Be Itemo Matek Mondo Pachi Ochal gi Pach Jehova?
“Lokreuru kuom miyo pachu obed manyien.”—RUMI 12:2.
1, 2. En ang’o ma wamedo ng’eyo kaka wamedo lony e yore Jehova? Chiw ane ranyisi.
SAMA ng’ato omiyo nyathi matin mich moro, jonyuolne nyalo nyise ni, “Gone erokamano.” Nyathino nyalo timo kaka onyiseno, to mana nikech janyuol owacho. Kaka omedo dongo, e kaka omedo fwenyo ni paro ma jonyuolne nigo e wach goyo erokamano ber. Gikone, obedo gi tim mar goyo erokamano kowuok e chunye sa asaya ma ng’ato otimone gimoro maber. Nikech ang’o? En nikech koro oserwako pach jonyuolne.
2 E yo ma chalo kamano, ka ne wahango puonjore adiera, ne waneno gimomiyo dwarore ni waluw chike Jehova ma onyisowa achiel kachiel. Kaka wamedo lony e yore Nyasaye, e kaka wamedo ng’eyo pache, tiende ni, gik mohero kod ma ok ohero, kaachiel gi yo monenogo gik mopogore opogore. Kuom bedo gi paro ma chalo kamano kendo yie mondo parono ochik timbewa kod yierowa, wanyiso ni watemo matek mondo pachwa ochal gi pach Jehova.
3. Ang’o momiyo nyalo bedonwa matek bedo gi paro kaka mar Jehova?
3 Timo kinda mondo wabed gi paro kaka mar Jehova en gima ber, kata kamano, en gi pek moko. Nitie kinde ma pachwa mobam nyalo monowa rwako pach Jehova. Kuom ranyisi, nyalo bedonwa matek ng’eyo maler paro ma Jehova nigo e weche kaka bedo gi timbe maler, hero mwandu, tij lendo, medo remo, kod gik mamoko. Ang’o ma wanyalo timo? Ere kaka wanyalo dhi nyime timo dongruok mondo wabed gi paro kaka mar Jehova? To timo kamano onego okonywa mondo wabed gi timbe ma chalo nade sani kod e kinde mabiro?
KAKA WANYALO BEDO GI PARO MA CHAL GI PACH NYASAYE
4. Mondo ‘walok pachwa obed manyien’ kaka jaote Paulo nowacho, ang’o ma dwarore?
4 Som Jo-Rumi 12:2. E ndikoni, jaote Paulo nolero gik ma nyaka watim mondo wabed gi paro ma chal gi mar Jehova. E sula mokalo, ne wapuonjore ni ka wadwaro ‘weyo luwo kit ngima mar joma odak e ndaloni,’ nyaka wakwed paro ma jopinyni nigo. E ndikono bende, Paulo nowacho ni nyaka ‘walok pachwa obed manyien.’ Mano dwaro ni wapuonjre Wach Nyasaye ka dwachwa maduong’ en bedo gi paro kaka meke, paro matut kuom gik ma wapuonjore kuome, kendo temo matek mondo pachwa owinjre gi mare.
5. Ler ane pogruok ma nitie e kind somo awiye-awiye kod puonjruok.
5 Puonjruok ok en aena somo awiye-awiye kata kiewo dwoko mag penjo ma ni e buk. Sama wapuonjore, onego wanon gik ma weche ma wapuonjorego konyowa ng’eyo e wi Jehova, yorene, kod pache. Onego watem fwenyo gimomiyo Nyasaye nyisowa ni watim gimoro to okwerowa machielo. Bende, onego watem neno kuonde monego watimie lokruok e timbewa kod pachwa. Kata obedo ni seche moko ok wanyal timo gigo duto e puonjruok ka puonjruok, wanyalo yudo ber mathoth ka watiyo gi nus thuolo ma wayango ne puonjruok e paro matut kuom gik ma wapuonjore.—Zab. 119:97; 1 Tim. 4:15.
6. Sama waparoga matut kuom Wach Nyasaye, en ang’o makende ma timore?
6 Sama waparoga matut kuom Wach Nyasaye, nitie gimoro makende ma timorega. Wayudo thuolo mar ‘ng’eyo gadier’ ni yo ma Jehova nenogo gik moko e ma ni kare. Wachako neno gik moko mana kaka onenogi, kendo warwako pache. ‘Pachwa bedo manyien,’ kendo wachako neno gik moko e yo manyien. Mosmos, wachako bedo gi paro ma chal gi mar Jehova.
