1, 2. (a) En mich mane ma jotich Jehova geno yudo? (b) Ang’o ma nyalo konyowa chomo wang’wa kuom mich? (Ne picha man malo.)

MANA kaka jaote Paulo, Jokristo mowal nigi thuolo makende mar yudo ‘mich man malo ma Nyasaye oseluongogie.’ (Fil. 3:14) Gin gi geno ni gibiro locho kod Yesu Kristo e polo ka gikelo ne dhano ngima makare chuth. (Fwe. 20:6) Adier, mano en luong makende ma Nyasaye oseluongogigo! Rombe mamoko to nigi geno mar yudo mich mopogore. Gigeno yudo ngima ma nyaka chieng’ e piny ka. Mano kaka gin gi geno ma jaber ndi!​—2 Pet. 3:13.

² Paulo nonyiso Jokristo wetene mowal gima ne ginyalo timo mondo gichung’ motegno kendo gibi giyud mich. Nonyisogi niya: “Sikuru ka uketo pachu kuom gik man malo.” (Kol. 3:2) Notemo nyisogi ni giket pachgi kuom geno makende ma gin-go mar dak e polo. (Kol. 1:4, 5) Kuom adier, paro matut kinde duto e wi gueth ma Jehova oseiko konyo jotichne duto mondo gichom wang’gi kuom mich, bed ni ng’ato nigi geno mar dak e polo kata e piny.​—1 Kor. 9:24.

3. Gin gik mage ma Paulo nonyiso Jokristo wetene ni nyalo monogi yudo mich?

 ³ Bende, Paulo nonyiso Jokristo wetene gik ma ne nyalo monogi yudo mich. Kuom ranyisi, ka nondiko ne Jo-Kolosai, nonyisogi ni nitie Jokristo moko mag miriambo ma ne temo makore gi Chike Musa kar mondo giket yie kuom Kristo, nikech ne giparo ni timo mano e ma ne nyalo miyo Nyasaye oyie kodgi. (Kol. 2:16-18) Nitie gik mamoko bende ma Paulo nonyisogi ma nyalo monowa wan bende yudo mich. Kuom ranyisi, nonyisogi kaka ginyalo kedo gi gombo maricho mag terruok, kaka ginyalo loso weche sama ywaruok oneno e kindgi, kod kaka ginyalo nyagore gi achiedh nade mag udi. Paro ma nochiwo e wi wechego nyalo konyowa wan bende. Omiyo, we wanon ane moko kuom siem ma yudore e barua ma Paulo nondiko ne Jo-Kolosai.

4. Ang’o momiyo wanyalo wacho ni gombo mag terruok nyalo monowa yudo mich?

⁴ Bang’ ka Paulo ne oseparo ne Jokristo wetene geno ma jaber ma gin-go, ne onyisogi niya: “Neguru fuonni mag ringreu manie piny, ka uweyo terruok, gi tim ma ok ler, kod owruok gi gombo mag terruok, gi gombo ma kelo hinyruok, kod ich-lach.” (Kol. 3:5) Ka ok watang’, gombo mag terruok nyalo loyowa kendo mano nyalo monowa yudo mich. Nitie owadwa moro ma gombo mag terruok ne omwomo. Bang’ ka ne oseduogo e kanyakla, ne owacho niya: “Ne awinjo ka gimoro ywaya ayawa mondo atim gik ma ne agombogo. Wang’a noduogo oyepo mana bang’e ka weche nosekethore.”

