1-2. Migepe ma jodong-kanyakla timo oriwo ang’o?

 KA PO ni isebedo jakony-tich kuom kinde moro, nyalo bedo ni itimo kinda mondo ibed jaduong’-kanyakla. Timo kamano nyiso ni igombo “tich maber.”—1 Tim. 3:1.

² Migepe ma jodong-kanyakla timo oriwo ang’o? Gitayo kanyakla e tij lendo, gitimonegi limbe mag kwath, gipuonjogi, kendo gigero kanyakla kokalo kuom wechegi kod ranyisi maber ma giketo. Mano e momiyo Muma wacho ni jodong-kanyakla gin “kaka mich.”—Efe. 4:8.

3. Gin kido mage ma owadwa onego obedgo mondo obed jaduong’-kanyakla? (1 Timotheo 3:1-7; Tito 1:5-9)

³ Gin kido mage ma dwarore ni ibedgo mondo ibed jaduong’-kanyakla? Kido ma dwarore mondo ng’ato obed jaduong’-kanyakla opogore ahinya gi kido ma dwarore mondo ng’ato oyud tij andika. Kinde mang’eny, mondo ng’ato oyud tij andika, gima dwarore en mana bedo gi lony e wi tijno. To mondo ng’ato obed jaduong’-kanyakla, dwarore ni obed gi lony e puonjo kod lendo. Kata kamano, mago kende ok oromo. Dwarore ni obed gi kido miwuoyoe e 1 Timotheo 3:1-7 kod Tito 1:5-9. (Som.) E sulani, wabiro nono kido moko ma dwarore ni jodongo obedgo. Kidogo opog e kidienje adek ma gin: Bedo gi nying maber, bedo wi ot maber, kod chiwruok e konyo kanyakla.

 BEDO GI NYING MABER

4. Tiend bedo “ng’at ma onge bura” en ang’o?

⁴ Mondo ibed jaduong’-kanyakla, nyaka ibed “ng’at ma onge bura,” tiende ni ng’at mong’ere ni timbene beyo. E wi mano, onego ibed gi “nying maber kuom jo ma ni oko.” Joma ok gin Joneno nyalo wuoyo marach e wi yieni, kata kamano, ok onego gibed gi kiawa e wi timbeni. (Dan. 6:4, 5) Penjri ane kama: ‘Be an gi nying maber e kanyakla kod oko mar kanyakla?’

5. Ere kaka inyalo nyiso ni in ng’at “mohero timbe mabeyo”?

⁵ Ka in “ng’at mohero timbe mabeyo,” ibiro neno kido mabeyo ma jomamoko nigo kendo pwoyogi. Ibiro timo ne jomamoko gik mabeyo kendo timo mokalo kata ma gikwayi. (1 The. 2:8; ne weche ma lero ndiko mar Tito 1:8 e study Bible e bwo wich ma wacho ni “lover of goodness.”) Ang’o momiyo dwarore ni jodongo obed gi kidono? En nikech gitiyo gi thuologi mang’eny e limbe mag kwath kendo e chopo migepegi e kanyakla. (1 Pet. 5:1-3) Kata obedo ni gitiyo gi thuologi mang’eny kamano, mor ma giyudo ok nyal pim gi okang’ ma gichiworego.—Tich 20:35.

6. Moko kuom yore minyalo nyisogo ni in ng’at mohero ‘rwako welo’ gin mage? (Jo-Hibrania 13:2, 16; ne picha bende.)

⁶ Inyalo nyiso ni in ng’at mohero ‘rwako welo’ sama itimo ne jomamoko gik mabeyo, moriwo nyaka joma ok gin osiepeni machiegni. (1 Pet. 4:9) Diksonari moro mar Muma wacho ni ng’at mohero rwako welo en ng’at mang’won kata gi joma ok ong’eyo, kendo omor rwakogi e ode. Penjri ane kama: ‘Be ang’era kaka ng’at mohero rwako welo?’ (Som Jo-Hibrania 13:2, 16.) Ng’at mohero rwako welo, rwakoga ji duto moriwo nyaka joma yutogi ni piny kaachiel gi jotich Jehova mochiworene kaka jorit-alwora kod jogol-twak molimo kanyaklagi.—Cha. 18:2-8; Nge. 3:27; Luka 14:13, 14; Tich 16:15; Rumi 12:13.