GIK MA WAPARO E MA CHIKO TIMBEWA
7, 8. (a) Jehova nigi paro mane e wi mwandu? (Ne pichni manie chak sulani.) (b) Ka warwako pach Jehova, en ang’o ma wabiro keto mokwongo e ngimawa?
7 Kik wagal ni wanyalo paro kuom gimoro kae to orumo gi kanyo. Gik ma waparo kod gik ma watimo dhiga kanyachiel. (Mar. 7:21-23; Jak. 2:17) Mondo wawinj tiend wachno maber, wanon ane weche moko e Muma. Kuom ranyisi, buge mag Injili konyowa ng’eyo paro ma Jehova nigo e wi mwandu. Nyasaye noyiero mondo dhano adhana kendo modhier e ma opidh Wuode. (Lawi 12:8; Luka 2:24) Ka ne Maria onyuolo Yesu, “nopiele e sanduk mimiyoe dhok chiemo nikech ne onge od bworo ma ne ginyalo betie.” (Luka 2:7) Jehova ne nyalo tiyo gi yore mang’eny mondo oyier kama ber mogik mondo nyuolie Wuode, to ne ok otimo kamano. Gima ne duong’ ne Jehova en ni Yesu odong e lwet jonyuol mohero weche mag chuny.
8 Ranyisini konyowa neno paro ma Jehova nigo e wi mwandu. Nitie jonyuol moko ma nyalo jiwo ne nyathi wach manyo mwandu ma kata nyathi weyo lamo Jehova to ok gidew. Jehova to neno ni weche motudore gi lame duong’ ma ok dipim gi gimoro amora. Be iserwako pach Jehova e wachno? Timbeni nyiso ang’o?—Som Jo-Hibrania 13:5.
9, 10. Wanyalo nyiso nade ni pachwa chal gi pach Jehova e wach chwanyo jomamoko?
9 Ranyisi machielo en kaka Jehova neno tim mar chwanyo jomamoko. Yesu nowacho kama: “Ng’ato ang’ata ma chwanyo achiel kuom joma tindo ma nyiso yiegi, dibed maber moloyo ka otue e ng’ute kidi mar pong’, kaka mirundo gi punda, mondo onyumego e nam.” (Mar. 9:42) Mago weche mapek ahinya! To nikech Yesu nigi kido ma chal gi mag Jehova, wan gadier ni Jehova bende ok mor kata matin gi ng’ato ang’ata ma timo atima gik moko ma ok odewo ni timbene chwanyo jomamoko.—Joh. 14:9.
10 Be wan gi paro ma chal gi mar Jehova gi Yesu e wachno? Be waserwako parono? Timbewa nyiso ang’o? Kuom ranyisi, samoro nitie kit rwakruok kata dusruok moro ma omako wang’wa, to wang’eyo maber ni onyalo chwanyo jomoko e kanyakla kata miyo jomoko obed gi gombo moko maricho kuomwa. Be hera ma waherogo Jokristo wetewa biro chwalowa mondo watamre kit rwakruok kata dusruok ma chalo kamago?—1 Tim. 2:9, 10.
11, 12. Ere kaka sin gi gik ma Jehova osin-go kendo bedo gi ritruok nyalo konyowa mondo kik watim gik mochido?
11 Ranyisi mar adek en ma: Jehova osin gi timbe mamono. (Isa. 61:8) Kata obedo ni Jehova ong’eyo ni bedowa dhano morem seche moko nyalo miyo watim gik ma ok kare, odwaro ni wasin gi gik maricho. (Som Zaburi 97:10.) Ka waparo matut kuom gimomiyo Jehova osin gi gik maricho, mano biro konyowa mondo wabed gi paro kaka mare, to mano biro medo jiwowa mondo watamre timo gik maricho.
12 Ka wasin gi gik maricho kaka Jehova osin-go, mano biro konyowa fwenyo timbe moko maricho kata ka Muma ok owuoyo kuomgi achiel kachiel. Kuom ranyisi, nitie kit miel moro mong’ere kaka lap dancing ma en miel mochido marach, to tinde onya ahinya. Nitie joma nyalo wacho ni miendno ok rach ahinya nikech ok en nindruok achiel kachiel. * To be timbe ma kamago nyiso pach Jehova ma en Nyasaye mosin gi gik maricho duto? Wabeduru mabor gi timbe mochido kuom bedo gi kido mar ritruok kaachiel gi sin gi gik ma Jehova osin-go.—Rumi 12:9.
PAR MOTELO GIMA IBIRO TIMO KA PO NI WACH MORO CHIENG’ OYUDI
13. Ang’o momiyo ber mondo wapar motelo kaka bedo gi pach Jehova nyalo konyowa e weche moko ma wanyalo romogo e kinde mabiro?