5. Ang’o ma wanyalo timo sama waromo gi tem moro ma nyalo miyo watim gik ma Jehova ok oyiego?

⁵ Onego wabed motang’ ahinya sama waromo gi tem moro ma nyalo miyo watim gik ma Jehova ok oyiego. Kuom ranyisi, nyalo bedo maber ka joma chano kendore oketo tong’ e wi weche kaka makruok, nyodhruok, kata bedo kar kendgi e kinde ma gitimo kisera. (Nge. 22:3) Bende, Jakristo nyalo yudore e tem ka odhi tich kamoro mabor ma nyalo miyo onind oko kuom ndalo moko, kata samoro tich nyalo riwe machiegni gi ng’at ma ok en jaode. (Nge. 2:10-12, 16) Ka gima kamano otimoreni, tem wacho chon ni in Janeno mar Jehova, bed gi timbe mabeyo, kendo tem mondo kik idonjri e angera moko moyuma nikech timo mano nyalo rwaki e chandruok. Bende, yot ahinya mondo walwar e obadho mar terruok seche ma wan gi parruok mang’eny. Sama wan gi parruok, wanyalo gombo mondo wayudie ng’at moro ma duogo chunywa kata ma chikonwa ite. Gombo ma kamago nyalo miyo wagore agoya kuom ng’ato ang’ata moriwo. Seche mineno ka inyalo donjo e tem, kwa Jehova mondo omiyi teko kendo ibed machiegni gi Jokristo weteni mondo kik itim gimoro amora ma nyalo moni yudo mich.​—Som Zaburi 34:18; Ngeche 13:20.

6. En paro mane monego wabedgo sama wayiero yore mag manyo mor?

⁶ Mondo waneg gombo mag terruok, nyaka watamre yore mag manyo mor mochido. Yore ma tinde ji manyogo mor oyugno mana ka ndalo Sodom gi Gomora. (Juda 7) Joma loso thumbe, sinembe, kod gik mamoko ma kamago losogi e yo ma miyo timbe mag terruok ok nenre ka gima rach kata ma nyalo hinyo ng’ato. Mano en paro ma ok onego wabedgo kata matin, kendo ok onego wayie ayie gi yore duto mag manyo mor. Onego wayier yore mag manyo mor ma ok bi monowa chomo wang’wa kuom mich.​—Nge. 4:23.

7. Gin chandruok mage ma seche moko wanyalo bedogo e kanyakla?

⁷ Wang’eyo ni bedo e kanyakla mar Jokristo en gueth maduong’ ahinya. Puonjruok Wach Nyasaye e chokruogewa kaachiel gi hera ma owetewa gi nyiminewa nyisowa konyowa mondo wachom wang’wa kuom mich. Kata kamano, nitie seche moko ma ywaruok matindo tindo nyalo kelo chwanyruok e kindwa. Ka ok watemo matek mondo walos wechego, yot mondo wachak mako sadha.​—Som 1 Petro 3:8, 9.

8, 9. (a) Gin kido mage ma ka wabedogo to wabiro yudo mich? (b) Ang’o ma wanyalo timo ka Jakristo wadwa ochwanyowa?

⁸ Ang’o ma wanyalo timo mondo sadha kik monwa yudo mich? Paulo nojiwo Jokristo ma ne ni Kolosai niya: “Kaka joma Nyasaye oseyiero, maler kendo mohero, rwakreuru gi hera ma kecho jomamoko, ng’wono, bolruok, muolo, kod horuok. Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo kata kapo ni ng’ato nigi wach moro gi nyawadgi. Mana kaka Jehova bende ne ni thuolo weyonu richou, un bende nyaka utim kamano. To e wi mago duto, rwakreuru gi hera, nimar en e gima tueyo ji duto mondo gibed e achiel chuth.”​—Kol. 3:12-14.

⁹ Hera kod ng’wono nyalo konyowa bedo joma weyo ne jomamoko kethogi. Kuom ranyisi, ka po ni ichwanyori nikech gima Jakristo wadu owacho kata otimo, par ni nitie kinde ma in be isegachwanyo ng’ato. Donge wamor ni owetewa gi nyiminewa oherowa kendo giikore ng’wononwa sama wachwanyogi? (Som Eklesiastes 7:21, 22.) To moloyo duto, wamor gi ng’wono ma Kristo nonyiso kuom choko jolupne madier kanyachiel. (Kol. 3:15) Waduto walamo Nyasaye achiel, walando wach ma chalre, kendo chandruoge ma waromogo bende chalre. Sama waweyo ne jomoko kethogi, wamiyo kue bet e kindwa kendo mano konyowa chomo wang’wa kuom mich mar yudo ngima.