7. Ere kaka jaduong’-kanyakla nyalo nyiso ni ‘ok en ng’at mohero pesa’?

⁷ ‘Ng’at ma ok ohero pesa.’ Ng’at ma ok  ohero pesa ok ket pache kuom mwandu. Bed ni imewo kata idhier, onego iket Pinyruoth obed mokwongo e ngimani. (Mat. 6:33) Ti gi thuoloni, tekoni, kod mwanduni e lamo Jehova, rito joodi, kod e konyo kanyakla. (Mat. 6:24; 1 Joh. 2:15-17) Penjri ane kama: ‘An gi paro mane e wi pesa? Be gik ma an-go oroma? Koso aketo mana pacha kuom loso pesa kendo manyo mwandu?’—1 Tim. 6:6, 17-19.

8. Moko kuom yore minyalo nyisogo ni ‘ok ikal tong’ e timbeni’ kendo ni in gi “ritruok” gin mage?

⁸ Onego ibed ng’at ma ‘ok kal tong’ e timbene’ kendo “ma nigi ritruok.” Mano nyiso ni ok onego ikal tong’ e metho, chiemo, rwakruok kod bidhruok, kata e yore mag manyo mor. Ok onego iluw kit ngima mar pinyni. (Luka 21:34; Jak. 4:4) Onego ikuwe mos sama ochwanyi. Ok onego ing’eri kaka ng’at ma “jamer” kata ma madho kong’o ahinya. Penjri kama, ‘Be kit ngimana nyiso ni ok akal tong’ e timbena kendo ni an gi ritruok?’

9. Bedo ng’at ma “pache long’o” kendo ma “kit ngimane obidhore maber” oriwo timo ang’o?

⁹ Ka in ng’at ma “pache long’o,” ibiro timo gik moko ka luwore gi puonj mag Muma. Ibiro paro matut kuom puonj mag Muma kendo mano biro konyi timo yiero ma nyiso rieko. Ok ibi rikni ng’ado paro. Kar mano, ibiro nono weche duto ka pok ing’ado paro moro amora. (Nge. 18:13) Mano biro miyo itim yiero ka luwore gi dwach Jehova. Onego ibed ng’at ma “ngimane obidhore maber,” tiende ni ng’at mochanore kendo mong’eyo rito sa. Onego ing’eri kaka ng’at minyalo gen kendo ma luwo kaka itaye. Kidogo biro miyo ibed gi nying maber. We wanon ane kido mamoko ma Muma wacho ni jaduong’-kanyakla onego obedgo mondo obed wi ot maber.

BEDO WI OT MABER

10. Ere kaka dichwo nyalo “tayo ode e yo maber”?

¹⁰ Ka isekendo kendo igombo bedo jaduong’-kanyakla, joodi onego oket ne jomamoko ranyisi maber. Kuom mano, dwarore ni ‘ita odi e yo maber.’ Onego ing’eri kaka ng’at mohero joode kendo ma ritogi maber. Mano oriwo tayo joodi e weche mag lamo. Ang’o momiyo mano en gima dwarore? Jaote Paulo nolero kama: “Ka ng’ato ok ong’eyo kaka onyalo tayo ode owuon, ere kaka obiro rito kanyakla mar Nyasaye?”—1 Tim. 3:5.

11-12. Ang’o momiyo nyithind jaduong’-kanyakla onego obed gi timbe mabeyo? (Ne picha bende.)

