SULA MAR PUONJRUOK 46
WER 49 Miyo Chuny Jehova Mor
Owete—Be Utimo Kinda Mondo Ubed Jokony-Tich?
“Chiwo kelo mor mang’eny moloyo kawo.”—TICH 20:35.
GIMA SULANI WUOYE
Sulani biro konyo owete mosebatisi mondo otim kinda mondo gibed jokony-tich.
1. Ang’o ma nyiso ni Paulo nogeno jokony-tich?
JOKONY-TICH konyo ahinya e tije mag kanyakla. Jaote Paulo nonyiso ni nogeno owete ma ne jokindago. Kuom ranyisi, ka nondiko barua ne Jokristo ma ne ni Filipi, nooro ne jodongo kod jokony-tich mos.—Fil. 1:1.
2. Owadwa Luis neno nade migawo ma en-go mar bedo jakony-tich?
2 Owete mang’eny mosebatisi osebedo jokony-tich, bed ni gin joma tindo kata joma hikgi oseniang’. Kuom ranyisi, Devan ne en jahigni 18 ka nokete jakony-tich. Owadwa Luis to noket jakony-tich ka ne en jahigni 50 gi wiye. Nowinjo nade ka nokete jakony-tich? Nowacho kama: “Amor ahinya timo migepe ma konyo owete gi nyimine e kanyakla, gisenyisa hera e yore mang’eny. Omiyo, an bende ma e yo ma anyalo nyisogo ni aherogi!” Mano e kaka jokony-tich mang’eny bende nenoga migawono.
3. Gin penjo mage ma wabiro nono e sulani?
3 Ka in owadwa mosebatisi to ok in jakony-tich, donge inyalo temo matek mondo ichop e migawono? En ang’o ma nyalo chwali mondo itim kamano? Ang’o ma ndiko wacho ni onego itim mondo ichop e migawono? Wabiro yudo dwoko mag penjogo e sulani. Mokwongo, we wane ane migepe ma jokony-tich timoga.
GIN MIGEPE MAGE MA JOKONY-TICH TIMOGA?
4. Jokony-tich timoga migepe mage? (Ne picha bende.)
4 Jakony-tich en owadwa mosebatisi, kendo ma jodongo opwodho kitayogi gi roho maler mondo otim migepe moko e kanyakla. Jokony-tich moko nigi migawo mar neno ni jolendo nigi alwora moromo mar lendo kod buge moromo. Moko konyo e timo ler kod rito Od Romo mondo osik ka ber. Bende, jokony-tich rwakoga joma obiro e chokruogewa, kendo gikonyoga e migawo mar dwol gi vidio. Thoth migepe ma gitimo gin tije lwedo. Kata kamano, gin chwo motegno e weche mag chuny. Gihero Jehova kendo gidak ka luwore gi chikene. Gihero Jokristo wetegi ahinya. (Mat. 22:37-39) Ang’o ma owadwa mosebatisi nyalo timo mondo obed jakony-tich?
Jokony-tich luwo ranyisi mar Yesu kuom chiwore mondo gikony jomamoko (Ne paragraf mar 4)
5. Ang’o ma owadwa nyalo timo ka doher bedo jakony-tich?
5 Muma lero kido ma dwarore ni owete ma gombo bedo jokony-tich obedgo. (1 Tim. 3:8-10, 12, 13) Ka diher bedo jakony-tich, inyalo nono moro ka moro kuom kidogo kendo itim kinda mondo ibed kodgi. Kata kamano, dwarore ni inon maber gimomiyo idwaro bedo jakony-tich.
ANG’O MOMIYO IDWARO BEDO JAKONY-TICH?
6. Ang’o monego ochwali mondo iti ne Jokristo weteni? (Mathayo 20:28; ne bende picha .)
6 Gima duong’ ma ne chwalo Yesu mondo otim migepene ne en hera ma noherogo Wuon-gi kod dhano. Herano nomiyo obedo jakinda e tich kendo noikore timo nyaka tije ma ne ji ochayo. (Som Mathayo 20:28; Joh. 13:5, 14, 15) Ka igomb bedo jakony-tich nikech ihero Jehova kod Jokristo weteni, Jehova biro guedhi kendo konyi chopo gombonino.—1 Kor. 16:14; 1 Pet. 5:5.
