Nonyuola e higa mar 1983. Ka ne pod atin, ngimana ne ber abera, kata kamano, ka nachopo higni apar, nachako winjo ka denda rama matin tin. Bang’ higni moko ariyo, chieng’ moro nachiewo ka denda omoko ti. Natemo choro tiendena kar nyalona mondo awuothi, to mano ne ok onyalore nikech ne gionge teko. Chakre chieng’no, pok awuotho nyaka kawuono. Tuono nomiyo dongo otama. Sani atin mana ka nyathi ma eka dongo.

Nitie kinde moro ma ne asebet ka atuo kendo ne ok anyal wuok e ot. Kindeno, Joneno mag Jehova moko ariyo nolima. Pile ka joma welo nolima, ne ajapondoga, kata kamano chieng’no narwako mine ma nolimago mondo giwuo koda. Sama ne gilerona weche e wi Paradiso, naparo weche moko ma ne asegawinjo ka ne ajahigni abich. Kindeno ne nitie misonari moro miluongo ni Jethro, ma nodak Suriname, ne ojalimoga gweng’wa dichiel e dwe kendo nopuonjoga wuonwa Muma. Jethro ne ng’won koda ahinya. Nahere ndi. Kwarwa gi danwa be ne dhiga koda e chokruoge mag Joneno mag Jehova ma ne itimo e gweng’wa kanyo. Omiyo, ka Florence, achiel kuom mine ma nolimago nopenja ka be daher puonjora Muma, nayie.

Florence noduogo gi jaode miluongo ni Justus, kendo ne gichako puonja Muma. Ka ne gifwenyo ni akia somo, ne gipuonja somo. Bang’ kinde, nang’eyo somo weche kenda awuon. Chieng’ moro, ne ginyisa ni owachnegi ni gidhi gilend Suriname. Gima lit en ni ne onge ng’ama ne nyalo dhi nyime puonja Muma Orealla kanyo. Kata kamano, namor ni Jehova pod ne para.

Mana matin bang’ mano, painia moro miluongo ni Floyd nobiro Orealla, kendo noromo koda sama nolendo ot ka ot. Ka nowuoyo koda e wi wach puonjruok Muma, nabwonjo. Nopenja ni, “Ang’o momiyo ibwonjo?” Nanyise ni nasepuonjora brosua miluongo ni Nyasaye Dwaro Ni Mondo Watim Ang’o? kendo nasechako puonjora bug Ujuzi Uongozao Kwenye Uhai Udumuo Milele. * Nalerone gimomiyo puonjruokwa nochung’. Floyd notieko koda bug Ujuzi, kae to bang’e en bende ne odhi e alwora machielo. Nadong’ ma onge japuonj kendo.

 Kata kamano, e higa mar 2004, jopainia moko ariyo miluongo ni Granville gi Joshua, noor Orealla. Ka ne gilendo ot ka ot, ne ginwang’a. Ka ne gipenja ka be daher puonjora Muma, nabwonjo. Nakwayogi mondo gipuonja bug Ujuzi chakre gi e tiende. Ne adwaro ng’eyo ka be gibiro puonja mana gik ma ne jopuonjga mamokoka nosepuonja. Granville nonyisa ni ne nitie chokruoge ma nitimoga e gweng’wa kanyo. Kata obedo ni ne pok awuok e dalana kuom higni ma dirom apar kama, ne agombo dhi e chokruogego. Omiyo, Granville nobiro moketa e wheelchair kae to otera nyaka e Od Romo.

Kindego, Granville nojiwa mondo adonj e Skul mar Tij Nyasaye. Nowachona niya: “Ok inyal wuotho, kata kamano inyalo wuoyo. Chieng’ moro, ibiro golo twak mar ji duto. Mano biro timore.” Wechego nojiwa kendo nomiya chir.

Bang’e, nachako lendo gi Granville. Kata kamano, nikech thoth nderni ne richo kendo ne gitimo bugni, ne ok anyal dhiga gi wheelchair. Omiyo, nakwayo Granville ni oketa e wheelbarrow mondo wadhi walend kode. Mano nodhi koda maber. Ka nochopo April 2005, nobatisa. Kae to mapiyo bang’ mano, owete notiega kaka anyalo rito buge mag kanyakla, kod thum mitiyogo e Od Romo.

Gima lit en ni, ka nochopo higa mar 2007, wuonwa notho. Wachno noweyo joodwa gi kuyo ahinya. Granville nolemo kodwa kendo nohoyowa gi ndiko moko ma wuok e Muma. Higni ariyo bang’ mano, ne waromo gi pek moro machielo​—Granville notho e pi ka yie nolokore kodgi.

Kanyaklawa matin ma koro nokuyono, nodong’ ma onge jaduong’-kanyakla to mana jakony-tich achiel kende. Tho mar Granville ne litna ahinya; ne en osiepna ma nageno. Nosebet ka okonya ahinya e weche mag chuny kod mag ringruok. E chokruok ma luwo bang’ thone, ne an gi migawo mar somo paragraf sa Puonjruok mar Ohinga mar Jarito. Natemo somo paragraf ariyo mokwongo, kata kamano bang’ mano, nachako ywak kendo pi wang’a ne bubni, mochuna wuok e ndiri.

Ka owete moko ma ne oa e kanyakla machiegni gi Orealla nobiro konyowa, nachako winjo ka koro atek. Ofis bende nooronwa painia makende machielo miluongo ni Kojo e kanyaklawa. Gimachielo ma nomora en ni minwa kod owadwa matin nochako puonjore mobatisgi. Kae to Mach 2015, nabedo jakony-tich. Gikone, nagolo twaga mokwongo mar ji duto. Chieng’no ne amor, to kuyo bende nakuyo ka ne aparo weche ma ne Granville owachona higni moko chien niya: “Chieng’ moro, ibiro golo twak mar ji duto. Mano biro timore.”

Aseyudo jip mowuok kuom owete gi nyimine ma bende nie chal kaka mara kokalo kuom program mag JW Broadcasting^®. Kata obedo ni gin gi ng’ol moko e ngimagi, pod gimor. Kata an bende, pod nitie gik ma anyalo timo. Nikech nagombo timo mathoth e tij Jehova, nabedo painia. Kendo e dwe mar Septemba 2019 nayudo wach moro maber! Dweno e ma noketa mondo abed jaduong’-kanyakla e kanyaklawa ma nigi jolendo ma dirom 40.

Agoyo erokamano ahinya ne owete gi nyimine ma nopuonja Muma kendo nokonya mondo an bende ati ne Jehova. To maduong’ie moloyo, amor ahinya ni Jehova osebedo ka paraga kinde duto.