13 Sama wapuonjore Muma, ber mondo wapar motelo kaka bedo gi pach Jehova nyalo konyowa e weche moko ma wanyalo romogo e kinde mabiro. Ka watimo kamano, biro bedonwa mayot mondo wakaw okang’ mapiyo sama waromo gi tem moro apoya. (Nge. 22:3) Wane ane ranyisi moko e Muma.
14. Yo ma Josef nokwedogo tembe ma chi Potifar ne siko ka keto e nyime puonjowa ang’o?
14 Yo ma Josef nokwedogo tembe ma chi Potifar ne siko ka keto e nyime nyiso maler ni noseparo motelo kuom kaka Jehova neno tudruok ma ni e kind dhako gi dichwo mokendore. (Som Chakruok 39:8, 9.) E wi mano, dwoko ma nomiyo chi Potifar nyiso ni nosebedo gi paro ma chal gi mar Jehova. Nonyiso dhakono kama: “Danyal nade timo richo maduong’ni, kendo ketho kuom Nyasaye?” To nade wan? Nade ka jatich wadwa moro ochako mila moko mag kisera kodwa? To nade ka ng’ato ooronwa mesej moro e simu ma nyiso weche mag nindruok kata ooronwa picha ma nyiso timbe ma kamago? * Biro bedonwa mayot mondo wachung’ motegno mana ka waserwako pach Jehova chon e weche ma kamago, kendo ka waseng’ado motelo gima wabiro timo e tembe ma kamago.
15. Wanyalo timo ang’o mondo wamakre gi Jehova mana kaka Shadrak, Meshak, kod Abednego notimo?
15 Koro wane ane ranyisi mar Shadrak, Meshak, kod Abednego. Yo ma ne gitamorego lamo sanamu ma Ruoth Nebukadereza noloso kod yo ma ne gidwokogo ruodhno nonyiso ni ne giseparo motelo yore ma ng’ato nyalo nyisogo ni omakore gi Jehova. (Wuok 20:4, 5; Dan. 3:4-6, 12, 16-18) Nade ka ng’at mondiki tich okwayi ni isol pesa mibiro tigo e siro nyasi moro motudore gi din mar miriambo? Ibiro timo nang’o? Kar rito nyaka chieng’ moro gima kamano otimreni e ka ing’ad gima ibiro timo, donge nyalo bedo maber kinono sani paro ma Jehova nigo e wi wach ma kamano? Kae to ka gima kamano oyudi, biro bedo mayot mondo ichiw dwoko makare kendo itim gik mowinjore mana kaka Shadrak, Meshak, kod Abednego notimo.
Be isetimo nonro e weche thieth mitiyoe gi remo mipong’o fom ma nyiso gik ma diher ni otimni kod ma ok diher, kendo wuoyo gi laktar? (Ne paragraf mar 16)
16. Ere kaka ng’eyo pach Jehova nyalo miyo waikre maber ne weche thieth ma nyalo bironwa apoya?
16 Paro motelo yore ma wanyalo makorego gi Jehova nyalo konyowa bende seche ma weche thieth oyudowa apoya. Kata obedo ni waseng’ado e chunywa ni ok wabi yie mondo medwa remo kata ng’injo ang’wen madongo mag remo, nitie kit thieth moko minyalo tiye gi ng’injo matindo tindo mag remo ma dwaro ni ng’ato otimie yiero owuon ka luwore gi puonj mag Muma ma lero pach Jehova. (Tich 15:28, 29) Kik warit ma chieng’ moro wachop e osiptal e ka watim yiero ma kamago, to ahinya-ahinya sama koro rem osaso dendwa ma dwarore ni watim yiero mapiyo. Sani e monego watimie nonro e wechego kendo wapong’ fom ma nyiso gik ma dwaher ni otimnwa kod ma ok dwaher, kendo wawuo gi laktar chon. *
17-19. Ang’o momiyo ber mondo wapuonjre pach Jehova sani? Chiw ane ranyisi mar gik ma dwaro ni waikrenegi chon.
17 Mogik, par ane kaka Yesu nodwoko Petro ka ne Petro onyise ni, “Kechri . . . Ruoth.” Nenore ni Yesu noseparo motelo gima Nyasaye ne dwaro ni otim kod ndiko ma ne wuoyo kuom ngimane e piny ka kod thone. Timo kamano nomiye mijing’o mar makore gi yiero ma nosetimo mar siko komakore gi Jehova ma ok obagni kata matin.—Som Mathayo 6:21-23.