Kokalo kuom ranyisine, Yesu puonjo jootene kaka ginyalo tiyo ne jomamoko kar dwaro huma kod duong’ (Ne paragraf mar 6)
7. Ang’o momiyo owete ok onego ogomb bedo jokony-tich mana ni mondo omigi duong’?
7 E pinyni, ji ohero jonyadhi, to mano opogore gi riwruok mar oganda Jehova. Mana kaka Yesu, ka hera e ma chwalo owadwa mondo odwar migepe moko makende, ok obi gombo telo, chiko jowetene, kata huma. Ka oket owadwa mohero telo mondo obed jakony-tich, biro bedone matek timo migepe moko ma nenore ni ji ochayo mondo okony rombe Jehova. Onyalo jaro migepego kowacho ni en ok owinjore timogi. (Joh. 10:12) Jehova ok bi guedho ng’at ma kamano.—1 Kor. 10:24, 33; 13:4, 5.
8. En ang’o ma Yesu nolero ne jootene?
8 Nitie kinde ma kata osiepe Yesu ma ne ni machiegni ahinya kode ne dwaro migepe makende mondo giyud duong’. Par ane gima Jakobo gi Johana ma ne gin joote Yesu chieng’ moro notimo. Ne gikwayo Yesu mondo omigi migepe makende e Pinyruodhe. Yesu ne ok opwoyogi nikech gombogino. Kar mano, nolero ne jootene 12 duto niya: “Ng’at ma dwaro bedo maduong’ e kindu nyaka bed jatiju, kendo ng’at ma dwaro bedo mokwongo e kindu nyaka bed misumba jomamoko.” (Mar. 10:35-37, 43, 44) Owete ma gombo bedo jokony-tich nikech gidwaro tiyo ne owetegi, biro bedo gueth ne kanyakla.—1 The. 2:8.
ANG’O MA INYALO TIMO MONDO IBED GI GOMBO MAR BEDO JAKONY-TICH?
9. Ang’o minyalo timo mondo ibed gi gombo mar bedo jakony-tich?
9 Onge kiawa ni ihero Jehova kendo igombo tiyo ne Jokristo weteni. Kata kamano, inyalo winjo ka ionge gi gombo mar timo momedore mondo ibed jakony-tich. Ang’o minyalo timo mondo ibed gi gombo mar konyo Jokristo weteni e okang’ momedore? Achiel kuom gik minyalo timo en paro mor ma ibiro yudo sama itiyo ne Jokristo weteni. Yesu nowacho kama: “Chiwo kelo mor mang’eny moloyo kawo.” (Tich 20:35) Yesu notimo mana gik ma nopuonjo. Tiyo ne jomamoko nokelone mor madier, to mano e gima nyalo timoreni in bende.
10. Ere kaka Yesu nonyiso ni nomor tiyo ne jomamoko? (Mar. 6:31-34)
10 Ne ane wach moro ma nyiso maler ahinya ni Yesu ne mor tiyo ne jomamoko. (Som Mariko 6:31-34.) Chieng’ moro, en kaachiel gi jootene ne giol ahinya. Ne gin e yo ka gichomo kamoro ma ne ginyalo yueyoe ka gin kar kendgi. Kata kamano, oganda mang’ongo nokwongonegi kuno kendo ne girito mondo Yesu opuonjgi. Nonyalo tamore puonjogi. To mano en nikech “[ne gionge gi] thuolo mar yueyo kata chiemo.” Kata Yesu ne nyalo yiero puonjogi weche moko manok kae to ogonygi mondo gidhi. To nikech noherogi, “nochako puonjogi gik mang’eny.” Nodhi nyime puonjogi nyaka e ‘sa molewo.’ (Mar. 6:35) Notimo kamano nikech “nokechogi.” Nodwaro puonjogi nikech noherogi. Tiyo ne jomamoko nokelo ne Yesu mor mogundho.