10, 11. (a) Ang’o momiyo nyiego rach? (b) Ang’o ma wanyalo timo mondo nyiego kik monwa yudo mich?

¹⁰ Nitie ranyisi mag jomoko e Muma ma konyowa ng’eyo kaka bedo gi nyiego nyalo monowa yudo mich. Kuom ranyisi, Kain nonego Abel owadgi nikech ne en gi nyiego kode. Nyiego achiel achielno e ma nomiyo Kora, Dathan, gi Abiram ong’anyo ne Musa. Bende, nyiego e ma ne omiyo Ruoth Saulo otemo nego Daudi. Mano e momiyo Muma wacho niya: “Kamoro amora ma nyiego kod ywaruok . . . nitie, kanyo bende e ma koko mag chochni kod gik moko duto maricho nitie.”​—Jak. 3:16.

¹¹ Hera kod ng’wono nyalo konyowa thiro kido marach mar nyiego. Muma wacho kama: “Hera hore mos kendo ong’won. Hera onge gi nyiego.” (1 Kor. 13:4) Mondo nyiego kik dong e chunywa, onego watem matek mondo wane gik moko e yo ma Jehova nenogigo. Jehova neno owetewa gi nyiminewa kaka joma ni e ringruok achiel, to mano e kaka wan be onego wanegi. Muma wacho kama: “Ka fuoni achiel imiyo duong’, mamokogo duto yudo mor kanyachiel kode.” (1 Kor. 12:16-18, 26) Omiyo, onego wanyis Jokristo wetewa ng’wono. Kar bedo gi nyiego sama weche dhi maber ne Jakristo wadwa moro, onego wamor matek nikech mano girwa waduto. Ne ane ranyisi mar Jonathan wuod Ruoth Saulo. Nyiego ne ok omake gi Daudi ka ne owal Daudi mondo obi obed ruoth. Kar mano, ne ojiwe ahinya. (1 Sa. 23:16-18) Donge nyalo  bedo maber ka wabedo mang’won gi Jokristo wetewa kendo herogi mana kaka Jonathan notimo ne Daudi?

12. En puonj mane ma nyalo konyo joot yudo mich?

¹² Luwo puonj ma ni e Muma nyalo konyo joot mondo odag gi kue kod mor, to mano nyalo giduto giyud mich. En puonj mane ma Paulo nomiyo Jokristo ma ne ni Kolosai ma nyalo konyo e ngima mar joot? Nondikonegi kama: “Un mon, bolreuru e bwo chwou, nimar en gima owinjore kuom Ruodhwa. Un chwo, dhiuru nyime hero mondeu kendo kik ubed gi mirima mager kodgi. Un nyithindo, winjuru jonyuolu e gik moko duto nimar mano en gima ber kuom Ruodhwa. Un wuone, kik umi nyithindu obed gi mirima mondo chunygi kik nyosre.” (Kol. 3:18-21) Donge en gima nenore ayanga ni tiyo gi puonjno nyalo konyo chwo, mon, kod nyithindo?

13. Ang’o ma dhako ma Jakristo nyalo timo mondo oywa chwore e adiera?

¹³ Nade ka in dhako to ineno ni chwori ma ok Janeno ok oheri kendo oger kodi? Be iparo ni lwerruok kode biro loso weche? To kata ka ilwere ma oyie timo gima idwaro, be mano biro ywaye mondo obed Janeno? Tek ahinya. Kimiyo chwori  luor, odu biro bedo gi kue, nying Jehova biro yudo duong’, kendo timbeni mabeyo nyalo miyo chwori obed Jakristo mi gikone uyud mich kanyachiel.​—Som 1 Petro 3:1, 2.