¹¹ Ka in wuoro, “[nyithindi nyaka winj] kaka ichikogi ka gikawo weche duto e yo mapek kaka dwarore.” Onego ipuonjgi kendo itieggi e yor hera. En adier ni mana kaka nyithindo mamoko, diher ni gibed mamor, ginyier, kendo gitugi. Kata kamano, kitiegogi maber, gibiro bedo nyithindo ma winjo wach, ma nigi luor, kendo ma timbegi beyo. Bende, nyaka itim duto minyalo mondo ikony nyithindi obed gi winjruok maber gi Jehova, gidag ka luwore gi puonj mag Muma, kendo gitim dongruok ma gichop e batiso.

¹² “Ng’at ma nyithinde ni e yie to gionge bura nikech tim anjawo kata wich-teko.” Ka nyathi manie yie otimo richo moro maduong’, ere kaka wachno nyalo mulo migap wuon-gi kaka jaduong’-kanyakla? Ka wuorono osebedo ka jwang’o nyithinde kendo ok opuonjgi kaka dwarore, ok obi winjore bedo jaduong’-kanyakla.—Ne Mnara wa Mlinzi, ma Oktoba 15, higa 1996, ite mar 21, paragraf mar 6-7.

 CHIWRUOK E KONYO KANYAKLA

13. Ere kaka inyalo nyiso ni in ng’at matur kendo ma ‘wiye ok tek’?

¹³ Owete ma nyiso kido mabeyo mag Jokristo, omako kama duong’ ahinya e kanyakla. Ka owadwa en ng’at ma “pache ni kare” kata ng’at matur, obiro jiwo kuwe. Ka ing’eri kaka ng’at matur, ibiro chiko iti ne jomamoko kendo temo ng’eyo kaka giwinjo. Sama un-ga e romo moro, be iikoriga riwo lwedo paro ma jomoko ochiwo ka parogo ok tuomre gi chike kata puonj mag Muma? Jaduong’-kanyakla ok onego obed ng’at ma “wiye tek,” tiende ni ng’at ma dwaro mana ni gik moko otim e yore owuon. Onego one ber mar chiko ite ne paro ma jomamoko chiwo. (Cha. 13:8, 9; Nge. 15:22) Ok onego ibed ng’at “mohero ywaruok” kata ma “iye wang’ piyo.” Kuom mano, kar mino wach kendo nyiso jomamoko achaya, onego ibed mang’won kodgi. Ka in ng’at ‘mohero kuwe,’ ibiro kawo okang’ mokwongo mar dwoko kuwe sama weche tek. (Jak. 3:17, 18) Wechegi mang’won nyalo kueyo chuny jomamoko, moriwo nyaka jo akwede.—Bura 8:1-3; Nge. 20:3; 25:15; Mat. 5:23, 24.

14. Sama ndiko wacho ni jaduong’-kanyakla ok onego obed “ng’at ma eka nyocha orwako yie” kendo ma ‘omakore’ gi Jehova, mano tiende en ang’o?

¹⁴ Owadwa ma dwaro bedo jaduong’-kanyakla ok onego obed “ng’at ma eka nyocha orwako yie.” Kata obedo ni ok ochuno ni higni mang’eny okal bang’ ka osebatisi, pod biro dwarore ni iteg winjruokni gi Jehova kendo ipuonjri tiyo gi puonj mag Muma sama itimo yiero. Ka pok oketi mondo ibed jaduong’-kanyakla, nyaka inyis ni ibolori mana kaka Yesu, kendo geno ni Jehova biro miyi migawo migombo e kinde mowinjore. (Mat. 20:23; Fil. 2:5-8) Onego inyis ni in ng’at ma ‘omakore’ gi Jehova kuom luwo  chikene kod kaka riwruok mar ogandane tayi.—1 Tim. 4:15.