11. Ere kaka Yesu notimo gik ma ne nyiso ni noikore tiyo ne joma ne winje? (Ne picha bende.)
11 Yesu notimo mathoth moloyo mana puonjo oganda. Nomiyogi nyaka gige ringruok. Nochiwo chiemo e yor hono kendo nonyiso jolupne mondo opog ji chiemogo. (Mar. 6:41) Kuom timo kamano, nopuonjo jootene yore ma ne ginyalo konyogo jomamoko. Bende, wachno nopuonjogi ni tije ma jokony-tich timoga, konyo kama duong’ ahinya e kanyakla. Parie mor ma jootego nobedogo sama ne gitiyo kanyachiel gi Yesu e pogo ji chiemo mochopo kama “ji duto nochiemo mi giyieng’”! (Mar. 6:42) Ma ok e kinde kende ma Yesu noketo dwach jomamoko mondo obed motelo ne dwache. Notiyo gi ngimane duto ka en e piny e konyo jomamoko. (Mat. 4:23; 8:16) Konyo jomamoko kod puonjogi nokelo ne Yesu mor kod chuny mokuwe. In bende ibiro winjo kamano ka itimo kinda ma ichopo gomboni mar bedo jakony-tich.
Hera miherogo Jehova kod gombo ma in-go mar konyo jomamoko biro chwali mondo itim duto minyalo e konyo kanyakla (Ne paragraf mar 11) a
12. Ang’o momiyo ok onego wapar ni onge gima wanyalo konyogo kanyakla?
12 Ka po ni ineno ni ionge kido moro ma dwarore mondo ibed jakony-tich, kik chunyi nyosre. Par ni pod in gi kido mamoko mabeyo ma nyalo konyo e kanyakla. Weche ma Jaote Paulo nowacho e 1 Jo-Korintho 12:12-30 nyalo konyi ahinya. Wechego nyiso maler ni mana kaka jotich Jehova mamoko, in bende nitie kama imako e kanyakla. Ka po ni gie sani pod ok inyal chopo kido ma dwarore mondo ibed jakony-tich, kik chunyi jogi. Kar mano, inyalo timo duto minyalo e tij Jehova mondo ikony Jokristo weteni. Bed gadier ni jodong-kanyakla biro nono nyalo ma in-go sama gimiyi migepe mowinjore kodi.—Rumi 12:4-8.
13. Be jokony-tich kende e ma onego obed gi kido ma dwarore ni jotich Nyasaye obedgo? Ler ane.
13 Ne ane gima chielo monego ojiwi mondo ibed jakony-tich: Thoth kido ma dwarore ni jokony-tich obedgo, e kido ma bende dwarore ni Jokristo duto obedgo. Kuom adier, Jokristo duto onego osud machiegni gi Jehova, gibed jochiwo, kendo giket ranyisi maber e ngimagi. Gin ang’o sie ma owete nyalo timo mondo gibed jokony-tich?
GIK MINYALO TIMO MONDO IBED JAKONY-TICH
14. Bedo ng’at ma “kawo weche e yo mapek” tiende en ang’o? (1 Timotheo 3:8-10, 12)
14 Wane ane moko kuom gik ma dwarore ni jokony-tich obedgo kaka oler e 1 Timotheo 3:8-10, 12. (Som.) Jakony-tich onego obed ng’ama “kawo weche e yo mapek.” Wechego bende inyalo lok ni “ng’at ma ji omiyo luor.” Mano ok nyis ni koro kinde duto ibed ng’at mongino kata ma ok nyier. (Ekl. 3:1, 4) Kar kamano, onego ikaw migepegi duto e yo mapek. Ka po ni ing’eri kaka ng’at migeno, jo kanyakla biro miyi luor.
15. Ere kaka ng’ato nyalo nyiso ni ok en “gi lep ariyo” kendo ni ok “oowore gi yudo ohala e yor mibadhi”?
15 “Kik gibed gi lep ariyo.” Mano tiende ni ng’at ma dwaro bedo jakony-tich nyaka bed jaratiro, ng’at ma wacho adiera, kendo minyalo gen. En ng’at ma timo kaka owacho kendo ok owuond jowetene. (Nge. 3:32) Bende, kik obed ng’at ma “oowore gi yudo ohala e yor mibadhi,” tiende ni onego obed jaratiro e weche mag ohala kod pesa. Ok obi tiyo gi winjruok maber ma en-go gi Jokristo wetene e loso pesa.
16. (a) Bedo ng’at ma ok madh “divai mang’eny” tiende en ang’o? (b) Bedo ng’at ma nigi “chuny maler ma ok [ketne] bura” tiende en ang’o?
16 “Kik gibed jo ma madho divai mang’eny.” Mano nyiso ni owadwa ma dwaro bedo jakony-tich ok onego obed jamer kata ng’at mong’ere ni ohero kong’o. Onego obed “gi chuny maler ma ok [ketne] bura,” tiende ni odag ka luwore gi chike makare mag Jehova. Kata obedo ni ok in ng’at makare chuth, pod ibiro bedo gi chuny mokuwe nikech in gi winjruok maber gi Nyasaye.