14. Ang’o ma dichwo ma Jakristo nyalo timo ka oneno ni chiege ma ok Janeno ochaye?

¹⁴ Nade ka in dichwo to ineno ni chiegi ma ok Janeno ochayi? Be obiro miyi luor adier ka po ni isiko kidhawone kendo iparone sa ka sa ni in e ma ninyuome? Onge ndi! Nyasaye diher ni iti maber gi migawo momiyi kaka wi ot, kiluwo ranyisi mar Yesu. (Efe. 5:23) Yesu hore ahinya sama otayo kanyakla. (Luka 9:46-48) Ka iluwo ranyisine, inyalo ywayo chiegi mi obi e adiera.

15. Dichwo ma Jakristo nyalo nyiso nade ni ohero chiege?

¹⁵ Muma nyiso chwo kama: “Dhiuru nyime hero mondeu kendo kik ubed gi mirima mager kodgi.” (Kol. 3:19) Dichwo mohero chiege chiko ite ne paro ma chiege chiwo kendo okonye bedo gadier ni okawo parogo mapek. (1 Pet. 3:7) Kata obedo ni ok dotim gik moko te ma chiege dwaro, winjo pach chiege pod nyalo konye ng’ado paro ma biro konyogi giduto. (Nge. 15:22) Dichwo mohero chiege ok chun chiege mondo omiye luor; kar mano, otemo matek mondo otim gik mabeyo ma nyalo miyo chiege omiye luor kowuok e chunye. Dichwo mohero chiege kod nyithinde bedo gi ngima mamor sama gitiyo ne Jehova kanyachiel, kendo bang’e gibiro yudo mich kaka joot.

16, 17. Ang’o ma joma tindo nyalo timo mondo girwak siem kod puonj ma jonyuolgi miyogi?

¹⁶ Nade ka in rawera to ineno ni jonyuolni ma Jokristo oridoni ngima ahinya? Chunyi nyalo chandore ma ipo ka ichako paro ni tiyo ne Jehova ok ber. Ka irwako paro ma kamano mi iweyo tiyo ne Jehova, ibiro ywak ahinya nikech ibiro fwenyo mapiyo ni onge ng’ato ang’ata ma nyalo heri gadier e pinyni mopogore gi Joneno mag Jehova kod jonyuolni moluoro Jehova.

¹⁷ Ka janyuolni pok nokweriga wach moro kata miyi kum, donge inyalo wuoro ka be giheri adier? (Hib. 12:8) Samoro nyalo bedo ni yo ma jonyuolni rieyigo e ma ok mori. Ka en kamano, tem kik itamri luwo kaka gichiki mana nikech ok imor gi yo ma gitimogo kamano. Tem matek mondo pachi oyie ni nyaka bedie ni nitie gimomiyo gitemo rieyi. Kik imin kodgi wach, kendo kik iyi wang’ mokalo tong’. Muma wacho kama: ‘Ng’ama rito dhoge en ng’a mong’eyo; kendo ng’ama chunye ng’ich en ng’at ma weche donjone.’ (Nge. 17:27) Tem ahinya mondo ibed ng’at mochwiny ma ka omiyi siem to irwako e yo mamuol ma ok iketo pachi ahinya kuom yo mochiwgo siemno. (Nge. 1:8) Bedo gi jonyuol ma ong’eyo Jehova en gueth maduong’ ahinya. Gibiro konyi kedo mondo ibi iyud mich mar ngima.

18. Ang’o momiyo diher siko kichomo wang’i kuom mich ma Jehova osingonwa?

¹⁸ Ngima maber oritowa nyime ka. Jomoko kuomwa biro yudo ngima e polo, to moko e piny. Wan gadier chuth ni wabiro yudo ngimano nikech Jachuechwa e mosingonwago. Nyasaye wacho kama e wi Paradiso mabiro: “Ng’eyo Jehova nopong’ piny, kaka pige opong’o nam.” (Isa. 11:9) Ji duto ma biro dak e kindeno biro yudo puonj mowuok kuom Jehova nyaka chieng’. Mano mich monego wakedne matek. Kuom mano, sik kiketo pachi kuom mich mabeyo ma Jehova osingonwa, kendo kik iyie mondo gimoro amora omoni yudo mich!