1-2. (a) Ang’o momiyo jaote Paulo nowacho ni hera e kido ‘maduong’’? (b) Gin penjo mage adek ma wabiro nono?

 KA NE jaote Paulo wuoyo kuom yie, geno, kod hera, notieko kowacho ni kuom kido adekgo, kido “maduong’ moloyogi en hera.” (1 Kor. 13:13) Ang’o momiyo Paulo nowacho kamano? En nikech e kinde mabiro, ok bi chunowa ni nyaka wabed gi yie kata geno kuom singo mag Jehova e wi piny manyien nikech singogo duto biro yudo kosechopo. Kata kamano, kinde duto biro dwarore ni waher Jehova kod dhano wetewa. Kuom adier, hera ma waherogigo biro medo bedo motegno nyaka chieng’.

² Nikech biro dwarore ni wanyis hera kinde duto, we wanon ane penjo moko adek. Mokwongo, ang’o momiyo onego waherre? Mar ariyo, ere kaka wanyalo nyiso ni wahero jowetewa? Mar adek, ere kaka wanyalo dhi nyime tego hera manie kindwa?

3. Ang’o momiyo onego waherre?

³ Ang’o momiyo dwarore ni waherre? En nikech mano nyiso ni wan Jokristo madier. Yesu nonyiso jootene niya: “Ma e ma nomi ji duto ong’e ni un jopuonjrena ka un gi hera e kindu uwegi.” (Joh. 13:35) E wi mano, hera konyowa bedo e winjruok achiel. Paulo nowacho ni hera “e motueyo gik moko duto kanyachiel.” (Kol. 3:14) Kata kamano, nitiere wach moro machielo momiyo onego waherre. Jaote Johana nondiko ne Jokristo wetene  kama: “Ng’at mohero Nyasaye nyaka her owadgi bende.” (1 Joh. 4:21) Sama wahero Jokristo wetewa, mano nyiso ni wahero Nyasaye.

4-5. Chiw ane ranyisi ma nyiso kaka hera ma waherogo Nyasaye otudore gi hera ma wanyiso owete gi nyimine.

⁴ Ere kaka hera ma waherogo Nyasaye otudore gi hera ma wanyiso owetewa gi nyiminewa? Wati ane gi ranyisini: Par ane tudruok mantie e kind adundowa kod fuonni mamoko mag dendwa. Sama laktar pimo kaka leche manie badwa guecho, mano nyalo konye ng’eyo ka be adundowa tiyo maber kata ooyo. En puonj mane ma wanyalo yudo e ranyisino?

⁵ Mana kaka laktar nyalo ng’eyo ka be adundowa tiyo maber kuom pimo kaka ler manie badwa guecho, e kaka wanyalo ng’eyo okang’ ma waherogo Nyasaye kuom nono okang’ ma waherogo jowetewa. Ka wafwenyo ni hera ma waherogo jowetewa ochako dok chien, mano nyalo nyiso ni hera ma waherogo Nyasaye bende osechako dok chien. To sama wadhi nyime nyiso Jokristo wetewa hera, mano nyiso ni hera manie kindwa gi Nyasaye otegno.

6. Ang’o momiyo onego wakaw okang’ mapiyo ka wafwenyo ni hera ma waherogo Jokristo wetewa ochako dok chien? (1 Johana 4:7-9, 11)

⁶ Onego wakaw okang’ mapiyo ka wafwenyo ni hera ma waherogo Jokristo wetewa ochako dok chien. Nikech ang’o? En nikech mano nyiso ni winjruokwa gi Jehova osechako bet ma yomyom. Jaote Johana noleronwa wachno ka noparonwa niya: “Ng’at ma ok ohero owadgi moseneno gi wang’e ok nyal hero Nyasaye ma pok oneno.” (1 Joh. 4:20) En puonj mane ma wayudo? Jehova mor kodwa mana sama wan bende ‘waherore.’—Som 1 Johana 4:7-9, 11.

7-8. Gin yore mage ma wanyalo nyisogo ni wahero Jokristo wetewa?

⁷ Ndiko chikowa nyadinwoya ni ‘waherre.’ (Joh. 15:12, 17; Rumi 13:8; 1 The. 4:9; 1 Pet. 1:22; 1 Joh. 4:11) Kata kamano, hera en kido ma wuok e chunywa, kendo onge dhano moro amora ma nyalo somo chunywa. Kuom mano, ere kaka Jokristo wetewa nyalo ng’eyo ka be waherogi? Ginyalo ng’eyo mano kokalo kuom wechewa gi timbewa.