17. Ere kaka owadwa nyalo nyiso ni en ng’at minyalo gen sama ‘iteme mondo one ka oromo’? (1 Timotheo 3:10; ne picha bende.)
17 Onego ‘okwong oteme mondo one ka oromo,’ tiende ni onon ka be en ng’at minyalo gen gi migepe momedore. Omiyo, sama jodongo omiyi migawo moro, tem luwo adimba gik ma ginyisi kod paro ma riwruogwa osechiwo ma tayo migawono. Ne ni ing’eyo maber gik ma dwarore e migawono kod kinde ma dwarore mondo itieke. Sama itimo migawo e yo maber, jomamoko e kanyakla biro fwenyo mano kendo gibiro bedo mamor gi dongruok mitimo. Un jodong-kanyakla, beduru akicha mondo ufweny owete mosebatisi minyalo tieg ne migepe momedore. (Som 1 Timotheo 3:10.) Be nitie owete mosebatisi e kanyaklau ma gin johigni apar gi wiye? Be giketo ranyisi maber e timo puonjruokgi giwegi? Be gichiwoga paro e chokruoge kendo lendo gi kinda? Ka en kamano, migiuru migepe mowinjre gi hikgi kod chalgi. Kuom timo kamano, ‘utemogi mondo une ka giromo.’ Kae to sama gihawo higni piero ariyo, ginyalo bedo jokony-tich.
Jodongo nyalo miyo owete mosebatisi migepe moko mondo ‘gitemgi kendo gine ka be giromo’ (Ne paragraf mar 17)
18. Bedo ng’at ma ‘onge wach moro minyalo donjnego’ tiende en ang’o?
18 “Onge wach moro minyalo donjnegigo.” Mano tiende ni jakony-tich onego obed ma onge ketho moro amora maduong’ minyalo donjnego. En adier ni nitie kinde minyalo hang ne Jakristo wach. Gima kamano notimore ne Yesu nyading’eny, kendo nokoro ni jolupne bende ne idhi timnegi kamano. (Joh. 15:20) Kata kamano, ka idhi nyime bedo gi timbe maler mana kaka Yesu, mano biro miyo ibed gi nying maber e kanyakla.—Mat. 11:19.
19. Bedo “chwor dhako achiel” tiende en ang’o?
19 “Chwor dhako achiel.” Ka isekendo, mano nyiso ni nyaka idag ka luwore gi chike ma Jehova oketo ne joma okendore, tiende ni dichwo achiel gi dhako achiel. (Mat. 19:3-9) Dichwo mosekendo ok onego oterre gi dhako machielo. (Hib. 13:4) E wi mano, onego imakri gi jaodi kendo kik iyie gombo maricho odong e chunyi.—Ayub 31:1.
20. Ere kaka dichwo nyalo “tayo ode e yo maber”?
20 ‘Otayo nyithinde kod ode e yo maber.’ Ka in wi ot, nyaka ikaw migawono e yo mapek. Bed gi chenro mar tayo lamo mar joot juma ka juma. Lend gi joodi nyading’eny kaka nyalore. Kony nyithindi obed gi winjruok maber gi Jehova. (Efe. 6:4) Dichwo ma tayo ode e yo maber, nyalo tayo kanyakla bende.—Pim gi 1 Timotheo 3:5.
21. Ka pok ibedo jakony-tich, en ang’o minyalo timo mondo ichop e migawono?
21 Un owete, ka pok ubedo jokony-tich, nonuru weche ma wasewuoyegi e yo matut, kendo ukwa Jehova e lamo mondo okonyu. Non kido ma dwarore ni jokony-tich obedgo kendo itim matek mondo ibed gi kidogo. Par matut e wi hera miherogo Jehova kod Jokristo weteni. Bed gi gombo mar tiyonegi. (1 Pet. 4:8, 10) Bed mamor sama ikonyo owete gi nyimineni. Mad Jehova oguedh kinda duto mitimo mondo ibed jakony-tich!—Fil. 2:13.
WER 17 “Ee, Adwaro”
a WECHE MA LERO PICHA: Koracham, Yesu obolore kendo okonyo jomamoko; korachwich, jakony-tich moro konyo owadwa moro ma hike oniang’ e kanyakla.