15. Be ochuno ni jaduong’-kanyakla obed japuonj mong’ith sama opuonjo e nyim ji? Ler ane.

¹⁵ Ndiko wacho maler ni jarit kanyakla onego obed “japuonj molony.” Be mano nyiso ni koro nyaka ibed japuonj mong’ith sama ipuonjo e nyim ji? Ooyo. Nitie jodongo moko ma ok gin jogol-twak mong’ith, kata kamano, gipuonjoga maber ahinya e tij lendo kod e limbe mag kwath. (Ne weche ma lero ndiko mar 1 Timotheo 3:2 e study Bible e bwo wich ma wacho ni “qualified to teach”; pim gi 1 Jo-Korintho 12:28, 29 kod Jo-Efeso 4:11.) To pod onego item matek mondo imed lony e puonjo. Ere kaka inyalo timo mano?

16. Ere kaka inyalo bedo japuonj molony? (Ne picha bende.)

¹⁶ Ng’at ma “makore motegno gi wach migeno.” Mondo ibed japuonj molony, ti gi Wach Nyasaye sama ipuonjo e nyim ji kata sama irieyo ng’ato. Puonjri Wach Nyasaye kod bugewa ma lero Muma gi kinda. (Nge. 15:28; 16:23; ne weche ma lero ndiko mar Tito 1:9 e study Bible bwo wich ma wacho ni “holding firmly to the faithful word.”) Sama itimo puonjruok ma mari iwuon, non kaka osebed kilero ndikono, kod kaka inyalo tiyo kode e ngimani. Kae to sama ipuonjo ji, tem matek mondo ichop e chunygi. Inyalo timo dongruok e yo mipuonjogo kikwayo kony kuom jodongo molony kendo tiyo gi paro ma gimiyi. (1 Tim. 5:17) Jodong-kanyakla onego obed gi “nyalo mar jiwo” owete gi nyimine. Kata kamano, nyaka ‘gikwergi’ kendo rieyogi sama gitimo gimoro ma ok owinjore. Onego gitim kamano e yor ng’wono. Ka ing’won, ihero ji, kendo ipuonjo kitiyo gi Wach Nyasaye, ibiro bedo japuonj maber nikech iluwo ranyisi mar Yesu ma en Japuonjwa Maduong’.—Mat. 11:28-30; 2 Tim. 2:24.

 DHI NYIME TIMO DONGRUOK

17. (a) Ang’o ma nyalo konyo jokony-tich mondo gidhi nyime timo dongruok? (b) Ang’o ma jodongo onego oket e paro sama ginono ka be owadwa moro owinjore bedo jaduong’-kanyakla? (Ne sanduk ma wiye wacho ni, “ Kik Ukal Tong’ Sama Unono Jomamoko.”)

¹⁷ Bang’ nono kido ma dwarore ni jodong-kanyakla obedgo, jokony-tich moko nyalo paro ni ok gibi nyalo bedo jodong-kanyakla. Kata kamano, par ni Jehova kata riwruok mare ok gen ni ibiro nyiso kidogo e okang’ makare chuth. (1 Pet. 2:21) Par bende ni roho maler mar Jehova e ma biro konyi nyago kido ma wasewuoyego. (Fil. 2:13) Be nitie kido moro sie mineno ni onego itimie dongruok? Nyis Jehova wachno e lamo. Tim nonro kendo ikwa jodongo mamoko mondo omiyi paro ma nyalo konyi bedo gi kidono.

18. Ang’o mijiwo jokony-tich duto mondo otim?

¹⁸ Mad waduto, moriwo nyaka joma osebedo jodong-kanyakla, wadhi nyime nyago kido ma wasewuoye e sulani. (Fil. 3:16) Dibed ni in jakony-tich? Ka en kamano, dhi nyime timo dongruok. Kwa Jehova mondo otiegi kendo okonyi bedo gi kido ma dwarore ma nyalo miyo ikony kanyakla e okang’ momedore. (Isa. 64:8) Mad Jehova guedh kinda mitimo mondo ibed jaduong’-kanyakla!