⁸ Nitie yore mang’eny ma wanyalo nyisogo ni wahero Jokristo wetewa. Kuom ranyisi, Muma wacho kama: “Ng’ato ka ng’ato owach adiera gi nyawadgi.” (Zek. 8:16) “Urit kuwe e kindu.” (Mar. 9:50) “Kuom wach miyo jomamoko duong’, beduru motelo.” (Rumi 12:10) “Rwakuru joweteu.” (Rumi 15:7) “Wereuru ketho e kindu.” (Kol. 3:13) “Dhiuru nyime ting’o ting’ mag joweteu.” (Gal. 6:2) “Dhiuru nyime ka uhoyoru.” (1 The. 4:18) “Dhiuru nyime . . . geroru.” (1 The. 5:11) “Ulam ne joweteu.”—Jak. 5:16.

9. Ang’o momiyo hoyo jomoko nyiso ni waherogi gadier? (Ne picha bende.)

⁹ We wanon ane achiel kuom yore mowach e paragraf mar 8, ma wanyalo nyisogo ni wahero Jokristo wetewa. Paulo nojiwowa niya: “Dhiuru nyime ka uhoyoru.” Ang’o momiyo hoyo jomamoko nyiso ni waherogi gadier? Ka luwore gi nonro moro ma notim e Muma, wach ma ne Paulo otiyogo ni “hoyo”  tiende en “chung’ e bath ng’ato mondo ijiwe nikech okalo e chal moro matek ahinya.” Omiyo, sama wahoyo Jakristo wadwa moro ma kalo e chandruok moro, wakonye mondo odhi nyime wuotho e yor ngima, to mano nyiso ni wahere.—2 Kor. 7:6, 7, 13.

10. Nitie tudruok mane e kind kecho ji kod hoyogi?

¹⁰ Kecho ji kod hoyogi gin weche ariyo motudore. E yo mane? Sama wakecho jowetewa, dwarore ni wahogi kendo wakonygi. Omiyo, kecho jomamoko biro chwalowa mondo wahogi. Ne ane kaka jaote Paulo notudo kido ariyogo ka nowuoyo kuom Jehova. Nowacho ni Jehova “en Wuoro ma kecho ji kendo Nyasach hoch duto.” (2 Kor. 1:3) Kuom mano, iluongo Nyasaye ni “Wuoro ma kecho ji” nikech en e Soko mar kidono. To kidono e ma chwale mondo ohowa “e masichewa duto.” (2 Kor. 1:4) Mana kaka pi maber ma wuok e soko duogo chuny joma riyo oloyo, e kaka Jehova duogo chuny joma ool kendo ohoyogi. Ere kaka wanyalo luwo ranyisi mar Jehova e kecho jowetewa kendo hoyogi? Achiel kuom yore ma wanyalo timogo kamano en nyago kido ma biro konyowa kecho jomamoko kendo hoyogi. Moko kuom kidogo gin mage?

11. Ka luwore gi Jo-Kolosai 3:12 kod 1 Petro 3:8, gin kido mage ma nyaka wabedgo ma biro konyowa hero jomamoko kendo hoyogi?

¹¹ Ang’o ma biro konyowa hero jowetewa kendo ‘dhi nyime hoyogi’ pile ka pile? Dwarore ni wanyis hera madier mar owete kendo wabed mang’won. (Som Jo-Kolosai 3:12; 1 Petro 3:8.) Kidogo biro konyowa nade? Sama wanyago kidogo e chunywa, wabiro bedo gi gombo mar hoyo jowetewa sama gichandore. Yesu nowacho niya: “Gik mogundho e chuny e ma dhok wacho. Ng’at maber golo gik mabeyo kuom mwandune mabeyo.” (Mat. 12:34, 35) Hoyo owetewa gi nyiminewa ma chandore en yo maduong’ ahinya ma wanyisogo ni waherogi.

12. (a) Ang’o monego watang’go? (b) En penjo mane ma wadwaro nono?

¹² Waduto wadwaro ni ‘wadhi nyime herore.’ (1 Joh. 4:7) Kata kamano, onego wapar ni Yesu nowacho ni “hera mar ji mang’eny nobed mang’ich.” (Mat. 24:12) Yesu ne ok wach ni jopuonjrene mang’eny ne dhi weyo herore. Kata kamano, onego wabed motang’ mondo pinyni kik monwa nyiso hera kaka thoth ji e kindegi. Ka wan gi wachno e paro, we wanon ane penjoni: Ang’o ma biro konyowa ng’eyo ka be hera ma waherogo owetewa otegno?

13. Ang’o ma nyalo konyowa ng’eyo ka be hera manie kindwa otegno?

¹³ Achiel kuom yore ma wanyalo ng’eyogo ka hera manie kindwa otegno en nono gik ma watimoga sama waromo gi chal moko e ngima. (2 Kor. 8:8) Kuom ranyisi, jaote Petro nowacho kama: “To moloyo duto, beduru gi hera matut e kindu, nikech hera umo richo mogundho.” (1 Pet. 4:8) Kuom mano, gik ma watimo sama owetewa ochwanyowa nyalo konyowa ng’eyo ka be waherogi gadier.

