla, e tich, kata e skul. (Nge. 15:3) Wane ane yore mamoko ma wanyalo medo nyisogo ni wamakore gi Jehova.

14. Jonyuol ma Jokristo nyalo nyiso nade ni gimakore gi Nyasaye?

¹⁴ Pidho nyithindo. Jonyuol ma Jokristo nyiso ni gimakore gi Jehova kuom puonjo nyithindgi ka gitiyo gi chike manie Muma. Jonyuol moluoro Nyasaye ok ta gi timbe kod chike mag ogendini ma giwuokie e wi kaka onego gipidh nyithindgi. Chuny mar pinyni ok onego obed e od Jakristo. (Efe. 2:2) Wuoro ma Jakristo ok onego opar e chunye ni ‘E ogandawa kae, mon e ma puonjoga nyithindo.’ Muma nyiso maler ni en ng’a monego opuonj nyithindo kowacho kama: “Wuone, . . . dhiuru nyime [pidho nyithindu] ka urieyogi kendo kupuonjogi kaka Jehova dwaro.” (Efe. 6:4) Jonyuol mohero Jehova diher ni nyithindgi obed kaka Samuel, nikech Jehova ne nigi Samuel kinde duto ka ne odongo.​—1 Sam. 3:19.

15. Ere kaka wanyiso ni wamakore gi Jehova sama watimo yiero madongo e ngimawa?

¹⁵ Timo yiero. Wanyalo nyiso ni wamakore gi Nyasaye sama watimo yiero madongo e ngimawa kuom tiyo gi puonj manie Muma kendo luwo kaka riwruok mar ogandane tayowa. Mondo wane gimomiyo timo kamano dwarore, ne ane wach moro ma kore tek ma jonyuol jaromogo. Kinde mang’eny nitie jonyuol ma teroga nyithindgi ne wedegi mondo odaggo sama gin to gidhi nyime tiyo mabor gi nyithindgigo. Kata obedo ni ng’ato owuon e ma nigi ratiro mar timo yiero e wi wachni, nyaka wang’e ni  waduto wabiro chiwo dwoko e nyim Nyasaye. (Som Jo-Rumi 14:12.) Be en gima nyiso rieko timo yiero madongo ma mulo ngima joodwa kod tijewa ka pok wanono gima Muma wacho? Ooyo. Nyaka Wuonwa manie polo e ma tawa nikech wan wawegi ok wanyal chikore kendwa e yo maber.​—Yer. 10:23.

16. En yiero mane ma miyo moro ne nyaka tim ka ne onyuolo nyathi ma wuoyi, to ang’o ma nokonye timo yiero makare?

¹⁶ Miyo moro ma nodhi tiyo e piny machielo nonyuolo nyathi ma wuoyi kae to ong’ado mar tero wuodeno thurgi mondo odag gi kwargi gi dagi. E kinde ma ne ochiegni nyuol, Janeno mar Jehova nochako puonjore kode Muma. Nopuonjore ni en ema en gi ting’ mar pidho nyathine mondo obi olam Jehova. (Zab. 127:3; Nge. 22:6) Nolemo mondo Nyasaye okonye mana kaka Muma chikowa ni watim. (Zab. 62:7, 8) Nowuoyo bende gi japuonjne mar Muma kod jomamoko e kanyakla. Kata obedo ni wedene nokase mondo oter nyathino pacho odhi odag gi kwargi gi dagi, notamore timo gima kamano. Yo ma owete gi nyimine noriwego lwedo nomoro chwore ahinya ma en bende ochako puonjore Muma kendo dhi e chokruoge. Be iparo ni Jehova nodwoko lamo mar miyono? Onge kiawa ni nomor ahinya ka ne Jehova odwoko lamone.

17. Osemiwa paro mane monego watigo e tayo jopuonjre mag Muma?

¹⁷ Luwo kaka itayowa. Yo maduong’ ma wanyisogo ni wamakore gi Nyasaye en kuom luwo kaka itayowa gi riwruok mar ogandane. Kuom ranyisi, ne ane moko kuom yore ma osenyiswa ni watigo sama watayo jopuonjre mag Muma. Osenyiswa ni onego wakawga thuolo moro matin gi ng’at ma wapuonjorego bug Ang’o ma Muma Puonjo Kuom Adier?, mondo wakonye ng’eyo kaka ochan riwruok mar oganda Jehova. Wanyalo timo kamano ka watiyo gi vidio mar Ang’o ma Timorega e Kingdom Hall? kod brosua mar Gin Jomage Matimo Dwaro mar Jehova e Kindegi? Ka wasetieko bug Muma Puonjo gi japuonjre ma timo dongruok, onego wachak puonjore kode bug “Ritreuru e Hera mar Nyasaye” kata kapo ni osebatise. Timo kamano konyo jopuonjre manyien mondo ‘gichung’ motegno e yie.’ (Kol. 2:7) Be itiyoga gi paro mabeyo ma imiyowa gi riwruok mar oganda Jehova?

18, 19. Ang’o momiyo onego wago ne Jehova erokamano?

¹⁸ Nitie gik mang’eny ma Jehova omiyowa ma miyo onego wadwokne erokamano! Jehova omiyowa ngima kendo oritowa maber. (Tich 17:27, 28) Omiyowa mich maber ahinya ma en Muma. Mana kaka Jokristo ma ne ni Thesalonika, wan bende wayie ni Muma en Wach Nyasaye.​—1 The. 2:13.

¹⁹ Nikech watiyo gi Muma, mano osemiyo wasudo machiegni gi Nyasaye kendo en bende osesudo machiegni kodwa. (Jak. 4:8) Wuonwa manie polo osemiyowa thuolo makende ahinya mar bedo e riwruok mar ogandane. To mano kaka wamor bedo osiepe Jehova! Jandik zaburi noketo wechego e yo maber ka nondiko niya: “Gouru erokamano ni Jehova; nimar ober: nimar kechne osiko nyaka chieng’.” (Zab. 136:1) Zaburi sula mar 136 wuoyo e wi Jehova kowacho nyadi 26 ni “kechne osiko nyaka chieng’.” Ka wamakore gi Jehova, wabiro neno adiera mar wechego nikech wabiro dak nyaka chieng’!