Be iyudoga ka tekni timo puonjruok ma mari iwuon mar Muma ma ok ibari? Nyalo bedo ni waduto seche moko wawinjoga kamano. Kata kamano, par ane gik ma watimoga pile, kaka lwokruok. Lwokruok dwaro kinda kod thuolo, kata kamano, bang’ lwokruok wawinjoga maber ahinya. Puonjruok Muma miyoga wawinjo maber mana ka gima ‘walwokore gi pi ka watiyo gi wach Nyasaye.’ (Efe. 5:26) Ne ane paro moko ma nyalo konyi:

• Los chenro. Puonjruok Muma en achiel kuom “gik ma dwarore moloyo” ma Jakristo ok onego ojwang’. (Fil. 1:10) Gima nyalo konyi luwo chenro milosono, en kete kama onenore mayot. Kuom ranyisi, inyalo kete e bod moro kata inyalo muone e dho frij, kendo inyalo keto alam e simu mondo oparni sa mar puonjruok.

• Ng’e nyaloni. Be in gi nyalo mar keto pachi e gik misomo kuom thuolo malach, koso inyalo timo kamano mana kuom thuolo matin? Ing’eyo nyaloni maber. Tim lokruok e thuolo mitiyogo e puonjruokni ka luwore gi nyaloni. Ka sechegi mag puonjruok osechopo to iwinjo ka iol, donge inyalo puonjori kata kuom dakika apar kama? Ka ipuonjori kuom dakika matin kamano, ibiro yudo ni ipuonjori gik mang’eny moloyo kiweyo ma ok ipuonjori chuth. Bende, timo kamano nyalo miyo ibed gi siso mar dhi nyime gi puonjruok.—Fil. 2:13.

• Par motelo gima ibiro puonjori. Ka irito nyaka sechegi mag puonjruok ochopi e ka ichak paro gima idwa puonjori, ok ibi ‘tiyo maber gi kinde ma in-go.’ (Efe. 5:16) Donge inyalo loso list mag sula kata weche moko ma diher puonjori? Ka penjo moro obiro e pachi sama ipuonjori, inyalo ndike piny. Bang’ puonjruok ka puonjruok, inyalo medo weche mamoko ma diher puonjori e list mari.

• Ikri timo lokruok. Kuom ranyisi, inyalo loko thuolo mitiyogo kod gik ma diher puonjori. Gima duong’ ok en sama itimoe puonjruok, thuolo mikawo, kata gima ipuonjori, to en ni ok ibari ne puonjruok

Wayudoga ber mathoth sama wapuonjore ma ok wabare. Timo kamano miyo wasudo machiegni gi Jehova, watimo gik ma nyiso rieko, kendo mano duogo chunywa.—Jos. 1:8.