14. Ka luwore gi 1 Petro 4:8, en hera mane monego wabedgo? Chiw ane ranyisi.

¹⁴ We wapar ane matut weche ma Petro  nowachogo. Kare mokwongo e kwan matindo 8 nyisowa kit hera monego wabedgo, ma en “hera matut.” Wach ma Petro notiyogo ni “matut” tiende en “moyarore.” Kare mar ariyo e ndikono nyisowa gima herano nyalo chwalowa mondo watim. Herano biro konyowa umo richo mag owetewa. Wawach ni nitie mesa moro ma nigi alama mang’eny maricho. Inyalo yaro otamba moro kendo pedhe e wi mesano mondo oum alamago. Ok obi umo mana alama achiel kende kata ariyo, to obiro umo alama mang’eny. E yo ma kamano bende, ka wan gi hera matut, wabiro umo “richo mogundho” mag Jokristo wetewa kendo weyonegi kethogi duto, to ok mana ketho achiel kata ariyo kende.

15. Ka hera ma waherogo Jokristo wetewa otegno, mano biro chwalowa mondo watim ang’o? (Jo-Kolosai 3:13)

¹⁵ Ka hera ma waherogo Jokristo wetewa otegno, mano biro miyo wawenegi kethogi kata ka samoro timo kamano ok yot. (Som Jo-Kolosai 3:13.) Sama waweyo ne jomamoko kethogi, wanyiso ni hera ma waherogigo otegno, kendo ni wadwaro moro Jehova. En ang’o  machielo ma nyalo konyowa fwayo nyawo mag jowetewa kod kethogi?

16-17. En ang’o machielo ma nyalo konyowa fwayo nyawo mag jowetewa kod kethogi matindo tindo? Chiw ane ranyisi. (Ne picha bende.)

¹⁶ Ket pachi kuom kido mabeyo ma owete gi nyimine nigo, to ok kuom nyawogi. Ne ane ranyisini: Wawach ni in e budho moro gi owete gi nyimine. Umor ahinya. Sama utieko budhono, igoyo picha moro moriwou uduto. Kae to igoyo pichni mamoko ariyo kata adek mondo ibedgo ka po ni mokwongocha ok owuok maber. Koro in gi pichni adek. Kata kamano, e achiel kuom pichnigo, ifwenyo ni owadwa moro ojuolo wang’e. Ibiro timo ang’o gi pichano? Ibiro rucho pichano nikech in gi pichni moko ariyo ma ji duto bwonjoe, moriwo nyaka owadwano.

¹⁷ Wanyalo pimo pichni ariyo modong’go gi gik ma wakanoga e pachwa. Thothne, wadong’ga ka waparo gik mabeyo ma watimo gi owetewa gi nyiminewa. To nade ka chieng’ moro owadwa kata nyaminwa moro owacho kata timo gimoro ma ok morwa? Ang’o ma wanyalo timo? Donge wanyalo rucho wachno e pachwa mana kaka wanyalo rucho picha ma ok owuok mabercha? (Nge. 19:11; Efe. 4:32) Mano en gima nyalore nikech nitie gik mamoko mang’eny  mabeyo ma wang’eyo e wi owadwano kata nyaminwano. To mago e gik ma wadwaro ni wasik ka waparo.

18. Gin weche mage madongo ma wasenono e sulani e wi hera?

¹⁸ Ang’o momiyo dwarore ni wadhi nyime tego hera manie kindwa? Mana kaka waseneno, sama wahero owetewa gi nyiminewa, mano nyiso ni wahero Jehova. Gin yore mage ma wanyisogo ni wahero owetewa gi nyiminewa? Achiel kuom yore ma wanyalo timogo kamano en hoyogi. Ka wakecho jowetewa, wabiro ‘dhi nyime hoyogi.’ Ere kaka wanyalo dhi nyime tego hera manie kindwa? En kuom timo duto ma wanyalo mondo wawe ne jowetewa kethogi.

19. Ang’o momiyo dwarore ni waherre ahinya e kindegi?

¹⁹ Ang’o momiyo dwarore ni waherre ahinya e kindewagi? Ne ane gima Petro nowacho: “Giko mar weche duto osekayo machiegni. Kuom mano, . . . beduru gi hera matut e kindu.” (1 Pet. 4:7, 8) Ang’o ma wabiro romogo kaka giko mar pinyni medo kayo machiegni? Yesu nonyiso jolupne kama: “Ogendni duto nosin kodu nikech nyinga.” (Mat. 24:9) Mondo wachung’ motegno kata ka ji osin kodwa, dwarore ni wasik ka wan e achiel gi Jokristo wetewa. Sama watimo kamano, Satan ok bi pogowa, nikech wan gi hera madier, to herano “e motueyo gik moko duto kanyachiel.”—Kol. 3:14; Fil. 2:1, 2.