18 E kindewagi bende, Nyasaye dwaro ni jotichne omakre kode kendo gidhi nyime timo tich mosemiyogi gi chunygi duto. (Mat. 6:33; 28:19, 20; Jak 4:8) Mana kaka notimore ne Yesu, nitie joma nyalo ng’adonwa paro moko ka gigalo ni gikonyowa to kare gihinyowa. Kuom ranyisi, nade ka ng’ama ondiki tich omedi telo kod osara mabup, to nenore maler ni telono biro chocho chenrogi mag lamo? To nade ka pod isomo to thuolo oneno mar dhi e skul moro maber ma ni mabor gi joodu? Be mago e seche monego itimie nonro, iwuo gi joodu kata jodong-kanyaklau, kendo itim yiero? Donge ber kichako manyo pach Jehova e weche kaka mago sani kendo item matek mondo irwak pache? Kitimo kamano, to e kinde mabiro ka tem ma kamano obironi, ok bi bedoni matek kale. Tembego biro yudo ka niseketo chenro mag tiyo ne Nyasaye, niseng’ado paro e chunyi, kendo nisetimo yiero mowinjore chon.
19 Samoro inyalo paro tembe mamoko mathoth ma nyalo bironi apoya. En adier ni ok dwaikre motelo ne tembe te. Kata kamano, ka watemo paro matut e wi pach Jehova sama wapuonjore, biro bedo ma yotnwa paro gik ma wasepuonjore kendo tiyo gi gigo sa asaya ma tem moro osiekonwa. Omiyo, kinde duto watemuru fwenyo pach Jehova, warwak parogo, kendo wanon kaka wanyalo tiyo gi parogo sani kod e kinde mabiro.
BEDO GI PACH JEHOVA BIRO KONYOWA NYAKA CHIENG’
20, 21. (a) Ang’o momiyo thuolo ma wabiro bedogo e piny manyien biro bedo gi tong’? (b) Ere kaka wanyalo bedo ma mor kata gie sani?
20 Warito piny manyien gi siso ahinya. Thothwa nigi geno mar dak nyaka chieng’ e paradiso e piny ka. E bwo loch Pinyruoth, ibiro gol ne dhano gik ma kelonegi kuyo e piny ma sanini. To kata mana e kindeno, ji pod biro bedo gi ratiro mar timo yiero. Ng’ato ka ng’ato biro yiero gik mogombo kata modwaro.
21 Kata kamano, thuolono biro bedo gi tong’. Sama jomamuol biro dwaro pogo gik mabeyo gi gik maricho, gibiro yie mondo chike Jehova kod pache e motagi. Timo kamano biro kelonegi mor kod kue mang’eny. (Zab. 37:11) Sama warito kindeno, pod wanyalo bedo ma mor ka watimo kinda mondo pachwa osik ka chal gi pach Jehova.
^ par. 12 Diksonari moro lero ni lap dancing en “kit miel [mitimo e club] ma jamiel michulo morwako lewni ma dwa weye duk bet e bam kastama kae to ondekni kanyo mana ka gima giterore.” Mano en tim ma nyalo miyo los ne ng’ato komiti ma yale nikech terruok, ka jodongo osenono weche duto ma notimore. Jakristo motimo tim ma kamano onego odhi ir jodongo mondo gikonye.—Jak. 5:14, 15.
^ par. 14 Oro mesej, pichni, kata vidio ma nyiso weche nindruok e simu iluongo ni sexting. Mae bende en tim ma nyalo miyo los ne ng’ato komiti ma yale, ka jodongo osenono weche duto ma notimore. Nitie kinde ma joma tindo ma timo sexting osedonjnegi e kot gi ketho mar dwanyo jowetegi e yor nindruok. Mondo iyud weche momedore, yaw jw.org/sw kae to isom sula ma wiye wacho ni “Vijana Huuliza—Ninapaswa Kujua Nini Kuhusu Kutuma Ujumbe Mchafu?” (Di MAFUNDISHO YA BIBLIA, kae to e bwoye idi MATINEJA.) Kata, inyalo somo sula ma wiye wacho ni “Jinsi ya Kuzungumza na Kijana Wako Kuhusu Kutuma Ujumbe Mchafu” ma yudore e Amkeni! ma Novemba 2013, ite mar 4-5.
^ par. 16 Bugewa osewuoyo nyading’eny kuom puonj mag Muma ma nyalo konyowa e weche motudore gi remo. Achiel kuom bugego en “Ritreuru e Hera mar Nyasaye,” ite mar 215-218.
